Ha ka jingpdiang ia ka jingjop ba iadei bad ka jingtei bad kyntiew ia ki jingdon jingem ha ka ioh ka kot, ka Myntri Sorkar Pdeng ba dei khmih ia ka Tnat Kam Pla Tyngka, ka Nirmala Sitharaman ha ka jingwanrah ia ka Mang tyngka jong u snem 2024-25 ha iing dorbar thawain Parliament mynta ka sngi ka la pynbna ia ka jingbuh T. 11,11,111 klur na ka bynta ka jingpynlut pisa. Kan long 3.4 per cent jong ka GDP jong ka ri. Ka Myntri Kam Pla tyngka ka la ong ba ka sorkar kan trei borbah ban pynneh ia ka jingkyrshan kaba khlain na ka bynta ki jingdon jingem ha ki 5 snem ban wan.

Ban pynshlur ia ki jylla ban ai kajuh ka jingkyrshan na ka bynta ki jingdon jingem, ka Myntri Kam Pla Tyngka, Nirmala Sitharaman ka la pynbna ka jingbuh pisa kaba T. 1.5 lak klur na ka bynta ki ram ha ka sut kaba jrong samoi mynta u snem. Kane kan kyrshan ia ki jylla ha ka jingmang jong ki na ka bynta ki jingdon jingem.

Haba kren shaphang ka jingkyntiew ia ka jingbei tyngka ki kynhun shimet ha ki jingdon jingem, ka Sitharaman ka la ong ba ka jingbei tyngka ha ki jingdon jingem da ki kynhun shimet yn kyntiew lyngba ka viability gap funding bad ka jingplie lad ia ki polisi bad ki kyndon. Ka la ong ba yn wanrah ia ka rukom bei tyngka katkum ka iew.

Ban pynbiang ki lad jingpyniasoh kiba iahap baroh shi aiom sha ki 25,000 tylli ki shnong kiba la bun ka jingdon bun, ka Myntri kam pla tyngka ka la tyrwa ban plie paidbah ia ka Bynta ba IV jong ka Pradhan Mantri Gram SadakYojana (PMGSY).

Ha ka jingkren jong ka ba iadei bad ka Mang Tyngka, ka Sitharaman ka la phaikhmat ruh sha ka jingwanrah ia ki jingdon jingem ban pynbiang um sha ki jaka rep bad ka jingiada na ka jingshlei um. Ka la pynbna ia ka jingkyrshan pisa bad jingiarap ia bun ki jylla kiba shah ktah ha ki jingshlei um bad ki jingtwa khyndew.

Haba kren shaphang ki jingjia shlei um ba man ka por ha Bihar, ka Myntri Kam pla tyngka ka la pynbna ka jingkyrshan pisa na ka bynta ki projek kiba kot sha ka T. 11,500 klur kum ka Kosi-Mechi intra-state link bad 20 tylli kiwei ki projek ba dang pyntrei bad ki skkhim ba thymmai kynthup ki projek kiba iadei bad ki lieng, ka jingpynduna ia ka jingpynjakhlia ia ki jaka shong um bad ki projek kiba iadei bad ka jingpynpoi um sha ki jaka rep. Shuh shuh, ka la ong ba yn sa sdang ia ka jingjurip bad jingtohkit ia ka Kosi ba iadei bad ka jingpynduna ia ka jingshlei um bad ki projek pynpoi um sha ki jaka rep.

Ka Sitharaman ka la pdiang ruh ia ki jingjia shlei um ba man ka por ha Assam namar ka wah Brahmaputra bad ki wah duit jong ka, ba ka tyllong kalong na shabar ka ri India. “Ngin ai jingiarap ia ka Assam ban iada na ka jingshlei um bad ki projek ba iadei bad kane,” ka la bynrap.

Shuh shuh, haba kren shaphang ki jingduhnong kiba khraw jong ka jylla Himachal Pradesh bad Uttarakhand namar ki jingshlei um, ka jingther u slap bad ki jingtwa khyndew ba jur, ka Myntri Kam Pla tyngka ka la ong ba ka sorkar kan ai jingiarap sha ki jylla na ka bynta ki jingtei biang bad ka jingai jaka sah. Haba phai sha ki jingjot namar ki jingshlei um bad ki jingtwa khyndew ha Sikkim, ka la pynbna ka jingiarap ruh sha ka jylla Sikkim.

*****