ইকায়খুম্নরবা মেম্বরশিং,

১. সংসদকী হাওস অনিমক্তা ৱা ঙাংবা অসিদা ঐ য়াম্না হরাওই। থা খরগী মমাঙদা, ঐখোয়গী লৈবাক নিংতম্বা চহি ৭৫ মপুং ফাখ্রে অমসুং ‘অমৃত কাল’ য়ৌরে। মসিগী ‘অজাদি কা অমৃত কাল’ অসিনা  চহি লিশিং কয়াগী ঐখোয়গী হৌখ্রবা মতমশিং, ভারতকী নিংতম ইহৌগী ইথিলশিং অমসুং তুংগী অফবা অমগীদমক ভারতকী ৱারেপকী চাউথোকচবা পোকহল্লে।

২. চহি ২৫গী ‘অমৃতা কাল’ অসি নিংতম্বা চহি ১০০ মপুংফারকপগী মতমনি অমসুং চাউখৎলবা ভারত অমা ওইহন্নবা থবক পায়খৎলি। চহি ২৫গী মতম অসিদা ঐখোয়গী নাগরিক খুদিংমক মখোয়গী মথৌশিং পাংথোক্কদবনি। ঐখোয়গী লৈজবা থৌনা পুথোক্তুনা ঐখোয় লেপ্তনা থবক তৌনবা খুদোংচাবা অমনি।

• ২০৪৭ ফাওবদা, অনৌবা মতমগী মচাকশিং লৈরবা লৈবাক অমা ঐখোয়না শেমগৎকদবনি।

• মশাগী ওক্নবা পুথোকচবা অমসুং লৈবাক অসিগী মীওইশিংগী দরকার ওইবশিং ফংহনবা ঙম্বা ভারত অমা ঐখোয়না শেমগৎকদবনি।

• লায়রবা লৈতবা অমসুং মিদ্দল ক্লাসশিংশু নুংঙাইবা ভারত অমা ওইহনগদবনি।

• খুন্নাই অমসুং লৈবাক লমজিংদুনা নহারোলশিং অমসুং নুপীগী শক্তিনা মাংজিল থাবা ভারত অমা ওইগদবনি।

• খেন্নবশিং হেন্না মশক থোকহনবা অমসুং অপুনবগী শক্তম থুগাইবা ঙমদবা ভারত অমা ওইহনগদবনি।

৩. ২০৪৭দা লৈবাক অসিনা মসি থবক ওইনা পাংথোকপা মতমদা, লৈবাক অসিনা মসিগী য়ুম্ফম অদু উবা ফংগনি। অজাদি কা অমৃত কালগী হৌরকপা মতম অসি তোঙানবা মওংদা উগনি। মরম অসিনা ‘অমৃত কাল’গী মতম অসি য়াম্না মরুওই।

ইকায়খুম্নরবা মেম্বরশিং,

৪. মীয়াম্না মখোয়গী সেবা তৌনবা অহানবা ওইনা ঐগী সরকারদা খুদোংচাবা পীবা মতমদা, ঐখোয়না সবকা সাথ, সবকা বিকাস হায়বা লাইৱা অসিগা লোয়ন্না থবক হৌখি। মতমগী মতুংইন্না, সবকা বিশ্বাস অমসুং সবকা প্রায়াস হাপচিনখি। মসিগী লাইৱা অসি চাউখৎলবা ভারত অমা শেমগৎনবা ইথিল ওইরে। থা খরগী মনুংদা, ঐগী সরকার অসি চাউখৎপগী লম্বীদা লাকপা চহি ৯ মপুংফারগনি।

৫. ঐগী সরকারগী চহি ৯গী মতম অসিদা অহানবা ওইনা মীয়াম্না অফবা অহোংবা কয়া উবা ফংলে। খ্বাইদগী চাউবা অহোংবদি ভারতমচা খুদিংমক্কী থাজবা মতোল লোম্বা অসিনি অমসুং মালেম্না ভারত্তা য়েংবা মীৎয়েং হোংলে।

• মতম অমদা ভারতনা মসিগী অৱাবশিং কোক্নবা অতোপ্পশিংগী মতেং লৌরম্মি, অদুবু ঙসিদি মালেম্না থেংনরিবা অৱাবশিং কোকহনবা লৈবাক অমা ওইরক্লি।

• চহি খর অসিদা, মতম শাংনা ঙাইরক্লবা মীয়ামদা, তঙাইফদনা চঙদ্রবা য়াদ্রবা খুদোংচাবশিং ফংহল্লে।

• ঐখোয়না মতম শাংনা ঙাইরক্লবা অনৌবা মতমগী মচাক-মথুমশিং, চহি খর অসিদা লৈবাক অসিদা লৈরে।

• ভারতকী দিজিতেল নেতৱার্ক অসি চাউখৎলবা লৈবাকশিং ফাওবা ইথিল পীবা অমা ওইরে।

• সরকারগী স্কিমশিংদা শেঞ্জা-থুমজা অমসুং স্কামশিং লৈহন্দনবা মতম শাংনা তকশিন্দুনা লাকপা অদু হৌজিক থবক ওইনা পাংথোক্লে।

• ঙসিদি থৌশিল শোইবগী মরৈ য়েৎনদ্রে, মসিগী মহুত্তা য়াংনা চাউখৎপা অমসুং মহাক্কী ৱারেপশিং শান্না উবা ঙম্বগীদমক ভারত মমিং চৎলে।

• মরম অসিনা হৌজিক ঐখোয় মালেমদা ৫শুবা খ্বাইদগী চাউবা ইকোনোমি ওইবা ঙম্লে অমসুং ১০শুবা মফমদগী হাইগৎলকপনি।

মসি মথং চহি ২৫দা চাউখৎলবা লৈবাক অমা ওইহন্নবা মশা মরোমদোম থাজনবগী য়ুম্ফম্নি।

ইকায়খুম্নরবা মেম্বরশিং,

৬. ভাগবান বাসাভেশ্বারানা হায়খি- থবক অসি লাইনিংনি অমসুং সিবা অসি লাইনিং অমনি। মসিগী মতুংইন্না, ঐগী সরকার অসি লৈবাক শেমগৎনবা মথৌ ফজনা পাংথোক্লি।

• ঙসিদি ভারত্তা তুংদু লৈতাবা, অকিবা লৈতবা, ৱারেপ লৌবা ঙম্বা অমসুং পান্দমশিংগা লোয়ন্না থবক তৌবা সরকার অমা লৈরে।

• ঙসিদি ভারত পুকচেল শেংবা সরকার অমা লৈরে।

• ঙসিদি ভারত লায়রবশিং অৱাবা মতম পুম্নমক্কী ওইনা কোকহন্নবা থবক তৌরিবা সরকার অমা লৈরে।

• মমাঙদা অমুক্তা ওইখিদ্রিবা মওংদা য়াংনা অমসুং পাক-চাউনা থবক তৌবা সরকার অমা ঙসি ভারতকী লৈরে।

• ইন্নোবেস অমসুং তেক্নোলোজি শীজিন্নদুনা মীয়ামগী থবক তৌবা ঙসি ভারতকী সরকার অমা   লৈরে।

• নুপীশিংনা থেংনবা অৱাবা খুদিংমক কোকহন্নবা থবক তৌরিবা সরকার অমা ঙসি ভারতকী লৈরে।

• চাউখৎনবা অমসুং মহৌশাগী খল ঙাক্নবা থবক তৌবা সরকার অমা ঙসি ভারতকী লৈরে।

• হেরিতেচ ঙাকপা অমসুং মতমগা চুনবা থবকশিং পায়খৎপা ঙসি ভারতকী সরকার অমা লৈরে।

• মালেমগী ফম্পাক্তা মসিগী লৌফম থোকপা থৌদাং লৌনবা থাজবগা লোয়ন্না মাঙলোমদা চঙশিল্লিবা সরকার অমা ঙসি ভারতকী লৈরে।

ইকায়খুম্নরবা মেম্বরশিং,

৭. তার্ম অনিরমক থংন-থংননা মরা চেৎপা সরকার অমা খনবগীদমক ঙসি মীফম অসিদা ঐনা লৈবাক অসিগী মীয়াম থাগৎচরি। সর্জিকেল স্ত্রাইক, এল.ও.সি অমসুং এল.এ.সিগী পাউখুমশিং, আর্তিকেল ৩৭০ অমসুং ত্রিপল তালাগ মুৎথৎপা য়াওনা ঐগী সরকার অসিনা মশক থোকপা থবক কয়া পাংথোক্তুনা অকনবা সরকার অমা ওইরে।

