প্রধানমন্ত্রীগী লোইশঙ
প্রধান মন্ত্রীনা গ্লোবেল মেরিতাইম ইন্দিয়া সম্মিৎ ২০২৩ হৌদোকখ্রে
ভারতকী মেরিতাইম ব্লু ইকোনোমিগী ব্লুপ্রিন্ত অমা-‘অমৃত কাল ভিজন ২০৪৭’ হৌদোকখ্রে
লুপা করোর ২৩,০০০ হেনবগী প্রোজেকশিং উরেপ-উয়ুং তমখ্রে অমসুং মীয়ামদা কৎথোকখ্রে
গুজরাতকী দিনদয়াল পোর্ত ওথোরিতিদা তুনা তেক্রা দিপ দ্রাফ তর্মিনেলগী উরেপ-উয়ুং তমখ্রে
মেরিতাইম সেক্তরদা মালেম অমসুং জাতিগী পার্তনরশিপকীদমক এম.ও.য়ু ৩০০ হেন্না কৎথোকখ্রে
“মালেমগী হোঙলক্লিবা ফিবম অসিদা, অনৌবা থাজবশিংগা লোয়ননা মালেম্না ভারত্তা য়েংলক্লি”
“নুংঙাই-য়াইফনবা হিথাংফমশিং অমসুং চাউখৎনবা হিথাংফমশিং হায়বা সরকারগী পান্দম্না মখোঙদগী হৌনা অওনবা কয়া পুরক্লে”
“ঐখোয়গী লাইৱাদি ‘মেক ইন ইন্দিয়া-মেক ফোর ৱার্ল্দ’ হায়নি”
“মশা-মউ ফবা মালেম অমা ওইহন্নবা ব্লু ইকোনোমিনা পাম্বৈ ওইগদবা তুংলমচৎ অমদা ঐখোয় চঙশিল্লি”
“লৈবাক অসিগী অফবা ইনফ্রাস্ত্রকচরশিংগী খুৎথাংদা মালেমগী ক্রুইজ হব অমা ওইনবা মায়কৈদা ভারত চঙশিল্লি”
“চাউখৎপা, মীওইশিং, গনতন্ত্র অমসুং দরকার ওইবা পুনশিনবা অসি শেন থাদরিবশিংগী খুদোংচাবা অমনি”
Posted On:
17 OCT 2023 11:54AM by PIB Imphal
ঙসি ভিদিও কনফরেন্সকী খুৎথাংদা প্রধান মন্ত্রী শ্রী নরেন্দ্র মোদীনা মুম্বাইদা ৩শুবা গ্লোবেল মেরিতাইম ইন্দিয়া সম্মিৎ ২০২৩ হৌদোকখ্রে। ভারতকী মেরিতাইম ব্লু ইকোনোমিগী ব্লুপ্রিন্ত অমা-‘অমৃত কাল ভিজন ২০৪৭’ প্রধান মন্ত্রীনা হৌদোকখ্রে। তুংগীদমক য়েংলগা, ‘অমৃত কাল ভিজন ২০৪৭’ গা চুন্নবা প্রধান মন্ত্রীনা লুপা করোর ২৩,০০০ হেনবগী প্রোজেকশিং উরেপ-উয়ুং তমখ্রে অমসুং মীয়ামদা কৎথোকখ্রে। ভারতকী মেরিতাইম সেক্তরদা শেন থাদনিংবা পোকহন্নবা মীফম অসি মতিক চারবা মফম অমা ওইরে।
থৌরম অদুদা তিনখিবা মীয়ামদা ৱা ঙাংবদা, ৩শুবা গ্লোবেল মেরিতাইম ইন্দিয়া সম্মিৎ ২০২৩ দা শরুক য়ারিবশিং প্রধান মন্ত্রীনা তরাম্না ওকখি। মহাক্না হায়খি ২০২১দা মীফম অসিদা পাংথোকপা মতমদা কোবিদ লাইচৎনা মালেম শীনবা থুংনা তম্বা ঙমদবা ফিবমশিংনা অৱাবা ওইহনখি অমসুং ঙসিদা মালেমগী অনৌবা শক্তম