অযোধ্যা ধামদা শ্রী রাম মন্দির প্রান প্রাতিস্থা পাংথোকখিবগী মতাংদা ঙসি কেন্দ্রগী মন্ত্রীমন্দলনা ৱারেপ অমা লৌখ্রে।

ৱারেপশিংগী মপুংফাবা ৱারোল মখাদা পীরি:

• প্রধান মন্ত্রী, অহানবদা ঐখোয় অদোমগী লমজিং মখাদা মন্ত্রীমন্দলগী মেম্বরশিংনা অদোম থাগৎপা ফোঙদোকচরি অমসুং রামলালাগী মীতম ইকায়খুম্নবা উৎচরি।

• হৌখিবা চহি ৫০০ ভারত সভেত্যনা মঙ মঙদুনা লাক্লবা মঙলান অমা অদোম্না মঙফাওনহল্লে।

• প্রধান মন্ত্রী, ঙসিগী মন্ত্রীমন্দলগী ৱারেপ অসি পুৱারি ওইরবা ৱারেপনি।

• পুৱারি ওইরবা থবক কয়ারক পাংথোকপা য়াই, অদুবু বৃতিস মতমদা ভাইসরোইগী ইজিকিউতিপ কাউন্সিলগী মতম অদু হাপচিল্লবসু, কেবিনেত সিস্তেম হেক শেম্বা হৌখিবদগী অসিগুম্বা খুদোংচাবা অমতা কৈদৌঙৈদা ফংখিদ্রি।

• অদোম্না পাংথোকখিবা থবক অদুনা মরম ওইদুনা জনুৱারি ২২, ২০২৪ অসি পুৱারিদা তোপ-তোপ্পা অমা ওইরে।

• চহি চা কয়াগী মতুংদা খুদোংচাবা অসি লাকপা মরম্না মহাক অখন্নবা অমনি। লৈবাক অসিগী হকচাং ১৯৪৭ দা নিংতম্বা ফংখি হায়না ঐখোয়না হায়রি অমসুং হৌজিক লৈবাক অসিগী থৱায়গী ইকায়খুম্নবা ফংলে। মসিনা মীওই খুদিংমক্তা অধ্যাতিক্কী থৌজাল অমা ফংহল্লে।

• অদোমগী ৱারোলদা প্রভু রামনা ভারত্তা, লৈবাক অসিগী খোৎচত্তা, থৌশিলদা অমসুং মরাইবক্তা ইথিল পীখি হায়না ফোঙদোকখি।

• ঙসি ঐখোয়না হায়রিবা অসি রাজনিতিগী মীৎয়েং অমদগী নত্তে, অধ্যাতিক্কী মীৎয়েং অমদগী হায়বদা অদোম্না খল্লিবা পান্দম অসি প্রভু রামগী ইকায়খুম্নবা ঙাক্নবা, ভারতকী চৎনবগী য়ুম্ফম থোন্নবা অমসুং মালেমগী মীৎয়েং চঙনবনি।

• তশেংনা, প্রভু রাম ভারতকী পন্থুংনি অমসুং পন্থুং অসিগা লোয়ননা হৌজিক তশেংনা অপুনবা অমা লৈরে।

• তশেংনা, মন্ত্রীমন্দলগী মেম্বরশিংগী খুদোংচাবা অসি পুন্সিদা অমুক খক্তং ফংবা খুদোংচাবা অমনি।

• লৈবাক অসিগী খ্বাইদগী চাউবা কম্মিতি, কেন্দ্রগী মন্ত্রীমন্দলগী মীফম অসিদা শরুক য়াবা ফংবা অসি ঐখোয় পুম্নমক্কী লাইবক ফবনি।

• প্রধান মন্ত্রী, অদোম্না লৈবাক অসিগী থৌনা হাপ্লে অমসুং অদোমগী থবকশিংনা নাৎ-চৎনবীশিংগী থাজবা মপাঙ্গল কনখৎহল্লে।

• ঐখোয়না লৈবাক শীনবা থুংনা উরিবা অসিগুম্বা হরাওবা ঐখোয়না কৈদৌঙৈদা উবা ফংখিদ্রি।

• মীয়ামগী ইহৌ অমগী মওংদা, ইমর্জেন্সি মনুংদা ফাওবা মীয়াম অমতা ওইবা ঐখোয়না উখি, অদুবু অপুনবা অদু দিক্তেতরশিপকী মায়োক্তা শিংনবা ইহৌ অমা ওইনা লাকখি।

