প্রধানমন্ত্রীগী লোইশঙ
প্রধান মন্ত্রীনা অরুনাচল প্রদেশকী অহানবা গ্রীনফিল্দ এয়রপোর্ত, ‘দোনয়ি পোলো এয়রপোর্ত, ইতানাগর’ শঙ্গাখ্রে
এম.দবল্যু. ৬০০কী কামেং হাইদ্রো পাৱর স্তেসন লৈবাক মীয়ামদা খুৎশিন্নখ্রে
“দোনয়ি পোলো এয়রপোর্ত হৌদোকখিবা অসিনা মসিগী উরেপ উয়ুং তমখিবদা মীখল মমাংগী মীয়াম মাংদা উৎ চাইবগী মতৌনি হায়খিবা ক্রিতিকশিংদা পীবা মতিক চারবা পাউখুম ওইরে”
“ঐখোয়গী সরকারনা ঙমখৈগী খুঙ্গংশিংবু লৈবাক্কী অহানবা খুঙ্গংনি খল্লগা থবক তৌই”
“তুরিজম নত্ত্রগা ত্রেদ, তেলিকোম নত্ত্রগা তেক্সতাইল ওইরো, অৱাং নোংপোক লমদমশিংদা খ্বাইদগী অহানবা মিৎয়েং চঙলি”
“মসিদি থাজবা অমসুং অপাম্বা থম্বগী অনৌবা য়ুগনি, অমসুং ঙসিগী থৌরমসিনা ভারতকী অনৌবা ৱাখল্লোনগী মতিক চারবা খুদম্নি”
“মমাংগী চহি ৮দা অৱাং নোংপোক লমদমদা এয়রপোর্ত ৭ শাখ্রে”
“দোনয়ি পোলো এয়রপোর্ত অসিনা অরুনাচল প্রদেশকী পুৱারী অমসুং কলচরগী শাখি ওইরি”
“অদোম্না হৌজিক্তি ৱা অসিবু অতোপ্পা লৌরোক্কুম্না থাবা, খাওবা অমসুং য়োনবা য়ারে”
“ইকায় খুম্নবা পুন্সি মহিং লাইরবশিংনা হিংবা হায়বসিনা সরকারগী অহানবা মিৎয়েং থম্বা খোংথাংনি”
“রাজ্যসিগী দবল ইঞ্জিন সরকার অমদি সবকা প্রয়াস থৌওংগা পুন্দুনা অরুনাচল প্রদেশকী চাউখৎ-থৌরাংগীদমক্তা খোঙফম চেৎলি”
Posted On:
19 NOV 2022 12:21PM by PIB Imphal
প্রধান মন্ত্রী, শ্রী নরেন্দ্র মোদীনা ঙসি দোনয়ি পোলো এয়রপোর্ত, ইতানাগর শঙ্গাখ্রে অমসুং এম.দবল্যু. ৬০০কী কামেং হাইদ্রো পাৱর স্তেসন লৈবাক মীয়ামদা খুৎশিন্নখ্রে। প্রধান মন্ত্রী মশামক্না ফেব্রুৱারী ২০১৯দা এয়রপোর্ত অসিগী উরেপ উয়ুং তমখিবনি। মরক্কী মতমদা লাইচৎনা অয়েৎপা কয়া পীখ্রবসু, য়াম্না তেনবা মতমগী মনুংদা এয়রপোর্ত অসি লোইশিনবা ঙমখি।
প্রধান মন্ত্রীনা ঙসিগী থৌরমদা তিনখিবা মীয়ামদা ৱা ঙাংবদা, মহাক্না অরুনাচল প্রদেশতা য়াম্না তোয়না লাকখিববু নিংশিংখি, অমসুং ঙসিগী থৌরম অসিবু য়াম্না চাউনা পাংথোকপগী মতৌবু শকখঙলদুনা অরুনাচল প্রদেশ মীয়াম্না মখোয়গী রাজ্য চাউখৎহন্নবগীদমক্তা খোঙফম চেৎপগী মতৌবু থাগৎপা ফোংদোকখি। অরুনাচল প্রদেশকী মীয়ামগী মবুক মপাও ফবা অদুগা থকসি খাসিসু নাইবা মতৌবু মহাক্না শকখঙখি। মহাক মশামক্না প্রোজেক্ত অসিগী উরেপ উয়ুংসু তম্বা, অদুগা প্রোজেক্ত