৮. চহি ১০০গী মনুংদা থোকপা খ্বাইদগী শাথিবা লাইচৎ মরা চেৎপা সরকার অসিনা থেংনবা ঙম্লে। রাজনিতিগী লৈতাদবা লৈবা মালেমগী লৈবাকশিং ঙসি ফাওবা অৱাবা থেংনরি। অদুবু লৈবাক্কী য়াইফনবা ঐগী সরকারনা ৱারেপশিং লৌবদগী মালেমগী লৈবাক অতৈদগী ভারতনা ফিবম হেন্না ফরে।

ইকায়খুম্নরবা মেম্বরশিং,

৯. শেঞ্জা-থুমজা অসি গনতন্ত্র অমসুং খুন্নাইগী খ্বাইদগী চাউবা য়েক্নবনি হায়বা ঐগী সরকারগী অচেৎপা থাজবনি। মরম অদুনা চহি খর অসিদা শেঞ্জা-থুমজাগী মায়োক্তা অকনবা থবক অমা পায়খৎলে। সরকার অসিনা পুকচেল শেংবশিং মনা পীনবা ঐখোয়না থবক পায়খৎলে। খুন্নাইদা শেঞ্জা-থুমজা তৌবা অসি মফম পীদনবা লৈবাক অসিগী ওইনা খুন্নাইগী ভাব তাবা হেনগৎলক্লে।

১০. হৌখিবা চহি খর অসিদা, শেঞ্জা-থুমজা লৈতবা ফিবম অমা শেমগৎনবা, বেনামি প্রোপর্তি এক্ত লাউথোক্লে। শেন-থুমগী অরানবা তৌরম্লগা চেনখিবশিংগী মরল-মথুম মৎনবা ফিউজিতিপ ইকোনোমিক ওফেন্দরর্স এক্ত পাস তৌরে। তেন্দরশিং অমসুং সরকারগী পোৎ-চৈ লৈনবা হৌজিক গভর্নমেন্ত-ই-মার্কেতপ্লেস(জি ই এম) লৈরে অমসুং মসিদা হৌজিক ফাওবা লুপা করোর লাখ ৩ হেন্না ত্রান্সসেক্সন তৌখ্রে।

১১. ঙসিদি, ভারত শেমগৎনবা পুকচেল শেংনা মতেং পাংবশিংদা অখন্নবা ইকায়খুম্নবা উৎলে। ইনকম তেক্স রিতর্নশিং ফাইল তৌবদা অরুবশিং লৌথোক্তুনা ঐখোয়গী মীয়ামগী পুন্সি লাইহল্লে। ফেসলেস এসেসমেন্ত পাংথোক্তুনা মরম চানা অমসুং অরোন-অথুপ লৈতনা থবক তৌরে। মমাঙদা তেক্স রিফন্দশিংগী মতম শাংনা ঙাইখি। ঙসিদা আই.তি.আর ফাইল তৌখিবা নুমিৎ খরনিগী মনুংদা রিফন্দশিং ফংলে। ঙসিদি জি.এস.তিনা অরোন-অথুপ লৈহন্দ্রে অমসুং তেক্স থিরিবশিংগী চিংলেম্বা লৈহল্লে।

১২. ৱান নেসন ৱা কার্দ হৌদোক্তুনা শাশিন্নবা বেনিফিসরিশিং লৌথোক্লে। দি.বি.তি অমসুং দিজিতেল ইন্দিয়াগী মওংদা লৈবাক অসিদা মরা চেৎপা অমসুং মনুং-মপান ফাওনা উবা লৈঙাক অমা লৈরে।ঙসিদি স্কিম ৩০০ হেনবগী শেনফমশিং বিনিফিসরিশিংগী বেঙ্ক একাউন্তশিংদা হকথেংন্না য়ৌরে। অসিগুম্বা স্কিমশিং অমসুং থবকশিংনা মরম ওইদুনা কোবিদ লাইচৎ মনুংদা মীওই করোর কয়া লায়রবগী পনখৈ মখাদা লৈখিগদবদগী কনবা ঙমখিবনি হায়বা ৱার্ল্দ বেঙ্কনা খঙলে।

১৩. শেঞ্জা-থুমজা লাকশিনবা অমসুং তেক্সকী শেনফম খুদিংমক অফবা থবক্তা শীজিন্নবদা তেক্স থিরবশিং চাউথোকচবা ফাওরে।

ইকায়খুম্নরবা মেম্বরশিং,

১৪. সরকারশিংনা রাজনিতিগী অশম্বা লম্বীশিং চৎতবা, ঙসিদি লৈবাক অসিগী তেক্স থিরিবা মীওইশিংনা পাম্মী। মীয়াম্না থেংনরিবা অৱাবশিং মতম পুম্নমক্কী ওইনা কোকহন্নবা থৌরাংশিং মহাক্না পাম্মী। মরম অদুনা হৌজিক থেংনরিবা অৱাবশিং কোকহনবগা লোয়ন্না মতম শাংনা মখোয়গী অৱাবশিং কোকহন্নবা ঐগী সরকারনা থবক পায়খৎলে।

১৫. ‘লায়রবা কোকহনবা’ হায়বসি মখা তানা খোল্লাউ অমা ওইদ্রে। মখোয়গী অৱাবশিং মতম পুম্নমক্কী ওইনা কোকহন্দুনা লায়রবশিং শক্তি পীনবা মাইকৈদা ঐগী সরকার হৌজিক থবক পায়খৎলি।

১৬. খুদম ওইনা, লায়রবগী অচৌবা মরম অসি অনাবনা ওইহল্লি। অরুবা অনাবা অমনা ইমুং অমগী মোরেল শোকহল্লি অমসুং মীরোল কয়া মথং-মথং শেন্দোন্না খ্বাং য়ৌহল্লি। লায়রবশিং মসিগী অৱাবা অসিদগী কোকহন্নবা, লৈবাক শীনবা থুংনা অয়ুস্মান ভারত য়োজনা হৌদোক্লে। স্কিম অসিগী মখাদা, লৈবাক অসিগী মীওই করোর ৫০ হেন্না লেম্না লায়য়েংবগী খুদোংচাবা পীরে। স্কিম অসিনা লায়রবা মীওই করোর কয়া হেন্না লায়রবদগী কনবা ঙম্লে, লায়য়েংবদা চংগদবা লুপা করোর ৮০,০০০গী শেনফম কনবা ঙম্লে। ঙসিদি লৈবাক শীনবা থুংনা লৈরিবা জন ঔশাধি কেন্দ্র ৯,০০০দা মমল য়াম্না হোংবা হিদাক-লাংথকশিং ফংহল্লে। মসিগী ফল ওইনা হৌখিবা চহি খর অসিদা লায়রবশিংগী লুপা করোর ২০,০০০গী শেনফম কনবা ঙম্লে। অয়ুস্মান ভারত য়োজনা অমসুং জন ঔশাধি স্কিমশিংনা লৈবাক অসিগী মীয়ামদা লুপা করোর লাখ ১গী মতেং পাংখ্রে।

১৭. য়ুমথোং খুদিংমক্তা ঈশিং পীনবা ঐগী সরকারনা জল জিবন মিসন হৌদোক্লে। মিসন অসি হৌদোক্ত্রিঙৈ চহি ৭০গী মমাঙদা, লৈবাক অসিদা শুপ্নগী ইমুং করোর ৩.২৫ রোম খক তোতি ঈশিং ফংখি। ঙসিদি মিসন অসিগী মখাদা, চহি অহুম অসিগী মনুংদা ইমুং করোর ১১ রোম তোতি ঈশিং ফংলে। লায়রবা ইমুংশিং স্কিম অসিগী কান্নবা ফংলে অমসুং মখোয়গী অৱাবশিং মতম পুম্নমক্কী ওইনা কোকহল্লে।

১৮. হৌখিবা চহি খর অসিদা, সরকারনা লায়রবা ইমুং করোর ৩.৫ হেন্না পাক্কাগী য়ুমশিং শাখ্রে। মসিনা ইমুংগী ফিবম ফগৎহনবা খক নত্তনা, ইমুং অদুদা চাউরক্লিবা অঙাংশিং মশানা মশাবু থাজবা হেনগৎহল্লে। তোইলেত, মৈ, ঈশিং অমসুং চাক থোংনা গ্যাস অসিনচিংবা ফংহন্দুনা লায়রবশিংগী অৱাবশিং কোকহন্নবা সরকারনা থবক পায়খৎলে। মসিগী ফল ওইনা, ভারতগুম্বা চাউরবা লৈবাক অমগী লায়রবা মীওই চাদা ১০০ তশেংনা সরকারগী স্কিমশিংগী কান্নবশিং ফংলে হায়বা লৈবাক অসিগী মীয়াম্না থাজরে।

