পশ্চিম বংগৰ ৰাজ্যপাল চি ভি আনন্দবোসজী, মন্ত্ৰীসভাৰ মোৰ সহকৰ্মী নিশিথ প্ৰামানিকজী, জন বাৰ্লাজী, বিৰোধী দলৰ নেতা শুভেন্দু অধিকাৰীজী, সংসদৰ মোৰ সহকৰ্মী সুকান্ত মজুমদাৰজী, কুমাৰী দেৱশ্ৰী চৌধুৰীজী, খগেন মুৰ্মুজী, ৰাজু বিস্তাজী, ডঃ জয়ন্ত কুমাৰ ৰয়জী, বিধায়কসকল, অন্যান্য গণ্যমান্য মহিলা আৰু গণ্যমান্য ভদ্ৰলোকসকল।

প্ৰাকৃতিক সৌন্দৰ্য আৰু চাহৰ বাবে বিখ্যাত উত্তৰ বংগৰ এই ভূমিত উপস্থিত হবলৈ পোৱাটো মোৰ বাবে অতি আনন্দদায়ক কথা। আজি হাজাৰ হাজাৰ কোটি টকাৰ উন্নয়নমূলক প্ৰকল্প উদ্বোধন কৰা হৈছে আৰু আধাৰশিলা স্থাপন কৰা হৈছে। উন্নত বংগৰ দিশত ই আন এটা গুৰুত্বপূৰ্ণ পদক্ষেপ। এই উন্নয়নমূলক কামৰ বাবে মই বংগৰ জনসাধাৰণ, উত্তৰ বংগৰ জনসাধাৰণক অভিনন্দন জনাইছোঁ।

বন্ধুসকল,

প্ৰধানমন্ত্ৰীয়ে কয় যে পশ্চিম বংগৰ উত্তৰ অংশ উত্তৰ-পূবৰ প্ৰৱেশদ্বাৰ আৰু ই চুবুৰীয়া দেশসমূহৰ সৈতে বাণিজ্যৰ যোগসূত্ৰও স্থাপন কৰে। সেয়েহে, এই ১০ বছৰত বংগ আৰু ৰাজ্যখনৰ উত্তৰ বংগৰ উন্নয়নেই চৰকাৰৰ অগ্ৰাধিকাৰৰ বিযয় হৈ আহিছে। উত্তৰ বংগৰ দ্ৰুত বিকাশৰ বাবে, এই অঞ্চলটোৱে একবিংশ শতিকাৰ ৰেল আৰু পথ আন্তঃগাঁথনি নিৰ্মাণ কৰিব লাগিব। এই লক্ষ্যৰে আজি একলাখীৰ পৰা বালুৰঘাট, শিলিগুৰিৰ পৰা আলুয়াবাৰী আৰু ৰাণীনগৰ-জলপাইগুৰি-হলদিবাৰীৰ মাজত ৰে'লপথৰ বৈদ্যুতিকৰণৰ কাম সম্পূৰ্ণ হৈছে।ইয়াৰ ফলত উত্তৰ দিনাজপুৰ, দক্ষিণ দিনাজপুৰ, কোচবিহাৰ আৰু জলপাইগুৰিৰ দৰে জিলাত ৰে'লৰ গতি অধিক বৃদ্ধি পাব। শিলিগুৰি- শামুকতলা পথটো ইয়াৰ বৈদ্যুতিকৰণৰ বাবে চাৰিওফালৰ বনাঞ্চল আৰু বন্যপ্ৰাণী প্ৰদূষণৰ পৰা মুক্ত হব। আজি বৰছোই-ৰাধিকাপুৰ শাখাৰ বৈদ্যুতিকৰণো সম্পূৰ্ণ হৈছে। ই পশ্চিম বংগৰ লগতে বিহাৰৰ লোকসকলক উপকৃত কৰিব। ৰাধিকাপুৰ আৰু শিলিগুৰিৰ মাজত এখন নতুন ৰেল সেৱা আৰম্ভ হৈছে। বংগৰ এই শক্তিশালী ৰে'ল আন্তঃগাঁথনিয়ে ইয়াত উন্নয়নৰ নতুন সম্ভাৱনাক গতি প্ৰদান কৰিব, যাৰ ফলত সাধাৰণ জনসাধাৰণৰ জীৱন সুখকৰ হ'ব।

বন্ধুসকল,

এটা সময় আছিল যেতিয়া আমি উত্তৰ-পূৰ্বাঞ্চলৰ ফালে আগবাঢ়ি যোৱাৰ লগে লগে ৰেলৰ গতি হ্ৰাস পাইছিল। কিন্তু আমাৰ চৰকাৰৰ প্ৰয়াস হৈছে উত্তৰ বংগত ৰেলৰ গতি বৃদ্ধি কৰা যিদৰে সমগ্ৰ দেশতে বৃদ্ধি কৰা হৈছে। এতিয়া উত্তৰ বংগৰ পৰা বাংলাদেশলৈ ৰেল সংযোগো আৰম্ভ হৈছে। মিতালী এক্সপ্ৰেছ নিউ জলপাইগুৰিৰ পৰা ঢাকা সেনা ছাউনীলৈ চলি আছে। বাংলাদেশ চৰকাৰৰ সৈতে একেলগে আমি ৰাধিকাপুৰ ষ্টেচনলৈকে যোগাযোগ ব্যৱস্থা বৃদ্ধি কৰি আছো। এই নেটৱৰ্ক শক্তিশালী হোৱাৰ ফলত দুয়োখন দেশৰ অৰ্থনীতি আৰু অঞ্চলটোৰ পৰ্যটন যথেষ্ট বৃদ্ধি পাব।

