প্রধান মন্ত্রী, শ্রী নরেন্দ্র মোদীনা ঙসি দিল্লীগী বিজ্ঞান ভবন্দা পাংথোকপা থৌরমদা স্লমদা লৈবা মীওইশিংবু রিহেবিলিতেসন তৌনবগীদমক্তা ‘ইন-সিতু স্লম রিহেবিলিতেসন প্রোজেক্ত’কী মখাদা দিল্লীগী কালকাজীদা নৌবা শাবা ই.দবল্যু.এস. ফ্লেত ৩০২৪ শঙ্গাখ্রে অমসুং ভুমিহীন কেম্পতা লৈবা মতিক চাবা বেনিফিশরীশিংদা ফ্লেতকী শো খুৎশিন্নখ্রে।

প্রধান মন্ত্রীনা ঙসিগী তিনখিবা মীয়ামদা ৱা ঙাঙবদা ঙসি অসি দিল্লীদা লৈবা ইমুং চাম্ম-চাম্মগী য়াম্না মরু ওইবা নুমিৎনি অমসুং ঝুগগিদা লৈবা লাইরবা ইমুং কয়াগী অনৌবা অহৌবা নুমিৎ অমসু ওইরি হায়খি। কালকাজী এক্সতেন্সনগী অহানবা ফেজ খক্তদা য়ুম ৩০০০ হেন্না শেম শাখ্রে হায়না প্রধান মন্ত্রীনা হায়খি। মফমসিদা লৈরিবা অতোপ্পা ইমুংশিংসু মশাগী অনৌবা য়ুমদা চঙবগী খুদোংচাবা অথুবা মতমদা ফংলগনি হায়না প্রধান মন্ত্রীনা হায়খি। “কেন্দ্র সরকারগী মসিগুম্বা খোঙথাং অসিনা দিল্লীবু অফবা শহর অমা ওইহনবদা তেংবাংগনি হায়না ঐহাক্না থাজবা থম্মি”, মহাক্না হায়খি। দিল্লীগুম্বা অচৌবা শহরদা উবা ফংলিবা চাউখৎ থৌরাং অমসুং মঙলান কয়া মঙফাওনরিবসিগী মতাংদা পল্লদুনা, প্রধান মন্ত্রীনা মসিগুম্বা চাউখৎ থৌরাং অমসুং মঙলানশিংগী ফম্বাক্তি লাইরবশিংগী শু-নোম্বা কনবা অমসুং হোৎনজমনশিংনা শেম্বনি হায়খি। “তাইয়োন্নবা মতৌ অমনা”, মহাক্না মখা তাখি, “মসিগুম্বা লাইরবশিং অসি নাতৈ চাদবা ফিভমদা হিংহনবসিনি। শহর অমখকক্তদা মসিগুম্বা খল মান্নদবা থৌওং থোক্লবদি, মপুং ওইবা চাউখৎপগী মতাংদা ঐখোয়না করম্না খনবা ঙমগনি? নিংতম্বগী অমৃত কাল অসিদা ঐখোয়না মসিগুম্বা খল মান্নদবা অসি মেনখৎপা তাবনি। মসিনা মরম ওইদুনা, লৈবাক অসিনা সবকা সাথ, সবকা বিকাস, সবকা বিশ্বাস অমসুং সবকা প্রয়াসকী লম্বীদা মীয়াম খুদিংগী চাউখৎ থৌরাংগীদমক্তা চৎলিবনি”।

দিকেদ কয়াদগী হৌদুনা লৈবাক্কী লৈঙাকপু লাইরবা হায়বসি মীয়ামগী শিংনবনি হায়বা ৱাখল্লোন্না শোকহন্দুনা লাকখি, অদুবু ঙসিগী সরকারসিদি লাইরবশিংগীনি অমসুং মখোয়বু নাথৈদুনা থম্বা হায়বসি সরকারগী ৱাখল্লোন্দা লৈতে হায়না প্রধান মন্ত্রীনা হায়খি। লাইরবশিংনা ঐখোয়গী পোলিসী শেম্বা অমসুং ৱারেপ লৌবগী পথাপকী খ্বাইদগী ময়াইদা লৈ হায়বদা মীয়ামগী পুক্নিং চিংশিল্লদুনা সরকারনা অর্বান লাইরবশিংগী শিংনবশিংবু মান্নবা মরু ওইবা পীদুনা য়েংলি হায়না মহাক্না হায়খি।  