১৯. হৌখিবা চহি ৯ অসিদা, মীচং-মীখাই নাইদনা নাগরিক খুদিংমক্কী য়াইফনবা ঐগী সরকার অসিনা থবক তৌখ্রে। মসিগী মহৈ ওইনা, অপুনবা মীশিংগী চাদা ১০০ য়ৌগে তৌনা নত্ত্রগা য়াম্না নক্না তঙাইফদবা খুদোংচাবশিং ফংলে।

২০. স্কিমশিং মপুংফানা কান্নবা ফংহন্নবা অমসুং অন্তয়োদয়া ওইনবা ঐগী সরকারনা মপুংফানা থবক পায়খৎলে। ফংফম থোকপা বেনিফিসরিশিংনা সরকারগী স্কিমশিংগী কান্নবশিং ফংবা অমসুং কনাগুম্বা অমতা চিৎথহৌদবা হায়বসি ঐখোয়গী পান্দম্নি।

ইকায়খুম্নরবা মেম্বরশিং,

২১. কোবিদ লাইচৎ মনুংদা মালেমগী লায়রবশিংগী অৱাবশিং ঐখোয়না থেংনখ্রে। লায়রবশিংগী পুন্সি কন্নবা অমসুং লায়রবশিং চারা হেনহন্দনবা মরুওইবা থবক পায়খৎখিবা মালেমগী লৈবাকশিংগী মনুংদা ভারত অমনি। ঐগী সরকারনা প্রধান মন্ত্রী গরিব কলয়ান অন্না য়োজনা পায়খৎলকপা অসিদা হরাওই। মসি ৱাখল তাবা অমসুং লায়রবগী খনবা সরকার অমগী খুদম্নি। প্রধান মন্ত্রী গরিব কলয়ান অন্না য়োজনাগী মখাদা লায়রবশিংদা চেং পীনবা সরকারনা লুপা করোর লাখ ৩.৫ চাদিং তৌখ্রে। ঙসিদি মসিগী স্কিম অসি মালেম শীনবা থুংনা থাগৎনরে। 

ইকায়খুম্নরবা মেম্বরশিং,

২২. লৈবাক অসিগী মীওই কাংলুপ কয়া অমসুং লমদম কয়াগী অনিংবা অমসুং অপাম্বশিং ফংহল্লবা  খক্তদা চাউখৎপগী পান্দম ফংবা ঙমগনি। হৌজিক ঐগী সরকারনা শোৎথরবা কাংলুপশিং অমসুং শোৎথরবা মফমশিংদা অখন্নবা মীৎয়েং চংলে।

২৩. চহি কয়া শোৎথদুনা লাক্লবা খুন্নাইগী কাংলুপ খুদিংমক্কী অনিংবশিং ঐগী সরকারনা থুংহল্লে। লায়রবশিং, দলিতশিং, তোল্লবশিং অমসুং ত্রাইবেলশিংগী অনিংবশিং ঐখোয়না থুংহল্লে। থবক খুদিংমক, হোৎনরিবা খুদিংমক অপীকপা অমতা নত্তে, চাউখৎপদা মখোয় অমমমগী থৌদাং লৈ।

২৪. অপীকপা ললোনবা মীওই কয়া লম্বী মতাইদা, গারিশিং পোৎ-চৈ য়োল্লি। চাউখৎ-থৌরাংদা মখোয়না লৌরিবা থৌদাংশিং ঐগী সরকারনা থাগৎলি। মরম অসিনা, অহানবা ওইনা, মখোয়গা বেঙ্কগা শম্নহল্লে অমসুং পি.এম শ্বানিধি স্কিমগী মখাদা গরেন্তি য়াওদনা লোনশিং পীরে। স্কিম অসিগী মতাংদা লম্বী মপান্দা পোৎ-চৈ য়োল্লিবশিংদা দিজিতেল ত্রান্সসেক্সনশিংগী খুদোংচাবা পীরে। হৌজিক ফাওবদা , স্কিম অসিগী মখাদা ভেন্দর লাখ ৪০ রোমদা লোনশিং পীখ্রে।

২৫. লৈবাক অসিগী লৌমী করোর ১১ সরকারগী মরুওইবা লিস্তা য়াওরে। হায়রিবা অপীকপা লৌমীশিং অসি চহি কয়া সরকারগী কান্নবা ফংদনা লাক্লবনি। হায়রিবা অপীকপা লৌমীশিং অসিদা পি.এম কিসান সম্মান নিধিগী মখাদা লুপা কারোর লাখ ২.২৫গী শেন্থং পীখ্রে। মসিগী মনুংদা নুপী করোর ৩ রোম য়াওরি। স্কিম অসিগী মখাদা, নুপী লৌমীশিংদা লুপা করোর ৫৪,০০০ পীখ্রে। লৌমীশিংদা ক্রোপ ইন্সুরেন্স, সোইল হেল্থ কার্দ, কিসান ক্রেদিদ কার্দ পীবা হেনগৎলে অমসুং ঐগী সরকারনা অহানবা ওইনা, শা-শন লোইবশিং অমসুং ঙামীশিংদা কিসান ক্রেদিদ কার্দকী কান্নবা পীরে। এফ.পি.ওশিং লিংখৎপা অমসুং মহৈ-মরোংশিংগী এম.এস.পি হেনগৎহনবদা ঐগী সরকারনা অপীকপা লৌশিংগীদমক লেপ্লি।

ইকায়খুম্নরবা মেম্বরশিং,

২৬. ঐগী সরকারনা সেদুল কাস্তশিং, সেদুল ত্রাইবশিং অমসুং ও.বি.সিশিংগী অনিংবশিং থুংহল্লে। হায়রিবা কাংলুপশিং অসি চাউখৎপগী খুদোংচাবশিং ফংদনা লাক্লবনি। হৌজিক কাংলুপ অসিদা তঙাইফদনা চংদ্রবা য়াদ্রবা খুদোংচাবশিং ফংহল্লে। সেদুল কাস্তশিংগী য়াইফনবা দোক্তর অম্বেকার উৎসব ধাম, অমৃত জলধারা অমসুং য়ুব উদ্যামি য়োজনা পায়খৎলি। অহানবা ওইনা, লৈবাক অসিনা ভাগবান বিরসা মুন্দাগী মপোক নুমিৎ অসি ‘জনজাতিয়া গৌরব দিবস’ হায়না থৌরম পাংথোকপা হৌরে। হন্দক সরকার অসিনা অহানবা ওইনা, মনগার ধামদা জাতিগী থাক্তা ত্রাইবেল য়াওল্লোইশিংদা ইকাখুম্নবা উৎখ্রে। ঙসিদি, প্রধান মন্ত্রী অদি অদার্স গ্রাম য়োজনাগী মখাদা ত্রাইবেলশিংনা মশিং য়াম্না লৈবা খুঙ্গং ৩৬,০০০ হেন্না শেমগৎলে। লৈবাক অসিগী ত্রাইবেলশিংগী মফমশিংদা এক্লাব্য মোদেল স্কুল ৪০০ হেন্না লিংখৎলে। বন ধন বিকাস কেন্দ্র ৩,০০০ হেন্না অনৌবা হিংবা লম্বী পীনবা মফমশিং ওইরক্লে। নেসনেল কম্মিসন ফোর বেকৱার্দ ক্লাসেস সংবিধান্না মশক খঙদুনা ও.বি.সিশিংগী য়াইফনবা ঐগী সরকারনা থবক পায়খৎলে। অহানবা ওইনা, বঞ্জারা, নোমেদিক অমসুং সেমি-নোমেদিক কাংলুপশিংগী ওইনা ৱেলফিয়ার অমসুং দিবলপমেন্ত বোর্দ অমা শেম্লে।

ইকায়খুম্নরবা মেম্বরশিং,

২৭. চাউখৎপগী হিরম কয়াদা শোৎথরবা জিলা ১০০ হেন্না লৈবাক অসিদা লৈরি।হায়রিবা জিলাশিং অসি এস্পিরেসনেল দিস্ত্রিকশিং ওইনা লাউথোক্তুনা মখোয়গী চাউখৎ-থৌরাংগী সরকারনা পুক্নিং চংলে। ঙসিদি হায়রিবা জিলাশিং অসি লৈবাক্কী অতোপ্পা জিলাশিংগা মান্ননা চাউখৎপা হৌরক্লে। লৈবাক অসিদা ব্লোক ৫০০ এস্পিরেসনেল ব্লোকশিং ওইনা শেমগৎনবা হৌজিক ঐগী সরকারনা থবক পায়খৎলি।

