અર્થતંત્ર પર માળખાગત સુવિધાઓના નિર્માણ અને સુધારણાની મજબૂત ગુણક અસરને સ્વીકારીને કેન્દ્રીય નાણાં અને કોર્પોરેટ બાબતોના મંત્રી શ્રીમતી નિર્મલા સીતારમણે આજે સંસદમાં વર્ષ 2024-25નું બજેટ રજૂ કરતી વખતે  મૂડીગત ખર્ચ માટે રૂ. 11,11,111 કરોડની જોગવાઈ કરવાની જાહેરાત કરી. તે દેશના જીડીપીના 3.4 ટકા હશે. નાણાં મંત્રીએ જણાવ્યું હતું કે, સરકાર આગામી 5 વર્ષમાં માળખાગત સુવિધા માટે મજબૂત રાજકોષીય ટેકો જાળવવા પ્રયાસ કરશે.

રાજ્યોને ઈન્ફ્રાસ્ટ્રક્ચર માટે સમાન સ્કેલનો ટેકો પૂરો પાડવા માટે પ્રોત્સાહિત કરવા માટે, નાણાં મંત્રી શ્રીમતી નિર્મલા સીતારમણે  આ વર્ષે લાંબા ગાળાની વ્યાજ મુક્ત લોન માટે ₹ 1.5 લાખ કરોડની જોગવાઈની જાહેરાત કરી. આ રાજ્યોને ઇન્ફ્રાસ્ટ્રક્ચર માટે તેમના સંસાધનોની ફાળવણીમાં ટેકો આપશે.

માળખાગત સુવિધામાં ખાનગી રોકાણને પ્રોત્સાહન આપવા વિશે શ્રીમતી સીતારમણે જણાવ્યું હતું કે, ખાનગી ક્ષેત્ર દ્વારા માળખાગત સુવિધામાં રોકાણને વાયાબિલિટી ગેપ ફંડિંગ અને નીતિઓ અને નિયમનોને સક્ષમ બનાવીને પ્રોત્સાહન આપવામાં આવશે. તેમણે નોંધ્યું હતું કે, બજાર-આધારિત ધિરાણ માળખું બહાર પાડવામાં આવશે.

25,000 ગ્રામીણ વસાહતોને તેમની જનસંખ્યા વૃદ્ધિને ધ્યાનમાં રાખીને તમામ ઋતુમાં કનેક્ટિવિટી પ્રદાન કરવા માટે નાણાં મંત્રીએ પ્રધાનમંત્રી ગ્રામ સડક યોજના (પીએમજીએસવાય)નો ચોથો તબક્કો શરૂ કરવાની દરખાસ્ત રજૂ કરી.

શ્રીમતી સીતારમણે પોતાનાં બજેટ ભાષણમાં સિંચાઈ અને પૂરનાં વ્યવસ્થાપન માટે માળખાગત સુવિધાઓ ઊભી કરવા પર પણ ધ્યાન કેન્દ્રિત કર્યું હતું. તેમણે પૂર અને ભૂસ્ખલનથી પ્રભાવિત ઘણા રાજ્યો માટે આર્થિક સહાય અને સહાયતાની જાહેરાત કરી.

બિહારમાં અવારનવાર પૂરની ઘટનાઓની નોંધ લઈને નાણાં મંત્રીએ  કોસી-મેચી આંતર-રાજ્ય લિન્ક જેવી રૂ. 11,500 કરોડના અંદાજિત ખર્ચ સાથેની યોજનાઓ અને બેરેજ, નદીના પ્રદૂષણમાં ઘટાડો અને સિંચાઈ યોજનાઓ સહિત અન્ય 20 ચાલુ અને નવી યોજનાઓ માટે નાણાકીય સહાયની જાહેરાત કરી હતી. આ ઉપરાંત તેમણે જણાવ્યું હતું કે, કોસી સંબંધિત પૂર નિવારણ અને સિંચાઈ યોજનાઓનો સર્વે અને તપાસ હાથ ધરવામાં આવશે.

શ્રીમતી સીતારમણે બ્રહ્મપુત્રા નદી અને તેની સહાયક નદીઓ દ્વારા આસામમાં નિયમિતપણે પૂરની ઘટનાઓનો પણ સ્વીકાર કર્યો હતો, જે ભારતની બહારથી શરૂ થાય છે. તેમણે ભારપૂર્વક જણાવ્યું હતું કે, "અમે પૂરનાં વ્યવસ્થાપન અને સંબંધિત પ્રોજેક્ટ્સ માટે આસામને સહાય પ્રદાન કરીશું."

વધુમાં, પૂર, વાદળ ફાટવા અને મોટા પાયે ભૂસ્ખલનને કારણે હિમાચલ પ્રદેશ અને ઉત્તરાખંડને થયેલા વ્યાપક નુકસાનનો ઉલ્લેખ કરતાં નાણાં મંત્રી કહ્યું હતું કે સરકાર રાજ્યોને પુનર્નિર્માણ અને પુનર્વસન માટે સહાય પૂરી પાડશે. સિક્કિમમાં અચાનક આવેલા પૂર અને ભૂસ્ખલનને કારણે સર્જાયેલી તબાહીને ધ્યાનમાં રાખીને, તેમણે સિક્કિમ રાજ્યને પણ સહાયની જાહેરાત કરી હતી.

CB/GP/JD

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com