প্রধানমন্ত্রীগী লোইশঙ
প্রধান মন্ত্রীনা ‘মজদুরো কা হিত, মজদুরো কো সমরপিৎ’ থৌরমদা শরুক য়াখ্রে
হুকুমচন্দ মিলগী শিন্মীশিংদা পীগদবা ৱাৎলিবা চেকশিং খুৎশিন্নখ্রে
খার্গোনে দিস্ত্রিক্ততা মেগাৱাত ৬০গী সোলার পৱার প্লান্ত উরেপ উয়ুং তমখ্রে
“ঐনা শিন্মীশিংগী থৌজাল অমদি মীনুংসিগী ইথিল খঙই”
“লায়রবা অমদি চাকথুং ফিথুংদ্রবশিংগী ইকায়খুম্নবা ঙাকপনা ঐখোয়গী মরুওইবা থৌদাংনি। নুংঙাই য়াইফবা ভারত অমগীদমক থৌদাং লৌবা ঙম্বা মপাঙ্গল কনবা শিন্মীশিংনা ঐখোয়গী পান্দম্নি”
“লু-নানবা অমদি অথুম অহাওগী লমদা ইন্দোরনা খ্বায়দগী মাঙজিল থারি”
“স্তেত লৈঙাক্না হন্দক্কী মীখলদা শকখিবা ৱাশকশিং ফংহন্নবা থবক পায়খৎলি”
“ঐনা এম.পি.গী মীয়ামদা ‘মোদীগী গরেদ্তী’ ভারীগী কান্নবা মপুং ফানা লৌহৌনবা হায়জরি”
Posted On:
25 DEC 2023 12:51PM by PIB Imphal
প্রধান মন্ত্রী, শ্রী নরেন্দ্র মোদীনা ‘মজদুরো কা হিত, মজদুরো কো সমরপিৎ’ থৌরম ঙসি ভিদিও কন্ফরেন্সিংগী খুত্থাঙদা শরুক য়াখ্রে। মহাক্না হুকুমচন্দ মিলগী শিন্মীশিংদা পিগদবা ৱাৎপা লুপা করোর ২২৪গী শেনফমগী চেক অমসি ওফিসিএল লিকুইদেতর অমদি হুকুমচন্দ মিল, ইন্দোরগী লেবর য়ুনিয়ন্দা খুৎশিন্নখি। থৌরম অসিনা হুকুমচন্দ মিলগী শিন্মীশিংগী মতম শাংনা তান্দুনা লাক্লবা ৱাফম অমা ফংহল্লে। শ্রী মোদীনা খার্গোনে দিস্ত্রিক্ততা মেগাৱাত ৬০গী সোলার পৱার প্লান্ত অমগী উরেপ উয়ুংসু তমখি।
তিল্লিবা মীয়ামগী মফমদা ৱা ঙাংলদুনা, প্রধান মন্ত্রীনা ঙসিগী থৌরম অসি শিন্মী ইচিল ইনাওশিংগী চহি কয়া নীংজরকপা, মঙজরকপা মঙলানশিং অমদি লেপখিবা ফিরেপশিংগী মহৈনি হায়খি। থৌরম অসি অতল জীগী মপোক কুমওন নুমিত্তা পাঙথোকপগীদমক অমদি অনৌবা লৈঙাক লিংলবা মতুংদা মধ্য প্রদেশতা প্রধান মন্ত্রীনা শরুক য়াবা অহানবা থৌরম অসিনা লায়রবা অমদি চাকথুং ফিথুংদ্রবা শিন্মীশিংগী মফমদা কত্থোকপা থৌরম ওইবসিদা মহাক্না নুংঙাইবা ফোঙদোকখি। শিন্মীশিংনা মখোয়গী থৌজাল মধ্য প্রদেশকী নৌনা শেম্বা দবল ইঞ্জিন লৈঙাক্কী মফমদা পীনবিগনি হায়না মহাক্না থাজবা ফোঙদোকখি। “ঐনা শিন্মীশিংগী থৌজাল অমদি মীনুংসিগী ইথিলগী মরমদা নীংথিনা খঙই,” হায়রদুনা, প্রধান মন্ত্রীনা স্তেত অসিদা নৌনা শেম্লিবা লৈঙাক অসিনা লাক্কদৌরিবা চহিশিংদা অসিগুম্বা পান্দম কয়া ফংবা ঙমগনি হায়বা ৱাফমসু থমখি। ঙসিগী থৌরম অসি পাঙথোকপনা ইন্দোরগী শিন্মীশিংগী কুমহৈ হরাওগী মতমসিদা মথুম মরাং হৌবা হেনগৎহল্লি হায়রদুনা, প্রধান মন্ত্রীনা মধ্য প্রদেশকা অতল জীগা লৈনবা মরীগী মরমদা ৱাফম কয়া থমখি অমদি মহাক্কী মপোক কুমওন অসিবু অফবা লৈঙাক্লোনগী নুমিৎ হায়নসু থৌরম পাঙথোকই হায়খি। শিন্মীশিংগী মফমদা লুপা করোর ২২৪ ত্রান্সফর তৌখিবগা লোয়ননা মখোয়বু সনা ফুদোংলবা তুংলমচৎ অমনা ঙাইদুনা লৈরি অমদি ঙসিগী নুমিৎ অসি শিন্মীশিংগী অচুম্বা ৱায়েল ফংখিবা নুমিৎ ওইনা নীংশিংনহৌরগনি হায়না প্রধান মন্ত্রীনা হায়খি। পি.এম. মোদীনা খাঙবা কনবা অমদি হোৎনবা কনবগী ৱাফমবুসু শকখঙখি।
