ভারত ইমানা য়াইফরে,

ভারত ইমানা য়াইফরে!

মফমসিদা দিৱালী য়াম্না ঙন্না লাকপগী মওংগুম্লে। কুহ্মৈগী মতম লাকপগী ওইরো, ধন্তেরাস, দিৱালী, অনৌবা চহিগী শেম-শাবা ওইরো, মীপুম খুদিংনা মশা-মশাগী থবক্তা লোয়না চিন্নরি। অদুবু, মশিং য়াম্লবা মীয়াম্না ঙসি লাকপীরি, অমসুং উরু উরু মফমদা মখোয়না পীক থল্লিবসিদা য়াইফ থৌজালনা গঙ্গাগুম্না চেনবগী মতৌগা চপ মান্নরে। জয় গির্নারী। মশিং য়াম্লবা সন্ত অমসুং মহাত্মা কয়ানা থৌজাল পীনবগীদমক্তা লাকপীরি, মসিদগী হেনবা নুংঙাইবা করি ওইগনি। মসিদি সিংহগী লমদম্নি, নর্সিংহগীসু লমদম্নি, অদুগা মশিং য়াম্লবা ইমা অমদি ইচেল-ইচলশিংনা থৌজাল পীনবগীদমক্তা লাকপীরি, মখোয়বু ঐহাক্না থম্মোই শেংনা থাগৎচরি।

ইচেল-ইচলশিং,

ঙসি জুনাগর, গির সোম্নাথ, পোর্বন্দরগী চাউখৎ থৌরাংগী লুপা করোর লিশিং ৪ হেনবগী প্রোজেক্তকী উরেপ-উয়ুং তম্লি। গুজরাতকী মতম অমগী থা ১২গী অপুনবা বজেত্তগী য়াম্না হেনবা শেনফমগী চাউখৎ-থৌরাংগী থবকশিংগী উরেপ উয়ুং ঙসিদি ঐহাক্না গুজরাত্তা নোংমখক লৈদুনা তম্লে। মসিদি অদোমগী থৌজালগী মতেংনা ওইথোকপনি অমসুং থবকশিং অসিনা ঐহাক্কী ঙামী মরূপশিংদা কান্নবা য়াম্না পীগনি। গুজরাতকী তুরিজমগী কোনুং ওইবগী মতিক জুনাগর, গির সোম্নাথ অমসুং পোর্বন্দরদা লৈ হায়না ঐহাক্না মতম পুম্বদা হায়দুনা লাকপনি। প্রোজেক্তশিং অসিনা থবক অমসুং ইশাবু থবক পীজবগী খুদোংচাবা কয়া পুদুনা লাক্লি। চাউখৎ-থৌরাংগী মসিগুম্বা থৌওংশিংবু দিৱালীগী খুদোলনি খন্না তাঞ্জা অসিগীদমক্তা হরাও নুংঙাইবা ফোংদোকপগীদমক্তা ঐহাক্না মীয়াম্বু থাগৎচরি। য়াইফ পাউজেলসু পীজরি।

ইচিল ইনাওশিং,

অদোম অমসুং অদোমগী থৌজালনা মরম ওইরগা ঙসিদি, ঐহাক্না চাউথোকচনা লেপ্লি। ঐহাক্না গুজরাত থাদোক্লবা তুংদা ঐখোয়গী তীম্না গুজরাতপু নীংথিরবা মওং অমদা শেন্নবীরি, ভুপেন্দ্র ভাই অমসুং মহাক্কী কাঙবুনা গুজরাতপু খোঙজেল য়াঙনা চাউখৎহন্নবগীদমক্তা থবক কয়া পায়খৎলি, মসিদগী হেন্না নুংঙাইবা করি লৈগনি। ঙসিদি গুজরাতনা সেক্তর খুদিংদা চাউখৎ-থৌরাংগী মাইকৈদা খোঙজেল য়াঙনা চঙশিল্লি।

