U Myntri Sorkar Pdeng ba dei khmih ia ka Tnat Information and Broadcasting, Ashwani Vaishnaw mynta ka sngi u la pynbna ba ka India kan pynlong ia ka World Audio Visual and Entertainment Summit, ka prokram kaba kongsan na ka bynta ka Media and Entertainment industry kylleng ka pyrthei, ka ban long ha Goa naduh ka 20-24 tarik Naiwieng. U Myntri u la pynbna ia kane ha ka jingialang plie ha New Delhi mynta ka sngi ryngkat bad u Myntri Rangbah jong ka Goa, Pramod Sawant bad u Myntri Khynnah jong ka sorkar pdeng ba dei khmih ia ka Tnat Information and Broadcasting Dr. L. Murugan.

Ha ka jingai jingkren ha ka jingialang, u Ashwini Vaishnaw u la ong, “ka media and entertainment (M&E) ka don hapdeng ka jingkylla bad la iohi ia ka jingpyndonkam ia ka teknoloji. Kane, ha kawei ka liang, ka la plie shibun ki lad ki lynti, hynrei ha kawei pat ka liang ka wanrah ia ki jingsngewkhia hapdeng katto katne ki nongiashim bynta ki bym shym la lah ban iaid ryngkat bad kane ka jingkylla. Ka bynta jong ka polisi mynta, ha kaba iadei bad ka thong jong u Myntri Rangbah duh, Narendra Modi, ka la iarap ban pyniasoh ia kaba bha tam na kane ka jingkylla kaba ryntih.” U la bynrap ba ka Sorkar ka kut jingmut ban kyrshan ia ka jinglong jingman baroh kawei ba iadei bad ka media and entertainment ban lah ban iaid ryngkat bad kane ka jingkylla.

Haba kren halor ki lad ki lynti bad ki sienjam ban kot sha ki thong jong ka, u Myntri u la ong ba ka jingphaikhmat jong ka Sorkar kalong ban plie ki lad ioh kam ha ka media and entertainment bad ban kyntiew ia ki sap. Ia kane yn pyntreikam lyngba ki sienjam kiba ryntih bad kiba katkum ka kyndon. Kine ki sienjam kin pynthikna ka jingwanrah ia ka jinglong jingman ka ban pynshlur ia ka content kaba bha, ka jingthaw bad iada ia ki hok IP ha ka ri bad kan pynlong ia ki ri ka pyrthei ban ithuh ia ka India kum ka lad kaba biang ban sdang ia ki jaka pynmih content jong ki.

U la bynrap ba kane ka jingpyrshang ka donkam ia ki jingiatreilang hapdeng ka kam M&E, ki kam kiba iadei bad ka pisa bad ka teknoloji. Kane kan wanrah ia ka jingdonkam ban pyrkhat bha ia ki polisi bad u myntri u pynpaw ka jingkyrmen ba ha ki bnai ban wan ka sorkar bad ki kam kin pyniasoh lang ia ki sienjam jong ki ban kot sha kane ka thong.

U Myntri u la ong shuh shuh ba ka WAVES bad ka IFFI kin thaw ia ki bynta bapher bapher jong kajuh ka bynta bad ba ka WAVES Summit kan long ka input,  katba ka International Film Festival of India (IFFI) kadei ka output. U la bynrap ba ka jingpyniasohlang ia ka input bad output kan pynlong ia ka Goa kum ka jaka pdeng na ka bynta ka jingsaindur bad ka sap, ka ban pynskhem ia ka kyrdan jong ka kum ka jaka pdeng jong ki jingsaindur thymmai bad ki jingpyni ia ki jingmut jingpyrkhat. U la pynpaw shuh shuh ka jingsngewnguh ia u Myntri Rangbah jong ka Goa ban pynlong ia ka WAVES 2024 ryngkat bad ka IFFI khnang ba baroh ki kam ki iahap lang.

U Myntri ryngkat bad kiwei kiwei ki kynrem ki lyndan ki la pyllait ia ka website jong ka WAVES 2024 ( https://wavesindia.org/ ) bad pyllait ia ka kot lyngkdop jong ka summit.

