নমস্তে! বনক্কম!

অদোম পুম্নমকপু ঐহাক্কী নমস্কার। ইন্দোনেসিয়াদা লাক্লবা তুংদা, বালিদা লাক্লবা তুংদা, হিন্দুস্তান মচা খুদিংনা তোঙানবা মতৌ অমা ফাওই, ঐহাকসু মদুমক ফাওই। ভারতকা চহি লিশিং কয়াদগী মরী লৈনদুনা লাক্লবা মফম, অমসুং চহি লিশিং কয়া হৌখ্রবসু, চারোন শুরোন কয়া লাক্তুনা চৎখ্রবসু, ঐখোয়গী চৎনবীগী মমি কৌদৌনুংদা মাঙহন্দবা, চৎনবী অসিবু চহি লিশিং কয়া অসিদা অদুমক হিংহন্দুনা থম্বা, চারোন খুদিংনা চৎনবী অসিবু খঙবা অমসুং চৎনবী অসিগা মরী অদুমক কায়দনা থম্লি হায়না তাদুনা লাক্লি। মফমসিগী মীয়াম অমসুং লমদম অসিমক্না তোঙানবা নুংঙাইবা অমা ফাওহল্লি। মফমদুমক্তগী ঐহাক্না হৌজিক অদোমগা ৱারী শারি। ঐখোয় বালিদা লৈরিবনি, বালিগী চৎনবীবু শৈথারিবনি। অদুগা ঐহাক্না হৌজিক ৱারী শারিবা মিৎকুপসিদা মফমসিদগী কিলোমীতর লিশিং কয়া লাপ্না লৈরিবা ভারতকী কতক শহরদা মহানদী তুরেল মতাইদা বালি য়াত্রাগী থৌরম পাংথোক্লি। থৌরম অসিমকসু বালি য়াত্রা হায়না কৌই। মসিগী বালি য়াত্রা হায়বসি করিনো? মসিদি ভারত অমসুং ইন্দোনেসিয়াগী মরক্তা চহি লিশিং কয়াদগী লৈদুনা লাক্লিবা লল্লোন ইতিক্কী মরীগী নুংঙাইবা ফোংদোকপনি। ইন্দোনেসিয়াগী মীয়াম্না হন্দক্কী বালি য়াত্রা অসিগী ফোতো ইন্তর্নেত্তা য়েংবা মতমদা মখোয়না তসেংনা চাউথোকচগনি, নুংঙাইবা ফাওগনি, পুক্নিং নুংশিগনি। চহি কয়াগী মতুংদা কোরোনানা মরম ওইরগা খুদোংচাবা কয়া লাকহনখি, মদুনা অয়েৎপা খরা পীখ্রে। অদুবু, হৌজিক্তি, চহি কয়াগী মতুংদা মীয়াম মশিং য়াম্বনা শরুক য়াদুনা ওরিশাদা স্কেল য়াম্না চাউনা, থৱাই য়াওনা অমসুং পুকচেল শেংনা বালি য়াত্রা পাংথোক্লি। বালি য়াত্রাবু মশক নাইহন্নবগীদমক্তা কম্পিতিসন অমা পাংথোক্লি হায়না ঐহাক্কী ইফমদা পাউদম্লক্লি, চেগী হি শাদুনা তাওহনগনি অমসুং থোউওং অসিমকপু ৱর্ল্দ রেকোর্দ ওইহন্নবা হোৎনগদৌরি হায়রি। মদুনা হায়বদি, ঙসি ওরিশাদা পুল্লিবা মীয়ামশিংগী মশাবুদু ওরিশাদা লৈ, অদুবু মখোয়গী ৱাখলদি অদোমগী মরক্তা লৈ হায়বনি।