অদুবু ইচিল ইনাওশিং,

ঐখোয়না মমাংগী মতম কয়া করম্না লেনখি হায়বা ঙসি মফমসিদা তিল্লিবা অহল লমন কয়ানদি ময়েক শেংনা খঙলমগনি, কাওরম্লোই। চহি ১০দা চহি ৭ ইকং থোকপনি। ঈশিংগীদমক্তা কয়া ৱারম্মি। নাকল অমদনা মহৌশা ইমানা মীরায়বীরম্মি, ঐখোয়গী ঘেঘুর সমুদ্রগী থুমহি চেনবা ঈশিংনা লেপ্তনা হায়জিল্লক্লম্মি, মনা মশিং অমত্তা হৌবা ঙমহনখিদবনি। ঐখোয়গী লৈবাক লৈহাওগী মসিগুম্বা ফিভম ওইরম্লবনি। কথিয়াৱার পুমহাঙ হাঙখি, খুঙ্গং কয়াগী মীয়াম্না ময়ুম হোংনখি। খরা অমনা সুরত্তা চৎখি, খরা অমনা হিন্দুস্তানগী তোঙানবা মফমশিংদা চেন্নখি, নোংমগী চরা তান্নবা কোইচেন চেন্নখি। অদুবু, ঐখোয়না পুন্না থম্মোই শেংনা হোৎনমিন্নখি, অদুগা থম্মোই শেংনা হোৎনবা মীওইশিংবু মহৌশানা ইমানসু চানবীবনি। ইচিল ইনাওশিংনা নুংঙাইথোকপীরো, ইং ২০০১গী মতুংদা মপুনা থৌজানবীখি। ইকং থোকপা চহি থেংনরক্তবা চহি ২০ হেল্লক্লে। মসিবু মপুগী থৌজাল হায়দ্রবদি করি হায়গনি মরুপশিং? নাকল অমদনা অদোম্না থৌজানবীবা, অদুগা নাকল অমদনা মহৌশানা থৌজানবীবগী মরম্না মীয়ামগীদমক্তা চাউখৎ-থৌরাং খুদোল তম্বা ঙমদুনা পুন্সি লেনবসিগী তোঙানবা নুংঙাইবা অমনি। ইমা নর্মদা খুরুম্বা অমসুং নুংঙাই য়াইফবগী থৌজাল নীরুনবগীদমক্তা স্পিসিএল বস তোংদুনা চৎলম্বগী মতম অমা লৈরম্মি। অদুবু ঙসিদি মতমদু হোংলে। হোৎনজমনগী মহৈ ফংদুনা ইমা নর্মদানা ঙসি সৌরাস্ত্রগী খুঙ্গং খুদিংদা মশামক্না থৌজাল পীনবা লেংবীরক্লে। ঈশিং ফংবা হৌরক্লে, লম্বী শোরোক ফগৎলক্লে, মনা-মশিং থাবা লৌমীশিংগী পুন্সিদা অহোংবা লাক্লে মরুপশিং।

ঐখোয়গী রাজ্যপাল সাহেব অচার্য় দেবব্রতজীনা জুনাগরগী লৌমীশিংনা নেচরেল ফার্মিংবু নীংথিনা পাংথোকপা হৌরে অমসুং মখোয়গী মপাঙ্গল খুদিংমক মসিদা থাদরে হায়না ঐহাক্কী ইফমদা পাউদম্বীরে। অদুগা গুজরাতকী কেসর হৈনৌগী থুম্লবা মহাওনা ভারত খক্তা নত্তনা মালেম শিনবা থুংবদা য়ৌরে। ভারতকী সমুদ্র তোর্বানগী অচৌবা শরুক অমদি গুজরাত্তা লৈ অদুবু মমাংগী সরকারনা সমুদ্রবু পোৎলুম্নি অমসুং মসিগী অতেকপা নুংশিৎপু হুনি খল্লম্মিবনি। অদুগা হৌজিক্কী অহোংবসি অমুক্তা য়েংবীয়ু ইচিল ইনাওশিং, পোৎলুম্নি খল্লম্বা সমুদ্রদুনা ঙসিদি ঐখোয়গী হোৎনজমনগী মহৈ পীরে। রনগী কৎচকী লৈঙোই উফুলনা মখোয় মশাগী শিংনবা ওইনা কোয়পাই পাইরম্বদু, ঙসিদি মদুগী কৎচ অদুনা গুজরাতকী চাউখৎ-তৌরাংগী চুক্লি পায়রি। মহৌশানা থোকহনবা অমাঙ অতা কয়া গুজরাতনা মাইয়োক্নখি, অদুগা গুজরাতনা চাউখৎপগী অনৌবা থাক কয়াসু ফংবা ঙম্লি। ঐখোয়না চহি ২৫গী মমাংদা গুজরাতকী চাউখৎ থৌরাংগীদমক্তা লেপখিবা ৱারেপ্না হৌজিক্তি মহৈ য়াল্লে। চহি ২০-২৫গী মমাংদা ৱাখিবশিংদি ঙসিগী নহারোলশিংনা খঙলরোই অদুবু ঙসিগী চাউখৎপা মতম পুরক্নবগীদমক্তা ঐখোয়না মিৎকুপ কাঙদনা হোৎনখিবনি।

