U Myntri Rangbah Duh, u Narendra Modi u la iashim bynta ha ki kam kiba iadei bad ka Rashtriya Ekta Diwas mynta ka sngi. U la ai jingsngwnguh ia u Sardar Patel ha u mot Statue of Unity ha ka lyngkhuh sngi kha jong u. U Modi u la peit ruh ia ka Rashtriya Ekta Diwas Parade kaba kynthup ki dkhot jong ka BSF bad ki kynhun bapher bapher jong ki pulit, ka jingpyni ia ka jingshlur da ki longkmie jong ka CRPF kiba niah thuk thuk, ki longkmie nongtem nongput jong ka BSF, ka prokram ba la pynlong da ki longkmie pulit jong ka tnat pulit Gujarat, ka jingpyni kyrpang da ka NCC, ki nongput nongtem na ki skul, ka jingpynher liengsuin da ka Indian Air Force, ka jingpyni ia ki lad ka ioh ka kot da ki shnong bad kiwei kiwei.

183. ka jingai jingkren jong u, u Myntri Rangbah Duh u la ong ba ka Rashtriya Ekta Diwas ka rakhe ia ka bor jong ka jingiatylli jong ki samla bad ki nongiakhun jong ka India. “Ha kawei ka rukom, nga iohi ia ka India kaba rit,” la ong u Myntri Rangbah Duh. U la ong ba watla ki don ki jingpher ha ka ktien, ki jylla bad ki dustur, baroh ki briew jong ka ri ki dei kiba iatylli. “Ki kpieng ki long kiba bun hynrei u jingdeng u long uwei. Watla ngi long kiba pher, ngi long kiba iatylli,” u la ong. Kumba la ithuh ia ka 15 tarik u Nailar bad ka 26 tarik u Kyllalyngkot kum ka Lyngkhuh Sngi Ioh Jinglaitluid bad ka Republic Day, u Myntri Rangbah Duh u la ong ba ka 31 tarik u Risaw ka la long kum ka jinglehkmen jong ka jingiatylli ha kylleng ka ri. U la ong ba ka jingrakhe ia ka Lyngkhuh Sngi Ioh Jinglaitluid ha Red Fort, ka Republic Day Parade ha ka Kartavya Path bad ka jingrakhe ia ka Rashtriya Ekta Diwas hajan u mot Statue of Unity harud ka wah Narmada ki la dei ki lai bynta jong ka jingkiew ka jingieid ri. Ha ka jingkren shaphang ka prokram mynta ka sngi, u Myntri Rangbah Duh u la ong kito kiba leit sha Ekta Nagar ki iohi ia u mot Statue of Unity bad ki iohi ruh ia ka jingim jong u Sardar Saheb bad ki kam ba u la leh na ka bynta ka jingtylli ka India. “U mot Statue of Unity u long kum ka dak jong ka jingngeit ha ka Ek Bharat Shreshtha Bharat”, la ong u Modi. U la kren shaphang ka jingnoh synniang jong ki briew ka ri na ka bynta ka jingtei ia une u mot bad u la ai nuksa ia ki nongrep kiba la ai sngewbha ia ki tiar treikam jong ki. U la kren ruh shaphang ka jingkhleh ia ka khyndew na kylleng ka ri India ban tei ia ka kynroh Wall of Unity. U Myntri Rangbah Duh u la pyntip ba da ki klur ngut ki briew jong ka ri ki iasoh lang ha kane ka jingrakhe ia ka Rashtriya Ekta Diwas da kaba iashim bynta ha ka ‘Run for Unity’ bad kiwei kiwei ki prokram ha kylleng ka ri. “Ki jingngeit jong u Sardar Saheb ki long ka nongrim jong 140 klur ngut ki briew jong ka ri kiba iawan lang ban rakhe ia ka jingngeit ha ka Ek Bharat Shreshtha Bharat”, la ong u Myntri Rangbah Duh haba u la ai jingsngewnguh ia u Sardar Patel bad u la ai khublei ia ki briew jong ka ri na ka bynta ka Rashtriya Ekta Diwas.