অমা লৈরে। মালেমগী হোঙলক্লিবা ফিবম অসিদা, অনৌবা থাজবশিংগা লোয়ননা মালেম্না ভারত্তা য়েংলক্লি। শেন-থুমগী অৱাবা মায়োক্নরিবা মালেম অমদা ভারতকী শেন্মিৎলোন লেপ্তনা ফগৎলক্লি অমসুং মালেমগী মকোক থোংবা ইকোনোমি অহুমগী মনুংদা ভারত য়াওগদবা মতম অদু কুইদ্রে। মালেমগী ললোন-ইতিক্কী থবকশিংদা সমুদ্রগী লম্বীশিং অসি য়াম্না মরুওই। কোরোনা মতুংগী মালেমদা অফবা সপ্লাই চেন অমা দরকার ওইরে।
প্রধান মন্ত্রীনা হায়খি ভারতকী মেরিতাইমগী তৌবা ঙম্বশিংনা মতম পুম্নমক্তা মালেমদা কান্নবা পীখি হায়বা পুৱারিনা শাখিনি। ইন্দিয়া-মিদল ইস্ত-য়ুরোপ ইকোনোমিক কোরিদোরগী ৱাফম পুৱারি ওইনা জি-২০ মীফমদা য়ানবা পুরকখ্রে। থায়নগী সিল্ক রুতনা লৈবাক কয়াগী শেন্মিৎলোন্দা অহোংবা পুরকখিবগুম, মসিগী কোরিদোর অসিনা মালেমগী ললোন-ইতিক্কী থবকশিংদা অহোংবা অমা পুরক্কনি। তুংগী মীরোলগী অচৌবা হিথাংফম, ইন্তরনেসনেল কন্তেন্নর ত্রান্স-সিপমেন্ত পোর্ত, ইথৎ চাউখৎহনবা, কংফাল মনুংগী ঈশিং লম্বীশিং অমসুং মল্তি-মোদাল হব শেমগৎতুনা পোৎ-চৈ পুথোক-পুশিনগী ফিবম ফগৎহনগনি অমসুং থবক ফংহনগনি। খোঙজং অসিদা শরুক য়ানবা অমসুং ভারতকা পুন্নবা ইনভেস্তরশিংগী অচৌবা খুদোংচাবা অমা লৈরে।
প্রধান মন্ত্রী মোদীনা হায়খি মথং চহি ২৫দা চাউখৎলবা লৈবাক অমা ওইনবা ৱাশকশিং মপুংফানবা ঙসিগী ভারতনা থবক তৌরি। হিরম খুদিংমক্তা সরকারনা অওনবা পুরক্লে অমসুং ভারত্তা মেরিতাইম সেক্তর চাউখৎনবা থবক পায়খৎলে। হৌখিবা চহি ১০দা, ভারতকী অচৌবা হিথাংফমশিংগী থবক তৌবা ঙম্বা শরুক অনিদা হেনগৎহল্লে অমসুং ২০১৪দা অচৌবা ভেসেলশিংগী তর্নএরাউন্দ তাইম পুং ৪২ ওইরম্বা অদু হৌজিক পুং ২৪গী মখাদা লৈরে। হিথাংফম য়ৌবা অনৌবা লম্বীশিং শেমগৎলে অমসুং সমুদ্র মপানগী ইনফ্রাস্ত্রকচরশিং মপাঙ্গল কনখৎহন্নবা সাগরমালা প্রোজেক পায়খৎলে। হায়রিবা থবকশিং অসিনা থবক ফংবগী খুদোংচাবশিং হেনগৎহনগনি অমসুং হিংবদা লাইবা হেনগৎহনগনি।
