নই দিল্লীগী বিজ্ঞান ভবন্দা, “য়ুবা শক্তি: গল্ভানাইজিং ইন্দিয়া” হায়বা হীরমদা পাঙথোকপা সেসন অমদা কমদৌনা লৈঙাক্কী খুজিল থৌরাং অমদি প্রোগ্রামশিংনা হৌখিবা চহি মাপনদা নহাশিং মপাঙ্গল হাপ্পবদা থৌদাং য়াখিবগে হায়বগী মতাঙদা খন্ননবা খুন্নাইগী তোঙান তোঙানবা শরুকশিংদগী মীওইশিংনা পুন্না শরুক য়াখি‍। সেসন অদু প্রসার ভারতীনা শীনবা “নেস্নেল কনক্লেব: চহি ৯ – সেবা, সুসাসন, গরীব কল্য়ান” হায়রিবা মীফমদুদা পাঙথোকখিবনি‍। শরুক য়াখিবা পেনেলিস্তশিংগী মরক্তা ইসপ্রেসো তেক্নোলোজিজকী দাইরেক্তর য়সোধরা বজোরিয়া; ওয়ো রুম্সকী সি.ই.ও. রিতেস অগর্ৱাল; হান্নগী ইন্দিয়ন হোকী কেপ্তেন বিরেন রাসকিন্হা; বোক্সর অখিল কুমার; ম্যুজিক্সিয়ন অমান অলি বঙ্গস; অমদি এক্তর রিসব সেত্তী য়াওখি‍। সেসন অদু রেদ এফ.এম.গী রেদিও জোকী রৌনক্না ৱাতেমখি‍।

"ওন্ত্রপ্রিন্যুরশিংদা ঙাক্লৌ পীবগী থৌওং ইনস্তিত্যুস্নেলাইজ তৌবগীদমক লৈঙাকপু শিংথাবা য়াই"

ইসপ্রেসো তেক্নোলোজিজকী দাইরেক্তর য়সোধরা বজোরিয়ানা স্তেন্দ অপ ইন্দিয়া অমদি স্তার্তঅপ ইন্দিয়ানচিংবা স্কীমশিংনা ওন্ত্রপ্রিন্যুরশিংবু মপাঙ্গল হাপ্পদা অচৌবা শক্লোন লৌখি হায়খি‍। লৈঙাক্কী ওপন নেতৱর্ক ফোর দিজিতেল কম্মর্সনা মরম ওইরগা মহাক্কী পোত্থোক য়োনবা ঙম্লবা নুপী লৌমী অমবু মহাক্না খুদম ওইনা পীখি‍। “ফার্মর্স প্রদ্যুসর ওর্গনাইজেসন অমদি সেল্ফ হেল্প গ্রুপশিংনা লৌমী অমদি মনুং হঞ্জিনবা মফমশিংদা লৈরিবা মীওইশিংদা গ্রাউন্দ লেবেল সপ্পোর্ত পীরি‍। অসিগুম্বা মখলগী সপ্পোর্তশিং পীবগী থৌওংবু ইনস্তিত্যুস্নেলাইজ তৌদুনা অপীকপা ওন্ত্রপ্রিন্যুরশিংদা ফাওবা মান্নবা মফম ফংহনবগীদমক লৈঙাক অসিবু চাউনা থাগৎপা য়াই,” হায়না মহাক্না হায়খি‍।

"লৈঙাক্কী খুজিল থৌরাংশিংনা ঐখোয়গী পুন্সিগী শরুক ওইরবা তোঙান তোঙানবা ইনোভেসনশিং পুথোরক্লি"

ওয়ো রুম্সকী সি.ই.ও. রিতেস অগর্ৱালনা ঙসি ঐখোয়গী পুন্সিগী শরুক অমা ওইরবা তোঙান তোঙানবা সর্ভিসশিং কয়া অমদি চহি মাপনগী মমাঙদা লৈরমদে হায়খি‍। “ভারত, স্তার্তঅপশিং খুমাঙ চাওশিনহল্লিবা নহাশিংনা থৌরগা পুদুনা নীংথিনা চঙশিল্লি‍। ঐখোয় মালেমসিগী তরং তরংবা মফম অমা ওইরে,” হায়না মহাক্না হায়খি‍।

