Ha ka sienjam ka ban ai jingiarap ia baroh ki iing ha ka ri, ka Sorkar ba ialam da u Myntri Rangbah Duh, u Narendra Modi ka la pynbna ia ka jingpynduna dor jong ki tyndong gas. Naduh ka 30.08.2023, ka dor jong ka tyndong LPG ba 14.2 Kg ka dei ka ban pynduna da T 200 ha baroh ki iew ha kylleng ka ri. Ha Delhi, kane ka rai kan pynduna ia ka dor jong ka tyndong gas kaba 14.2 Kg na ka dor kaba T 1103 mynta ia ka shi tyndong sha ka T 903 ia ka shi tyndong. U Myntri Rangbah Duh u la ong, “Kane ka dei ka jingai sngewbha ia baroh ki hynmen ki para jong nga ha ka ri ha ka Raksha Bandhan. Ka Sorkar jong ngi kan leh ia kiba donkam ban kyntiew ia ka jingim jong ki briew bad ruh ban ai jingmyntoi ia kiba duk ba suk bad kiba pdeng ka kamai kajih.”

Kane ka jingpynduna dor ka long ruh bad ka subsidy kaba T 200 kaba la don lypa ia man ka tyndong sha ki longiing PMUY ka ban dang bteng. Kumta, na ka bynta ki longiing PMUY, ka dor ha Delhi hadien kane ka jingpynduna dor kan long T 703 ia man ka tyndong.

Lah ban shu kdew hangne ba ki don palat 31 klur ki longiing ba pyndonkam LPG ha ka ri ba kynthup 9.6 klur ki longiing ba ioh jingmyntoi na ka PMUY bad kane ka jingpynduna kan iarap ia baroh kiba pyndonkam LPG ha ka ri. Ban pyndep ia ki application PMUY ba dang sah bad ban ai ia ki LPG connection khlem ka deposit ia baroh ki iing kiba dei ban ioh ia kane, ka Sorkar shen kan sdang ia ka jingsam ia ki PMUY connection sha 75 lak ki longkmie na ki longiing ba duna jingioh ki bym don ia ka LPG connection. Kane kan kyntiew ia ka jingdon ki briew kiba ioh jingmyntoi na ka PMUY na ka 9.6 klur sha ka 10.35 klur.

Kine ki sienjam ki wan kum shi bynta ki jingpyrshang ka Sorkar ban pynduna ia jingban khia ia ki briew bad ruh ban kyntiew ia ka bha ka miat jong ki longiing. Ka jingpynduna ia ka dor jong ka gas ka dei ka dak jong ka jingieng skhem ka Sorkar ban peit nyngkong ia ka bha ka miat jong ki briew bad ban pynthikna ba baroh ki ioh ia ki jingdonkam ha ki dor kiba iahap.

U Hardeep Singh Puri, Myntri ka tnat Petroleum and Natural Gas u la ong ba u dap da ka jingkmen halor kane ka rai da kaba bynrap, “Ngi sngewthuh ia ki jingeh jong ki longiing ban pyniaid ia ka pisa. Ka jingpynduna ia ka bai gas ka thmu ban ai jingiarap ia ki longiing bad ki briew bad ka kyrshan ruh ia ka thong jong ka Sorkar ban pynthikna ka jingioh ia ki mar ba donkam ha ka dor kaba iahap."

La kyrmen ba ka jingpynduna ia ka bai gas kan iarap pynduna ia ka jinglut jingsep jong ki briew. Ka sienjam jong ka Sorkar ka dei ka ban pynduna ia ka jinglut jingsep jong ki longiing bad kan iarap ia ka bor pynlut pisa jong ki.

Ka Sorkar ka la shim ia ki sienjam ban pynduna ia ka jingbankhia jong ki briew bad kane ka jingpynduna ia ka bai gas ka dei ka dak jong ka jingsngewthuh jong ka Sorkar ia ki jingdonkam jong ki briew bad ka jingieng skhem jong ka na ka bynta ka bha ka miat jong ki.

***