মরূপশিং,

“মালেম অসি য়াম্না পীকই” হায়না মীয়াম্না য়াম্না তোয়না হায়নৈ অমসুং ইন্দোনেসিয়াগী মতাংদা য়েংলুরবদি, মসি শুপ্নগী ৱাহৈ নত্তে, অশেংবা শক্তম উবা ঙম্মি। য়াম্না চুন্নৈ। সমুদ্রগী কল্লবা ইথক-ইপোম্না ভারত অমসুং ইন্দোনেসিয়াগী মরীবু ইথক-ইপোমগুম্না ফজহল্লি, হিংদুনা লৈহল্লি, কৈদৌনুংদা চোকথবা নাইহন্দে, ইথক-ইপোমশিংনা লেপ্তনা লেংবগুম্না ঐখোয়গী মঙলানসু অদুমক হিংহন্দুনা থম্লি। ভারতকী ফিলোসোফী অমসুং নাৎকী পাউজেলনা কলিঙ্গা মেদাংগুম্বা নিংথৌ লৈবাক্কী খুত্থাংদা ইন্দোনেসিয়া য়ৌরম্বগী মতম অমা লৈরম্মি। অদুগা হৌজিক্কী মতমসিদনা ভারত অমসুং ইন্দোনেসিয়ানা ২১শুবা চহি চাসিদা অমনা অমগী তেংবাংনদুনা চাউখৎ-থৌরাংগীদমক্তা থবক তৌমিন্নরি। ইন্দোনেসিয়াগী লমদম্না ভারত্তগী লাকপা মীওইশিংবু নুংশিনা লৌশিনবীরি, মখোয়গী খুন্নাইদা তরাম্না ওকপীরি। মসিনা মরম ওইরগা, অদোম্নসু লৈবাক অসিগী চাউখৎ থৌরাংদা ইশাগী থৌদাং য়ারিবনি। ঐখোয়গী সিন্ধী ইমুং কয়া অমা মফমসিদা লৈরি। অদুগা ভারত্তগী লাকপা মখোয়গুম্বা সিন্ধী ইচিল-ইনাওশিংনা লমদমসিগী তেক্সতাইল সেক্তর, স্পোর্ত গুদ সেক্তর খক্তদা নত্তনা ফিল্ম অমসুং তি.ভি. ইন্দস্ত্রীদা ফাওবা মতেং পাংলি। গুজরাতকা মরী লৈনবা মীওই কয়াসু লমদমসিদা লৈরি। জেম, দাইমন্দ, মাইন, অমসুং লৌউ শিংউ ফাওবদা মখোয়শিং উবা ফংই। ভারত্তগী লাকপা ইঞ্জিনিয়র, চার্তর একাউন্তেন্ত, প্রোফেস্নেলশিংনা ইন্দোনেসিয়াগী চাউখৎ থৌরাংগী খোঙলোই ওইরি। তমিল লোল ঙাংবা কলাকার কয়ানা মফমসিগী সংস্কৃতী, আর্তপু মপাঙ্গল হেনগৎহন্নবগীদমক্তা মশাগী থৌদাং য়ারি। ইন্দোনেসিয়াগী বপ্পা য়োমেন নুৱারতাবু চহি ৩-৪গী মমাংদা ভারতকী পদ্মশ্রী পীদুনা ইকায় খুম্নখিবা ঐহাক্না নিংশিংলি অমসুং ভারতকী রাস্ত্রপতি ভবন অসি মতমদুদা খুবাক্কী মখোলনা থনখিবনি। মহাক্না শাখিবা কলাকৃতি গরুরা বিষ্ণু কেনকানাবু থাগত্তবা হিন্দুস্তানগী মীওই অমত্তা লৈরম্লোই। মতৌ অসুম্না, ইন্দোনেসিয়াগী ৱায়ান দিবিয়া অমসুং