২৮. ত্রাইবেল, চীংগী মফমশিং, সমুদ্র মপান অমসুং ঙমখৈগী শরুকশিং চাউখৎপগী কান্নবা লিক্না ফংদুনা লাক্লি। লম্মিৎ-তুম্মিৎ অমসুং তেরোরিজম্না মরম ওইদুনা অৱাং-নোংপোক অমসুং জে অমসুং কেদা চাউখৎ-থৌরাংগী থবকশিংদা অচৌবা অপনবা ওইরি। তুংকোইনা শান্তি পুরক্নবা অমসুং লম্মিৎ-তুম্মিৎকী খুদোংচাদবশিং কোকহন্নবা ঐগী সরকারনা মাইপাক্লবা থবক কয়া পায়খৎলে। মসিগী মহৈ ওইনা অৱাং-নোংপোক অমসুং ঐখোয়গী ঙমখৈগী শরুকশিং অনৌবা চাউখৎ-থৌরাংগী মহৈ চাবা হৌরে।

২৯. ঙমখৈগী খুঙ্গংশিংদা খুদোংচাবশিং হেন্না ফংহন্নবা ঐগী সরকারনা ভাইব্রেন্ত ভিলেজ প্রোগ্রাম পায়খৎপা হৌরে। হৌখিবা চহি খর অসিদা ঙমখৈগী শরুকশিংদা ঙাক-শেনগী অমসুং ইনফ্রাস্ত্রকচরশিং শেমগৎলে। হৌখিবা চহি খরদা লৈবাক্কী ঙাক-শেন্দা অচৌবা শিংনবা অমা ওইদুনা লাকখিবা লেফ-ৱিং এক্সত্রিমিজম অসি জিলা খর খক্তদা ঙাইরে।

ইকায়খুম্নরবা মেম্বরশিং,

৩০. ঐগী সরকারগী অচৌবা মাইপাকপদি নুপীশিংদা শক্তি পীবা অসিনি। কনাগুম্বা অমগা চাংদম্নবদা ভারতকী নুপীশিং অসি তাবা নত্ত্রগা শোনবা নত্তে। ভারত নুপীশিংগী শিবা নাইদ্রবা থৌনা অসি চহি মাঙবা ঙম্লোই অমসুং মালেম পু্ম্নমক্না মতম পুম্নমক্তা নিংশিংদুনা লৈহৌরগনি।

৩১. উতকাল ভারতিগী মঙলানশিংগী শরুক অমা ওইনা, মালেমগী থাক্তা ঐখোয়গী ইচলশিং অমসুং ইচাশিংনা মিংচৎ কয়া পুরকপদা ঐ চাউথোকচবা পোকই। অসিগুম্বা মাইপাকপা অসিদা ঐগী সরকারগী থবকশিংনা শাফু পীবা অসিদা ঐ হরাওই।

৩২. ঐগী সরকারনা পায়খৎলিবা য়াইফ-থৌরাংশিংগী মরুওইবা পান্দমশিংগী মনুংদা নুপীশিংগী পুন্সি হিংবদা লাইহনবা, থবক পীনবা অমসুং মশানা মশাবু থবক পীজনবা অনৌবা খুদোংচাবশিং পীবা অমসুং নুপীশিং শক্তি পীবা য়াওরি। নুপীশিংগী থাক ৱাংখৎহন্নবা,  অরিবা চৎনবীশিং অমসুং থাজবশিং থুগাইনবা সরকার অসিনা তুমিন্না লৈথোকলোই।

৩৩. ‘বেতি বচাউ, বেতি পরাউ’ খোঙজংগী মাইপাকপা ঐখোয়না উরে। সরকারগী থবকশিংনা মরম ওইদুনা মীয়াম মরক্তা ৱাখল তারকপদগী নুপীমচাশিংগী মশিং তপ্না-তপ্না হেনগৎলক্লে। লৈবাক অসিদা অহানবা ওইনা অপুনবা নুপা মশিংদগী অপুনবা নুপী মশিংনা হেল্লে অমসুং নুপীশিংগী হকশেলগী ফিবমশু য়াম্না ফগৎলে। প্রধান মন্ত্রী সুরক্ষিত মাত্রিভা য়োজনা নত্ত্রগা প্রধান মন্ত্রী মাত্রু বন্দনা য়োজননা মমা অমসুং অঙাং অনিমক্কী পুন্সি কয়া কনবদা ঐখোয় মাইপাক্লে। অয়ুস্মান ভারত য়োজনাগী বেনিফিসরিশিংগী চাদা ৫০দি নুপীশিংনি।

ইকায়খুম্নরবা মেম্বরশিং,

৩৪. লাইরিক তম্বদগী হৌরগা শীনফম খনবা ফাওবদা, নুপীমচাশিংনা থেংনরিবা খুদোংচাদবশিং কোকহন্নবা ঐগী সরকারনা হোৎনরি। সরকারগী স্কুলশিংদা নুপীমচাশিংগী তোখাইবা তোইলেতশিং শাবা নত্ত্রগা সেনিতরি পেদশিং ফংহনবগী স্কিমশিংনা মরম ওইদুনা নুপীশিং স্কুল তম্বা তোকপগী চাং ফজনা হন্থরে। শ্বাছ ভারত অভিয়ান্না নুপীশিংগী ইকায়খুম্নবা হেনগৎহনবা খক নত্তনা, মসিনা তরু-তনানবা ফিবম অমা লৈহনবা ঙম্লে। সুক্যা সমরিধি য়োজনাগী মখাদা লৈবাক অসিদা অহানবা ওইনা নুপীমচা করোর কয়াগী তুংগী ফিবম য়াইফনবা সেভিং একাউন্তশিং হাংলে। নিউ ইজুকেসন পোলিসিদা নুপীমচাশিং লাইরিক তমহন্নবা মরুওইবা থবক কয়া লৌখৎলে।

৩৫. হিরম অমদা হেক্তা নুপীশিং শরুক য়াবদা অপীনবা পীদনবা ঐগী সরকারনা থবক পায়খৎলে। মসিগীদমক, মাইনিংদগী হৌরগা লান্মীগী পোস্তশিংদা নুপীশিং থবক চংনবা থোং লাউনা হাংলে। হৌজিক ঐখোয়গী নুপীমচাশিং সৈনিক স্কুলশিং অমসুং মিলিতরি একাদেমিশিংদা লাইরিক তম্লে অমসুং ত্রেনিং য়াওরে। ঐগী সরকারনা চাবোকপীশিংগী ছুতি চয়োল ১২দগী চয়োল ২৬তা হেনগৎহল্লে।

৩৬. মুদ্রা য়োজনাগী বেনিফিসরিশিংগী চাদা ৭০দি নুপী ওন্ত্রেপ্রেনিউয়রশিংনি। স্কিম অসিনা নুপীশিংদা শেন-থুমগী শক্তি পীবা অমসুং খুন্নাইগী ওইনা ৱারেপশিং লৌবদা শরুক য়াবা হেনগৎহল্লে হায়বা থিজিনবদগী খঙলে। পি.এম অৱাস য়োজনাগী মখাদা পীবা য়ুমশিং নুপীশিংগী মমিংদা রেজিস্তার তৌবদগী নুপীশিং মশানা মশাবু থাজবা হেনগৎহল্লে। জন ধন য়োজনা অসিনা অহানবা ওইনা লৈবাক অসিদা বেঙ্কগী থবকশিংগী কান্নবা ফংবদা নুপীশিং অমসুং নুপাশিংগী মরক্তা মান্নবা লৈহনবা ঙম্লে। হৌজিক লৈবাক অসিদা সেল্ফ হেল্প গ্রুপ লাখ ৮০ হেন্না থবক তৌরি অমসুং মসিদা নুপী করোর ৯ রোম শরুক য়ারি। হায়রিবা নুপীশিংগী সেল্ফ হেল্প গ্রুপশিংদা সরকারনা লুপা করোর লাখ কয়া মতেং পীখ্রে।

ইকায়খুম্নরবা মেম্বরশিং,

৩৭. ঐখোয়গী হেরিতেচগা ঐখোয়গী হৌরকফমগা শম্নহল্লি অমসুং ঐখোয়গী চাউখৎপনা ঐখোয় অতিয়া য়ৌনবা থৌনা পীরি। মরম অসিনা সরকার অসিনা হেরিতেচ পুনশিন্নবা লম্বীদা চৎলি অমসুং চাউখৎ-থৌরাংদা মরুওইবা মীৎয়েং থম্লি।

৩৮. ঙসিদি, অমরোমদা, লৈবাক অসিদা অয়োধ্যা ধাম শাগৎলি অমসুং অতোপ্পা অমদা, অনৌবা সংসদ হাওস শাগৎলি।

৩৯. অমরোমদা, ঐখোয়না কেদরনাথ ধাম, কাসি বিশ্বনাথ ধাম অমসুং মহাকাল মহালোক শেমগৎলে, অতোপ্পা অমরোমদা, ঐখোয়গী সরকারনা জিলা খুদিংমক্তা মেদিকেল কোলেজশিংশু শাগৎলি।

