খুরুমজরি

মধ্য প্রদেশকী মুখ্য মন্ত্রী শিবরাজ সিংহ চৌহানজী, রাজ্য সরকারগূ মন্ত্রীশিং, এম.এল.এ.শিং, পঞ্চায়ৎ মেম্বরশিং, দিগনিতরী পুম্নমক অমসুং মধ্য প্রদেশকী ইচিল ইনাওশিং,

অহানবদা ঐহাক্না পুম্নমকপু ধনতেরস অমসুং দীপাৱলীগী য়াইফ পাউজেল পীজরি। ধনতেরস অমসুং দীপাৱলী অসি অনৌবা অহৌবা অমনি। মখোয়না য়ুমশিং অনৌবা মচু শংই, অনৌবা কোল-লিক লৈশিল্লি, করিগুম্বা অনৌয়া খরা হাপচিল্লি অমসুং অনৌবা ফিরেপশিং লৌই। অনৌবা অহৌবা অমা পুরক্তুনা ঐখোয়না পুন্সিদা অনৌবা কয়ানা থলহল্লি, হরাও নুংঙাইবা অমসুং চাউখৎপগী অনৌবা লম্বী য়াৎলি। ঙসি মরুপশিং অসিনা মখোয়গী অনৌবা অমসুং পক্কাগী য়ুমশিংদা চংবা ফংজরি। কার নত্ত্রগা য়ুমশিংগুম্বা মমল য়াম্বা লনশিং লৈনবগীদমক্তা খুন্নাইগী শেল পাইবা মীওইশিংনা খক্তা ধনতেরস পালন তৌরমখি। রিসোর্স লৈবা, শেল লৈবা মীওইশিংনা খক্তা ধনতেরস পালন তৌরমখি অদুবু ঙসি লৈবাক অসিগী লায়রবশিংনা ধনতেরসতা মখোয়গী য়ুম অনৌবা ফংলি। ঙসি ঐহাক্না য়ুমগী মপু ওইখ্রবশিং মরু ওইনা নুপীশিংদা, অমসুং লুপা লাখ কয়াগী য়ুম শাদুনা লাখপতি ওইহনখিবশিংদা নুংঙাইবা ফোঙদোকচরি।

ইচিল-ইনাওশিং,

তেক্নোলোজীগী খুত্থাংদা ঐহাক্কী মাংদা ফম্লিবা মশিং লাকঙমদ্রবা মীওইশিং অসি লোইনাইদ্রবা অনীংবা অপাম্বশিংনা থানবা ঐহাক্না উবা ফংই। মসিগী অনীংবশিং, মঙলানশিং অসি উবা ফংখিদে মরমদি য়ুম লৈত্রবদি অনীংবশিং অসি নমথদুনা, লোৎশিন্দুনা অমসুং ওইথোকপা ঙমদনা মাংখি। মরুপশিং অসিনা অনৌবা য়ুমশিং ফংবা অসিনা মখোয়গী মঙলানশিং অদু মঙফাওনবা ঙম্নবা অনৌবা শক্তি ফংলগনি। মরম অসিনা নুমিৎ অসি য়ুম শঙ্গাবা খক্তা নত্তনা য়ুমদা হরাও তয়াম্বা, অনৌবা ফিরেপশিং, অনৌবা মঙলানশিং, অনৌবা ইনোৎশিং, অনৌবা তুংলমচৎ লাকপনি। হৌখিবা চহি ৮দা পি.এম. আৱাস য়োজনাগী মখাদা লায়রবা ইমুং করোর ৩.৫গী অচৌবা মঙলানশিং ঐখোয়না থুংহনবা ঙম্বা অসি ঐখোয়গী সরকারগী য়াম্না লাইবক ফবনি। অমসুং মসি ঐখোয়না ফকলাং মরিনা খাবা য়ুম অমা মখোয়দা পীবা খক্তা নত্তে। ঐখোয়গী সরকারনা লায়রবগীদমক লৈবা ওইবনা অমসুং মখোয়গী য়াইফনবা কত্থোকপনা অমসুং লায়রবশিংগী তঙাই ফদবশিং অমসুং অপাম্বশিং খঙবনা সরকারনা শাখিবা য়ুমশিং অসিদা তোইলেৎশিং য়াওহল্লি, ইলেক্ত্রিসিতী, ৱাতর কন্নেক্সন, গ্যাস কন্নেক্সন ফংহল্লি। তঙাই ফদবা খুদোংচাবা পুম্নমক য়াওবগা লোয়ননা প্রধান মন্ত্রী আৱাস য়োজনাগী মখাদা সরকারগী তোঙান-তোঙানবা পোলিসী অমসুং স্কিমশিংনা য়ুমশিং শারি।