অগস ইন্দ্র উদায়নজীবু পদ্ম পীদুনা ইকায় খুম্নখিবা মতমদা ঐহাক্না মখোয়গী মরমদা খঙবগী খুদোংচাবা ফংজখি। অদোম্না অগস ইন্দ্র উদায়নগী মরমদা নীংথিনা খঙলবনি অমসুং মহাক মশামক হৌজিক ঐখোয়গী মরক্তা য়াওরি। মহাক্না মহাত্মা গান্ধীগী ৱাখল্লোনবু বালিদা হেন্না খুমাং চাউশিলহন্নবা থৱাই হকচাং য়াওনা হোৎনরিবনি। ঐহাক্না মহাক্কী ইন্তর্ভ্যু অমা য়েংখি, মদুদা মহাক্না ভারতকী খ্বাইদগী মশক থোকপা মতৌদি অতিথী দেব ভাৱ অসিনি হায়খি। মসিগী মতৌসিদি ভারত মচা খুদিংগী মথানুংদা য়াওবনি। মহাক্কী ইন্তর্ভ্যু য়েংবদা য়াম্না নুংঙাইবা ফাওখি, অদুগা ঐহাক্না ৱাফম অমগা হায়জনীংই। মীয়ামগা নক্নবা ঙম্বগী মতৌগীদমক্তা ভারত অসি মমিং য়াম্না চৎলম্বা য়াই, অদুবু ইন্দোনেসিয়াগী মীওইশিংসু হীরম অসিদা ভারত মচাশিংদগী তাবা নত্তে। ঐহাক্না মমাংদা জাকার্তাদা লাকখিবা মতমদা, ইন্দোনেসিয়া মীয়াম্না ঐহাক্কী ইফমদা উৎখিবা নুংশিবীবগী মতৌবু ঐহাক্না য়াম্না নক্না উবা ফংজখি। ঐহাকপু তরাম্না ওকপীখি, নুংশিবীখি অমসুং ইকায় খম্নবীখি। অদুগা রাস্ত্রপতি জোকো বিদোদোগা তেলঙ্গা পায়মিন্নবা নুংঙাইখিবদু ঐহাক্না ঙসিসু নিংশিংলি। ঐখোয় অনিনা তেলঙ্গানা ফজনা পাইমিন্নখিবনি। মদুদগী য়াম্না নুংঙাইখিবা মিৎকুপ্নি, অদুগা ঐহাক্তি গুজরাত্তা সংক্রান্তী মতমদা তেলঙ্গা পাইবগী ত্রেনিং নিংথিনা ফংখ্রবনি, অদুগা ইন্দোনেসিয়াদসু সংক্রান্তীগী মতমদা তেলঙ্গা পাইনৈ হায়বা ঐহাক্না খঙখি। ভারত অমসুং ইন্দোনেসিয়াগী নুংঙাইবখক্কী মরী লৈ হায়বা নত্তে, নুংঙাইবা মতমদা খক্তা মরী ফজৈ হায়বা নত্তে, ঐখোয়গী লৈবাক অনিদি অৱাবা নুংঙাইবা মতম খাঙমিন্নবনি, তেংবাংনবনি। ইন্দোনেসিয়াদা ইং ২০১৮দা য়ুহা কন্না হাখিবদা ভারতনা ওপরেসন মিত্র ওপরেসন খুদক্তা হৌদোকখি। অদুনা ঐহাক্না জাকার্তাদা লাকপদা ৱাফম অমা থমখিবনি। ভারত অমসুং ইন্দোনেসিয়াগী মরক্তা নাউতিকেল মাইল ৯০না থৎচরবসু, তসেংবদি ঐখোয় অসি নাউতিকেল মাইল ৯০ লাপ্নবা নত্তে, নাউতিকেল মাইল ৯০ নক্নবনি।