লায়রবা, নহা, নুমী অমদি লৌমী হায়বা মহাক্না উরিবা ফুরুপ মরিগী মতাঙদা পল্লদুনা, পি.এম. মোদীনা খুন্নাইগী লায়রবা কাঙলুপকী ফীভম ফগৎহন্নবা মধ্য প্রদেশ লৈঙাক্না লৌখৎলিবা খোঙথাংশিংবু থাগৎখি। “লায়রবা অমদি চাকথুং ফিথুংদ্রবশিংগী ইকায়খুম্নবা ঙাকপনা ঐখোয়গী মরুওইবা থৌদাংনি। নুংঙাই য়াইফবা ভারত অমগীদমক থৌদাং লৌবা ঙম্বা মপাঙ্গল কনবা শিন্মীশিংনা ঐখোয়গী পান্দম্নি,” হায়না শ্রী মোদীনা হায়খি।
লু-নানবা অমদি অথুম অহাওগী লমদা ইন্দোরনা খ্বায়দগী মাঙজিল থানা চৎপগী মতাঙদা পল্লদুনা, প্রধান মন্ত্রীনা ইন্দোরগী ইন্দস্ত্রীগী লেন্দস্কেপ্তা তেক্সতাইল ইন্দস্ত্রীনা লৌরিবা থৌদাংগী মতাঙদা ৱাফম কয়া থমখি অমদি মহারাজা তুকোজী রাউ ফিরোলগী কৈথেলগী মরুওইবা অমদি হোলকরশিংনা ময়োল্লম অসিগী অহানবা লশিংগী মিল লিংখৎখিবা অমসুং মীয়াম্না পাম্নবা মলৱা লশিংগী ৱাফমশিং পনখি। মতমদু ইন্দোরগী ফিরোলশিংগী সনা ফুদোংবা মতম্নি হায়খি। মমাঙগী লৈঙাক্না মীরাইদুনা থম্লম্বা কয়াবু মহাক্না পেন্দবা ফোঙদোকখি অমদি দবল ইঞ্জিন লৈঙাক অসিনা ইন্দোরগী হান্নগী মীৎচৎ অমুক হঞ্জিলহন্নবা হোৎনরি হায়খি। মহাক্না থবক পীগদবা অমদি শেন্মিৎলোন পাকথোক চাউথোকহনগদবা ভোপাল অমদি ইন্দোরগী মরক্তা ইনভেস্তমেন্ত শেমগৎলিবা কোরিদোর, ইন্দোর ইকনমকি কোরিদোর অমদি মল্তি-মোদেল লোজিস্তিক পার্ক, বিক্রম ইদ্যোগপুরীগী মেদিকেল দিভাইস পার্ক, ধরগী পি.এম. মিত্র পার্ক প্রোজেক্তশিংগী মতাঙদসু পাউদমখি।
মধ্য প্রদেশকী মহৌশাগী ফজবা অমদি নাৎকী লনশিংগী মতাঙদা পল্লদুনা, প্রধান মন্ত্রীনা ইন্দোর য়াওনা স্তেত অসিগী ময়োল্লম কয়ানা চাওখৎপা অমদি মহৌশা অনিগী মরক্তা চপ চাবা খল অমা শেম্বগী অথোইবা খুদমশিং ওইরে হায়খি। প্রধান মন্ত্রীনা ময়োল্লম অসিদা লৈরিবা এসিয়াগী খ্বায়দগী চাউবা গোবর্ধন প্লান্ত অমদি ই-ভি. চার্জিং ইনফ্রাস্ত্রকচরশিং শেমগৎপবু খুদম ওইনা পীখি। ঙসি খার্গোনে দিস্ত্রিক্তাতা উরেপ উয়ুং তম্লিবা, ইলেক্ত্রিতী বিলদা লুপা করোর ৪ রোম হন্থহনবা ঙমগদবা মেগাৱাত ৬০গী সোলার পৱার প্লান্তকী মতাঙদসু মহাক্না পনখি। পাম্বীশিংগী ফন্দ শেমগৎপা ওইনা গ্রীন বোন্দ শীজিন্নবগী মতাঙদা পল্লদুনা, মসিনা মহৌশাগী ফীভম ঙাকথোকপদা মীয়ামবু শরুক শোয়দনা য়াহনগনি হায়না প্রধান মন্ত্রীনা হায়খি।