৪০. অমরোমদা, ঐখোয়না ঐখোয়গী লাইফমশিং অমসুং পুৱারিগী মফমশিং শেমগৎলি, অদুগা অমরোমদা, ভারত মালেমগী স্পেসকী অচৌবা শক্তি অমা ওইরক্লি। ভারতনা মসিগী অহানবা লনাই সেতেল্লাইতশু থাগৎলে।

৪১.  ঐখোয়না অতোপ্পা নাকল অমদনা অদি শঙ্করচার্য়, ভগ্বান বসাবেশ্বরা, থিরুবল্লুর, গুরু নানক দেবনা তাক্লম্বা লম্বী ইন্দুনা চৎলি অদুগা অতোপ্পা নাকল অমদনা ভারতনা ঙসিদি হাই-তেক লৌশিংগী হব অমা ওইরক্লি।

৪২.  ঐখোয়না নাকল অমদা কাশি-তমিল শঙ্গমমগী খুত্থাংদা এক ভারত-স্রেস্থ ভারতকী ইথিলবু মপাঙ্গল হাপ্লি, অদুগা নাকল অমদনা, ঐখোয়না ৱান নেসন, ৱান রাসন কার্দকুম্বা মতমগা চুনবা পথাপসু শেমগৎখি। ভারতনা দিজিতেল ইন্দিয়া অমসুং ৫জি. তেক্নোলোজীদা লৈরিবা পাঙ্গলবু মালেম্না ঙসিদি শকখঙবা হৌরক্লে।

৪৩.  ঙসিদি, ভারতনা য়োগ অমসুং অয়ুর্বেদগুম্বা অরিবা মতমগী পথাপ কয়াবু মালেম পুম্বগী মফমদা য়ৌহল্লি, অদুগা নাকল অমদনা, মসিনা মালেমগী ফার্মাসী হায়বা লৈবাক্কী অনৌবা শক্তাক অমা লৈরক্লিবা অসিবুসু মপাঙ্গল হাপ্লি।

৪৪.  ঙসিদি, ভারতনা নেচরেল ফার্মিং অমসুং চৎনবী ওইরিবা মিল্লেত ক্রোপশিংবু পুক্নিং থৌগৎলিবা অসিগা লোয়ননা ঐখোয়না নেনো য়ুরিয়াগুম্বা মোদর্ন তেক্নোলোজীসু পুথোক্লে।

৪৫.  ঐখোয়না নাকল অমদা লৌউ-শিংউগী রুরেল ইনফ্রাস্ত্রকচর ফগৎহল্লি, অদুগা নাকল অমদনা, ঐখোয়না দ্রোন তেক্নোলোজী অমসুং সোলর পাৱরগী খুত্থাংদা লৌমীশিংগী মপাঙ্গলসু হাপ্লি।

৪৬.  শহরশিংদা স্মার্ত ফেসিলিতী চাউখৎহনবদা অহেনবা মিৎয়েং পীরিবসিগা লোয়ননা স্বামিত্বা য়োজনাগী মখাদা খুঙ্গংগী য়ুমশিং মেপ্পিং তৌবগী থৌওংসু দ্রোন শিজিন্নদুনা অহানবা ওইনা পাংথোক্লি।

৪৭.  নিংতম্বগী অমৃত মহোৎসবকী থৌরমগী মনুং চনবা ওইনা জিলা খুদিংদা অমৃত সরোবর ৭৫ শেমগৎলি, অদুগা বন্দে ভারত ত্রেন কয়াসু চাম্মগী খুজিংদা হৌদোক্লি।

৪৮.  ঐখোয়গী লল্লোন ইতিক্কী নাৎকী ওইবা পাঙ্গল, হায়বদি, তুরেলগী ৱাতরৱেজ অমসুং হিথাংফমশিংশু মতমগা চুনহহল্লি অমসুং মসিগুম্বা মলতিমোদেল কন্নেক্তিবিতী অসিগা লোয়ননা লোজিস্তিক্স পার্ক্কী নেতৱর্ক অমসু শেমগৎলি।

ইকায় খুম্ননিংঙাই ওইরবা মেম্বরশিং,

৪৯.  লৈবাক অসিনা নিংতম্বগী অমৃত কাল অসিদা ‘পাঞ্চ প্রন’গী ইথিলগা লোয়ননা তুংলমচত্তা খোঙদারি। ঐহাক্কী সরকারনা ‘মীনাইগী ৱাখল্লোন’গী ইঙ্গিৎ খুদিংদগী নিংতম্নবা লেপ্তনা হোৎনরি।

৫০.  মতম অমদা রাজপথ ওইরম্বা অসি হৌজিক্তি কর্তব্য পথ ওইরে।

৫১.  ঙসিদি, কর্তব্য পথতা লৈরিবা নেতাজী সুভাস চন্দ্র বোসকী মীতম অসিনা ভারত মচা খুদিংবু চাউথোকচবা ফাওহল্লি অমসুং ঐখোয়না অন্দমান অমসুং নিকোবরদা নেতাজী অমসুং অজাদ হিন্দ ফৌজকী মথৌনাবুসু ইকায় খুম্নরে। ঐহাক্কী সরকারনা নুমিৎ খরনিগী মমাংদা নেতাজী সুভাস চন্দ্র বোসকী মফমদা কত্থোকপা অচৌবা নিংশিং খুভম অমসুং ম্যুজিয়ম অমসু অন্দমান অমসুং নিকোবরদা লৈবা মহাক্কী মমিং লৌদুনা মিংথোনবা ইথৎ অমদা উরেপ উয়ুং তমখ্রে।

৫২.    অন্দমান অমসুং নিকোবর ইথৎকী ইথৎ ২১বুসু ইন্দিয়ন আর্মীগী পরম বীর চক্র ফংখ্রবা অথৌবশিংগী মমিং লৌদুনা মিংথোনখ্রে।

৫৩.    অতোপ্পা নাকল অমদা, নেস্নেল ৱার মেমোরিএলনা লৈবাক্কী মথৌনাগী খুদম ওইরি, অদুগা অতোপ্পা নাকল অমদনা, ঐখোয়গী নেভীনা ছত্রপতি বীর শিবাজী মহারাজনা পীরম্বা ইন্সিগনিয়া অমসু ফংখ্রে।

৫৪.  অতোপ্পা নাকল অমদা, ভগ্বান বির্সা মুন্দা য়াওনা ত্রাইবেল নিংতম লান্মী পুম্নমক্কা মরে লৈনবা ম্যুজিয়মশিং শারি, অদুগা অতোপ্পা নাকল অমদনা, দাঃ বাবসাহেব অম্বেদকরগী পাঞ্চতীর্থসু শারে। মান্নবা থৌওং ওইনা, প্রধান মন্ত্রীশিংগী ম্যুজিয়ম অমসু শাদুনা মসিনা প্রধান মন্ত্রী খুদিংগী থৌদাংশিং তাক্লি।

৫৫.  লৈবাক অসিনা চাউথোকচবা অমসুং ইকায় খুম্নবগা লোয়ননা অহানবা “বীর বাল দিবস” পাংথোকখ্রে। ঐহাক্কী সরকারনা পুৱারীদা থোকখিবা অৱাবা থৌদোকশিং অমসুং মসিগা মরী লৈনবা ৱারোল কয়া মুৎহন্দনা থম্নবগীদমক্তা লৈবাক অসিদা “বিভাজন বিভিশিকা স্মৃতী দিবস” পাংথোকপা হৌহনখ্রে।

ইকায় খুম্ননিংঙাই ওইরবা মেম্বরশিং,

৫৬.  লৈবাক অসিনা মেক ইন ইন্দিয়া অমসুং আত্মানির্ভর ভারত কেম্পেনগী মহৈ চাবা হৌখ্রে। ঙসিদি, ভারতকী মেন্যুফেকচর তৌবগী মতিক হেনগৎলক্লি অমসুং মালেম পুম্বগী মেন্যুফেকচরিং কম্পেনীশিং ভারত্তা চঙলক্লি।

৫৭.  ঙসিদি, ঐখোয়না ভারত্তা সেমিকন্দক্তর চিপ অমসুং এরোপ্লেন মেন্যুফেকচর তৌনবা থবক পায়খৎপা হৌখ্রে। মসিগুম্বা খোঙথাংশিং অসিনা মরম ওইদুনা, ভারত্তা শাবা পোত্থোকশিং মীরমদা থাদোকপগী চাংনা লেপ্তনা হেনগৎলক্লিবনি। ঐখোয়না চহি খরগী মমাংমক্তদা মীরমদগী মোবাইল ফোন মশিং য়াম্না ইম্পোর্ত তৌরম্লিবনি। অদুবু ঙসিদি, ভারতনা মালেমদা মোবাইল ফোন এক্সপোর্ত তৌবা অচৌবা লৈবাক অমা ওইরে। লৈবাক অসিদা শান্নপোত ইম্পোর্ত তৌবগী চাংসু ৭০% তাথরক্লে, অদুগা মসিমক এক্সপোর্ত তৌবগী চাংনা ৬০% হেনগৎলে।

