শেন্মিৎলোন্দা ইনফ্রাস্ত্রকচর শেমগৎনবা অমসুং ফগৎনবগীদমক মপাঙ্গল লৈবা মলতিপ্লাইয়রগী শাফুগী তঙাইফদবা লৈরিবা য়েংলদুনা কেন্দ্রগী শেলথুম অমসুং কোর্পোরেত এফিয়র্স মন্ত্রী শ্রীমতি নির্মলা সিতারমন্না ঙসি পার্লিয়ামেন্ততা বজেত ২০২৪-২৫ লান্থোকপদা কেপিতেল এক্সপেন্দিচরগীদমক লুপা করোর ১১,১১,১১১গী অয়াবা লাউথোকখ্রে। মসি লৈবাক অসিগী জি.দি.পি.গী চাদা ৩.৪ ওইগনি। শেলথুম মন্ত্রী অসিনা হায়খি মদুদি লৈঙাক অসিনা মথংগী চহি ৫ অসিদা ইনফ্রাস্ত্রকচরগীদমক মপাঙ্গল লৈবা ফিস্কাল সপ্পোর্ত পীগনি হায়খি।

রাজ্যশিংদা ইনফ্রাস্ত্রকচরগীদমক অসিগুম্বা অচৌবা মতেং অসি শৌগৎনবগীদমক শেলথুম মন্ত্রী শ্রীমতি সিতারমন্না চহি অসিগী ওইনা লোং-তার্ম ইন্তরেস্ত ফ্রী লোনগীদমক লুপা করোর লাখ ১.৫কী অয়াবা পীখ্রে। মসিনা রাজ্যশিংদা ইনফ্রাস্ত্রকচরগী রিসোর্স এলোকেসন তৌবদা মতেং ওইগনি।

ইনফ্রাস্ত্রকচরদা প্রাইবেত ইনভেস্তমেন্ত হেনগৎনবগী মতাংদা ফোংদোক্লদুনা শ্রীমতি সিতারমন্না হায়খি মদুদি প্রাইবেত সেক্তরনা ইনফ্রাস্ত্রকচরদা ইনভেস্ত তৌবদা ভাইএবিলিতী গেপ ফন্দিংগী খুত্থাংদা অমসুং পোলিসে অমসুং রিগুলেসন য়াহন্দুনা পুক্নিং  থৌগৎকনি। মার্কেত্তা য়ুম্ফম ওইবা ফাইনান্সিং ফ্রেমৱার্কসু পুখৎকনি হায়না মহাক্না ফোঙদোকখি।

মীশিং য়ামখৎলকপগী মতুং ইন্না য়েংবদা য়ারবা খুঙ্গংগী মফম ২৫০০০ দা কুম পুম্নমক চৎনবা য়াবা লম্বী থোং শেম্নবগীদমক প্রধান মন্ত্রী গ্রাম সরক য়োজনা (পি.এম.জি.এস.ৱাই)গী তাংকক IV হৌদোক্নবা শেলথুম মন্ত্রীনা পুখৎকখি। শ্রীমতি সিতারমনা মহাক্কী বজেত ৱারোলদা, ঈথৈ লৌখোঙ অমসুং ঈচাউ য়েংশিন্নবগী ইনফ্রাস্ত্রকচর শেম্বদা মীৎয়েং থমখি। মহাক্না ঈচাউ অমসুং চীং নীংখাইবনা শোকহল্লবা তোঙান-তোঙানবা রাজ্যশিংদা শেলগী তেংবাং অমসুং মতেং পীনবগীদমক লাউথোকখি।

বিহারদা তোইনা ঈচাউ থোকপগী মতাংদা পল্লদুনা শেল থুম মন্ত্রীনা কোসি-মেচি স্তেত লিঙ্ক অমসুং অতৈ হৌজিক চত্থরিবা অমসুং বেরেজ, তুরেল মোৎশিনবা হিংবা অমসুং ঈথৈ লৌখোঙগী প্রোজেক্তশিংগুম্বা লুপা করোর ১১,৫০০কী অচঙবা শেনফম লৈবা প্রোজেক্তশিংদা শেলগী তেংবাং লাউথোকখ্রে। মসিগী মথক্তা, মহাক্না হায়খি মদুদি কোসিগা মরী লৈনবা ঈচাউ থেংননবা অমসুং ঈথৈ লৌখোংগী প্রোজেক্তশিংগী সর্ভে অমসুং ইনভেস্তিগেসন চত্থগনি।

শ্রীমতি সিতারমন্না অসমদা ব্রহ্মপুত্র রুতেল অমসুং ভারতকী মপান্দগী লাকপা মসিগী মশাশিংনা ঈচাউ তোইনা থোকহনবগী মতাংদা পুখৎখি। "ঐখোয়না অসমদা ঈচাউ য়েংশিন্নবা অমসুং মসিগা মরী লৈনবা প্রোজেক্তশিংগীদমক মতেং পীগনি", হায়না মহাক্না হায়খি।

মখা তানা, হিমাচল প্রদেশ অমসুং উত্তরাখন্দদা ঈচাউ, ক্লাউদ বর্স্ত অমসুং চাউনা চীংমাই কিন্থবনা পাক চাউনা মাঙহন তাকহল্লিবসি য়েংদুনা শেলথুম মন্ত্রীনা হায়খি মদুদি লৈঙাক অসিনা রাজ্যশিং অসিদা নৌনা শেমগৎ শাগৎনবা অমসুং মশাগী ফিভমদা হঞ্জিলহন্নবগীদমক মতেং পীগনি। সিক্কিমদা পাক চাউনা ঈচাউ অমসুং চীংমাই কিন্থবা নংখিবনা পুরকখিবা অৱাবশিং য়েংদুনা মহাক্না সিক্কিম রাজ্যগীসু মতেং লাউথোকখি।

***