"গ্রাসরুত থাক্তা শান্ন-খোৎনবগী ইনফ্রাস্ত্রকচর শেমগৎনবগী শেল থাদবদা লৈঙাক্না অচৌবা  থবক পায়খৎলি"

হান্নগী ইন্দিয়ন হোকী কেপ্তেন বিরেন রাসকিন্হানা তোকিও ওলিম্পিক্সতা ভারতকী নুপাগী হোকী তীম্না নীংথিনা শান্নখি‍। “তোকিও ওলিম্পিক্সতা শান্নখিবা মশান্না কয়াগী মরক্তগী ঐগীদমক্তা খ্বায়দগী মরুওইবা পাউদি মরিশুবা মফম ফংখিবা মেদল ফংগদবা শুপ্নতগী মফম অমখক ৱাৎখিবা ভারতকী নুপীগী হোকী তীমগী পর্ফোর্মেন্স অদুনি‍। ২০১৬ দগী ২০২১ ফাওবদা গ্রাসরুত থাক্তা শেল য়াম্না থাদরে‍। এস্ত্রো তর্ফ পিত্চ মশিং মশক থোক্না হেনগৎলে; শান্ন-খোৎনবগী ইনফ্রাস্ত্রকচর য়াম্না ফগৎলে, অদুম ওইনমক ঐখোয় চঙশিনগদবা য়াম্না ৱাৎলি‍। হোকী হকচাংগী পাঙ্গল ফুদোকপা মশান্না অমা ওইরে, ঐখোয়না মালেমগী খ্বায়দগী ফবা লৈবাক্কী হৈথোই শিংথোইববু লম্বা তৌবা ঙমগনি, ঐখোয়না শোত্থরিবা হায়ববু হকচাং ফবা অমদি পাঙ্গল অনিসিদনি‍। হায়রিবা হীরম অসিদসু ঐখোয়না মশক থোক্না খুমাঙ চাওশিল্লক্লি,” হায়না মহাক্না হায়খি‍। হান্নগী কেপ্তেন অদুনা অপীকপা খুঙ্গংশিংদগী নুপীমচাশিংনা ওলিম্পিক্সতা শান্নরকপদা নুপীমচা মিলিয়ন কয়াদা চাউথোকচবা ফাওহল্লি অমদি থাজবা পীরি হায়খি‍। গ্রাসরুত থাক্তা শেল থাদদুনা লৈঙাক অসিনা অফবা থবক অমা পায়খৎলি হায়না মহাক্না হায়খি‍।

ফিৎ ইন্দিয়া অমদি খেলো ইন্দিয়াগী ৱাখল্লোন অসি অওনবা পুরক্নিংঙাই ওইবা, শান্ন-খোৎনবগী কল্চল অমদি কোচ হায়রিবা সি অনিসিগী পাম্বৈ পীরিবা থৌরাং অনিনি হায়খি‍। শান্ন-খোৎনবনা ঐগী পুন্সিদা পরা য়াম্না তম্বিখ্রে, শান্ন-খোৎনবনা ঐখোয়দা তম্বিবা খ্বায়দগী মরুওইবা পরাদি মা্য়থিববু য়াজবা অমদি লেপ্তনা তমশিন্দুনা ফীভম ফগৎহন্নবগী পরাদুনি,” হায়না মহাক্না হায়খি‍। করিগুম্বা ঐখোয়নে ফীজিকেল এগুকেসন ওজাগী থাক অসি সাইন্সকী ওজাগী থাক্তা পুখৎলবদি ঐখোয়না তশেংনা শান্ন-খোৎনবদা অহোংবা অমদি অওনবা পুরকপা ঙমগনি হায়বা ৱাফমসু মহাক্না থমখি‍।