U Myntri Rangbah Duh u la ban biang ba kine ki 25 snem ban wan ki long ki 25 snem ba kongsan tam ha kine ki shispah snem na ka bynta ka ri namar ka ri ka dei ban long kaba la kiew shaphrang ha kane ka por. U la kyntu ban don kajuh ka jingtrei shitom na ka bynta ka ri kumba la iohi ha ki 25 snem shuwa ka jingioh ia ka jinglaitluid. U la ong ruh ba ka India ka la kiew kyrdan ha ka pyrthei. “ngi sngew kmen ba ngi dang rah ia ka burom jong ka synshar paidbah kaba heh tam sha ki kliar kiba thymmai,” u la ong. U la kren shaphang ka jingskhem ka India ha ka jingshngain, ka ioh ka kot, ka science, ka jingpynmih ia ki tiar iada ri, bad ka jingialam lynti ha ki kam kompani ha kylleng ka pyrthei kiba ki briew ka India ki pynbiang ha ki kompani ba heh jong ka pyrthei bad ki kam ialehkai.

Ha ka jingkren shaphang ka jingbam smai ban kiew shaphrang bad ban kyntait ia ka rukom pyrkhat jong ki nongshah teh mraw, u Myntri Rangbah Duh u la ong ba ka India ka dang kiew shaphrang ha ryngkat ka jingpynneh ia ka nongrim jong ka. U la kren shaphang ka jingweng ia ka dak jong ki mynder na ka lama jong ka Navy, ka jingweng ia ki ain bym iahap kiba naduh ki por jong ki mynder, ka jingwanrah bujli ia ka IPC bad u mot jong u Netaji uba don ha ka India Gate ba la buh bujli ha ka jaka ki nongmihkhmat jong ki mynder.

U Myntri Rangbah Duh u la ong, “Mynta ym don kano kano ka thong ba ka India kam lah ban kot.” U la kren shaphang ka bor jong ka Sabka Prayas, bad u la kren katto katne shaphang ka jingweng ia ka Article 370 bad u la ong ba mynta ba ia ka kynroh jong ka Article 370 kaba ieng hapdeng ka Kashmir bad kiwei kiwei ki bynta jong ka ri la pynpra bad kane khlem pep kan pynkmen ia u Sardar Sahab ha kano kano ka jaka ba u don mynta.

U Myntri Rangbah Duh u la bteng ka jingkren shaphang ki kam kiba la sahteng ha kaba u la kren shaphang ka Sardar Sarovar Dam kaba la sahkut la 50 – 60 snem hynrei kaba la pyndep ha kine ki snem ba la dep. U la kren shaphang ka jingkylla jong ka Kevadia - Ekta Nagar kum ka nuksa jong ka Sankalp se Siddhi. “Mynta la ithuh ia ka Ekta Nagar kum ka nongbah kaba jyrngam jong ka pyrthei,” u la ong. Ha ryngkat ki jaka kiba khring ia ki nongjngoh kai, u Myntri Rangbah Duh u la pyntip ba ha kine ki 6 bnai ba la dep, la dep thung palat 1.5 lak ki dieng ha Ekta Nagar. Ha ka jingkren shaphang ka bor pynmih bording solar bad ka jingsam gas ha kane ka jaka, u Myntri Rangbah Duh u la ong ba shen yn wanrah ia ka rel ba kyrpang sha Ekta Nagar. U la pyntip ba palat 1.5 klur ngut ki nongjngoh kai ki la wan sha kane ka jaka ha kine ki 5 snem ba la dep bad ba kane ka iarap ia ki briew na kane ka jaka ba kin ioh lad kamai jakpoh.