U Myntri Rangbah jong ka Goa, u Pramod Sawant u la ong ba katba ka IFFI ka la dei ka dak jong ka jingtbit ha ki kam cinema, ka WAVES kan wanrah ia ka bynta ba thymmaii jong ka jingiatreilang ka industry da kaba phaikhmat sha ka kam M&E ka ban dang kiew. U la ong ba ki artylli ki prokram kin wanrah ka lad ban jam sha ka lawei kaba bun ki lad ki lynti. Da kaba ong ba ka WAVS kan kyntiew shuh shuh ia ka Goa kum ka jaka pdeng ba iadei bad ka deiriti, u la khot sngewbha ia ka kam M&E ban wan sha Goa da ka mynsiem jong ka jingsaindur thymmai bad ka jingiatreilang.

U Myntri Khynnah jong ka Sorkar Pdeng, Dr. L. Murugan u la ong ba ka WAVES 2024 kan pynurlong ia ka thong jong u Myntri Rangbah duh, Narendra Modi ban wanrah ia ki nongialam na kylleng ka pyrthei kiba dei na ka M&E industry sha India. U la bynrap ba ka Summit kan plie ka rynsan ban pynshlur ia kito ha ka ri kiba la pyntbit ha kane ka kam.

U Secretary Sanjay Jaju u la ong ba ka summit ka thmu ban wanrah ia ka world class M&E summit: “ka jingthmu jong ka sienjam kalong ban pynkhlain ia ka bor ba jem jong ka India kum ka India kaba kiew ha ka ioh ka kot. La khmih lynti ba ka Summit kan wanrah ia ki jinglong jingman ba thymmai ha ka jingsaindur.” U la ong ba ka summit kan pynkhreh ban kot sha ki thong ban wanrah ka jingkiew shaphrang ha ki kam saindur thymmai bad ki kam teknoloji, ka jingkyntiew ia ki kam jong ngi ba kin lah ban iaryngkat kyrdan bad ka pyrthei, ka jingpynkhlain ia ki jingiatreilang, wanrah ia kajingbei tyngka, kyntiew ia ka sap, pynbun ia ki jait content bad kyntiew ia ka roi ka par kaba iaineh.

U Secretary u la pyntip shaphang ki lad ki lynti ba ka summit kan pyndonkam bad ong ba ka Content Production and Innovation, Animation, VFX, Gaming & Music bad ka Intellectual Property (IP) Creation kin long kiba kongsan.

Ka WAVES ka thmu ban long ka kynhun kaba hakhmat tam, ka jingiatreilang ha ka khaii pateng bad ka jingsaindur thymmai hapoh ka jinglong jingman M&E ba dang kylla. Ka Summit kan wanrah lang ia ki nongialam jong ka industry, kito kiba don bynta ha kane ka kam, bad ki nongsaindur thymmai ban wad ia ki lad ki lynti, ban weng ia ki jingeh, ban khring ia ki kam khaii pateng sha India, bad saindur ia ka lawei jong kane ka kam.

Lyngba ka thong ban kyntiew ia ka India kum ka bor kaba khlain ha ki kam M&E, ka WAVES ka thmu ban buh ia ki kyndon ba thymmai ba iadei bad ka jingsaindur, bad ka bor ha kylleng ka pyrthei. Ka thong kalong ban pynkupbor ia ki nongialam  jong ka M&E ha kylleng ka pyrthei da ki lad bei tyngka lyngba ka rynsan jong ka WAVES.

Ha kane ka jingialang la iadonlang u Chairperson jong ka TRAI, Anil Kumar Lohati bad u Chief Secretary Goa, Puneet Kumar Goel. Ki Nongrah ktien bad ki dkhot na ki Mission bapher bapher nabar ri.

Ha ka jingialang plie, la sakhi ia ka jingpyllait ia ka logo jong ka WAVES, ka Website, bad ka kot lyngkdop bud pat sa ka jingialang CEO. Ha ka jingialang la sakhi jan 60 tylli ki kynhun, ki seng, ki kynhun na ka industry ba mihkhmat da 80 ngut ki manager na ki kynhun media ba pawkhmat, kynthup ka Broadcasting, AVGC, Digital Media, bad kiwei kiwei.

Yn pynlong ia ka WAVES naduh ka 20 haduh 24 tarik Naiwieng, 2024 ha Goa, India ha kaba la kular ba kan long ka jingialang ba kongsan ha ka M&E industry.

****