মরুপশিং,

নখোয়গা লোয়ননা ৱারী শাবদা ঐহাক্না মমাংদা ওইরমখিবা ফীভম অদু নীংশিংলকই, মমাংদা করিগুম্বা মখোয়গী য়ুমশিং শাবীরবসু মখোয়না তোখাইনা তোইলেৎশিং শাবা তাখি অমসুং য়ুমগী মপুশিংনা মখোয়গী য়ুমশিংদা ইলেক্ত্রিসিতী, ঈশিং অমসুং গ্যাস কন্নেক্সনশিংগীদমক তোঙান-তোঙানবা সরকারগী ওফিসশিংদা পিল্লর অমদগী পোস্ত অমদা কোইচেন চেনবা তারমখি। মমাংগী সরকারগী মতমদা থৌওং পুম্নমক অসি লোইশিন্নবা ওফিস কয়াদা লায়রবশিংনা থবক তৌবীনবা শেল পীবা তাখি। মসি খক্তা নত্তে মমাংদা লায়রবশিংগী মমিংদা লাউথোকখিবা য়ুমশিং অদু সরকারগী অপাম্বগী মওংদা শাখি, মখোয়না য়াথং পীখি। মখোয়না মফম অসিদগী পোৎ লৌগদবা অমসুং মসি তৌগদবনি হায়খি। য়ুমদা অদুদা লৈগদবা মীওই অদুগী অপাম পামদবা অমসুং মশাগী ওইবা চৎনবী লৈজৈ, মশাগী পুন্সিগী মওং লৈজৈ। মহাক্কী অপাম্বা হংবীখিদে। মরম অসিদা য়ুম খরা শারমখিবা অদুগী গৃহ প্রবেশ পাঙথোকপা ওইথোকখিদে। অদুবু ঐখোয়না য়ুমগী মপুশিংদা মনীং তম্না তৌজনবা হক পীখি। মসিনা মরম ওইদুনা পি.এম. আৱাস য়োজনা অসি অচৌবা খুন্নাই অমসুং শেন্মীৎলোন্দা অহোংবা পুরক্নবা পাম্বৈ ওইখি।

ইচিল-ইনাওশিং,

অয়াম্বনা ঐখোয়গী লন থুম অসি মীরোল অদুনা মথংগী মীরোলদা থংথৈ। মমাংগী সরকারগী থৌশিল-থৌরাংদা অশোইবা লৈবনা মরম ওইদুনা মীওইশিং অসিনা মখোয়গী য়ুম লৈতবগী চৈথেংশিং অদু মথংগী মীরোলশিংদা অমুক থংথবা তাহনখি। ঐহাক্না তমথীরবা সাইকল অসিগী ঐহাক্কী ইরৈবাকচা করোর কয়াবু কনবা ঙমখিবগী খুদোংচাবা ফংহনবীখিবগীদমক ঐহাক্না অপেনবা পোকই। ঐখোয়গী সরকারনা লায়রবা খুদিংমক্তা পক্কাগী য়ুম ফংহন্নবা অয়ুক নুংথিল হোৎনখি। মরম অসিদা ঙসি মশিং য়াম্লবা য়ুমশিং শারি। মধ্য প্রদেশতসু পি.এম. আৱাস য়োজনাগী মখাদা য়ুম লাখ ৩০ শাখি। য়ুম লাখ ৯-১০ শাবগী থবক পাইখৎলি।

মরুপশিং,

য়ুমশিং অসিনা লৈবাক অসিগী কাচিন কোয়াদা থবক পীবগী খুদোংচাবশিং পীরি। ঙসি অয়ুক রোজগার মেলাগী থৌরমদা ঐহাক্না শরুক য়াখিবা মতমদা ঐহাক্না নুংথিলদা গৃহ প্রবেশমদা শরুক য়াগনি হায়না ফোঙদোকখি অমসুং মসিগা থবক পীবগা করম্না মরী লৈনবগে হায়জগে।

