مرکزی وزیر اطلاعات و نشریات جناب اشونی ویشنو نے آج اعلان کیا کہ بھارت 20  تا 24 نومبر2024 کے دوران گوا میں ورلڈ آڈیو ویژوئل اینڈ انٹرٹینمنٹ سمٹ کی میزبانی کرے گا جو دنیا بھر میں میڈیا اور انٹرٹینمنٹ انڈسٹری کے لیے ایک تاریخی پروگرام ہے۔ وزیر موصوف نے آج نئی دہلی میں گوا کے وزیر اعلی جناب پرمود ساونت اور مرکزی وزیر مملکت برائے اطلاعات و نشریات ڈاکٹر ایل موروگن کے ساتھ پردہ کشائی کی تقریب میں یہ اعلان کیا۔

اس موقع پر حاضرین سے خطاب کرتے ہوئے جناب اشونی ویشنو نے کہا کہ میڈیا اور انٹرٹینمنٹ (ایم اینڈ ای) کی دنیا ایک ساختی تبدیلی سے گزر رہی ہے اور اس میں زبردست ٹکنالوجی کی سرمایہ کاری دیکھی گئی ہے۔ اس نے ایک طرف تو بہت سے مواقع کھولے ہیں، لیکن دوسری طرف، کچھ شرکاء میں تشویش بھی پیدا کی ہے جو تبدیلی کو برقرار رکھنے کے قابل نہیں ہیں. وزیر اعظم جناب نریندر مودی کے وژن کے مطابق آج عوامی پالیسی کا کردار اس ساختی تبدیلی سے بہترین فائدہ اٹھانے کے قابل بنانا ہے۔ انھوں نے مزید کہا کہ حکومت اس تبدیلی کا مقابلہ کرنے میں میڈیا اور تفریح کے پورے ایکو سسٹم کی مدد کرنے کے لیے پرعزم ہے۔

اپنے اہداف کے حصول کے لیے مواقع اور بنیادی کوششوں پر بات کرتے ہوئے وزیر موصوف نے کہا کہ حکومت میڈیا اور تفریح کے شعبے میں روزگار پیدا کرنے اور ٹیلنٹ پائپ لائن کو بڑھانے پر توجہ مرکوز کر رہی ہے۔ اس پر ساختی اور طریقہ جاتی دونوں طرح کی کوششوں کے ذریعے عمل درآمد کیا جائے گا۔ یہ کوششیں ایک ایسے ایکو سسٹم کی تخلیق کو یقینی بنائیں گی جو اعلی معیار کے مواد کی حوصلہ افزائی کرے، ملک میں آئی پی حقوق کی تخلیق اور حفاظت کرے اور دنیا کو اپنے مواد کی تخلیق کے مراکز قائم کرنے کے لیے بھارت کو ایک قدرتی انتخاب کے طور پر تسلیم کرنے کا سبب بنے۔

انھوں نے مزید کہا کہ اس کوشش کے لیے ایم اینڈ ای انڈسٹری، مالیاتی شعبے اور ٹیکنالوجی کی دنیا کے درمیان قریبی مربوط کوششوں کی ضرورت ہوگی۔ اس کے لیے سوچی سمجھی پالیسی اقدامات کی ضرورت ہے اور وزیر موصوف نے امید ظاہر کی کہ آنے والے مہینوں میں حکومت اور صنعت اس مقصد کے لیے مل کر کوشش کریں گے۔

وزیر نے مزید کہا کہ ویوز اور افی ایک ہی سپیکٹرم کے مختلف حصے تشکیل دیں گے اور ویوز سمٹ ان پٹ کی نمائندگی کرے گی جبکہ انٹرنیشنل فلم فیسٹیول آف انڈیا (افی) اس کا آؤٹ پٹ ہے۔ انھوں نے مزید کہا کہ ان پٹ اور آؤٹ پٹ کی ہم آہنگی گوا کو تخلیقی صلاحیتوں اور لیاقتوں کے لیے ایک بڑے مرکز کے طور پر قائم کرے گی ، جس سے جدت طرازی اور فنکارانہ اظہار کے لیے ایک مشعل کے طور پر اس کی حیثیت مستحکم ہوگی۔ انھوں نے افی کے ساتھ ویوز 2024 کی میزبانی کرنے پر گوا کے وزیر اعلی ٰ کا شکریہ ادا کیا کہ اسپیکٹرم کے دونوں سرے ایک ساتھ آئے۔

وزیر موصوف نے دیگر معززین کے ساتھ ویوز 2024 (https://wavesindia.org/) کی ویب سائٹ کا افتتاح کیا اور سمٹ کے بروشر کی نقاب کشائی کی۔

