Khyndai snem mynshuwa, u Myntri Rangbah Duh u Narendra Modi u la ai jingkyntu na ka bynta ka jingkhuid ha u snem 2014. Ki briew jong ka ri ki la ai ka jubab kaba biang da ka jingshitrhem ha kaba ki la shim ia ka jinglong trai ia ka Swachh Bharat. Namar kane, ka jingkhuid ka la long ka jinglong jong ka ri bad ka Swachh Bharat Mission ka dei kaba la poi sha man ka longiing.

Katba ngi dang jan sha ka Gandhi Jayanti, u Myntri Rangbah Duh u la ai ka jingkyntu kaba kyrpang ia ki briew jong ka ri. Ha ka bynta kaba 105 jong ka Mann Ki Baat, u Myntri Rangbah Duh u la kyntu ban don shi kynta ka shramdaan na ka bynta ka jingkhuid ha ka por 10 baje mynstep ha ka 1 tarik u Risaw da baroh ki briew ka ban long ka ‘swachhanjali’ ia u Bapu ha ka sngi shuwa ka Jayanti jong u. Ha ka jingkren shaphang ka Swachhata Hi Sevaabhiyan, u la ong, “Yn pynlong ka prokram kaba heh na ka bynta ka jingkhuid ha ka 1 tarik u Risaw lane ka Sngi u Blei ha ka por 10 baje mynstep. Phi dei ban pyllait por ban ai jingiarap ha kane ka kam kaba iadei bad ka jingkhuid. Phi lah ban iasnoh kti ha ki kam pynkhuid ha ka dong jong phi lane ka jaka paidbah, lane ka jaka shong um ne kano kano ka jaka.”

Kane ka prokram pynkhuid kaba heh ka kyntu ia baroh ki briew jong ka ri ba kin iasnoh kti ha ki kam pynkhuid ia ki jaka paidbah kum ki jaka shong iew, ki lynti rel, ki jaka shong um, ki jaka jngoh kai, ki jaka ba kyntang bad kiwei kiwei. Man ka nongbah, Gram Panchayat, baroh ki bynta jong ka Sorkar kum ka civil aviation, railways, information & technology bad kiwei kiwei, ki kynhun kiba trei ha ki kam kiba iadei bad ka imlang sahlang kin plie lad ia ki kam pynkhuid kiba ialam lynti da ki paidbah. Ki NGO/ RWA/ Kynhun shimet kiba kwah ban pynlong ia ki jingpynkhuid ki lah ban ai application online lyngba ka rynsan ULB/ District Administration. Ki paidbah ki lah ban ioh ia ki jingtip shaphang ki kam pynkhuid lyngba ka rynsan IT ba kyrpang, ka Swachhata Hi Seva – Citizens Portal https://swachhatahiseva.com/ . Ha ki jaka ba pynkhuid, ki briew ki lah ban shon ia ki dur bad upload ia kine ha kane ka rynsan. Ka rynsan ka don ruh ka bynta kaba khot sngewbha ia ki briew ba ki iasnoh kti lang bad ka andolan bad ialam lynti ia kane ka kam paidbah da kaba long ki Swachhata Ambassador.

Kane ka kam pynkhuid kaba heh ka long shi bynta jong ka SwachhataPakhwada- Swachhata Hi Seva2023, kaba rakhe naduh ka 15 tarik u Nailur haduh ka 2 tarik u Risaw. Ki briew ki lah ban iashim bynta ha ki kam pynkhuid bapher bapher kum ka jingpynbha biang ia ki jingtei kiba la rim, ka jingpynkhuid ia ki jaka shong um, ki  ghat, ka jingairong ia ki kynroh, ka jingpynlong ia ki nukkadnataks, ki jingiakob shna rangoli. Naduh ba la sdang ia ka Pakhwada haduh mynta, palat 5 klur ki briew jong ka ri ki la iashim bynta ha ka Pakhwada kaba 14 sngi.