মশাগী বেঙ্ক একাউন্ত ফাওবা লৈজদবা মীওই লাখ ৫০ দিল্লীদা লৈরম্মি হায়না প্রধান মন্ত্রীনা হায়খি। মসিনা মখোয়দা বেঙ্কিংগী কান্নবা ফংহল্লমদে। “মখোয়না দিল্লীদা লৈরবসু, দিল্লী অসি মখোয়দগী য়াম্না থাপ্না লৈরম্মি”, মহাক্না হায়খি। মসিগুম্বা ফিভম অসি সরকারনা হোংদোক্লে অমসুং একাউন্ত হাংবীদুনা ফাইনেন্সিএল ইনক্লুজন তৌবগী খোঙথাং অমা পায়খৎলে। মসিনা স্ত্রীত ভেন্দর য়াওনা দিল্লীগী লাইরবশিংদা হকথেংননা কান্নবা পীখি, তেংবাংখি। য়ু.পি.আই.না মীপুম খুদিংগী পুন্সিগী শরুক ওইরকপগী মতাংদসু মহাক্না পনখি। স্ত্রীত ভেন্দর ৫০,০০০ হেনবনা পি.এম. স্বনিধী স্কিমগী মখাদা শেলগী তেংবাং ফংনখি।

প্রধান মন্ত্রীনা হায়খি, “ঐখোয়না ৱান নেসন, ৱান রাসন কার্দকী খুত্থাংদা দিল্লীগী লাইরবশিংগী পুন্সি মহিং নুংঙাইহল্লি”। মসিনা লাইচৎ মনুংদা লাইরবশিংদা মশক থোক্না কান্নবা পীখি। মমাংগী চহি ২দগী হৌনা লাইরবা লাখ কয়ানা লেম্না রাসন ফংলি। দিল্লী খক্তগী ওইনা, থবক অসিগীদমক্তা লুপা করোর লিশিং ২.৫ হেন্না থাদখি হায়না মহাক্না পাউদমখি। দিল্লীগী লাইরবা লাখ ৪০ হেনবনা ইন্স্যুরেন্সকী সেক্যুরিতী ফংখ্রে হায়না প্রধান মন্ত্রীনা মখা তাখি। জন ঔশধী স্কিমগী মতেংদগী অনা লাইয়েংবদা শেল চঙবসু হন্থহনখ্রে। “পুন্সিদা সেক্যুরিতী লৈরকপা মতমদা, লাইরবশিংনা মশাবু লাইরবদগী থোক্লক্নবা পোত্থাবা নাইদনা কন্না শু-নোম্মি”, মহাক্না মখা তাখি। থৌওংশিং অসি য়াম্না হরাও নুংঙাইবা অমসুং পাক শন্না এদভর্তাইজ তৌদুনা পাংথোকখি অমসুং মসিগী মরমদি “ঐখোয়না অতোপ্পগী পুন্সিদা অহোংবা পুরক্নবগীদমক্তা হিংবগীনি” হায়না মহাক্না হায়খি।

দিল্লীদা লৈরিবা আইন্না য়াদবা কোলোনীশিংগী মতাংদা পল্লদুনা, প্রধান মন্ত্রীনা মীয়াম্না মতম পুম্বদা ৱাজরিবা অসি মখোয়গী য়ুমগী করি ফিভমদা লৈবগে খনবদনি হায়খি। “দিল্লীগী মীয়ামগী অৱাবশিং হন্থহন্নবগীদমক্তা কেন্দ্র সরকারনা থবক পায়খৎলে। মখোয়শিংবু পি.এম.-উদয় স্কিমগী খুত্থাংদা রিগুলরাইজ তৌনবা থবক চত্থরি। হৌজিক ফাওবদা, মীওই লিশিং কয়ানা স্কিম অসিগী কান্নবা লৌখ্রে”, মহাক্না হায়খি। লাইরবা অমসুং মিদ্দল ক্লাসশিংদা মশাগী ময়ুম শানবা ইন্তরেস্ত সবসিদী পীবদা লুপা করোর ৭০০ শিজিন্নখ্রে হায়না মহাক্না ফোংদোকখি।

“দিলীগী মীয়ামগী অনীংবা অপাম্বা থুংহন্নবগীদমক্তা ঐখোয়গী সরকারনা থবক অমত্তা চিত্থদনা পাংথোক্লি। কেন্দ্র সরকারগী পান্দমদি দিল্লীবু লৈবাক্কী কোনুং অমা ওইবগী থাক অসিগা মরী লৈননা তঙাই ফদবা হীরম খুদিংমক লৈবা মশক থোকপা শহর অমা ওইহনবনি”, মহাক্না হায়খি। প্রধান মন্ত্রীনা লাল কিলাগী ফম্বাক্তা দিল্লীগী মীয়ামগী ‘এস্পিরেস্নেল সোসাইতী’ ওইবগী ৱারোল নিংশিংলদুনা মহাক্না দিল্লীগী লাইরবা অমসুং মিদ্দল ক্লাসশিং অসি এস্পিরেস্নেল ওইবগা লোয়ননা তেলেন্তসু লৈ হায়খি।