মরূপশিং,

পুন্সিগী থেংখাং কয়া, মিৎকুপ কয়াদা ভারত অমসুং ইন্দোনেসিয়ানা হৌজিক ফাওবদা তেংবাংনদুনা লাক্লি। বালিগী লমদম অসিদি মহাঋশি মার্কন্দেয় অমসুং মহাঋশি অগস্তকী মতমদগী অশেংবা ওইদুনা লাক্লবনি। ভারত্তা করিগুম্বা হিমালয় লৈরবদি, বালিদা অগুং চিংজাও লৈরি। ভারত্তা করিগুম্বা গঙ্গা লৈরবদি, বালিদা তীর্থ গঙ্গা লৈরি। ঐখোয়না ভারত্তা অফবা থবক হৌবা খুদিংদা শ্রী গনেশ তৌই, মফম অসিদসু য়ুম্থোং খুদিংদা শ্রী গনেশ লৈ, মীয়াম মফমশিংবু য়াইফহল্লি। পুর্নিমাদা চরা হেনবা, একাদশীগী মহিমা, ত্রিকাল সন্ধ্যাগী খুত্থাংদা নুমিৎ লাৎপা, ইমা সরস্বতীগী শক্তমদা মহৈগী পুজা তৌবগুম্বা মশিং থীঙমদ্রবা থৌওং কয়ানা ঐখোয়বু পুন্সিদুনা থম্লি, পুন্দুনা থমখিগনি। বালিগী মীপুম খুদিংনা মহাভারতকী ৱারী খঙই, মসিবু তাদুনা চাউরকপনি। অদুগা ঐহাক্তি দ্বার্কাধীশ ভগ্বান কৃষ্ণগী লমদম গুজরাত্তগী চাউরকপনি, ঐহাক্কী পুন্সিদি মফমদুদা লেনখিবনি। বালিগী মীয়াম্না মহাভারতপু লুনা খনজরিবা অসিগা মান্ননা ভারতকী মীয়াম্না বালিগী মীয়াম্বু লুনা খঞ্জৈ। অদোম্না মফমসিদা ভগ্বান বিষ্ণু অমসুং ভগ্বান রাম নিংলি, অদুগা ঐখোয়না ভগ্বান রামগী পোক্নফম লমদমদা রাম মন্দিরগী জাত্রা হুনখিবা মতমদা ঐখোয়না ইন্দোনেসিয়াগী রামায়নগী চৎনবীবুসু চাউথোকচবগা লোয়ননা নিংশিংখি। চহি খরগী মমাংদা ভারত্তা রামায়ন কুহ্মৈ হৌদোকখিবা মতমদা, ইনিদোনেসিয়াগী কলাকার কয়া অমসুং মফমসিগী কলাভৃধ কয়া ভারত্তা লাকখি অমসুং অহমেদবাদ, হাইদ্রবাদ, লখনৌগুম্বা তোঙানবা শহর কয়াদা মখোয়না প্রোগ্রাম পাংথোক-পাংথোক্না অয়োধ্যাদা য়ৌরক্তুনা অরোইবা প্রোগ্রাম অয়োধ্যাদা পাংথোকখিবনি, মীয়াম্না য়াম্না থাগৎনখিবনি। মখোয়না চৎলুবা হিন্দুস্তানগী মফম খুদিংগী পাউ-চেদা মখোয়গী পাউনা থনখিবনি।

ইচিল ইনাওশিং,

পুন্সিদা অমুক্তং ওইরবসু অয়োধ্যা নত্ত্রগা দ্বারিকাগী দর্শন তৌবা পামদবা মীওই অমত্তা বালিদা লৈরম্লোই হায়না ঐহাক্না খল্লি। ভারতমক্তদসু, মীয়াম্না প্রম্বনন মন্দির নত্ত্রগা গরুর বিষ্ণু কিনকানাগী মুর্তিগী দর্শন তৌবা য়াম্না পাম্নৈ। কোরোনাগী মমাংগী অহানবা চহিমক্তদা ভারত মচা লাখ ৫ হেনবনা বালিদা চৎখিবনা ৱাফম অসিগী শাখি ওইরিবনি।

মরূপশিং,

হেরিতেজ মান্নবা, মীওইবা খুন্নাইগীদমক্তা ফাওবা ৱাখল্লোন মান্নবা মতমদা, চাউখৎ থৌরাংগী মান্নবা লম্বীসু য়াৎলি। থা খরগী মমাংদা ভারতনা নিংতম্বগী চহি ৭৫ মপুং ফাখি। ইন্দোনেসিয়াগী নিংতম নুমিৎসু ভারতকী নিংতম নুমিৎকী নিনিশুবা নুমিৎ, ওগস্ত ১৭তা তাই, অদুবু ইন্দোনেসিয়ানা ভারত্তগী চহি ২গী মমাংদা নিংতম্বা ফংখি। ভারতনা ইন্দোনেসিয়াদগী তম্বা য়াবা কয়া অমা লৈ, অদুগা ঐখোয়গী নিংতম্বা মতুংগী চহি ৭৫গী খোঙচৎ অসিদগী ইন্দোনেসিয়াদা পীবা য়াবা কয়া অমসু লৈ। ভারতকী তেলেন্ত, তেক্নোলোজী, ইন্নোভেসন ইন্দস্ত্রী। অদুগা হায়রিবা হীরমশিং অসিনা ঙসিদি মালেমদা তোঙানবা শক্তাক অমা শেম্লে। ভারত মচানা সি.ই.ও. ওইবা মালেমগী চাউরবা কম্পেনী কয়া ঙসি লৈরে। অদুগা ঙসিগী মালেমদা য়ুনিকোর্ন ওইরিবা ১০গী মরক্তগী অমদি ভারতকীনি। ঙসি ভারতনা মালেমগী খ্বাইদগী য়াঙনা শাহৌ লৌরিবা শেন্মিৎলোন ওইরে। ভারতনা ঙসিদি দিজিতেল ত্রাঞ্জেক্সন্দা মালেমগী অহানবা থাক্তা লৈরি। মালেমগী ফিন্তেক্তা ভারতনা খ্বাইদগী মকোক্তা লৈরি। আই.তি.বি.পি.এন.গী আউতসোর্সিং তৌবদা ভারতনা ঙসি খ্বাইদগী মকোক্তা লৈরে। মালেমগী স্মার্ত ফোন শিজিন্নবগী হীরমদা ভারতনা খ্বাইদগী মকোক ওইরি। হিদাক লাংথক পীবা অমসুং ভেক্সিন কয়া শাবগী মতাংদসু ঙসিদি ভারতনা মালেমগী খ্বাইদগী মকোক ওইরিবনি।