বন্ধুসকল,

স্বাধীনতাৰ পিছত দীৰ্ঘদিন ধৰি পূৱ ভাৰতৰ বিকাশ আৰু ইয়াৰ স্বাৰ্থক উপেক্ষা কৰা হৈছিল। কিন্তু আমাৰ চৰকাৰে পূৱ ভাৰতক দেশৰ বিকাশৰ ইঞ্জিন হিচাপে গণ্য কৰে। সেয়েহে, এই অঞ্চলত যোগাযোগ ব্যৱস্থাৰ ক্ষেত্ৰত অভূতপূৰ্ব বিনিয়োগ হৈছে। ২০১৪ চনৰ আগতে, বংগৰ গড় ৰে'ল বাজেট আছিল প্ৰায় ৪ হাজাৰ কোটি টকা, ই এতিয়া প্ৰায় ১৪ হাজাৰ কোটি টকালৈ বৃদ্ধি হৈছে। আজি অৰ্ধ-উচ্চ গতিৰ বন্দে ভাৰত এক্সপ্ৰেছ উত্তৰ বংগৰ পৰা গুৱাহাটী আৰু হাওৰালৈ চলি আছে। অমৃত ভাৰত ষ্টেচন আঁচনিৰ অধীনত যি ৫০০তকৈও অধিক আধুনিক ষ্টেচন নিৰ্মাণ কৰা হৈছে, তাত আমাৰ শিলিগুৰি ষ্টেচনটো অন্তৰ্ভুক্ত হৈছে। এই ১০ বছৰত আমি ৰে'লৰ উন্নয়নক পেছেঞ্জাৰৰ পৰা এক্সপ্ৰেছ স্পীডলৈ লৈ গৈছোঁ আমাৰ তৃতীয় কাৰ্যকালত, ই চুপাৰফাষ্ট গতিত আগবাঢ়িব।

বন্ধুসকল,

আজি উত্তৰ বংগত ৩,০০০ কোটি টকাৰ অধিক মূল্যৰ দুটা পথ প্ৰকল্প উদ্বোধন কৰা হৈছে। ৪ লেনৰ ঘোষপুকুৰ-ধুপগুৰি শাখা আৰু ইছলামপুৰ বাইপাছে বহু জিলাৰ জনসাধাৰণক উপকৃত কৰিব। জলপাইগুৰি, শিলিগুৰি আৰু মাইনাগুৰি টাউনৰ দৰে নগৰীয়া অঞ্চলসমূহে যান-জঁটৰ সমস্যাৰ পৰা পৰিত্ৰাণ পাব। ইয়াৰ ফলত উত্তৰ-পূৰ্বাঞ্চলকে ধৰি উত্তৰ বংগৰ শিলিগুৰি, জলপাইগুৰি আৰু আলিপুৰদুৱাৰ জিলালৈ উন্নত পথ যোগাযোগ ব্যৱস্থা হ'ব। ইয়াৰ ফলত ডুআৰ্ছ, দাৰ্জিলিং, গেংটক আৰু মিৰিকৰ দৰে পৰ্যটনস্থলীত উপস্থিত হোৱাটো সহজ হ'ব। অৰ্থাৎ এই সমগ্ৰ অঞ্চলটোত পৰ্যটন বৃদ্ধি হ'ব, উদ্যোগো বৃদ্ধি পাব আৰু চাহ খেতিয়কসকলো লাভান্বিত হ'ব।

বন্ধুসকল,

কেন্দ্ৰীয় চৰকাৰে পশ্চিম বংগৰ উন্নয়নৰ বাবে সম্ভৱপৰ সকলো প্ৰচেষ্টা চলাই আছে। আকৌ এবাৰ, উন্নয়নমূলক প্ৰকল্পসমূহৰ বাবে মই আপোনালোক সকলোকে অভিনন্দন জনাইছো। বহুত ধন্যবাদ। এতিয়া ইয়াত এটা কাৰ্যসূচী সম্পূৰ্ণ হৈছে, কিন্তু মোৰ কথা ইয়াতেই সম্পূৰ্ণ হোৱা নাই, মোৰ কথা ভৱিষ্যতে হ'ব আৰু সেয়েহে এতিয়া আমি ইয়াৰ পৰা মুকলি খেলপথাৰলৈ যাম। আপোনালোক সকলোকে হেঁপাহ পলুৱাই চাম, হেঁপাহ পলুৱাই কথা পাতিম।

বহুত ধন্যবাদ!

**************

DS/ST/AV/KG