মরুপশিং,

ময়াম্না খঙই মদুদি য়ুমশিং শাবা মতমদা, চেক, সিমেন্ত, লৈঙোই, নুং, স্তীল, রং, ইলেক্ত্রিকেল আইতেমশিং, তোইলেৎ সীত, তেপ-পাইপ অসিগুম্বা কন্সত্রক্সনগা মরী লৈনবা পোৎলমশিংগী দিমান্দ হেনগৎলকখি। দিমান্দশিং অসি হেনগৎলকপা অসিনা পোৎলমশিং অসি পুথোক্লিবা ফেক্তরীশিং অসিনা মী হেন্না থম্মি, ত্রান্সপোর্তর হেন্না মথৌ তাই অমসুং মখোয়না মী কয়াদা থবক পী। পোৎশিং অসি য়োনবা দুকানশিংদা মীওই কয়ানা থবক ফংলি। অমসুং মসি সতনাদগী হেন্না কনানা খঙগনি? সতনা অসি লাইমস্তোন, সিমেন্তগীদমক খঙনৈ। য়ুমশিং অসি শাবা মতমদা সতনাগী সিমেন্তগী দিমান্দ হেনগৎলকখি। য়ুমশিং অসি শাবদা য়াওরিবা শিন্মীশিং, মিস্ত্রীশিং, উ শুবশিং, পাইপ শেম্বশিং, রং শংবশিং, উফু-কাংথোল শাবশিংনা থবক ফংখি। মধ্য প্রদেশ অসিদা মিস্ত্রী লিশিং ৫০ হেনবগা ত্রেন তৌখি হায়না ঐঙোন্দা ফোঙদোকখি। মসিগী মনুংদা লিশিং ৯-১০দি ইমা অমসুং ইচে-ইচলশিংনি। হায়বদি পি.এম. আৱাস য়োজনাগী খুত্থাংদা অনৌবা কলা, অনৌবা থবক্কী খুদোংচাবশিংনা ঐখোয়গী ইচে-ইচলশিংবু শাহৌ পীরি। অমরোমদা কন্সত্রক্সনগী লম অসিদা ইচে-ইচলশিং অসি অনস্কিল লেবর ওইনা লৌরমখি। হৌজিক ফাওবদা মধ্য প্রদেশতা য়ুমশিং অসি শাবদা লুপা করোর লিশিং ২২ চাদিং তৌখ্রে। মসিদা চংখিবা লুপা করোর লিশিং ২২ অসি কদাইদা চৎখি? য়ুমশিং শাখি অদুবু শেল অসি মধ্য প্রদেশকী য়ুম শাবগী তোঙান-তোঙানবা থবকশিং তৌরিবা মীওইশিংদা চৎখি, দুকানদারশিংদা চৎখি, ফেক্তরীগী মপুশিংদা চৎখি মসিনা মীওইশিং অসিগী ইনকম হেনগৎহনখি। মসিনা তাকপদি অহানবদা য়ুমশিং অসিনা মীপুম খুদিংমকপু চাউখৎহনখি।

