ప్రధానమంత్రి శ్రీ నరేంద్ర మోదీ 2023 ఆగస్టు 23న దక్షిణాఫ్రికా అధ్యక్షతన జోహాన్నెస్‌బర్గ్‌ లో ప్రారంభమైన ‘బ్రిక్స్‌’ 15వ శిఖరాగ్ర సదస్సులో పాల్గొన్నారు. ఈ సందర్భంగా ప్రపంచ ఆర్థిక పునరుద్ధరణ, ఆఫ్రికాసహా దక్షిణార్థ గోళ దేశాలతో భాగస్వామ్యం తదితర అంశాలపై కూటమి దేశాల అధినేతలు ఈ సందర్భంగా చర్చించారు. అలాగే ‘బ్రిక్స్’ కార్యాచరణ జాబితాలోని అంశాల అమలులో ఇప్పటిదాకా పురోగతిని వారు సమీక్షించారు.

ప్రధానమంత్రి తన ప్రసంగంలో భాగంగా- మరింత బలమైన ‘బ్రిక్స్‌’ కోసం ముందడుగు వేయాల్సిన అవసరాన్ని నొక్కిచెబుతూ కూటమికి కొత్త నిర్వచనం ఇచ్చారు. ఈ మేరకు:

బి - అవరో్ధాలను అధిగమించడం (బ్రేకింగ్‌ బారియర్స్‌)

ఆర్‌- ఆర్థిక వ్యవస్థలకు పునరుత్తేజం (రీవైటలైజింగ్‌ ఎకానమీస్‌)

ఐ – ఆవిష్కరణ స్ఫూర్తి (ఇన్‌స్పైరింగ్‌ ఇన్నొవేషన్‌)

సి – అవకాశాల సృష్టి (క్రియేటింగ్‌ ఆపర్చునిటీస్‌)

ఎస్‌- భవిష్యత్తుకు రూపం (షేపింగ్‌ ది ఫ్యూచర్‌)

అదేవిధంగా వివిధ చర్యలకు సంబంధించి కింది అంశాలను ప్రధానమంత్రి నొక్కిచెప్పారు:

• ఐక్యరాజ్య సమితి భద్రత మండలి సంస్కరణలకు నిర్దిష్ట గడువు విధింపు
• బహుపాక్షిక ఆర్థిక సంస్థలలో సంస్కరణలు
• ప్రపంచ వాణిజ్య సంస్థ (డబ్ల్యుటిఒ)కు సంస్కరణలు
• బ్రిక్స్‌ విస్తరణపై ఏకాభిప్రాయ సాధన
• బ్రిక్స్‌ ద్వారా ప్రపంచానికి విభజిత దృక్కోణం కాకుండా ఐక్యత సందేశం పంపడం
• బ్రిక్స్‌ అంతరిక్ష పరిశోధన సమాఖ్య ఏర్పాటుకు ప్రతిపాదన
• భారత డిజిటల్‌ ప్రభుత్వ మౌలిక సదుపాయాలు- ‘ఇండియన్‌ శ్టాక్స్’ను బ్రిక్స్‌ భాగస్వాములతో పంచుకోవడానికి సంసిద్ధత.
• నైపుణ్యాల గుర్తింపు.. శిక్షణ.. బ్రిక్స్‌ దేశాల మధ్య నిపుణ మానవ వనరుల ఆదానప్రదానాలకు ప్రతిపాదన
• ‘అంతర్జాతీయ పులిజాతి సంరక్షణ కూటమి’ ఒప్పందం కింద వాటి సంరక్షణకు బ్రిక్స్‌ సంయుక్త కృషిపై ప్రతిపాదన
• బ్రిక్స్‌ దేశాల మధ్య సంప్రదాయ వైద్యవిధానాల భాండాగారం ఏర్పాటుకు ప్రతిపాదన
• జి-20లో ఆఫ్రికా సమాఖ్యకు శాశ్వత సభ్యత్వంపై బ్రిక్స్‌ మద్దతుకు పిలుపు

*****