৫৮.  ঐহাক্কী সরকারগী অনৌবা খোঙথাংশিংনা মরম ওইরগা, ঐখোয়গী দিফেন্স এক্সপোর্তনা শরুক ৬ হেনগৎলে। ঐখোয়গী লৈবাক্তা অহানবা ওইনা শাজবা আই.এন.এস. ভিক্রান্তনা ঐখোয়গী ফোর্সকী শরুক অমা ওইখিবা অসিদা ঐহাক্না চাউথোকচৈ। ঐখোয়না মেন্যুফেকচরিংগী অনৌবা সেক্তরশিংদা খোঙদাবা হৌবতা নত্তনা খাদি অমসুং ভিলেজ ইন্দস্ত্রীজকুম্বা ঐখোয়গী নাৎকী ওইবা স্কেতরশিংদসু মশক নাইবা থবক পাংথোক্লি। নিংতম্বগী অমৃত মহোৎসবকী মতমগী মনুংদা ঐখোয়গী খাদি অমসুং রুরেল ইন্দস্ত্রীশিংগী তর্নওভরনা লুপা করোর লাখ ১গী থাক য়ৌবসি নুংঙাইবা ৱাফম অমনি। ঐহাক্কী সরকারগী হোৎনজমনগী মতুং ইন্না, খাদি য়োনবগী মশিংসু শরুক ৪ হেনগৎলে।

ইকায় খুম্ননিংঙাই ওইরবা মেম্বরশিং,

৫৯.  ঐহাক্কী সরকারনা ইন্নোভেসন অমসুং ওন্তোপ্রিনর্শিপ্তা মমাংদা চঙলমদবা মওংদা লেপ্তনা মিৎয়েং চঙলি। মসিদি মালেমগী খ্বাইদগী নহা ওইবা মীশিং লৈবা লৈবাক্কী পাঙ্গলগী মহৈ চাবনি। ঙসিদি, ঐখোয়গী নহাশিংনা মখোয়গী ইন্নোভেসন তৌবগী মতিকপু মালেম পুম্বগী মমাংদা উৎলি। ভারতনা ইং ২০১৫গী গ্লোবেল ইন্নোভেসন ইন্দেক্সতা ৮১শুবা থাক্তা লৈরম্মি। ঙসিদি, ঐখোয়না ৪০শুবা থাক্তা লৈরে। লৈবাক অসিদা চহি ৭কী মমাংদা রেজিস্তর তৌরবা স্তার্তঅপ মশিং চাম্মগী খুজিংদা লৈরম্মি, অদুবু, মসিগী মশিংনা ঙসিদি চাউরাক্না ৯০,০০০ য়ৌরে।

৬০.  ঐখোয়গী ফোর্সনা লাল্লোন্দা হৈবা অমসুং তেক্নোলোজীগী শক্তি লৈহন্নবগীদমক্তা মসিদা নহাশিংগী পাঙ্গল হাপ্পা হায়বসি ঙসিগী য়ুগকী য়াম্না মরু ওইবা ৱাফম্নি। ৱাফমশিং অসিবু খন্থরবা তুংদা, অগ্নিবীর য়োজনা হৌদোকখি। মসিনা লৈবাক্কী নহারোলশিংনা আর্ম্দ ফোর্সকী খুত্থাংদগী লৈবাক সেবা তৌবগী য়াম্না চাউবা খুদোংচাবা অমনি।

৬১. ঐহাক্কী সরকারনা নহাশিংগী পাঙ্গলগা লৈবাক্কী মায়-পাকপগা শান্ন-খোৎনবগী খুত্থাংদা অমত্তা ওইহল্লি। ঐখোয়গী শান্নরোইশিংনা কম্মনৱেল্থ গেমস, ওলিম্পিক অমসুং পেরা গেমসতা মশক থোক্না শান্নদুনা মখোয়গী হৈ-শিংবসি কনা অমত্তগী মখা তাদে হায়বা উৎলে। লৈবাক্কী কাচিন কোয়া খুদিংদা মসিগুম্বা তেলেন্ত মশক খঙদোক্তুনা য়োকখৎনবগীদমক্তা খেলো ইন্দিয়া গেমস অমসুং খেলো ইন্দিয়া সেন্তরগা লোয়ননা, তি.ও.পি.এস. স্কিম অসিসু থবক্তা ওন্থোকপা হৌরে।

৬২.  ঐখোয়গী সরকারনা দিব্যাংশিংগী য়াইফ য়ুম্বালদা মিৎয়েং চঙলি। লৈবাক অসিদা পায়খৎলিবা ৱান সাইন লেংগ্বেজ অমসুং সুগময়া ভারত অভিয়ান্না দিব্যাং নহাশিংদা মশক থোক্না তেংবাংলি।

ইকায় খুম্ননিংঙাই ওইরবা মেম্বরশিং,

৬৩.  মমাংগী দিকেদ অসিগী মনুংদা, ঐখোয়না ভারত্তা ইনফ্রাস্ত্রকচর শেমগৎপদা অচৌবা শিংনা অনি উখি। অহানবা, ইনফ্রাস্ত্রকচরগী অচৌবা প্রোজেক্তশিং মতম চানা লোইশিনবা ঙমদবা। অনিশুবা, তোঙানবা বিভাগ অমসুং সরকারশিংনা মখোয়গী খুদোংচাবগী মতুং ইন্না থবক তৌবা। মসিনা সরকারগী রিসোর্সশিং লান্না শিজিন্নবা অমসুং মতম হেন্দোকপগী মথক্তা, মীচম মীয়ামদা খুদোংচাদবা কয়াসু থোকহল্লি। ঐহাক্কী সরকারনা পি.এম. গতি-শক্তি নেস্নেল মাস্তরপ্লান শেমদুনা মসিগুম্বা শিংনবশিংগা মাইয়োক্নবা ঙম্নবগীদমক্তা মশক থোকপা খোঙথাং পায়খৎলে। রাজ্য অমসুং য়ু.তি.শিংনা মাস্তর প্লান অসিদা থৱাই য়াওবগী মতৌ উৎনরক্লি। মসিনা লৈবাক্কী মলতি-মোদেল কন্নেক্তিবিতীবুসু পাকথোক চাউথোকহনগনি।

৬৪. ঐহাক্কী সরকারনা ভারতপু মালেমগী খ্বাইদগী কম্পিতিতিব ওইবা লোজিস্তিক্স হব অমা ওইহন্নবা কন্না হোৎনরি। মসিগীদমক্তা মমাংগী চহিদা নেস্নেল লোজিস্তিক্স পোলিসী হৌদোকখি। পোলিসী অসিবু থবক্তা ওন্থোকপনা লোজিস্তিক্স কোস্তসু হন্থহনগনি।

৬৫. ঐহাক্কী সরকারনা লৈবাক চাউখৎহন্নবা থবক পায়খৎলিবা অসিগী খোঙজেল অমসুং মিৎয়েং চাউনা য়েংলিবা অসিদি মমাংদা অমুক্তা থোকখিদ্রি অমসুং চাংদম্ননিংঙাইসু লৈত্রি।

• ঐহাক্কী সরকার শেমখ্রবা মতুংদা, অৱস য়োজনাগী মখাদা ভারতকী লাইরবশিংগীদমক্তা নোংমদা চাংচত্তা য়ুম ১১,০০০ শাখি।

• মান্নবা মতমসিদা, চাংচত্তা মীওই লাখ ২.৫না ভারত্তা নুমিৎ খুদিংগী ব্রোদবেন্দ ফংখি।

• নুমিৎ খুদিংগী গ্যাস কন্নেক্সন ৫৫,০০০ হেন্না পীখি।

• মুদ্র য়োজনাগী মখাদা লুপা করোর ৭০০ হেনবগী লোন নুমিৎ খুদিংগী পীখি।

• মমাংগী চহি ৮-৯ অসিদা ভারত্তা থা খুদিংগী য়ামদ্রবদা মেদিকেল কোলেজ অমা হৌদোকখি।

• মতমসিগী মনুংসিদা, নুমিৎ খুদিংগী কোলেজ অনি অমসুং চয়োল খুদিংগী য়ুনিবর্সিতী অমা হৌদোকখি।