ইচিল-ইনাওশিং,

মমাংগী সরকারশিং অমসুং ঐখোয়গী মরক্তা চাউনা খেন্নৈ। মমাংগী সরকারশিংনা লায়রবশিংবু ঙাইহনখি, মখোয়গঈ ওফিসশিংদা কোইচেন চেনহনখি। হৌজিক পাল্লিবা ঐখোয়গী সরকারনা প্রজাশিংগী মনাক্তা চৎলি অমসুং মীয়ামদা স্কিমশিংগী কান্নবা পুম্নমক ফংহন্নবা কেম্পেনশিং পাইখৎলি। ঙসি ঐখোয়না অচান মীরান নাইদনা স্কিমশিংগী কবরেজকী সেচুরেসনগী মরমদা ঙাংনরি। মসিদা অচান মীরান নাইবা তৌদে, ঐগী মাগী হায়বা ৱাখল্লোন লৈতে। মীপুম খুদিংমকপু য়াম্না থুনা পক্কাগী য়ুমশিং ফংহনখি। গ্যাস, মৈ, ঈশিং, আয়ুশ্মান ভারতকী মখাদা লুপা লাখ ৫ ফাওবগী লেম্না লায়েংখি। মীপুম খুদিংমক্তা অফবা লম্বী, অফবা স্কুল, কোলেকজ অমসুং অফবা লায়েংশঙ ফংহনখি। খুঙ্গং খুদিংমক্তা খোঙজেল য়াংনা ওপতিকেল ফাইবর ফংহনখি। ঐখোয়না মসিগীদমক অয়ুক নুংথিল খাইদনা থবক তৌখি। করিগীদমক ঐখোয়না থুজিল্লিবনো, করিগীদমক ঐখোয়না ঙাইঙমদ্রিবনো? মসি মমাংগী সরকারদগী ঐখোয়না তমশিনখিবা পরানি। দিকেদ কয়া অসিগুম্বা তঙাই ফদবা খুদোংচাবশিং অসি পন্দুনা লৈহনখি। লৈবাক অসিগী য়াম্লবা মীশিংনা তঙাই ফদবশিং অসিগীদমক ঙাইদুনা লাকখি। মখোয়না অতোপ্পা হিরমশিংগী মতাংদা খনবগী মতম ফংখিদে। মরম অসিনা ৱাশক, লায়রবা কোকহন্নবা ফোঙদোকখিবা ৱাফম অসি শুপ্নগী রাজনিতীগী ওইখি। মখোয়না কনাগুম্বা অমত্তগী থবক তৌখিদে। কম্মান্দরশিংনা ফনা থৱায় য়াওরবসু করিগুম্বা লান্মীশিংদা লান শোক্ননবা তঙাই ফবা পোৎলমশিং ফংহনদবা তারবদি লান মাইপাকপা ওইথোক্তে। মরম অসিনা ঐখোয়না লৈতা লায়রবা মাইথিবা পীনবা তঙাই ফদবা খুদোংচাবশিং ফংহন্নবা লৈবাক অসিগী প্রজা খুদিংমক্কীদমক খোঙজেল য়াংনা কন্নেক্ত তৌনবা ৱারেপ লৌখি। হৌজিক লায়রবশিংদা খুদোংচাবশিং অসি ফংহল্লি, মখোয়গী লায়রবা কোকহন্নবা খোঙজেল য়াংনা হোৎনরি। ঐহাক্না ৱাফম অমা হায়জনীংবদি নখোয়দা পীরিবা য়ুম অসি শুপ্নগী লৈনবা, চানবা, থক্নবা অমসুং তুম্নবা মফম নত্তে। নখোয়গী য়ুম অসি লানবন ঙম্বনি, মসি লায়রবা ঙাকথোক্নবা লানবন্নি, লায়রবা লৌথোক্নবনি।

ইচিল-ইনাওশিং,

হৌখিবা থা খরা অসিদা কেন্দ্র সরকারনা মালেমগী লাইচৎ মনুংদা ইরৈবাকচা করোর ৮০দা লেম্না রাশন পীখি অমসুং পি.এম. গরিব কল্যান অন্ন য়োজনাদা লুপা করোর লাখ ৩ হেন্না চাদিং তৌখি। অমসুং ঐহাক্না ৱাফম অমা হায়জনীংই, তেক্স থীরিবা মীওইশিংনা মখোয়গী শেল অদু মফম চানা শীজিন্নরে খঙবা মতমদা তেক্স পেয়রনা য়াম্না নুংঙাইবা পোকখি। ঙসি লৈবাক অসিগী তেক্স থীরিবা মীওই করোর কয়ানা কোরোনাগী মনুংদা মীওই করোর কয়াবু মতেং পাংনবা মখোয়না তৌখিবা মমল য়াম্লবা সর্ভিস অদুদা মখোয়না অপেনবা পোক্লি। ঙসি ঐহাক্না য়ুম লাখ মরি খুৎশিন্নবা মতমদা তেক্সপেয়রনা দিৱালী পালন তৌবা মতমদা মধ্য প্রদেশকী লায়রবা ইচিল-ইনাওশিং অসিনা দিৱালী পালন তৌরি, পক্কাগী য়ুম ফংলে হায়না খল্লি।

