ঙসি স্কিল দিবলপমেন্ত অমসুং ওন্ত্রেপ্রেনিউয়রশিপ অমসুং ইলেক্ত্রোনিক্স অমসুং আই.তিগী রাজ্য মন্ত্রী শ্রী রজিব চন্দ্রসেখরনা পাউমীশিংগা উনখ্রে অমসুং হৌখিবা ওগস্ত থাদা পাংথোকখিবা দিজিতেল ইকোনোমি মিনিস্তরশিংগী মীফমদগী ফংলকপা কন্নবা ৱাফমশিং মহাক্না ফোঙদোকখ্রে। তুংগীদমক দিজিতেল পব্লিক ইনফ্রাস্ত্রকচর(দি.পি.আই) অমা মপুংফনা শেমগৎনবা, ভারতনা জি-২০গী প্রসিদেন্ত ওইবগী মখাদা কমদৌনা দিজিতেল ইকোনোমি মিনিস্তরশিংনা য়ানবা পুরকখিবগে হায়গী মতাংদা মহাক্না ফোঙদোকখি।

শ্রী রজিব চন্দ্রসেখরনা হায়খি মরুওইবা হিরম অহুম-দিজিতেল পব্লিক ইনফ্রাস্ত্রকচর, সাইবর সেকুরিতি অমসুং দিজিতেল স্কিলশিংগী মতাংদা লৈবাকশিংগী মরক্তা য়ানবা পুরক্লে। অহানবা ওইনা দি.পি.আইগী ৱাহন্থোক, ফ্রেমৱার্ক অমসুং প্রিন্সিপলশিংগী মতাংদা মালেমগী লৈবাকশিংগী মরক্তা য়ানবা পুরক্লে। জি-২০গী থৌরমশিংগী শরুক অমা ওইনা খন্ন-নৈনবশিং পাংথোক্লে। চাউখৎনবা তেক্নোলোজিগী খুৎলায়শিং ওইনা শীজিন্নবগী মতাংদা হৌজিক ভারত অসি খন্ন-নৈনবা লৈবাক অমা ওইরে। মীওই খুদিংমক্না শীজিন্নবা য়াবা দিজিতেল ইনফ্রাস্ত্রকচর অমা ওইনা, চাউখৎপা থিন্থহৌরবা লৈবাকশিংনা দি.পি.আইদা ভারতনা মাংজিল থারিবা অসি তুংইন্নবা লম্বী অমা ওইনা য়ানবা পুরক্লিবা অসি য়েংগদবনি। জি-২০গী মীফমশিংগী খুৎথাংদা, মরুওইনা গ্লোবেল সাউথকী লৈবাকশিংগীদমক পুম্নমক কোনশিন্নবা দি.পি.আইশিং অসি শক্তি লৈরবা থবক্নি হায়বা ঐখোয় মখা তানা খঙলে।

লৈবাক নিপাল হায়বদি অর্মেনিয়া, সৈরা লিওন, সুরিনাম, এন্তিগুৱা, বারবাদোস, ত্রিনিদাদ অমসুং তোবাগো, পাপুয়া নিউ গিনিয়া অমসুং মাওরিসিয়সকা ভারতনা এম.ও.য়ুশিং খুৎয়েক পীনখ্রে অমসুং মখোয়দা ভারতকী স্তেক অমসুং দি.পি.আই মমল লৌদনা পীখ্রে। হায়রিবা লৈবাকশিং অসি হৌজিক মখোয়গী লৈবাকশিংদা হায়রিবা তেক্নোলোজিশিং অসি শীজিন্নবগী খুদোংচাবা ফংলে।

মিনিস্তরনা হায়খি দি.পি.আইশিংগী মথক্তা, লৈবাকশিং য়াংনা শেন-থুম চাউখৎনবগীদমক সাইবর সেকুরিতি অসি য়াম্না মরুওই। ললোন-ইতিক্কী থবকশিং ঙাক-শেন্নবা করিগীদমক সাইবর সেকুরিতি দরকার ওইরিবনো হায়বগী মতাংদা জি-২০ দিজিতেল ইকোনোমি মিনিস্তরশিংগী মীফমদা পাক-শন্না খন্নখ্রে। শেন-থুম চাউখৎপা অমসুং মালেমগী শেন্মিৎলো ফগৎহনবদা দিজিতেল ইকোনোমি অসি অচৌবা মচাক অমা ওইবা মরম্না মালেমগী লৈবাকশিংগী ওইনা সাইবর সেকুরিতি অসি মরুওইবা ৱাফম অমনি।

মিনিস্তরনা হায়খি য়ানবা পুরকখিবা অহুমশুবা ৱাফমদি দিজিতেল স্কিলশিংনি। কোবিদ-১৯ লাইচৎ মতুংগী দিজিতেলগী তাইবংদা, লৈবাকশিংনা দিজিতেল স্কিলশিং তম্বা অমসুং নহারোলশিংদা খঙহনবা হায়বসি তঙাইফদ্রে। ঐখোয়গী নহারোলশিং দিজিতেল স্কিলশিং হৈহন্নবা ভারতনা মীৎয়ং চঙলে। মসিগী ৱাফম অসি মীফম মনুংদা মরুওইনা খন্নখি। অমগা অমগা মতেং পীনবদা লৈবাক কয়ানা থৱায় য়াওনখি অমসুং লাক্লিবা চহি কয়াদা থেংনগদবা খুদোংচাদবশিং থেংননবা তুংদগী থৌরাং তৌরবা স্কিল অমসুং দিজিতেলগী থৌরাং তৌনবা ভারতনা শেম-শারে।

****