অসিমকপুসু মশামক্না শাঙ্গাবগী লৈবাক্কী ৱর্ক কলচরদা অহোংবা লাক্লিবা অসিগী মতাংদা মহাক্না পনখি। দোনয়ি পোলো এয়রপোর্ত হৌদোকখিবা অসিনা মসিগী উরেপ উয়ুং তমখিবদা মীখল মমাংগী মীয়াম মাংদা উৎ চাইবগী মতৌনি হায়খিবা ক্রিতিকশিংদা পীবা মতিক চারবা পাউখুম ওইরে হায়না মহাক্না হায়খি। রাজনিতীগী ৱাঙাংলোইশিংনা অনৌবা ৱাখল্লোন অমা ইন্নবা অমসুং রাজনিতীগী কান্নবগী মিৎয়েং খক্তদগী রাজ্যগী চাউখৎ থৌরাংদা য়েংবা তোক্লসি হায়না প্রধান মন্ত্রীনা হায়খি। রাজ্যসিদা হৌজিক মীখল পাংথোক্কদবা লৈতে অমসুং তুংদসু পাংথোক্কদবা লৈতে হায়না মহাক্কী ৱারোলবু হেন্না হকচিনহনখি। সরকারগী অহানবা মিৎয়েং চঙবা থবক্তি রাজ্যগী চাউথৎ-থৌরাং পারকপনি। “ঐহাক্না নুমিৎ থোকপা রাজ্যদগী ঙসিগী নুমিৎ হৌরি অমসুং ভারত্তা নুমিৎ তাবা দামন অমসুং দ্যুগী মরক্কী মফমদা ঐহাক্কী ঙসিগী নুমিৎ লোইশিনগনি, ঐহাক কাশিদা লৈগনি”, মহাক্না হায়খি।
নিংতম্বা ফংলবা মতুংগী মতমশিংদা, অৱাং নোংপোক লমদমবু কনানা থওইরমদে হায়না প্রধান মন্ত্রীনা হায়খি। লমদমসিদা মিৎয়েং চঙবা হৌখিবসি শ্রী অতল বিহারী বাজপায়গী সরকারনি অমসুং অৱাং নোংপোক্কী তোঙানবা মন্ত্রালয় অমা শেমখিবনি। মখা তারকপা মতমদা, মসিগী খোঙজেল অসি তপথরকখি, অদুবু ইং ২০১৪দগীদি চাউখৎ-থৌরাংগী অনৌবা তাঙ্কক অমা হৌরকখি। “হান্নদি, ঙমখৈগী মনুং চনশিনবা খুঙ্গংশিংবু খ্বাইদগী অকোনবা খুঙ্গং হায়না খন্নরম্মি। ঐখোয়গী সরকারনা ঙমখৈগী খুঙ্গংশিংবু লৈবাক্কী অহানবা খুঙ্গংনি খল্লগা থবক তৌই। মসিনা অৱাং নোংপোক লমদমগী চাউখৎ থৌরাংবু সরকারগী খ্বাইদগী অহানবা মিৎয়েং চঙবা থবক ওইহনখি”। “তুরিজম নত্ত্রগা ত্রেদ, তেলিকোম নত্ত্রগা তেক্সতাইল ওইরো, অৱাং নোংপোক লমদমশিংদা খ্বাইদগী অহানবা মিৎয়েং চঙলি”, হায়না প্রধান মন্ত্রীনা মখা তাখি। “দ্রোন তেক্নোলোজী, নত্ত্রগা কৃষি উরান, এয়রপোর্ত কন্নেক্তিবিতী নত্ত্রগা হিথাংফমগী কন্নেক্তিবিতী ওইরো, সরকারনা অৱাং নোংপোক চাউখৎহনবদা খ্বাইদগী অহেনবা মিৎয়েং থমখ্রে”। ভারতকী খ্বাইদগী শাংবা থোং, খ্বাইদগী শাংবা রেল-লম্বীগী থোং অমসুং রেকোর্দ ওইবা মওংদা হাইৱে শাবগী থবকশিংবু প্রধান মন্ত্রীনা লমদম অসিদা পায়খৎলিবা থবকশিং তাক্নবা খুদম ওইনা পীখি। “মসিদি থাজবা অমসুং অপাম্বা থম্বগী অনৌবা য়ুগনি, অমসুং ঙসিগী থৌরমসিনা ভারতকী অনৌবা ৱাখল্লোনগী মতিক চারবা খুদম্নি”, হায়না প্রধান মন্ত্রীনা মখা তাখি।