• প্রভু রামগীদমক ঐখোয়না  উরিবা মীয়ামগী ইহৌ অসিনা অনৌবা যুগ অমা হৌরগনি।

• লৈবাক অসিগী মীয়াম্না থবক অসিগীদমক চহি চা কয়া ঙাইদুনা লাক্লি অমসুং রাম মন্দিরদা প্রভু রামগী প্রান প্রাতিস্থা পাংথোক্তুনা অনৌবা যুগ অমা হৌরে। ঙসিদি মসি অনৌবা ৱাখল্লোল অমদা মীয়ামগী খোঙজং অমা ওইরক্লে।

• প্রধান মন্ত্রী লাইনিং-লাইশোনগী থৌরম অসি প্রভু রাম ইকায়খুম্নবা উৎনবা পাংথোকলবা মতমদা অসিগুম্বা অচৌবা লাইনিং-লাইশোন অসি মপুংফাগনি।

• গোশ্বামী তুলসিদাসনা ইরমখি মদুদি ‘জা পারি কৃপা রাম কি হোই। তা পারি কৃপা কারৈ সব কোই..’ মসিনা হায়রি মদুদি ‘শ্রী রাম জি ইকায়খুম্নরিবা মশামক, মীওই খুদিংমক্না মহাক ইকায়খুম্নগনি’।

• প্রধান মন্ত্রী, শ্রী রাম জন্মভুমি ইহৌ অসি লৈবাক অসিগী মীয়াম অমতা ওইনা পুনশিনখিবা নিংতম্বা ফংলবা ভারতকী অমতা ঙাইরবা ইহৌনি। মসিদা চহি চা কয়া ঙাইরকখি অমসুং ভারতমচা করোর কয়াগী পুক্নিংগী ইহুল য়াওখি।

• অদোম নুমিৎ ১১ নি লাই নিংখি অমসুং ভারত্তা লৈরিবা প্রভু রামগা মরী লৈনবা লাইফমশিংদা লাই খুরুমদুনা ভারতকী অপুনবগী শক্তমদা থৌনা হাপখি। মসিগীদমক অদোম মন্ত্রীমন্দলগী মেম্বর অমা ওইবা খক নত্তনা মীচম অমা ওইনা অদোম থাগৎপা ফোঙদোকচরি।

• ইকায়খুম্নরবা প্রধান মন্ত্রী জি অদোম্না মীয়ামদগী ফংলিবা নুংশিবা অসি য়েংলগা, অদোম মীয়ামগী হিরো অমা ওইবতা নত্তনা, হৌজিক অনৌবা যুগ অসি হৌদোক্লবা মতুংদা, অদোম অনৌবা যুগ অসি শেমগৎপা অমশু ওইরে।

• অদোম্না পায়খৎখিবা থবকশিংগীদমক অদোম থাগৎপা ফোঙদোকচরি অমসুং ভারতকী তুংগী য়াইফনবগীদমক ঐখোয়না অদোমগী মফমদা য়াইফ-পাউজেল পীজরি।

• লাইশঙ অসি চহি লিশিং কয়া চৎনবা শাবনি অমসুং অদোমগী ৱারোলদা অদোম্না হায়খি “ জনুৱারি ২২গী নুমিৎনা অঙকপা মশেক-মঙাল অমা পীরে। মসি ইচম চম্বা কেলেন্দরদা ইবা তারিখ অমা নত্তে, মসি অনৌবা যুগ অমা হৌবনি। মীনাই ওইবগী ৱাখল্লোন থুগাইদুনা লৈবাক অমা হৌগৎলক্লে, হৌখ্রবা মতমগী থৌদোক খুদিংমক্তগী লৈবাক অমা থৌনা ফংলে, অনৌবা পুৱারি অমা শেম্লে।  ঙসিদগী চহি লিশিং অমগী মতুংদা ফাওবা, মীয়াম্না নিংশিংগনি অমসুং ঙসিগী তারিখ অসি ৱারি শানগনি অমসুং ঙসিগী মিকুপ অসি নিংশিংগনি। রামগী থৌজালগা লোয়ননা ঐখোয় তাঞ্জা অসিদা হিংলে, রাম মশক উরে। ঙসি, নুমিৎশিং, মাইকৈশিং ঈশ্বরগী ওইবা মশক্না পীক থল্লে। মতম অসি মহৌশাগী মতম অদু নত্তে। মতম অসি মতমগী খোঙচত্তা মুৎপা নাইদ্রবা মুক্না ইদুনা লৈহৌরে”।

• মরম অদুনা, ঙসিগী মন্ত্রীমন্দলগী মীফম অসি যুগ অসিগী মন্ত্রীমন্দল মীফম হায়না কৌবদা হায়মনবা থোক্লোই।

• পুম্নমক অসিগা লোয়ননা ঐখোয়না অদোম থাগৎপা ফোঙদোকচরি অমসুং অমগা অমগা থাগৎপা ফোঙদোকচরি।

****