ঐখোয়গী ঙামী খুন্নাইগী য়াইফ য়ুম্বাল, সেক্যুরিতী, তঙাই ফদবা পোৎলম অমসুং ইনফ্রাস্রকচরগীদমক্তা সাগর খেদু স্কিম ঐখোয়না হৌদোক্লম্বনি। স্কিম অসিগী মনুং চন্না ঐখোয়গী ঙামীশিংগী তেক্ত কায়দবা, খুদোংচাবা অমসুং মখোয়গী কারবারগী তঙাই ফদবা ইনফ্রাস্ত্রকচরদা ঐখোয়না অহানবা মিৎয়েং চঙখি। মসিগী মহৈ ওইনা ঙসিদি চহি ২০গী মতুংদা গুজরাতকী ঙা এক্সপোর্তনা শরুক ৭ হেনগৎলে। ঐখোয়গী ঙাগী এক্সপোর্তনা অসুক য়ামখৎলকপা অমসুং মালেমগী মফম খুদিংদা য়ৌরক্লিবসিদা মমাঙদা থোকখিবা থৌদোক অমা ঙসি নীংশিংলক্লে। ঐহাক্না মুখ্য মন্ত্রী ওইরিঙৈ মতমদা লাকখিবা জাপানগী দেলিগেতশিংনা ঐখোয়গী থৌওং খঙনবা পুকচেল শেংনা প্রজেন্তেসন য়েংলম্বনি। অদুবু ফিশরীগী খোঙথাংগীদমক্তা স্ক্রীন্দা কাপ্লিবা প্রজেন্তেসন লেপ্পীয়ু হায়রকখি। ঐহাক্না করি তৌরবগে, ঐহাক করিগুম্বা খরা তাক্লি হায়খি। মখোয়না অমুক্তং লেপ্পো হায়রকপদুদা ঐহাক করিমত্তা ভাব তারুদ্রে। মদুদগী, অদোম্না সমুদ্র তোর্বান অমসুং ঙামীশিং উৎলিঙৈ মরক্তা সুর্মা ঙা উবসিদা তিন য়োৎলে, ঐখোয় ফম্বা ঙম্লরোই, ঙা অসি চানীংলে চৎলগে হায়রকখি। সুর্মাই ঙা অসি জাপানগী কৈথেলদা মমিং য়াম্না চৎলি অমসুং মসিবু গুজরাতকী মিং পল্লগা খঙনৈ। চহিদা ঙা অসিগী লুপা করোর কয়া এক্সপোর্ত তৌই। অদুগা বলসারদা লৈরিবা ফিশ পার্ক অসিদগী হৌজিক এক্সপোর্ত তৌরে। ঐখোয়না ফিশরীজ সেক্তরদা অনৌবা মায় পাকপা কয়া ফংবা ঙম্লে।

