ଶ୍ରୀ ଭୁପେନ୍ଦର ଯାଦବ ଆଜି ୧୧ ଜୁନ୍ ୨୦୨୪ରେ କେନ୍ଦ୍ର ପରିବେଶ, ଜଙ୍ଗଲ ଏବଂ ଜଳବାୟୁ ପରିବର୍ତ୍ତନ (ଏମ୍‌ଓଇଏଫ୍‌ଆଣ୍ଡ୍‌ସିସି) ମନ୍ତ୍ରୀ ଭାବରେ ଦାୟିତ୍ୱ ଗ୍ରହଣ କରିଛନ୍ତି । ପରିବେଶ ଭବନରେ ସଚିବ ଶ୍ରୀମତି ଲୀନା ନନ୍ଦନ ଏବଂ ଅନ୍ୟ ବରିଷ୍ଠ ଅଧିକାରୀମାନେ ତାଙ୍କୁ ସ୍ୱାଗତ କରିଥିଲେ । ଶ୍ରୀ କୀର୍ତ୍ତୀବର୍ଦ୍ଧନ ସିଂ ମଧ୍ୟ ରାଜ୍ୟ ମନ୍ତ୍ରୀ ଭାବରେ ଦାୟିତ୍ୱ ଗ୍ରହଣ କରିଛନ୍ତି ।

ଦାୟିତ୍ୱ ଗ୍ରହଣ କରିବା ପରେ ଗଣମାଧ୍ୟମକୁ ସୂଚନା ଦେଇ କେନ୍ଦ୍ର ମନ୍ତ୍ରୀ ତାଙ୍କୁ ଏହି ସୁଯୋଗ ଦେଇଥିବାରୁ ମାନ୍ୟବର ପ୍ରଧାନମନ୍ତ୍ରୀଙ୍କୁ ଧନ୍ୟବାଦ ଜଣାଇବା ସହ ମନ୍ତ୍ରଣାଳୟରେ ତାଙ୍କର ଦାୟିତ୍ୱ ଏବଂ କର୍ତ୍ତବ୍ୟ ତୁଲାଇବାକୁ ସେ ପ୍ରସ୍ତୁତ ଅଛନ୍ତି ବୋଲି କହିଥିଲେ । ଏହି ଅବସରରେ ସେ ତାଙ୍କର ସହକର୍ମୀ ରାଜ୍ୟ ମନ୍ତ୍ରୀ ଶ୍ରୀ କୀର୍ତ୍ତୀବର୍ଦ୍ଧନ ସିଂଙ୍କୁ ମଧ୍ୟ ସ୍ୱାଗତ କରିଥିଲେ । ବିଗତ ୧୦ ବର୍ଷ ମଧ୍ୟରେ ପ୍ରଧାନମନ୍ତ୍ରୀ ମୋଦୀଙ୍କ ନେତୃତ୍ୱରେ ମନ୍ତ୍ରଣାଳୟ ଦ୍ୱାରା ବିଭିନ୍ନ ପଦକ୍ଷେପ ନିଆଯାଇଛି ଏବଂ ସରକାର ପରିବେଶ ଓ ବିକାଶକୁ ଏକତ୍ର ନେଇ ଆଗକୁ ଅଗ୍ରଗତି କରୁଛନ୍ତି। ଆଗକୁ ମିଶନ୍ ଲାଇଫ - ପରିବେଶ ପାଇଁ ଜୀବନଶୈଳୀ ଭଳି ପଦକ୍ଷେପ ଉପରେ ଧ୍ୟାନ ଦିଆଯିବ । ସେ ଆହୁରିମଧ୍ୟ କରିଛନ୍ତି ଯେ, ବିଶ୍ୱସ୍ତରରେ ପରିବେଶ ସଂକଟ ଦେଖା ଦେଇଛି ଏବଂ ମାନ୍ୟବର ପ୍ରଧାନମନ୍ତ୍ରୀ ଗ୍ଲାସ୍‌ଗୋ ଜଳବାୟୁ ସମ୍ମିଳନୀ ୨୦୨୧ରେ ମିଶନ ଲାଇଫ୍ - ପରିବେଶ ପାଇଁ ଜୀବନଶୈଳୀ ଘୋଷଣା କରିଥିଲେ । ସେ କହିଛନ୍ତି ଯେ, ମିଶନ - ଲାଇଫ୍ ସକରାତ୍ମକ ବ୍ୟବହାର ପାଇଁ ଜନସାଧାରଣଙ୍କୁ ସଂଗଠିତ କରିବା ସହ ପରିବେଶ ଅନୁକୂଳ ସ୍ୱୟଂଚାଳିତ ଇକୋସିଷ୍ଟମ୍ ସୃଷ୍ଟି କରିବାରେ ସହାୟକ ହେବ । ଅନୁଚିତ ବ୍ୟବହାର ଅପେକ୍ଷା ଉଚିତ ବ୍ୟବହାରକୁ ଏହା ଗୁରୁତ୍ୱ ଦିଏ ।

ମାନ୍ୟବର ମନ୍ତ୍ରୀ ଏହା ମଧ୍ୟ କହିଛନ୍ତି ଯେ, ପରିବେଶ ସଂରକ୍ଷଣ ଏବଂ ବିକାଶ ଏକା ଧାରାରେ ହୋଇପାରିବ ବୋଲି ସରକାର ବିଶ୍ୱାସ କରନ୍ତି । ବିଶ୍ୱସ୍ତରରେ ବୃଦ୍ଧି ପାଉଥିବା ତାପମାତ୍ରାର ମୁକାବିଲା କରିବା ପାଇଁ ମାନ୍ୟବର ପ୍ରଧାନମନ୍ତ୍ରୀ ଏକ ବୃକ୍ଷରୋପଣ ପଦକ୍ଷେପ “ଏକ ପେଡ୍ ମାଁ କେ ନାମ୍‌” ମଧ୍ୟ ଆରମ୍ଭ କରିଛନ୍ତି । ୨୦୨୪ରେ ପ୍ରଧାନମନ୍ତ୍ରୀଙ୍କ ଦ୍ୱାରା ବିଶ୍ୱ ପରିବେଶ ଦିବସ ଅବସରରେ ଆରମ୍ଭ ହୋଇଥିବା ଏହି ପଦକ୍ଷେପରେ ଅଂଶ ଗ୍ରହଣ କରିବାକୁ ସେ ଜନସାଧାରଣଙ୍କୁ ଆହ୍ୱାନ ଦେଇଛନ୍ତି । ଏହା ବୃଦ୍ଧି ପାଉଥିବା ତାପମାତ୍ରା, ମରୁସ୍ଥଳୀକରଣ ଏବଂ ଜୈବ ବିବିଧତା କ୍ଷେତ୍ରରେ ସମ୍ମୁଖୀନ ହେବାକୁ ଥିବା ଆହ୍ୱାନର ମୁକାବିଲା କରିବାରେ ସହାୟକ ହେବ ।

ଦାୟିତ୍ୱ ଗ୍ରହଣ କରିବା ପରେ ମନ୍ତ୍ରୀ ମନ୍ତ୍ରଣାଳୟର ବରିଷ୍ଠ ଅଧିକାରୀମାନଙ୍କ ସହ ଏକ ବୈଠକ ମଧ୍ୟ କରିଥିଲେ, ଯେଉଁଠାରେ ତାଙ୍କୁ ମନ୍ତ୍ରଣାଳୟର ପ୍ରମୁଖ ପଦକ୍ଷେପ ଏବଂ ନୀତି ସମ୍ପର୍କରେ ଅବଗତ କରାଯାଇଥିଲା ।

SR