স্তেত লৈঙাক্না হন্দক পাঙথোকখিবা মীখলদা শকখিবা ৱাশকশিং মপুং ফাহন্নবা থবক পায়খৎলি হায়না প্রধান মন্ত্রীনা হায়খি। লৈঙাক্কী স্কীমশিং সেচুরেসন ফংহন্নবগীদমক, বিক্সিত ভারত সংকল্প য়াত্রানা মধ্য প্রদেশতসু কাচিন কোয়া শিন-থুংনা চৎলি হায়না মহাক্না পাউদমখি। মীখলগী মোদেল কোদ ওফ কন্দক্তনা মরম ওইদুনা হৌরকপদা খরা থিন্থখ্রবসু, খোঙচৎ অসিনা থৌরম ৬০০ পাঙথোক্তুনা, মীওই লাখ কয়াদা কান্নবা ফংহনখ্রে হায়না মহাক্না পাউদমখি। “ঐনা এম.পি.গী মীয়ামদা ‘মোদীগী গরেদ্তী’ ভারীগী কান্নবা মপুং ফানা লৌহৌনবা হায়জরি,” হায়না মহাক্না মখা তাখি।
শিন্মীশিংগী মোমোন নোকপা মায়থোঙশিং অমদি মখোয়না হুকপিবা লৈ পরেংশিংগী লৈনম্না লৈঙাক অসিবু খুন্নাইগী য়াইফনবগী মায়কৈদা মখা তানা থবক তৌহন্নবা পুক্নিং থৌগত্তুনা লৈরগনি হায়না লোইশিল্লকপদা প্রধান মন্ত্রীনা ফোঙদোকখি।
মধ্য প্রদেশকী মুখ্য মন্ত্রী, শ্রী মোহন য়াদবসু থৌরমদুদা ভর্চুএল ওইনা শরুক য়াখি।
বেকগ্রাউন্দ
হুকুমচন্দ মিলগী শিন্মীশিংনা ইন্দোরগী হুকুমচন্দ মিল অসি ১৯৯২দা থোঙ লোনখ্রবা অমদি মতুং তারকপদা লিকুইদেসন তৌখ্রবা মতুংদা মখোয়গী পিফম থোকপা শেনফমশিং ফংনবগীদমক মতম শাংনা আইনগী লান্থেং অমা থেংনদুনা লাকখি। হন্দক্তা, মধ্য প্রদেশ লৈঙাক্না অফবা শক্লোন অমা লৌদুনা ৱায়েলশঙ, লেবর য়ুনিয়ন, অমদি মিলগী শিন্মীশিং য়াওনা স্তেকহোল্দর পুম্নমক্না য়ানবা সেতলমেন্ত পেকেজ অমগীদমক শন্তাইনখি। সেতলমেন্তকী থৌরাং অসিদা মধ্য প্রদেশ লৈঙাক্না পিথোক্তনা লৈরিবা শেনফম খুদিংমক লৌশিনবা, মিলগী লম লৌশিনবা, অমদি মফমদুবু রেসিদেন্সিএল অমদি কম্মর্সিএল মফম ওইনা শেমগৎপা য়াওরি।
থৌরমদুদা, প্রধান মন্ত্রীনা ইন্দোর ম্যুনিসিপাল কোর্পোরেসন্না খার্গোনে দিস্ত্রিক্তকী সম্রাজ অমদি অসুখেরী খুঙ্গংদা লিংখৎকদৌরিবা মেগাৱাত ৬০গী সোলার পৱার প্লান্তকী উরেপ উ্রয়ুংসু তমখি। লুপা করোর ৩০৮ চঙনা শাগৎকদৌরিবা অনৌবা সোলার পৱার প্লান্ত অসিনা ইন্দোর ম্যুনিসিপাল কোর্পোরেসনবু চহিদা লুপা করোর ৪গী মৈগী বিল হন্থহনবা ঙম্লবা য়াই হায়না পানরি। সোলার প্লান্ত অসি শাগৎনবগী শেল থাদনবগীদমক, ইন্দোর ম্যুনিসিপাল কোর্পোরেসন্না লুপা করোর ২৪৪গী গ্রীন বোন্দ থাদোকখি। মসিনা লৈবাকসিদা গ্রীন বোন্দ থাদোকপা অহানবা অর্বান বোদী ওইরে। স্তেত ২৯গী মীওইশিংনা অহৌবদা থাদোকখিবা শেনফমগী শরুক অহুম হেনগৎনা লুপা করোর ৭২০ রোমগী ওইগদবা চাংদা সব্সক্রাইব তৌরক্তুনা মসিনা অঙকপা মওংদা মীয়ামগী মতেঙ ফংলি।
*****
(Release ID: 1990267)
Visitor Counter : 58
Read this release in:
Kannada
,
Bengali
,
Bengali
,
Telugu
,
English
,
Urdu
,
Hindi
,
Marathi
,
Assamese
,
Punjabi
,
Gujarati
,
Odia
,
Tamil
,
Malayalam