মরূপশিং,

ইং ২০১৪গী মমাং অমসুং ইং ২০১৪গী মতুংদা লৈরিবা খ্বাইদগী চাউবা খেন্নবা অসিদি মোদী নত্তে, মদুদি লৈবাক অসিগী স্পীদ অমসুং স্কেলনি। ঙসিদি ভারতনা অঙকপা স্পীদতা থবক তৌরি। অদুগা চাউরবা স্কেলদা থবক তোউরি। ঙসিগী ভারতনা ৱাখল পীক্না খনদ্রে। মুর্তি শারবসু মালেমগী খ্বাইদগী চাউবা মুর্তী, স্তেদিয়ম শারবসু মালেমগী খ্বাইদগী চাউবা স্তেদিয়ম। ইং ২০১৪গী মতুংদা ভারতনা অনৌবা বেঙ্ক একাউন্ত মিলিয়ন ৩২০ হাংখি। মসিনা হায়বদি, অমেরিকাগী অপুনবা মীশিংগা মান্নবা বেঙ্ক একাউন্ত মশিং হাংখি হায়বনি। ভারতনা ইং ২০১৪গী মতুংদা, লাইরবা মীওই চাউরাক্না করোর ৩গী য়ুম লেম্না শাবীখি, অদুগা মখোয়না য়ুম হেক ফংবগা লাখপতি ওইনখি। ঐহাক্না য়ুম করোর ৩গী ৱারী শারিবা অসিনা করি তাক্লি? মসিনা হায়বদি, ওস্ত্রেলিয়াগী ইমুং খুদিং নত্তেকো, মীওই খুদিংগী য়ুম অমমম ফংবা য়াগদবা য়ুম মশিং শাখি হায়বনি। মমাংগী চহি ৭-৮দা ভারতনা কিলোমীতর লিশিং ৫৫গী নেস্নেল হাইৱে শাখি। মসিনা হায়বদি, স্কেলদা হায়বনিকো, মালেম অকোয়ববু অনি মখায়রক কোয়বগা মান্নগনি হায়বনি। ঙসিদি, ভারতনা অয়ুশমান ভারতকী মখাদা লুপা লাখ ৫ ফাওবগী লেম্না লাইয়েংবগী খুদোংচাবা পীরি, লুপা লাখ ৫ ফাওবগী মেদিকেল বিল তাবদু সরকারনা পীগনি হায়বনি। মসিগী কান্নবা মীওই কয়ানা ফংখ্রে, য়ুরোপকী অপুনবা মীশিংদগী হেনবা মীওই মশিংনা মসিগী কান্নবা ফংখ্রবনি। কোরোনা মতমদা ভারতনা লৈবাক মীয়ামদা কাপখিবা ভেক্সিন দোজ খুদিংমক লেম্না কাপখিবা ঙাক্তনি। য়ুরোপ অমসুং অমেরিকাগী অপুনবা মীশিংদগী শরুক অনি মখায় হেনবদা ঐখোয়না হিন্দুস্তান্দা লেম্না কাপখি। ৱারোল ময়াম অসি তাবদা অদোম য়াম্না চাউথোকচরমগনি। চাউথোকইকো? অদুনা, ভারত অসি হোংলক্লে হায়না ঐহাক্না হায়রিবনি।