দোনয়ি পোলো এয়রপোর্তনা অরুনাচল প্রদেশকী মথৌ পাংথোক্লিবা মরিশুবা এয়রপোর্ত ওইগনি হায়না প্রধান মন্ত্রীনা হায়খি, অমসুং মসি য়াওরগা অৱাং নোংপোক্কী অপুনবা এয়রপোর্ত মশিংনা ১৬ ওইরগনি। ইং ১৯৪৭তগী ইং ২০১৪ ফাওবদা, অৱাং নোংপোক্তা শুপ্নগী এয়রপোর্ত ৯ খক শাখি। লমদম অসিগী এয়রপোর্তকী মতাংদা খোঙজেল য়াঙনা চাউখৎলক্লিবা অসিদা প্রধান মন্ত্রীনা লমদমসিগী কন্নেক্তিবিতী হেন্না ফগৎহন্নবা মিৎয়েং চঙবগী মতৌগী মমি তারি। অৱাং নোংপোক ভারতকা শম্নহনবা অপুনবা ফ্লাইত মশিংগী মশিংনা শরুক অনি হেন্না হেনগৎলে। “দোনয়ি পোলো এয়রপোর্ত অসিনা অরুনাচল প্রদেশকী পুৱারী অমসুং কলচরগী শাখি ওইরি”, শ্রী মোদীনা হায়খি। এয়রপোর্ত অসিগী মমিং থোনখিবগী মতাংদা শন্দোক্না তাক্লদুনা, প্রধান মন্ত্রীনা ‘দোনয়ি’ হায়বদি নুমিৎ হায়বনি, অমসুং “পোলো’ হায়বসিনা থা হায়বনি হায়না ফোংদোকখি। নুমিৎ অমসুং থাগী মঙালগা রাজ্যসিগী চাউখৎ থৌরাংগা মরী লৈনহন্দুনা, প্রধান মন্ত্রীনা এয়রপোর্ত চাউখৎলকপগা লাইরবশিংগী পুন্সি চাউখৎলকপগা মান্ননা মরু ওই হায়না ফোংদোকখি।
অরুনাচল প্রদেশকী ইনফ্রাস্ত্রকচর দিভেলপমেন্ততা মিৎয়েং চঙলদুনা, প্রধান মন্ত্রীনা মনুং হঞ্জিনবা মফমশিংদা হাইৱে শাবগী খুদম পীখি অমসুং কেন্দ্র সরকারনা থবকশিং অসিগীদমক্তা তুংগী মতমশিংদা চাউরাকপা লুপা করোর ৫০,০০০ থাদগনি হায়খি। প্রধান মন্ত্রীনা অরুনাচল প্রদেশকী মহৌশাগী ফজবশিংগী মতাংদা পল্লদুনা রাজ্য অসিদা তুরিজমগী অচৌবা মতিক লৈ হায়খি। রাজ্যসিগী মনুং হঞ্জিনবা মফমশিংদা মতিকচাবা কন্নেক্তিবিতী লৈবগী তঙাই ফদবগী মতাংদা মহাক্না পল্লদুনা, অরুনাচল প্রদেশকী খুঙ্গংশিংগী ৮৫%দি প্রধান মন্ত্রী গ্রাম শরক য়োজনাগা শম্নরে হায়না ফোংদোকখি। এয়রপোর্তকী অনৌবা ইনফ্রাস্ত্রকচর শেমগৎপগা লোয়ননা, মসিনা কার্গো সর্ভিসকী হীরমদা অনৌবা অমসুং অচৌবা খুদোংচাবা কয়া লৈহল্লগনি হায়না প্রধান মন্ত্রীনা ফোংদোকখি। পুম্নমক অসিগী মহৈ ওইনা, রাজ্যসিগী লৌমীশিংনা মখোয়গী পোত্থোকশিংবু হেন্না চাউবা কৈথেলদা য়োনবা য়ারগনি। রাজ্যসিগী লৌমীশিংনা পি.এম. সম্মান নিধীগী কান্নবা কয়া ফংনরে হায়না মহাক্না মখা তাখি।