• ভারতনা শুপ্নগী চহি ২গী মনুংদা, ভেক্সিন দোজ করোর ২২০ হেন্না কাপখি।

৬৬. সোসিএল ইনফ্রাস্ত্রকচরগী মতাংদা পল্লুরবদি, ইং ২০০৪ অমসুং ২০১৪গী মনুংদা মেদিকেল কোলেজ ১৪৫ হাংদোকখিবা মতমদা, ঐহাক্কী সরকারগী ইং ২০১৪দগী ২০২২ ফাওবগী মনুংদা, মেদিকেল কোলেজ ২৬০ হেন্না হাংদোকখি। হান্নগী মতমগা চাংদম্নবা মতমদা, লৈবাক্কী মেদিকেল মহৈরোইগী গ্রেজুএত অমসুং পোস্ত-গ্রেজুএত সিত মশিংসু শরুক অনি হেনগৎলে। ইং ২০১৪গী মমাংদা লৈবাক অসিদা য়ুনিবর্সিতী ৭২৫মুক লৈরম্বা মতমদা, মমাংগী চহি ৮সিদা অনৌবা য়ুনিবর্সিতী ৩০০ হেন্না হাংদোকখি। মতমসিগী মনুংদা, অনৌবা কোলেজ ৫০০০ হেনবসু হাংদোকখি।

৬৭. মান্নবা মতৌ ওইনা, ফিজিকেল ইনফ্রাস্ত্রকচরগী মতাংদা লৈবাক অসিদা অনৌবা রেকোর্দ কয়া থমখ্রে। ইং ২০১৩-১৪ ফাওবদা, লৈবাক অসিদা শোরোক কিমি চাউরাক্না ৩.৮১ প্রধান মন্ত্রী গ্রাম সরক য়োজনাগী মখাদা শাখি। অদুবু, মসিগুম্বা শোরোক্কী নেতৱর্ক অসি ইং ২০২১-২২ ফাওবদা, কিমি লাখ ৭ হেন্না হেনগৎখি। হৌজিক ফাওবগী ওইনদি, লৈবাক অসিগী খুন্দাবা মফম চাউরাকপা ৯৯%দি শোরোক্না শম্নরে। ৱর্ল্দ বেঙ্ক য়াওনা লুপ কয়া অমনা পাংথোকপা স্তদীশিংনা খুঙ্গংগী শোরোকশিংনা খুঙ্গংদা থবক পীবা, লৌউ-শিংউ, মহৈ-মশিং অমসুং হকশেলগী হীরমদা য়াম্না কান্নবা শাফু পী হায়না উৎলি।

৬৮. নেস্নেল হাইৱে নেতৱর্ক অসিসু মমাংগী চহি ৮গী মনুংদা ৫৫% হেন্না হেনগৎলে। লৈবাক্কী জিলা ৫৫০ হেনববু ভারতমালা প্রোজেক্তকী মখাদা হাইৱেগা য়াম্না থুনা শম্নরগনি। শেন্মিৎলোন্দা অফবা শাফু পীগদৌরিবা কোরিদোর মশিংসু ৬তগী ৫০দা হেনগৎলগনি।

৬৯.   মান্নবা মতৌ ওইনা, লৈবাক্কী এভিএসন সেক্তর অসিসু য়াম্না থুনা শাহৌ লৌরি। ইং ২০১৪ ফাওবদা, লৈবাক্কী এয়রপোর্ত মশিং অসি ৭৪ ওইরম্মি, হৌজিক্তি মশিং অসি ১৪৭ য়ৌরে। ঙসিদি, ভারতনা মালেমগী খ্বাইদগী অহুমশুবা চাউবা এভিএসন মার্কেত ওইরে। হীরম অসিদা উরান য়োজনানা অচৌবা থৌদাং লৌরি। ইন্দিয়ন রেলৱেজ অসিসু মোদর্ন ইন্সতিত্যুসন অমা ওইরক্লি অমসুং য়ৌশিনবদা ৱাবা মফম কয়া অমসু লৈবাক্কী রেল মেপ্তা য়াওরে। বন্দে ভারত এক্সপ্রেসকী মওংদা মোদর্ন ওইবা অমসুং হাই-স্পীদ ত্রেনশিংসু ইন্দিয়ন রেলৱেজকী শরুক ওইরে। য়ৌশিনবদা ৱাবা জম্মু অমসুং কশ্মির অমসুং অৱাং নোংপোক্কী মফমশিংসু রেলৱেজতা শম্নরে। লৈবাক্কী মরু ওইবা রেলৱে স্তেসন কয়াবু মোদর্নাইজ তৌরি। ইন্দিয়ন রেলৱেজনা মালেমগী খ্বাইদগী চাউবা ইলেক্ত্রিক রেল নেতৱর্ক ওইবগী মাইকৈদা খোঙজেল য়াঙনা চঙশিল্লি। ঐখোয়না ইন্দিয়ন রেলৱেজপু তেক্ত-কায়দবা ওইবা হেনগৎহন্নবগীদমক্তা ইন্দিজিনিয়স তেক্নোলোজী – কবচপু পাকথোক চাউথোকহল্লি।

ইকায় খুম্ননিংঙাই ওইরবা মেম্বরশিং,

৭০.  চাউখৎপা অমসুং মহৌশাবু ওন্ন-তৈনবনি খনবা ৱাখল্লোন্সু ভারতনা হোংদোক্লে। ঐহাক্কী সরকারনা গ্রীন গ্রোথতা মিৎয়েং চঙলি অমসুং মালেম পুম্ববু মিসন লাইফকী খুত্থাংদা অমত্তা ওইহন্নবা মিৎয়েং চঙলি। সরকার অসিনা সোলর কেপাসিতী শরুক ২০ হেন্না মমাংগী চহি ৮দা হেনগৎহনখ্রে। ঙসিদি, ভারত অসি মালেমগী রিন্যুএবল ইনর্জী কেপাসিতীদা মরিশুবা থাক্তা লৈরে। লৈবাক অসিনা নন-ফোসিল ফুএল সোর্সতগী মশাগী ইলেক্ত্রিক জেনেরেসন কেপাসিতীবু ৪০% য়ৌহনবগী পান্দমসু চহি ৯গী মমাংদা ফংবা ঙমখ্রে। মায় পাকপা অসিনা ঐখোয়না ইং ২০৭০ফাওবদা নেত জিরো ওইবগী পান্দমদা চাউয়া তেংবাংগনি। লৈবাক অসিনা পেত্রোলদা ইথানোল য়ানবগী ২০%গী পান্দম ফংবগী মাইকৈদা খোঙজেল থুনা চঙশিল্লি।

৭১.  সরকারনা হাইদ্রোজেন মিসনসু হন্দক্তা অয়াবা পীখ্রে। মসিনা ভারত্তা গ্রীন ইনর্জীগী হীরমদা লুপা করোর কয়াগী ইনভেস্তমেন্তকী পুক্নিং চিংশিনগনি। মসিনা ঐখোয়না ক্লীন ইনর্জী অমসুং ইনর্জী সেক্যুরিতীগী মতাংদা মীরমগী মখা পোল্লিবা অসিসু হন্থহনগনি। ঐখোয়গী শহরশিংদা পোল্ল্যুসন হন্থহনবা হায়বসিদসু অহেনবা মিৎয়েং চঙলি। মরম অদুনা, ইলেক্ত্রিক মোবিলিতীগী ওইনা য়াম্না চাউবা থাক্তা থবক পায়খৎলি। এফ.এ.এম.ই. স্কিমগী মখাদা, ইলেক্ত্রিক বস ৭০০০ হেনববু কেন্দ্র সরকারনা লৈবাক্কী শহর কয়াদা পব্লিক ত্রান্সপোর্তকী শরুক ওইনা হাপখ্রে, মসিদা লৈবাক্কী কোনুং দিল্লীসু য়াওরি। মমাংগী চহি ৮দা, লৈবাক্কী মেত্রো নেতৱর্ক অসি শরুক ৩ হেন্না হেনগৎলে। ঙসিদি, শহর ২৭তা মেত্রোগী থবক পায়খৎলি। মান্নবা থৌওং ওইনা, লৈবাক শিনবা থুংবগী ওইনা অনৌবা ৱাতরৱে ১০০ হেন্না শাগৎলি। মসিগুম্বা অনৌবা ৱাতরৱে অসিনা লৈবাক্কী ত্রান্সপোর্ত সেক্তরবু নৌনা শেমদোকপদা তেংবাংগনি।