দিল্লী এন.সি.আর. মফমগী চাউখৎ-থৌরাংদা অখন্নবা মিৎয়েং চঙলদুনা, মেত্রো লম্বীবু ইং ২০১৪গী মতুংদা কিলোমীতর ১৯০দগী ৪০০দা শাংদোকখি হায়না প্রধান মন্ত্রীনা পাউদমখি। মমাংগী চহি ৮দা, নেতৱর্ক অসিদা অনৌবা মেত্রো স্তেসন ১৩৫ হাপচিনখি অমসুং মসিনা মীয়ামগী শেল অমসুং মতম অনিমক কনখি হায়না মহাক্না হায়খি। ভারত সরকারনা লুপা করোর লিশিং ৫০ থাদদুনা দিল্লীগী শোরোক পাকথোক্লি অমসুং মসিনা ত্রাফিক চিনবগী ফিভম হন্থহল্লে হায়না প্রধান মন্ত্রীনা হায়খি। প্রধান মন্ত্রীনা দ্বার্কা এক্সপ্রেসৱে, অর্বান এক্সতেন্সন রোদ, অকশর্ধামদগী বাঘপাত ফাওবগী লেন ৬কী এক্সেস কন্ত্রোল হাইৱে অমসুং গুরুগ্রাম সোনহা রোদকী মওংদা শেম্বা ইলিভেতেদ কোরিদোরগী খুদম পীখি।

দিল্লী এন.সি.আর.গী রেপিদ রেলগী সর্ভিসসু অথুবা মতমদা হৌরগনি হায়না প্রধান মন্ত্রীনা পাউদমখি। নই দিল্লী রেলৱে স্তেসন শাবসু হৌরগনি হায়না মহাক্না তম্লদুনা মথংগী থা খরদা শাবা লোইশিল্লগদবা দ্বার্কাগী হেক্ত্যার ৮০গী লমদা শারিবা ভারত বন্দনা পার্ক্কীদমক্তা নুংঙাইবা ফাওই হায়খি। “দিল্লীগী অচৌবা পার্ক ৭০০মুক্তি দি.দি.এ.না শেন্নরি হায়না ঐহাক্কী ইফমদা পাউদম্লে। ৱজিরাবাদ বেরেজতগী ওখলা থোং ফাওবগী মরক্কী কিলোমীতর ২২গী অশাংবসিদা তোঙানবা পার্ক কয়া অমসু দি.দি.এ.না শারি”, মহাক্না হায়খি।

অনৌবা য়ুমশিংগী বেনিফিশরীশিংনা মৈ কন্নবা এল.ই.দি. বল্ব থানসি, ঈশিং মাংহল্লোইসি অমসুং খ্বাইদগী মরু ওইবা ওইনা, কোলোনীশিংবু লু নান্না অমসুং মশক ফজহল্লগা থমসি হায়না প্রধান মন্ত্রীনা হায়খি। ভারত সরকারনা লাইরবা করোর কয়াগী ময়ুম শারি, তোতি ঈশিং পীরি, মৈ ফংহল্লি, উজ্বালা সিলিন্দর পীরি, অদুগা স্লমশিং অসিদি অমোৎ অকায়নি হায়না চহি কয়াদগী খন্নদুনা লাক্লিবা অসি ঐখোয়না মুত্থৎপা তাই হায়না প্রধান মন্ত্রীনা হায়খি। “দিল্লী অমসুং লৈবাক্কী চাউখৎ থৌরাংগীদমক্তা মীপুম খুদিংনা মশাগী থৌদাং পাংথোক্কনি হায়না ঐহাক্না থাজৈ। মীপুম খুদিংনা মশাগী থৌদাং পাংথোক্তুনা দিল্লী অমসুং ভারতকী চাউখৎপগী খোঙচৎনা অনৌবা থাক্তা য়ৌবা ঙমগনি”, প্রধান মন্ত্রীনা ৱা লোইশিনখি।

দিল্লীগী রাজ্যপাল, শ্রী শ্রী বিনয় কুমার সক্সেনা, হাউজিং অমসুং অর্বান এফিয়র্সকী কেন্দ্র মন্ত্রী, শ্রী হর্দীপ সিংহ পুরি, হাউজিং অমসুং অর্বান এফিয়র্সকী কেন্দ্রগী রাজ্য মন্ত্রী, শ্রী কৌশল কিশোর, এক্সতর্নেল এফিয়র্সকী কেন্দ্রগী রাজ্য মন্ত্রী, শ্রীমতি মীনাক্ষী লেখী অমসুং এম.পি.শিংনা ঙসিগী থৌরমদা শরুক য়াখি।