অরুনাচল প্রদেশকী মীয়ামদা ৱা থাবা অমসুং ককপগী অথিংবা থম্লম্বা লোইলম লৈঙাক্কী আইনগী মতাংদা নিংশিংলদুনা, সরকারনা আইন অসিবু মুত্থৎনবা লৌখৎপা থবকশিংগী মতাংদা তমখি। ৱা অসি রাজ্যসিগী পুন্সি মহিংগী শরুক অমনি অমসুং মসি থাবনা লমদমসিগী মীওইশিংদা ৱাবু ভারত অমসুং মালেমগী মফম খুদিংদা থাদোকপদা তেংবাংলি হায়না মহাক্না ফোংদোকখি। “অদোম্না হৌজিক্তি ৱা অসিবু অতোপ্পা লৌরোক্কুম্না থাবা, খাওবা অমসুং য়োনবা য়ারে”, হায়না মহাক্না মখা তাখি।
“ইকায় খুম্নবা পুন্সি মহিং লাইরবশিংনা হিংবা হায়বসিনা সরকারগী অহানবা মিৎয়েং থম্বা খোংথাংনি”, প্রধান মন্ত্রীনা হায়খি। মমাংগী সরকারনা চিংগী লমদমশিংদা এজুকেসন অমসুং হকশেলগী সেবা পীনবা পাংথোক্লম্বা থৌওংশিংদা পেন্দবা ফোংদোকখি অমসুং হৌজিক্কী সরকারনা অয়ূশমান ভারত স্কিমগী মখাদা লুপা লাখ ৫ ফাওবগী ইন্স্যুরেন্স কভর পীরি হায়না ফোংদোকখি। প্রধান মন্ত্রীনা মোদেল এক্লাব্যা স্কুল, প্রধান মন্ত্রী অৱাস য়োজনা অমসুং অরুনাচল স্তার্তঅপ পোলিসীগী খুদম পীখি। মীপুম খুদিংদা মৈ ফংহন্নবগীদমক্তা ইং ২০১৪দা হৌদোকখিবা সৌভাগ্যা য়োজনাদা মীয়ামগী পুক্নিং চিংশিল্লদুনা, প্রধান মন্ত্রীনা অরুনাচল প্রদেশকী খুঙ্গং কয়া অমনা নিংতম্বা ফংলবা মতুংদা মপুন্সিগী খ্বাইদগী অহানবা ওইনা মৈ ফংনখ্রে হায়না পাউদমখি।
“রাজ্যসিগী য়ুম্থোং অমসুং খুঙ্গং খুদিংদা চাউখৎ-থৌরাংগী কান্নবা য়ৌহন্নবা ঐখোয়না মিসন মোদতা থবক তৌরি”, শ্রী মোদীনা হায়খি। তুরিজমদা কান্নবা শাফু ফংগদবা অমসুং লমদমসিদা মাইগ্রেসন তৌরকপা হন্থহনগদবা, ঙমখৈগী খুঙ্গং খুদিংবু ভাইব্রেন্ত বোর্দর ভিলেজ প্রোগ্রামগী মখাদা চাউখৎহন্নবা সরকারনা হোৎনরিবশিংগী মতাংদসু মহাক্না ৱাফম কয়া ফোংদোকখি। লৈবাক্কী নহাশিংবু এন.সি.সি.গা মরী লৈনহন্নবা অখন্নবা প্রোগ্রাম অমা পায়খৎলি অমসুং মসিনা নহাশিংদা দিফেন্স ত্রেনিং পীবতা নত্তনা লৈবাক্কীদমক্তা তেংবাংনিংবগী ইথিল অমসু লাকহনগনি হায়না মহাক্না পাউদমখি। প্রধান মন্ত্রীনা মশাগী ৱারোল অসুম্না লোইশিনখি, “রাজ্যসিগী দবল ইঞ্জিন সরকার অমদি সবকা প্রয়াস থৌওংগা পুন্দুনা অরুনাচল প্রদেশকী চাউখৎ-থৌরাংগীদমক্তা খোঙফম চেৎলি”।
অরুনাচল প্রদেশকী মুখ্য মন্ত্রী, শ্রী পেমা খন্দু, রাজ্যপাল, শ্রী বি.দি.মিশ্রা অমসুং কেন্দ্র মন্ত্রী। শ্রী কিরেন রিজিজুসু ঙসিগী থৌরমসিদা অতোপ্পা মীথুংলেনশিংগা লোয়ননা শরুক য়াখি।