ইকায় খুম্ননিংঙাই ওইরবা মেম্বরশিং,

৭২.  মালেম্না ঙসি শিংনবা কয়া মাইয়োক্নরি। দিকেদ কয়াগী মমাংদা শেমখিবা মালেমগী লুপশিংগী চুনবা অমসুং মথৌ নিংথিনা তৌবগী থৌওংবু হৌজিক্কী মতমদা ৱাহং কয়া হংনবা হৌরক্লি। মসিগুম্বা তাঞ্জা অসিদা ভারতনা তোখাইনা তারুরবা মালেম্বু অমত্তা ওইনা পুন্সিনবা ঙম্বা শক্তি অমা ওইরক্লি। মালেমগী সপ্লাই চেন্দা অমুক্কা হন্না থাজবা পুরকহনবা শাফু অমা ভারতনা ঙসি ওইরক্লে। মরম অদুনা, মালেম্না ভারত্তা থাজবা য়াম্না থম্লি।

৭৩.  ভারতনা হন্দক্কী চহিসিদা জি.২০গুম্বা পাঙ্গল লৈবা কাঙলুপকী প্রসিদেন্সীগী থৌদাং লৌরে। ভারতনা ৱান আর্থ, ৱান ফেমিলী, ৱান ফ্যুচরগী মন্ত্রগা লোয়ননা জি.২০ মেম্বর লৈবাকশিংগা খুৎশম্নদুনা মালেম্না হৌজিক থেংনরিবা শিংনবা কয়াগী ৱারোইশিন পুরক্নবা হোৎনরি। ঐহাক্কী সরকারনা মসিবু দিপ্লোমেতিক ওইবা প্রোগ্রাম অমখক ওইনা অকক্নবা থম্বা পামদে। মদুগী মহুত্তা, লৈবাক পুম্বনা অমত্তা ওইনা হোৎনমিন্নদুনা ভারতকী মতিক অমসুং চৎনবীবু উৎনবা খুদোংচাবা লৌবা পাম্লি। মরম অদুনা, লৈবাক্কী তোঙানবা শহরশিংদা জি.২০ মীফম কয়া চহি অসিগী মনুংদা পাংথোক্লিবনি।

ইকায় খুম্ননিংঙাই ওইরবা মেম্বরশিং,

৭৪.  হৌজিক্কী মতমসি ভারতকী মালেমগা লৈনবা মরীগী খ্বাইদগী অফবা তাঙ্কক্নি। ঐখোয়না মালেমগী তোঙানবা লৈবাকশিংগা লৈনবা মরী হেন্না ফগৎহল্লে। নাকল অমদা, ঐখোয়না হন্দক্কী চহিসিদা এস.সি.ও.গী লুচিংবগী থৌদাং লৌরি, অদুগা অতোপ্পা নাকল অমদনা, ঐখোয়না ক্বাদ মেম্বর অমা ওইনা, ইন্দো পেসিফিকপু শান্তি লৈবা, তংদু লৈতাবা অমসুং নুংঙাই য়াইফবা ওইহন্নবা হোৎনরি।

৭৫.  ঐখোয়গী লৈবাক্কী অপাম্বশিংবু খ্বাইদগী থাক ৱাংনা থমদুনা ঐখোয়গী থৌদাং চাউথোকহল্লে। অফঘানিস্তান্দা য়ুহা হাবা নত্ত্রগা শ্রি কঙ্কাগী ইরাং ওইরো, ঐখোয়না খ্বাইদগী হান্না হ্যুমেনিতরিয়ন তেংবাং পীখি।

৭৬.  ঐখোয়না শাগৎখিবা গুদৱিলনা অফঘানিস্তান অমসুং য়ুক্রেনগী ইরাং মনুংদা য়াম্না কান্নবা পীখি। ঐখোয়না লৈবাকশিং অসিদগী ঐখোয়গী অৱাবা তারবা মীয়াম্বু তেক্ত কায়দনা লৌথোকখি। অতোপ্পা লৈবাক কয়াগী মীয়াম্বুসু ঐখোয়না তেংবাংদুনা, ভারতনা হ্যুমেনিতরিয়নগী খুদম্বু মালেমদা অমুক হন্না উৎখি।

ইকায় খুম্ননিংঙাই ওইরবা মেম্বরশিং,

৭৭.  ভারতনা তেরোরিজমগী মাইকৈদা খোঙফম চেৎনা লেপ্লিবা অহকপা ফিদম্বু মালেম্না ঙসি শকখঙলে। মসিনা মরম ওইদুনা, ভারতনা তেরোরিজমগী মাইয়োক্তা থম্বা ৱাফম্বু মালেমগী প্লেতফোর্ম খুদিংনা তারিবনি। য়ু.এন.এস.সি. কাউন্তর তেরোরিজমগী অখন্নবা মীফম অমা মমাং চহিগী ওক্তোবরদা ভারত্তা পাংথোকখি। ভারতনা মসিদসু তেরোরিজমগী মাইকৈদা ৱাফম থমখি। ঐহাক্কী সরকারনা সাইবর সেক্যুরিতীগা মরী লৈনবা ৱাফম কয়াবুসু মালেম মাঙদা থম্মোই শেংনা থম্লি।

৭৮.  ঐহাক্কী সরকারনা ঐখোয়না পোলিতিকেল অমসুং স্ত্রেতজিক ওইনা পাঙ্গল লৈরবা মতমদা মতম শাংনা শান্তি লৈবা ঙমগনি থাজৈ। মরম অদুনা, ঐখোয়গী ঐখোয়গী মিলিতরীগী পাঙ্গলবু মোদর্নাইজ তৌবদা লেপ্তনা মিৎয়েং চঙলিবনি।

ইকায় খুম্ননিংঙাই ওইরবা মেম্বরশিং,

৭৯.  গনতন্ত্রগী মমা ওইবগী শক্নাইরবা ভারতকী খোঙচৎ অসিদা চাউথোকচনিংঙাই ওইবা ৱাফম কয়ানা থল্লি। ঐখোয়না য়াম্না হ্যুমেন ওইবা মওংদা ঐখোয়গী দিমোক্রেসীগী মগুন লৈহনখি। মসিগী মমাংগী শক্নাইরবা চহি লিশিং কয়াগুম্না, ভারতকী হ্যুমেন সিবিলাইজেসন্না মথংগী চহি চা কয়াদসু তুংলমচৎকী মাইকৈদা লেপ্তনা চঙশিনখিগনি।

•       ভারতকী দিমোক্রেসী অসি নুংঙাই য়াইফৈ, মপাঙ্গল লৈ অদুগা তুংদসু অদুমক ওইখিগনি।

•       ভারতকী ৱাখল্লোন্দি মতম নাইদবনি অমসুং তুংদসু ওইদুনা লৈগনি।

•       ভারতকী লৌশিং, সাইন্স অমসুং স্পিরিচুএলিতীনা মালেম্বু চহি চা কয়াদগী লমজিং-লমতাক্তুনা লাকখি অমসুং তুংগী চহি চা কয়াদসু লমজিং লমতাকখিগনি।

•       ভারতকী ৱাখল্লোন অমসুং ভেল্যুনা মীখা পোল্লিঙৈগী অৱাবা মতমদসু তেক্ত-কায়দনা লৈখি অমসুং অদুমক লৈখিগনি।

•       ভারতকী লৈবাক অমা ওইবগী শক্তাক অসিদি অমরনি, অমর ওইদুনা লৈগনি।

৮০.   ঐখোয়গী গনতন্ত্রগী থৱাই ওইরিবা পার্লিয়ামেন্ত অসিদা ঐখোয়না লুনা উবা অমসুং ফংবদা ৱাগদবা পান্দম থম্বগী চৎনবী অসিমক ঐখোয়গী পান্দম ওইগদবনি। হয়েং পাংথোক্কদবা থবকশিংবু ঐখোয়না পাংথোক্নবা হোৎনগদবনি। অতোপ্পনা তৌগে খল্লিবা থবকশিংবু ঐখোয়না ভারতনা মচানা মখোয়দগী হান্না পাংথোক্কদবনি।

৮১.   “সমগাছদভম সম্বাদাধবম সম বো মানমসি জনতম” হায়না ফোংদোক্লিবা ভেদগী পাউতাক্কী মখা পোন্না হিংদুনা ঐখোয়গী গনতন্ত্রবু হেন্না নিংথিহনসি। বেদগী ৱারোল অসিনা হায়বদি, ঐখোয়না খোঙ্কাপ অমমম পুন্না থাংমিন্নসি, অমনা অমগী ৱাখল্লোন খঙনসি, ঐখোয়গী ৱারেপ খুদিংদা অমত্তা ওইবগী ইথিল লৈহন্সি হায়বনি।

৮২.   লৈবাক শেম্বগী মসিগুম্বা মহাজৈগ্যা অসিদা ইশাগী কর্তব্যা পথতা চত্তুনা ঐখোয়না সংবিধানগী ৱাশক মপুং ফাহন্সি।

থাগৎচরি!

জয় হিন্দ!

জয় ভারত!

***