মরূপশিং,

ঙসিদি ভারতনা মশাগী চৎনবীদা চাউথোকচরি, ইশাগী চৎনবীগী মপাঙ্গল কনখৎহন্দুনা অতিয়া শোকপা ঙম্বগা লোয়ননা চাউখৎপা ভারত অমা শেম্নবা পান্দম থম্লি, মাংজিল থানা চঙশিল্লি। অদুবু ভারতনা ঙসি থম্লিবা পান্দম অসি মশাখক্কী নত্তে, ঐখোয়দি ইশা খক্কী খনবা মীওই নত্তে, মসিনা ঐখোয়গী সন্সকার নত্তে। ২১শুবা চহি চা অসিদা মালেম্না ভারত্তা থাজবা কয়া থম্লি। মসিমকপু ভারতনা মশাগী থৌদাংনি খল্লি। মালেমগে অফবা তৌবা হায়বসি ঐখোয়গী তৌফম থোকপা মিৎয়েং ওইনা য়েংলি। ঐখোয়গী চাউখৎ-থৌরাংগীদমক্তা ভারতনা অমৃত কালগী রোদমেপ শেম্লিবা অসিদা মালেমগী শেন্মিৎলোন অমসুং রাজনিতীগী মরমদসু খল্লি। ভারতনা আত্মানির্ভর ভারতকী পান্দম মাঙদা থম্বা মতমদা, মসিদা মালেমগী কান্নবা পুরকপগী ৱাফমসু য়াওরি। ঐখোয়না রিন্যুএবল ইনর্জীগী সেক্তরদা ৱান সন, ৱান ৱর্ল্দ, ৱান গ্রিদকী মন্ত্রা হাপ্লি। মালেমগী হকশেল ফহন্নবগীদমক্যা ঐখোয়না ৱান আর্থ, ৱান হেল্থকী খোঙথাং পায়খৎলি। ক্লাইমেত চেঞ্জকুম্বা শিংনবগী মাইয়োক্তা চঙশিনবা মতমদা ইথৎ লৈবাকশিংদদি, ভারতনা মখোয়গী বোর অমগুম্না থবক তৌরি। ক্লাইমেত চেঞ্জকী শিংনবশিংগা থেংনবা ঙম্নবা ভারতনা মালেমগী মফমদা মিসন লাইফকী পাম্বৈ পীরি। মসিনা সস্তেনেবল লাইফস্তাইল হিংহনবদা তেংবাংগদৌরিবনি। মালেম পুম্বনা ইনভাইরনমেন্ত ফ্রেনলী অমসুং হোলিস্তিক হেল্থকেয়রগী মাইকৈদা চঙশিল্লিবা মতমসিদা ভারতকী য়োগ অমসুং আয়ুর্বেদনা মালেম মীয়ামদা খুদোল অমগুম্না থোক্লি। আয়ুর্বেদকী ৱাফম লাকপসিদা ভারত অমসুং ইন্দোনেসিয়াগী তেংবাংনবগী হীরম অমা অমুক নিংশিংলক্লে। ঐহাক্না গুজরাতকী মুখ্য মন্ত্রী ওইরিঙৈদা, গুজরাত আয়ুর্বেদিক য়ুনিভর্সিতী অমসুং মফমসিগী য়ুনিভর্সিতী হিন্দু ইন্দোনেসিয়াগী মরক্তা য়ানবা অমা পুরকখিবনি। মদুগী চহি খরগী মতুংদা য়ুনিভর্সিতী অসিদা আয়ুর্বেদ হোস্পিতাল লিংখৎখিবদা ঐহাক্না য়াম্না নুংঙাইবা ফাওই।