অমসুং মরুপশিং,

তেক্স থীরিবা মীওই অদুনা মঙোন্দগী লৌখিবা শেল অদুনা লেম্না ‘রীৱারি’ য়েন্থোকপা উবদা থমোয় পেনখি। ঙসি অসিগুম্বা তেক্স থীরিবা মীওই কয়ানা ঐঙোন্দা ফোঙনা চীথি ইবীরকখি। লৈবাক অসিগী অচৌবা শরুক অমনা লৈবাক অসিদগী রীৱারি কলচর মুত্থৎনবা হোৎনরক্লিবা অসিদা ঐহাক্না নুংঙাইবা ফাওই।

মরুপশিং,

ঐখোয়গী সরকারগী পান্দম অসি শুপ্নগী মাগী প্রজাশিংগী মঙলানশিং অমসুং অনীংবা অপাম্বশিং থুংহনবা খক্তা নত্তে অদুবু মিদল অমসুং লো-ইনকম গ্রুপশিংগী চাদিং হন্থহন্নবা হোৎনবসুনি। আয়ুশ্মান ভারত অসিবু খুদম ওইনা পীখি অমসুং হৌজিক ফাওবদা স্কিম অসিগী শরুক ওইনা শেল থুমদা শোত্থরবা অনাবা করোর মরিদা লায়েং ফংহনখি। সরকার অসিনা কোরোনাগী মনুংদা লেম্না ভেক্সিন কাপ্পগী কেম্পেনগীদমক লুপা করোর লিশিং কয়া চাদিং তৌখি অমসুং লায়রবশিংগী ফুরিৎ খাওদগী শেল চৎহনখিদে। অহানবদা কোরোনা লাকখি, মালেমদা লান থোকখি মসিনা মরম ওইদুনা ঙসি ঐখোয়না মালেমদগী তাংনা হারশিং লৈরি। ঐখোয়না ঙসি লুপা ২,০০০ হেন্না পীবা য়ুরিয়া বেগ অমদা লৌমীশিংনা শুপ্নগী লুপা ২৬৬তা ফংহল্লি, লুপা লিশিং ২০০০ হেনবা বেগ অমদা লুপা ৩০০দগী হন্থনা ফংহল্লি। লৌমীশিংদা পোৎলুম পুহনদনবা সরকারনা মসিদা লুপা করোর লাখ ২ হেন্না চাদিং তৌরি। কেন্দ্র সরকারনা পি.এম. কিসান সম্মান নিধি অসি লৌমীশিংগীদমক্তা থৌজাল অমা পীরি। নখোয়না উরম্লগনি, নুমিৎ খরনিগী মমাংদা বেনিফিসরী লৌমী খুদিংমক্তা খুদক্তা লুপা করোর লিশিং ১৬কী ইনস্তোলমেন্ত য়ৌহনখি। হৌজিক ঐখোয়গী সরকারনা লৌমীশিংগী বেঙ্ক একাউন্তশিংদা লুপা করোর লাখ ২ হেন্না দিপোজিৎ তোখি। অমসুং মসিনা লৌউ পন্থানা লাকপদা কান্নবা পীরি অমসুং লৌমীশিংনা হার অমসুং হীদাকশিং লৈনবা শেলগী মথৌ তাই। মহৈ মরোংশিং য়োনবদগী ফংলকপা শেল অদু হকথেংননা বেঙ্ক একাউন্তদা চংলি। এম.এন.আর.ই.জি.এ.গী শেল অসি বেঙ্ক একাউন্তদা হকথেংননা হাপ্পি। মাত্রু বন্দনা য়োজনাগী লুপা লিশিং কয়া মীরোনবীশিংনা মচি ওইবা চীঞ্জাক খ্বাইদগী মথৌ তাবা মতমদা য়ৌহল্লি। ইচিল-ইনাওশিং,