বেকগ্রাউন্দ

ঝুগগি ঝোপ্রি ক্লস্তর ৩৭৬কী ইন-সিতু স্লম রিহেবিলিতেসনগী খোঙথাং অসি মীপুম খুদিংগী য়ুম লৈবা হায়বা প্রধান মন্ত্রীগী পান্দমগী মখা পোন্না দিল্লী দিভেলপমেন্ত ওথোরিতী (দি.দি.এ.)না পায়খৎপনি। রিহেবিলিতেসন প্রোজেক্ত অসিগী পান্দমদি ঝুগগি ঝোপ্রি ক্লস্তরশিংদা লৈরিবা মীওইশিংদা পুন্সি হিংবগী হেন্না ফবা অমসুং হকশেল ফবা অকোয়বগী ফিভমগা লোয়ননা নোংমগী পুন্সিগী তঙাই ফদবা মতিক চাবা খুদোংচাবশিং ফংহনবনি।

দি.দি.এ.না মসিগুম্বা প্রোজেক্ত অহুমসু কালকাজী এক্সতেন্সন, জেলরৱালা বাঘ অমসুং কথপুতলি কোলোনীদা পায়খৎখ্রবনি। কালকাজীদা লৈবা ভুমিহীন কেম্প, নবজীবন কেম্প অমসুং জৱাহর কেম্প হায়রিবা স্লম অহুমসিগী ইন-সিতু স্লম রিহেবিলিতেসন অসি কালকাজী এক্সতেন্সন প্রোজেক্তকী মখাদা তাঙ্কক নাইনা পায়খৎপনি। মনাক নকপা অহাঙবা কম্মর্সিএল সেন্তরদা ই.দবল্যু.এস. ফ্লেত ৩০২৪ ফেজ ১গী মখাদা শারে। ভুমিহীন কেম্পকী ঝুগগি ঝোপ্রিগী মফম অসি কেম্প অসিদা লৈবা মতিক চাবা ইমুংশিংবু নৌনা শারবা ই.দবল্যু.এস. ফ্লেত্তা রিহেবিলিতেত তৌরবা মতুংদা হাঙহনগনি। ভুমিহীন কেম্পকী মফমসি হাঙহল্লবা তুংদা, নবজীবন কেম্প অমসুং জৱাহর কেম্প রিহেবিলিতেত তৌনবগীদমক্তা হাঙলবা মফমসিমক অসিবু ফেজ ২গী মনুং চন্না শিজিন্নগনি।

প্রোজেক্ত অসিগী ফেজ ১ লোইশিনখ্রে অমসুং ফ্লেত ৩০২৪ অসি হোংজিনবা য়ানবা শেম শাবা লোইরে। ফ্লেতশিং অসি লুপা করোর ৩৪৫ চঙনা শাবনি অমসুং মসিদা ভিত্রিফাইদ ফ্লোর তাইল, সেরামিক্স তাইল, চাকখুমদা উদয়পুর গ্রীন মার্বল কাউন্তরনচিংবনা ফিনিশিং তৌবগী মতৌ য়াওনা তঙাই ফদবা হীরমশিং য়াওরি। কম্ম্যুনিতী পার্ক, ইলেক্ত্রিক সব স্তেসন, সিৱেজ ত্রিতমেন্ত প্লান্ত, দুএল ৱাতর পাইপ্লাইন, লিফ, হাইজিনিক ওইবা ঈশিং পীনবা অন্দর্গ্রাউন্দ রিজর্বরগুম্বা মীয়ামগী খুদোংচাবা পীবগী মওং মতৌ কয়াসু য়াওরি। ফ্লেত পীবনা মসিদা লৈগদৌরিবা মীয়ামদা মপু ওইবা অমসুং তেক্ত কায়দরে খলহনবগী ৱাখল্লোন চেলহনগনি।

दिल्ली की झुग्गी-झोपड़ी में रहने वाले गरीबों को पक्का मकान देने के संकल्प में आज हमने अहम पड़ाव तय किया है। https://t.co/3cBvsnft5t

— Narendra Modi (@narendramodi) November 2, 2022

Historic day as several citizens staying in Jhuggi-Jhopdi clusters in Delhi will now have their own houses. pic.twitter.com/tWsB5WbA52

— PMO India (@PMOIndia) November 2, 2022

Welfare of poor is at the core of our government's policies. pic.twitter.com/4Lx40tpSlA

— PMO India (@PMOIndia) November 2, 2022

We are ensuring 'Ease of Living' for the poor in Delhi through 'One Nation, One Ration Card'. pic.twitter.com/q4ByCFNQYZ

— PMO India (@PMOIndia) November 2, 2022

Our government is leaving no stone unturned to fulfil aspirations of citizens in Delhi. pic.twitter.com/RaeULy9AGf

— PMO India (@PMOIndia) November 2, 2022

We are facilitating faster, safer and comfortable commute. pic.twitter.com/X7UiNB0kOe

— PMO India (@PMOIndia) November 2, 2022

*****