প্রধান মন্ত্রীনা হায়খি নুংঙাই-য়াইফনবা হিথাংফমশিং অমসুং চাউখৎনবা হিথাংফমশিং হায়বা সরকারগী পান্দম্না মখোঙদগী হৌনা অওনবা কয়া পুরক্লে। পোৎথোক-চাথোক হেনগৎহন্নবা হিথাংফমশিং শীজিন্নবা হায়বা লাইৱা অসিসু পুক্নিং থৌগৎলে। লোজিসতিক্স সেক্তর হেন্না মতিক চানা থবক তৌহন্দুনা শেন-থুম চাউখৎপা হেনগৎহন্নবা সরকারনা মরুওইবা থবকশিং পায়খৎলে। ভারত্তা কোস্তেল সিপ্পিংগী থবকশিং মতমগা চুনবা মওংদা শেমগৎলে অমসুং হৌখিবা চহি ১০দা কোস্তেল কার্গো ত্রাফিক শরুক অনিদা হেনগৎলে অমসুং মসিনা মীয়ামদা মমল হোংনা পোৎ-চৈ পুথোক-পুশিনগী খুদোংচাবা পীরে। লৈবাক অসিগী কংফাল মনুংগী ঈশিং লম্বীশিংদা কার্গো পুথোক-পুশিন শরুক মরিদা হেনগৎলে। হৌখিবা চহি ৯দা লোজিসতিক্স পর্ফোমেন্স ইন্দেক্সতা ভারতকী ফিবম ফগৎলে।
প্রধান মন্ত্রীনা হায়খি জহাজ শাবা অমসুং শেমজিন-শাজিনবগী হিরমদা সরকারনা অকনবা মীৎয়েং চঙলে। লৈবাক অসিনা মশানা শাজবা এয়রক্রাফ কেরিয়র আই.এন.এস বিক্রান্ত অসি ভারতকী তৌবা ঙম্বগী খুদম্নি। লাক্লিবা চহি ১০দা ভারত জহাজ শাবা মকোক থোংবা লৈবাক মঙাগী মনুংদা লৈবাক অমা ওইবা ঙম্লগনি। মেরিতাইম ক্লস্তরগী খুৎথাংদা হিরম অসিগী মরী লৈনবা খুদিংমক পুনশিন্নবা সরকারনা থবক তৌরি। মফম কয়াদা জহাজ শাফমশিং অমসুং শেমজিন শাজিন্নবা মফমশিং শেমগৎলগনি। জহাজ রিসাইক্লিংগী লমদা ভারত অনিশুবা মফমদা লৈরি। হিরম অসিদা নেত-জিরো লাল্লোং অমগী মখাদা ভারতকী মরুওইবা হিথাংফমশিং কার্বোন থাদোক্তবা মফম ওইহন্নবা থবক পায়খৎলে। মশা-মউ ফবা মালেম অমা ওইহন্নবা ব্লু ইকোনোমিনা পাম্বৈ ওইগদবা তুংলমচৎ অমদা ঐখোয় চঙশিল্লি।
প্রধান মন্ত্রীনা হায়খি মেরিতাইম সেক্তরগী অচৌবা কম্পেনিশিং ভারত্তা চঙলক্নবা থৌরাং তৌদুনা লৈরে অমসুং অহমেদবাদকী গিফ সিতিদা শেন-থুমগী থবক অমা ওইনা জহাজ শান্দোকপগী থবক হৌরে। মালেমগী জহাজ লিজদা পীবা কম্পেনি ৪ গিফ আই.এফ.এস.সিদা রেজিস্তার তৌরে। মীফম অসিদা শরুক য়ারিবা অতোপ্পা জহাজ শান্দোকপা কম্পেনিশিং গিফ আই.এফ.এস.সিদা শরুক য়ারগনি।
প্রধান মন্ত্রীনা হায়খি মেরিতাইম তুরিজমদা অনৌবা খুদোংচাবশিং শেমগৎনবা ভারতকী পাক-চাউরবা সমুদ্র মপান, অফবা তুরেল অমসুং ইনাকখুল্লবা নাৎ কয়া লৈরি। ভারতকী চহি লিশিং ৫ রোম শুরবা লোথাল হিথাংফম অসি মালেমগী লনগৈ অমনি অমসুং মসি ‘জহাজগী থবক্কী নাউশুম’ হায়না খঙনরে। মসিগী মালেমগী তাংলবা লন অসি চেকশিন্না থম্নবা মুম্বাই ময়াগী লোথালদা নেসনেল মেরিতাইম হেরিতেচ কমপ্লেক্স অমা শেমগৎলে অমসুং মসি লোইরবা মতুংদা মীয়াম্না য়েংবা চৎপীয়ু।