মরূপশিং,

বাসুদৈবা কুতুম্বাকম, হায়বদি মালেম পুম্বা অসি ইমুং অমা ওইনা খনবগী ভারতকী ৱাখল্লোন অসিনা মালেমগী অফবা তৌনীংবগী লম্বী য়াৎলি। ভারতনা কোরোনা মনুংদা হিদাক্তগী হৌরগা ভেক্সিন ফাওবগী লমদা মরোমদোম লেপচবা ঙমখিবা ঐখোয়না উরে, মসিনা মালেমদসু কান্নবা পীখি। ভারতকী পাঙ্গলনা লৈবাক কয়াগী ঙাকথোক চুংগোই ওইখি। ইন্দোনেসিয়াগুম্বা মরুপ লৈবাক্কীদমক্তা ঐখোয়না লেংগোন্নদুনা লেপমিন্নখি। মতৌ অসুম্না, ভারতনা স্পেস সেক্তরদসু মালেমগী সুপর পাৱর ওইনা থোক্লক্লিবা অসিদা সাউথ এসিয়া লৈবাকশিংনা অখন্ননা কান্নবা ফংনরি। দিফেন্সকী লমদা ভারতনা দিকেদ কয়াদগী মীরম পোত্থোক্তা মীখা পোল্লম্বা অদু ওইদ্রে, লৈবাক অসিনা মশাগী তৌবা ঙম্বগী মতিক হেনগৎহল্লে। ব্রহ্মোস মিসাইলদগী হৌরগা তেজস ফাইতর জেতপু মালেম্না থাগৎনবগী মতৌ অসুম অসুম হেনগৎলক্লি। ভারতনা থম্লিবা পান্দম ফংনবা ভারতনা য়াম্না কন্না হোৎনরি। হোৎনদুনা পান্দম ফংবা হায়বগী মন্ত্রনা ২১শুবা চহি-চাগী অনৌবা ভারতকী ইথিল ওইরি। ঐহাক্না ঙসিগী থৌরমসিদা অদোম পুম্নমকপু মথংগী প্রবাসী ভারতীয় সম্মেলন্দা লাকপীনবা পাউজেল পীজরি। জনুৱারী থাগী ৯দগী থৌরম অসি হৌবনি। হন্দক্তি, থৌরম অসি মধ্য প্রদেশকী ইন্দোরদা পাংথোক্কনি, অদুগা ইন্দোর হায়বা শহরসিদি লৈবাক্কী খ্বাইদগী মশা নানবা শহর ওইরিবনি। মরম অদুনা ইন্দোরগী থৌরম অসিদা অদোম শোইদনা লাকপীয়ু। ইশাগী অচিনবা থবক লৈরবসু, মতমসিদা কোম্না শীন্দোকপীয়ু। অদোম্না ইন্দোর য়ৌরক্লবা মতুংগী নুমিৎ ১-২দা অহমেদবাদতা তেলঙ্গাগী কুহ্মৈ অমুক পাংথোক্কনি। ইন্দোনেসিয়াগী মীওইনা তেলঙ্গাগী কুহ্মৈদা চত্তবা হায়বসিদি ওইথোক্তবনি। অদুবু, ইশা ইথন্তা লাকপীগনু, ইমুং মনুংগী মথক্তা ইন্দোনেসিয়াগী মীওই খরসু শোইদনা পুবীরকউ। অদোমগী মদুগুম্বা থৌওংনা লৈবাক অনিগী মরী লেংদনা থমগনি হায়না ঐহাক্না থাজৈ। অদোমগী কর্মভুমীগী নুংঙাই য়াইফনবগীদমক্তা অদোম্না পাংবা য়াবা মতেং পাংগদবনি, থম্মোই শেংনা পাংগদবনি। ঐখোয়গী বোহরা খুন্নাইগী মরুপ কয়া ঙসি লাকপা উই। সেয়দনা সাহেবকা ঐহাক্কা নক্নবা মরী কৈবদা ঐহাক্না লাইবক ফবা ফাওজৈ। মালেমগী মফম অমদা হেক চৎপদা অতোপ্পা মীওই উন্নবা-উন্নদবা, বোহরা শাগৈদি অদুম উন্নবা ফংগনি।

মরূপশিং,

অদোম্না মশিং য়াম্না লাকপীবা, মতম কাইথোক্তুনা লাকপীবা, থৱাই য়াওনা লাকপীবগী মতৌ ঐহাক্না উজরি। ওরিশাগী বালি য়াত্রাদা ওইরিবা নুংঙাইবগী মতৌদুমক ঐহাক্না ঙসি মফমসিদা উবা ফংজরি। অদোমগী মসিগুম্বা মতৌ, ভারতকীদমক্তা লুনা খঞ্জবা অসিগীদমক্তা ঐহাক্না অদোম পুম্নমকপু থাগৎচরি, অদুগা য়াইফ পাউজেল কয়াসু পীজরি।

মরুপশিংবু থাগৎচরি।

***