"খেলো ইন্দিয়া অমদি ফিত ইন্দিয়ানচিংবা স্কীমশিং লৈবনা ভারতকী শান্নরোয়শিংগী তুংলমচৎ তরং তরংই"

প্রধান মন্ত্রীনা অচৌবা তুর্নামেন্তশিংগী মাঙওইননা শান্নরোয়শিংগা উনদুনা ৱারী ৱাতায় শান্নবনা শান্নরোয়শিংদা নুংগী ওইবা থৌনা য়াম্না পী হায়না বোক্সর অখিল কুমারনা হায়খি‍। শান্ন-খোৎনববু য়োকখৎনবগীদমক স্পোর্তস কলচর শেমগৎপা মরুওই‍ হায়না মহাক্না হায়খি‍। মশা মউ ফনা থম্নবগী থৌরাংদা ফিৎ ইন্দিয়া মুভমেন্তনা লৌরিবা থৌদাংবুসু মহাক্না থাগৎখি‍। শান্নরোয়শিংবু শেলথুমগী মথা শাহন্দনা মখোয়গী মশান্নদুদা পুক্নিং লুপ্পা ঙমহন্নবা শান্নরোয়শিংদা পীরিবা শেলগী তেংবাংগী মরুওইববুসু মহাক্না থমখি‍। খেলো ইন্দিয়াগুম্বা মপাঙ্গল হাপ্লিবা স্কীমশিং লৈবনা ভারতকী শান্নরোয়শিংগী তুংলমচৎ তরং তরংই হায়না মহাক্না মখা তাখি‍।

"অপীকপা খুঙ্গং অমদি ময়োল্লমশিংদগী হৈথোই শিংথোইবা মীওইশিং য়োকখৎপগী থবক লৈঙাক্না নীংথিনা তৌরি"

ম্যুজিক্সিয়ন অমান অলি বঙ্গসনা লৈঙাক অসিনা নহরোলশিংগীদমক তৌবা য়াবা য়াম্না তৌরি হায়খি‍। লৈঙাক অসিনা অপীকপা খুঙ্গংশিং অমদি ময়োল্লমশিংদগী হৈথোই শিংথোইবা নহাশিংবু পুক্নিং থৌগৎপা অমদি য়োকখৎপিবা উবসি অফবা থৌওংনি‍। হৌজিক অসি ভারতকী মচিন তুমখৎলক্লিবা মতমনি ঐমদি আর্ত অমসুং কলচর মখল খুদিংগী মরমদা খঙবগী চাংসু নীংথিনা হেনগৎলে হায়না মহাক্না হায়খি‍।

"প্রধান মন্ত্রীনা ফিল্মমেকরশিংদা ভারতকী তোপ তোপ্পা ৱারীশিংবু মালেমগী মফমদা উৎননবা হায়খি"

এক্তর রিসব সেত্তীনা ফিল্ম হায়বসি মীয়ামদা পাউজেল য়ৌহন্নবগী মপাঙ্গল কনবা পাম্বৈ অমা ওইরক্লে‍ হায়খি‍। “মমাঙদা, ফিল্ম কয়ানা ঐখোয়গী লৈবাক অসিবু ফজদবা মওংদা উৎনরম্মি, ঐনা খনবদা ঐখোয়গী লৈবাক অসিবু অফবা মওংদা উত্থোকপা মরুওই হায়না খল্লি‍। ঐখোয়গী তোপ তোপ্পা থাজনবী, পুন্সি মহিং, লাইথৌ অমদি চীঞ্জাকনচিংবদা মমি তারিবা ঐখোয়গী অপীকপা খুঙ্গংশিংগী তোপ তোপ্পা ৱারীশিংবু পুথোক্তুনা লীবা হায়বসি ঐগী ৱাখল্লোন্নি‍। ঐখোয়গী ভারতকী নাৎ অমদি ৱারীশিং মালেমগী মফমদা য়ৌহনবা তঙাই ফদে হায়বসি প্রধান মন্ত্রীনা ফিল্ম ইন্দস্ত্রীদা পীবা পাউজেলনি,” হায়না মহাক্না হায়খি‍।

***