প্রধান মন্ত্রীনা হায়খি মালেমদা খ্বাইদগী শাংবা রিভর ক্রুইজ সর্বিসনা ভারত্তা মেরিতাইম তুরিজম য়োকখৎকনি। মুম্বাইদা ইন্তরনেসনেল ক্রুইজ তর্মিনেল শেমগৎলে অমসুং বিশাখাপত্নম অমসুং চেন্নাইদা অনৌবা ক্রুইজ তর্মিনেলশিং শেমগৎলে। লৈবাক অসিগী অফবা ইনফ্রাস্ত্রকচরশিংগী খুৎথাংদা মালেমগী ক্রুইজ হব অমা ওইনবা মায়কৈদা ভারত চঙশিল্লি।
লোইশিল্লকপদা, প্রধান মন্ত্রীনা হায়খি “চাউখৎপা, মীওইশিং, গনতন্ত্র অমসুং দরকার ওইবা পুনশিনবা লৈবাক খরগী মনুংদা ভারত অমনি অমসুং মসি শেন থাদরিবশিংগী খুদোংচাবা অমনি। ২০৪৭দা চাউখৎলবা ভারত অমা ওইনবা পান্দমদা ভারতনা মাঙলোমদা চঙশিল্লিবা মতম অমদা মসি অদোমগী অফবা খুদোংচাবা অমনি। ভারত্তা লাক্নবা অমসুং চাউখৎপগী লম্বীদা চৎমিন্ননবা শ্রী মোদীনা মালেম শীনবা থুংবগী ইনভেস্তরশিংদা তকশিনখি।
থৌরম অদুদা পোর্তস, সিপ্পিং অমসুং ৱাতরৱেজগী য়ুনিয়ন মিনিস্তর শ্রী সর্বনন্দা সোনোৱাল শরুক য়াখি।
নুঙগীৱারোল
প্রধান মন্ত্রীনা থৌরম অসিগী মনুংদা ভারতকী মেরিতাইম ব্লু ইকোনোমীগী অশাংবা মতমগী ব্লুপ্রিন্ত ওইগদৌরিবা ‘অমৃত কাল ভিজন ২০৪৭’ মায়খুম হাংদোকখ্রে। ব্লুপ্রিন্ত অসিনা হিথাংফমশিংগী ফেসিলিতী হেন্না ফগৎহনবা, সস্তেনেবল ওইবা থৌওংশিংগী পুক্নিং থৌগৎপা, অমসুং ইন্তর্নেস্নেল কোলাবোরেসন লৈহন্নবা তেংবাংবগী পান্দম থম্বা স্ত্রেতজিক ওইবা থৌওং কয়া য়াওরি। ভারতকী মেরিতাইম ব্লু ইকোনোমীগী ‘অমৃত কাল ভিজন ২০৪৭’গা মরী লৈনবা লুপা করোর ২৩,০০০ হেনবগী প্রোজেক্ত কয়া প্রধান মন্ত্রীনা শঙ্গাখ্রে, লৈবাক মীয়ামদা খুৎশীন্নখ্রে অমসুং উরেপ উয়ুংসু তমখ্রে।