বেকগ্রাউন্দ
দোনয়ি পোলো এয়রপোর্ত
অৱাং-নোংপোক্তা চৎথোক-চৎশিন ফগৎহন্নবা মরুওইবা খোঙথাং অমদা, প্রধান মন্ত্রীনা অরুনাচল প্রদেসকী অহানবা গ্রিনফিল্দ এয়রপোর্ত-‘দোনয়ি পোলো এয়পোর্ত, ইতানগর’ শঙ্গাগনি। এয়রপোর্ত অসিগী মমিং অসিদা অরুনাচল প্রদেসকী ইনাকখুল্লবা চৎনবীশিং অমসুং কলচরগী মমি তারি অমসুং মসিদা থায়না মমাঙঙৈগী নুমিৎ(দোনয়ি) অমসুং থা(পোলো) ইকায়খুম্নবা উৎপগী চৎনবীগী মমি অদু তারি।
অরুনাচল প্রদেসকী অহানবা গ্রিনফিল্দ এয়রপোর্ত ওইরিবা এয়রপোর্ত অসি লম একর ৬৯০ হেনবদা লুপা কোতি ৬৪০ হেন্না চংনা শেমগৎপনি। মিতর ২৩০০ শাংবা রেনৱে লৈবা এয়রপোর্ত অসি মখল খুদিংমক্কী নোং-চিংগী ফিবমদা শীজিন্নবা য়াগনি। মতমগী অনৌবা বিল্দিং অমা ওইরিবা এয়রপোর্ত তর্মিনেল অসিদা ইনর্জি লিক্না শীজিন্নবা, রিনিউএবল ইনর্জি অমসুং রিসাইক্লিংগী খুদোংচাবশিং য়াওরি।
ইতানগরদা অনৌবা এয়রপোর্ত অমা শেমগৎপা অসিনা লমদম অসিদা চৎথোক-চৎশিন ফগৎহনবা খক নত্তনা, মসিনা ললোন-ইতিক অমসুং তুরিজম চাউখৎনবগী কেতেলাইস্ত অমা ওইনা থবক তৌদুনা লমদম অসিগী শেন-থুমগী ফিবম ফগৎহনবা ঙম্লগনি।
অৱাং নোংপোক রাজ্য তরুক, মিং ওইনা পল্লবদা, মিজোরম, মেঘালয়, সিক্কিম, অরুনাচল প্রদেশ অমসুং নাগালেন্দগী এয়রপোর্তশিংদগী চহি ৭৫গী মনুংদা খ্বাইদগী অহানবা ওইনা ফ্লাইত পায়বগী মতৌ উবা ফংখ্রে।
অৱাং নোংপোক্কী এয়রক্রাফ মুবমেন্তনা ইং ২০১৪দগী ১১৩%গী চাংদা হেনগৎখিবগী মতৌ উবা ফংই। মসি হান্নদি ইং ২০১৪দা চয়োলদা ৮৫২ ওইরম্বদগী ইং ২০২২দা চয়োলদা ১৮১৭ ওইরবনি।
এম.দবল্যু. ৬০০কী কামেং হাইদ্রো পাৱর স্তেসন
লুপা করোর ৮৪৫০ হেন্না চংনা শাখিবা অমসুং অরুনাচল প্রদেসকী ৱেস্ত কামেং জিলাদা কিলোমিতর ৮০ হেন্না পাক-চাউনা লৈরিবা প্রোজেক অসিনা অরুনাচল প্রদেশপু মৈ লেম-পানা পুথোকপা রাজ্য অমা ওইহল্লগনি অমসুং নেসনেল গ্রিদতা কান্নবা পীরগনি। মসিগী প্রোজেক অসিনা লৈবাক অসিদা মৈখু চেন্দবা ইনর্জি শীজিন্নবগী পান্দম অদু ফংনবা হোৎনবদা চাউনা মতেং পাংলগনি।
*****
(Release ID: 1877243)
Visitor Counter : 213
Read this release in:
Kannada
,
Bengali
,
English
,
Urdu
,
Marathi
,
Hindi
,
Assamese
,
Punjabi
,
Gujarati
,
Odia
,
Tamil
,
Telugu
,
Malayalam