گوا کے وزیر اعلی ٰ جناب پرمود ساونت نے کہا کہ جہاں آئی ایف ایف آئی طویل عرصے سے سنیما کی بہترین کارکردگی کا مینار رہا ہے، وہیں ویوز ابھرتے ہوئے ایم اینڈ ای سیکٹر پر توجہ مرکوز کرتے ہوئے صنعتی تعاون کی ایک نئی جہت متعارف کرائے گی۔ انھوں نے کہا کہ دونوں ایونٹس مل کر بے مثال مواقع کے مستقبل میں جست لگانے کا موقع فراہم کریں گے۔ یہ کہتے ہوئے کہ ویوز گوا کو ایک ثقافتی مرکز کے طور پر مزید قائم کرے گی ، انھوں نے ایم اینڈ ای صنعت کو جدت طرازی اور تعاون کے جذبے کے ساتھ گوا آنے کی دعوت دی۔

مرکزی وزیر مملکت ڈاکٹر ایل موروگن نے کہا کہ ویوز 2024 وزیر اعظم جناب نریندر مودی کے ایم اینڈ ای صنعت کے عالمی رہنماؤں کو بھارت لانے کے وژن کو زندہ کرے گا۔ انھوں نے مزید کہا کہ سمٹ اس شعبے سے ملک کی ہنرمند افرادی قوت کی حوصلہ افزائی کے لیے ایک پلیٹ فارم تخلیق کرے گی۔

سکریٹری جناب سنجے جاجو نے کہا کہ سمٹ کا مقصد عالمی سطح کا ایم اینڈ ای سمٹ بنانا ہے: ’’اس اقدام کا مقصد بھارت کی سافٹ پاور کو فروغ دینا ہے کیونکہ بھارت اقتصادی طور پر ترقی کر رہا ہے۔ توقع ہے کہ سمٹ تخلیقی صلاحیتوں، جدت طرازی اور اثر و رسوخ میں نئے معیار قائم کرے گی۔ انھوں نے کہا کہ یہ سمٹ جدت طرازی اور تکنیکی ترقی کو فروغ دینے، ہماری صنعت کی عالمی مسابقت کو بڑھانے، صنعتی تعاون کو مضبوط بنانے، سرمایہ کاری کو راغب کرنے، ہنرمندی کی ترقی کو فروغ دینے، مواد کے تنوع کی حوصلہ افزائی اور پائیدار ترقی کے فروغ کے مقاصد کو حاصل کرے گی۔‘‘

وزیر خارجہ نے سمٹ میں موجود مواقع کے بارے میں آگاہ کیا اور کہا کہ کنٹینٹ پروڈکشن اینڈ انوویشن، اینیمیشن، وی ایف ایکس اور گیمنگ اور آخر میں میوزک اینڈ انٹلیکچوئل پراپرٹی (آئی پی) تخلیق اس کا محور بنے گی۔

ویوز کا مقصد ایک اہم فورم بننا ہے، جو ترقی پذیر ایم اینڈ ای صنعت کے منظر نامے میں مکالمے، تجارتی تعاون اور جدت طرازی کو فروغ دیتا ہے۔ سمٹ میں صنعت کے رہنماؤں، اسٹیک ہولڈروں اور جدت طرازوں کو مواقع تلاش کرنے، چیلنجوں سے نمٹنے، بھارت میں تجارت کو راغب کرنے اور اس شعبے کے مستقبل کو تشکیل دینے کے لیے اکٹھا کیا جائے گا۔

متحرک ایم اینڈ ای منظر نامے میں بھارت کو ایک بے مثال عالمی پاور ہاؤس کے طور پر پیش کرنے کے وژن کے ساتھ ، ویوز کا مقصد دنیا بھر میں تخلیقی صلاحیتوں ، جدت طرازی اور اثر و رسوخ کے نئے معیار قائم کرنا ہے۔ اس مشن کا مقصد ویوز کے پریمیئر پلیٹ فارم کے ذریعے عالمی ایم اینڈ ای رہنماؤں کو خصوصی سرمایہ کاری کے مواقع کے ساتھ بااختیار بنانا ہے۔

اس تقریب میں ٹرائی کے چیئر پرسن جناب انل کمار لوہٹی اور گوا کے چیف سکریٹری جناب پونیت کمار گوئل نے شرکت کی۔ اس موقع پر مختلف غیر ملکی مشنز کے سفیر اور سفارتی نمائندے بھی موجود تھے۔

اس تقریب نقاب کشائی میں ویوز لوگو ، ویب سائٹ اور بروشر کا اجراء عمل میں آیا، اس کے بعد سی ای او گول میز اجلاس کا آغاز ہوا۔ گول میز اجلاس میں تقریبا 60 تنظیموں، ایسوسی ایشنز، صنعتی اداروں کی نمائندگی براڈکاسٹنگ، اے وی جی سی، ڈیجیٹل میڈیا وغیرہ سمیت مختلف شعبوں سے تعلق رکھنے والے معروف میڈیا اداروں کے 80 اعلیٰ مینیجرز نے کی۔

ویوز 20 سے 24 نومبر، 2024 کے دوران گوا، بھارت میں منعقد کیا جائے گا، جو ایم اینڈ ای انڈسٹری کیلنڈر میں ایک تاریخ ساز واقعہ بننے جارہاہے۔

***

(ش ح – ع ا – ع ر)

U.No. 8305