U Myntri Rangbah Duh u la ong, “Mynta, baroh kawei ka pyrthei ka ithuh ia ka jingskhem jingmut jong ka India, ka jingshlur bad ka jingdon ka mon ba skhem jong ki briew jong ka. Hynrei u la ong ba watla ka pyrthei ka dang ioh mynsiem na kane, ki don katto katne ki jingma. U la kren shaphang ki jingkulmar ha ka pyrthei mynta bad ruh shaphang ka jingpulom ka ioh ka kot ha katto katne ki ri hadien ka khlam Covid ha kaba ka jingkiew dor ki mar bad ka jingduh kam ka long kaba khlain tam ha kine ki 30-40 snem ba la dep. Ha kine ki jinglong jingman, u Myntri Rangbah Duh u la ong ba ka India ka dang bteng ban kiew shaphrang bad wanrah ia ki record bad ki sienjam ba thymmai. U Myntri Rangbah Duh u la ong ba ka jingseisoh jong ki polisi bad ki ri ba la shim da ka Sorkar ha kine ki 9 snem ba la dep ki dei kiba ngi iohi mynta. U la ong ba palat 13.5 klur ngut ki briew jong ka ri ki la lait na ka jingduk ha kine ki 5 snem ba la dep. U la kyntu ia ki briew jong ka ri ba kin pynneh ia ka jingiaid ryntih ha ka ri bad u la ong ba ki dei ki kam jong 140 klur ngut ki briew jong ka ri kiba la ialam ia ka India sha ka lynti jong ka roi ka par ka bym dei ban shu sepei mynta. “Ngi dei ban peit ia ka lawei bad bteng ban kut jingmut ban pynurlong ia ki thong jong ka ri,” u la ong.

Ha ka jingkren shaphang ka jingkut jingmut u Sardar Saheb na ka bynta ka jingiatylli jong ka ri, u Myntri Rangbah Duh u la batai shaphang ki sienjam ba la shim ha kine ki 9 snem ba la dep na ka bynta kane bad kumno la pynbeit ia ki jingeh da kaba tehlakam ia ki por pynpra ban kin ioh ia ki jingjop ba ki ju ioh mynshuwa. U la ong ba ngi dei ban bteng ban husiar halor ki jingpyrshang ban pynpra ia ka jingiatylli jong ka ri.

U Modi u la ong ba ka jingeh kaba khraw tam ha ka roi ka par jong ka ri ka dei ki kam sain pyrthei kiba pynhun shuwa ia ki briew lajong bad u la ong ba la iohi ha kine ki snem ba la dep ba kito kiba sngewtynnad ia kane ka jait kam sain pyrthei ki leh bym iohi ia ki kam pyntriem bad ki ieng ruh bad ki nongshun jong ka jinglong briew. U la ong ba ngi dei ban husiar ia kane ka rukom pyrkhat kaba buh jingma ia ka jingiatylli jong ka ri.

Ha ka jingkren shaphang ka elekshon ban wan, u Myntri Rangbah Duh u la mana ia ka kynhun ka bym don kino kino ki kam politik kiba bha bad kiba mushlia ha ki kam kiba ktah ia ka imlang sahlang bad ia ka ri. “Ngi dei ban bteng beit ia ki sienjam ban pynneh ia ka jingtylli jong ka ri khnang ban pynurlong ia ka thong ban ioh ia ka India kaba la kiew shaphrang. Kam pher kano ka kam ba ngi trei, ngi dei ban theh met bad mynsiem ha ka kam. Kane ka dei ka lynti ban ai ka lawei kaba bha ia ki pateng ban wan,” la ong u Modi.

U Modi u la iathuh ruh shaphang ka jingiakop ha kylleng ka ri halor u Sardar Patel ha ka MyGov.

U Myntri Rangbah Duh u la ong ba ka India kaba mynta ka dei ka India kaba thymmai ha kaba baroh ki briew jong ka ri ki dap da ka jingskhem jingmut. U la ban jur halor ka jingpynthikna ia ka jingbteng jong kane ka jingsngew bad ka jingiatylli. U la pynkut ia ka jingkren da kaba ai jingsngewnguh ia u Sardar Patel na ka liang jong ki briew jong ka ri bad u la ai khublei halor ka Rashtriya Ekta Diwas.

Ka Nongrim

Khnang ban kyntiew ia ka jingngeit ha ka jingpynneh bad ka jingpynkhlain ia ka jingiatylli, ka jingskhem bad ka jingshngain jong ka ri, u Myntri Rangbah Duh u la rai ban rakhe ia ka lyngkhuh sngi kha jong u Sardar Vallabhbhai Patel kum ka Rashtriya Ekta Diwas.