تعلیم اور ہنرمندی کی ترقی اور انٹرپرینیورشپ کے مرکزی وزیر جناب دھرمیندر پردھان نے کل پریکشا پہ چرچہ 2024 کی جاری تیاریوں کا جائزہ لیا۔

جناب پردھان نے اس بات پر روشنی ڈالی کہ پریکشا پہ چرچا ایک سالانہ روایت بن گئی ہے، جس کا امتحان دینے والے، والدین اور اساتذہ سبھی اپنی بے چینی پر قابو پانے اور بہترین کارکردگی کے ساتھ سامنے آنے کے منتظر ہیں۔

انہوں نے پی پی سی 2024 میں وزیر اعظم جناب نریندر مودی کے ساتھ سال کی سب سے زیادہ مطلوب بات چیت کے لیے سب کے درمیان جوش و خروش کا اظہار کیا۔

’’پریکشا پہ چرچا‘‘  (پی پی سی) ایک انوکھی پہل ہے، جس کی قیادت وزیر اعظم جناب نریندر مودی نے کی ہے تاکہ امتحانات سے وابستہ تناؤ کو دور کیا جاسکے اور ’ایگزام واریئرس‘ کی بڑی تحریک کے ساتھ ہم آہنگ زندگی کے تئیں جشن منانے کے انداز کو فروغ دیا جائے۔ محکمہ اسکولی تعلیم اور خواندگی، وزارت تعلیم کے زیر اہتمام پی پی سی نے گزشتہ چھ سالوں سے کامیابی کے ساتھ طلباء، والدین اور اساتذہ کو اس پروگرام میں شامل کیا ہے۔ کووڈ-19 کی وبا کی وجہ سے، چوتھا ایڈیشن آن لائن منعقد ہوا، جبکہ پانچواں اور چھٹا ایڈیشن ٹاؤن ہال فارمیٹ میں واپس آیا۔ پچھلے سال 31.24 لاکھ طلباء، 5.60 لاکھ اساتذہ، اور 1.95 لاکھ والدین نے اس پروگرام میں پرجوش شرکت کی۔

موجودہ 7 ویں ایڈیشن میں MyGov پورٹل پر 2.26 کروڑ رجسٹریشن ریکارڈ کی گئیں، جو ملک بھر کے طلباء میں وسیع پیمانے پر جوش و خروش کو نمایاں کرتی ہے۔ 29 جنوری 2024 کو شیڈول کردہ ٹاؤن ہال فارمیٹ، بھارت منڈپم، آئی ٹی پی او، پرگتی میدان، نئی دہلی، تقریباً 3000 شرکاء کی میزبانی کرے گا، جو وزیر اعظم کے ساتھ بات چیت کر رہے ہیں۔ ہر ریاست اور مرکز کے زیر انتظام علاقے سے دو طالب علموں اور ایک استاد کو، کلا اتسو کے فاتحین کے ساتھ مدعو کیا گیا ہے۔ ایکلوویہ ماڈل ریزیڈنشیل اسکولس (ای ایم آر ایس) کے سو طلبہ پہلی بار شرکت کریں گے۔

مائی جی او وی پورٹل پر 11 دسمبر 2023 سے 12 جنوری 2024 تک ایک آن لائن ایم سی کیو مقابلہ ہوا،جس کے تحت ان کے جمع کرائے گئے سوالات کی بنیاد پر شرکاء کا تعین کیا گیا۔ منتخب شرکاء کو پریکشا پہ چرچا کٹ ملے گی، جس میں وزیر اعظم کی طرف سے ’’ایگزام واریئرز‘‘ کتاب اور ایک سرٹیفکیٹ بھی شامل ہے۔

12 جنوری سے 23 جنوری 2024 تک، ملک بھر میں اسکول کی سطح پر مختلف سرگرمیوں کا انعقاد کیا گیا، جیسے میراتھن دوڑ، موسیقی اور میمے مقابلے، نکڑ ناٹک، اور طالب علم-اینکر-طالب علم-مہمان مباحث۔ 23 جنوری، 2024 کو، 774 اضلاع کے 657 کیندریہ ودیالیوں اور 122 نوودیا ودیالیوں میں ایک پینٹنگ مقابلہ منعقد کیا گیا، جس میں 60 ہزار سے زائد طلباء نے حصہ لیا، اس کا موضوع کتاب ’’ایگزام واریئرس‘‘ کے امتحانی منتروں کے گرد تھا۔

2.26 کروڑ رجسٹریشن کے ساتھ، 29 جنوری 2024 کو پریکشا پہ چرچا کا آنے والا 7 واں ایڈیشن، بہت زیادہ توقعات پیدا کر رہا ہے، جس سے امتحان کے دباؤ سے نمٹنے اور سیکھنے کے مثبت کلچر کو فروغ دینے میں ایونٹ کے کردار کو اجاگر کیا جا رہا ہے۔

******

ش  ح۔ ش ت ۔ م ر

U-NO. 4083