করিগুম্বা সরকারনা ঙসি পুম্নমক অসি তৌবা ঙম্লিবা অসিগী নুংগী ওইবা মরম অসি পুম্নমক্কীদমক সর্ভিস অমসুং পোলিতিকেল ৱিলগী ৱাখল্লোন চেনবনা ওইথোকপা ঙমহনবনি। ঐখোয়না নখোয়গী থৌজালশিংগা লোয়ননা কত্থোক্তুনা মাংদা চংশিল্লি। মরম অসিনা মীচম প্রজাগী পুন্সি লায়থোকহনবদা তেক্নোলোজী পাকশন্না শীজিন্নরি। ঐখোয়গী বিজ্ঞানিক, ঐখোয়গী নহা ওইরিবা দিস্কোবরশিংনা পুথোকপা তেক্নোলোজীনা মীচম প্রজাগী পুন্সি লায়থোকহনবদা শীজিন্নরি। ঙসি স্বামিত্ব স্কিমদা প্রোপর্তী রেকোর্দশিং শেম্বদা অমসুং লৌউ-শিংউদা দ্রোন সর্ভেশিং চত্থখি। মমাংদা মসিগী থবক অই পতৱারী, রিভেন্যু বিভাগকী কর্মচারীশিংনা তৌরমখি, হৌজিক থবকশিং অসি তেক্নোলোজীগা লোয়ননা দ্রোনশিং লাক্তুনা তৌরি। অহানবা ওইনা লৈবাক অসিদা খুঙ্গংগী য়ুমশিংগী মেপশিং অসি স্বামিত্ব স্কিমগী মখাদা শেমলি অমসুং খুঞ্জাশিংদা মপু ওইবগী সর্তিফিকেৎশিং পীরি। মরম অসিনা ঙমখৈগী চয়েৎনবা কোকহল্লি, য়ুমশিং আইন্না য়াদবা মওংদা লৌশিনবা য়াহনদ্রি। অমসুং মথৌ তারকপদা বেঙ্কশিংদগী লোনশিং ফংহল্লি। মতৌ অসুম্না লৌউ-শিংউদা দ্রোনশিং পাকশন্না শীজিন্নরি, লৌমীশিংদা দ্রোনশিংগী খুদোংচাবা পীরি। নুমিৎ খরনিগী মমাংদা ঐখোয়না লৌমীশিংগী অচৌবা খোঙথাং অমা লৌখৎখি। লৈবাক শিনবা থুংবদা প্রধান মন্ত্রী কিসান সমৃদ্ধি কেন্দ্রশিং হায়না হারগী দুকান লাখ কয়া হাংদোকখি। মফম অসিসা লৌমীশিংনা তঙাই ফদবা পুম্নমক ফংহনগনি। তুংদা সেন্তরশিং অসিদা লৌউ-শিংউগী খুৎশু খুৎলাই অমসুং দ্রোনশিং ফাওবা ৱাইবা য়ারগনি। য়ুরিয়াগী মতাংদা অচৌবা খোঙথাং অমা পাইখৎখি। হৌজিক করম্বা কম্পনীদগী য়ুরিয়া লৈগনি, করম্বদগী লৌরোই হায়বা অসিদা লৌমীশিংগী অৱাবা কোক্লগনি অমসুং হৌজিক হার খুদিংমক ভারত কৌবা ব্রান্দগী মখাদা ফংলগনি। মসিদা মমলসু ময়েক শেংনা ইরি। লৌমীশিংনা ইরিবা অদুতমক পীরগনি। খোঙথাংশিং অসুনা লৌমীশিং অমসুং লায়রশিংগী পুন্সি নুংঙাইহল্লগনি। ঐখোয়না চাউখৎপা ভারত অমা শেম্নবা মাইকৈদা থবক তৌরগনি। পক্কা য়ুমশিং অসিগী বেনিফিসরী পুম্নমক্তা ঐহাক্না অমুক হন্না নুংঙাইবা ফোঙদোকচরি। অমসুং নখোয় কয়া য়াম্না হরাওরমগনি হায়বা ঐহাক্না খঙই। মীরোল অহুম মরিনা মশাগী য়ুমদা অমুক্তা দিৱালী পাঙথোকপা ফংলমখিরোই। ঙসি নখোয়না নশাগী য়ুমদা অঙাংশিংগা লোয়ননা ধনতেরস অমসুং দিৱালী পাঙথোকপা ফংলগনি, থাওমৈগী মঙাল অসিনা নখোয়গী পুন্সিদা অনৌবা মঙাল অমা পুরকপা ওইরসনু। ঈশ্বরনা নখোয়বু থৌজানবীবা ওইরসনু, অনৌবা য়ুম অসিনা অনৌবা খুমাং চাউশিন্নবগী মরম ওইরসনু, ঐহাক্না য়াইফ মঙ্গোল পীজরি। হন্না-হন্না থাগৎচরি।

***