প্রধান মন্ত্রীনা গুজরাতকী দীন্দয়াল পোর্ত ওথোরিতীদা লুপা করোর ৪,৫০০ হেন্না চঙদুনা শাগদৌরিবা তুনা তেক্রা ওল-ৱেদর দীপ দ্রাফ তর্মিনেলগী উরেপ উয়ুং তমখি। স্তেত-ওফ-দি আর্ত গ্রীনফিল্দ তর্মিনেল অসি পি.পি.পি মোদতা শাগনি। মালেমগী ত্রেদ হব অমা ওইরকপা য়ারিবা তর্মিনেল অসিনা ত্বেন্তী-ফুত ইকুইভেলেন্ত য়ুনিৎ ১৮,০০০ হেনবা নেক্স-জেন ভেসেল শেন্নগনি, অমসুং ভারত-মিদ্দল ইস্ত-য়ুরোপ ইকোনোমিক ওরিদোর ফাওগদবা ভারতকী ত্রেদকী থোংজিন অমা ওইনা মথৌ পাংথোক্কনি। প্রধান মন্ত্রীনা থৌরম অসিমক্কী মনুংদা মেরিতাইম সেক্তরগী গ্লোবেল অমসুং দোমেস্তিক পার্ত্নরশিপকীদমক্তা লুপা করোর লাখ ৭ হেনবগী মেমোরেন্দম ওফ অন্দর্স্তেন্দিং (এম ও য়ু) ৩০০ অমগসু মীয়ামদা খুৎশীন্নখ্রে।
সম্মিত অসিনা লৈবাক অসিগী মেরিতাইমগী খ্বাইদগী চাউবা থৌরম ওইগনি। মসিদা য়ুরোপ, অফ্রিকা, সাউথ অমেরিকা, এসিয়া (সেন্ত্রেল এসিয়া, মিদ্দল ইস্ত অমসুং বিমসতেক লৈবাকশিং য়াওনা)বু মীহুৎ শিন্দুনা মালেম পুম্বগী মন্ত্রীশিংনা শরুক য়াখি। সম্মিত অসিদা মালেমগী গ্লোবেল সি.ই.ও, ব্যুজিনেস লীদর, ইনভেস্তর, ওফিসিএল অমসুং স্তেকহোলদর পুম্নমক্না শরুক য়াখি। মখা তারকপদা, ভারতকী তোঙান-তোঙানবা রাজ্য কয়াগী মখোয়গী মন্ত্রী অমসুং অতোপ্পা দিগ্নিতরীশিংনা মীহুৎ শিন্দুনা শরুক য়াখি।
নুমিৎ হুম্নি চত্থগদবা সম্মিত অসিদা তুংগী মতমগী হিথাংফম; দিকার্বোনাইজেসন; কোস্তেল শিপ্পিং অমসুং ইনলেন্দ ৱাতর ত্রান্সপোর্তেসন; জহাজ শাবা; শেমজিন শাজিনবা অমসুং রিসাইক্লিং তৌবা; ফাইনান্স, ইন্স্যুরেন্স অমসুং আর্ব্রিতেসন; মেরিতাইম ক্লস্তর; ইন্নোভেসন অমসুং তেক্নোলোজী; মেরিতাইম সেফতী অমসুং সেক্যুরিতী; অমসুং মেরিতাইম তুরিজম য়াওনা মখল কয়াগী হীরমগী শিংনবশিংগী মতাংদা খন্ন-নৈনগনি। সম্মিত অসিনা লৈবাক্কী মেরিতাইম সেক্তরদা ইনভেস্তমেন্তশিংগী পুক্নিং চীংশিনবগী প্লেতোর্ম অমা ওইনসু মতেং পাংগনি।
খ্বাইদগী অহানবা মেরিতাইম ইন্দিয়া সম্মিত অসি ইং ২০১৬ দা মুম্বাইদা পাংথোকখিবনি। অনিশুবা মেরিতাইম সম্মিত অসিনা ইং ২০১২ দা ভর্চুএল ওইনা পাংথোকখিবনি।
******
(Release ID: 1968470)
Visitor Counter : 115
Read this release in:
Kannada
,
English
,
Urdu
,
Marathi
,
Hindi
,
Bengali
,
Assamese
,
Bengali-TR
,
Punjabi
,
Gujarati
,
Odia
,
Tamil
,
Telugu
,
Malayalam