ইচিল ইনাওশিং,

মমাংগী চহি ৮দা দবল ইঞ্জিন সরকারগী দবল কান্নবসি ঐহাক্কী গুজরাতকী সমুদ্র তোর্বান লমদমশিংনা ফংখি। ঙা, সী ফুদকী কারাবার চাউখৎখি। ঐখোয়গী চেনেল অসি থেনবনা মরম ওইরগা ঐখোয়গী ঙামীশিংনা শিংনবা কয়া থেংনরম্মি, চেনেল অসি য়াম্না হেন্না লুহনবা পাম্মি। ঙা ফারবা তুংদা সমুদ্র তোর্বান তম্না পুরকপদা খুদোংচাদবা কয়া থেংনরম্মি, অদুনা হৌজিক গুজরাত্তা ফিশিং হার্বর শানবা খোঙথাং পায়খৎলে, মসিনা ঐখোয়গী সাগর খেদুগী শিংনবা কয়াগী ৱারোইশিন পুরক্নবা হোৎনবগী থৌওংনি। দবল ইঞ্জিন সরকার লাক্লবা তুংদা থবকসিগী চাউখৎ থৌরাংনা শরুক অনি হেনগৎলে। ফিশিং হার্বর ৩গী উরেপ উয়ুংসু ঙসি তম্লবনি মরুপশিং। ঐখোয়গী লমদমগী শেন্মিৎলোন্না কয়া য়াম্না ফগৎলক্কনি অমুক্তা খনবীয়ু। ঙামীশিংগী পুন্সিদা কয়া য়াম্না চাউবা অহোংবা লাক্লগনি? ফিশ হার্বর লৈবদগী ঙা পুথোক-পুশিন তৌবা অমসুং এক্সপোর্ত তৌবদা য়াম্না লায়হল্লগনি। মসিগা লোয়ননা ঐখোয়না দ্রোন পোলিসী পুদুনা লাকখি। হৌজিক্তি, দ্রোন্না কিলো ২০, ২৫ অমসুং ৫০গী পোৎ পুরে। সমুদ্র লৈতবা মফমদসু অতেকপা ঙা ফংহনবা ঙমহনবগী খুদোংচাবা শেম্বগী থবক চত্থরি। চাউখৎপনা কান্নবা কয়া য়াম্না পী হায়বগী ফজরবা খুদমদি মসিনি, মরুপশিং।

ইচিল ইনাওশিং,

ঐহাক্কী লৌমী মরুপশিং, দবল ইঞ্জিন সরকারনা ঐখোয়গী খুঙ্গংগী করি তঙাই ফদবা লৈবগে খঙনা থবক তৌই। ঐখোয়গী সরকারনা পি.এম. কিসান সম্মান নিধী পুরক্তুনা হন্দক্তা লুপা করোর লিশিং কয়া লৌমী অমমমগী বেঙ্ক একাউন্ততা হাপখিবা অদোমসু উরম্লগনি। ঙসিদি, লবুক্তা ফম্লিবা লৌমীগী মোবাইলদা লুপা লিশিং ২ লাকখ্রে অমসুং মখোয়গী একাউন্ততা চঙখ্রে। হৌজিক ফাওবদা লৌমীশিংদা পীখিবা শেনফম্না পুন্না লুপা করোর লাখ ২গা লিশিং ১৬০০০ য়ৌখ্রে।

ইচিল ইনাওশিং,

কান্নবসি গুজরাতকী লৌমীশিংসু ফংলে। মখোয়গী একাউন্তশিংদা চঙলকখিবা লুপা করোর লিশিং কয়াদগী মখোয়না মতেং কয়া ফংলে। অপীকপা লম লৈজবা, ইরিগেসনগী ঈশিং থিবা তাবা অমসুং নোংগী ঈশিংগী মখা পোল্লম্বা লৌমীশিংদা শেল অসিনা মতেং য়াম্না পীরি। ঐখোয়গী সরকারনা লৌমী ওইরো, এনিমেল হসবেন্দরী তৌবা ওইরো অমসুং সাগর খেদুগী ঐহাক্কী ঙামীশিং ওইরো, মখোয় পুম্নক্কা কিসান ক্রেদিত কার্দকী খুদোংচাবগা মরী লৈনহল্লে। মসি অহানবদা লৌমীখক্তা পীরম্বনি। ঐখোয়না মসি চাউথোক্তুনা এনিমেল হসবেন্দরী অমসুং ঙামীশিং মনুং চলহনখি। অমসুং মসিনা মরম ওইরগা মখোয়না বেঙ্কতগী লোন লৌবদসু লায়হল্লে। মখোয়না মসিদগী লুপা করোর লাখ ৩.৫০গী কান্নবশিং অপীকপা শেন্দোইদা ফংলি। মখোয়না শেন্দোই চাবশিংগী মনাক্তা চৎলুদ্রবসু য়ারে, শেন্দোইগী পোৎলুম পুদ্রবসু য়ারে অমসুং মশাগী কারবার চাউখৎনবা মশাগী শেল থাজবা ঙম্লে। হিদগী হৌদুনা জেকেত ফাওবা, দিজলগী ওইরো, লেবরগী ওইরো, থাউগী ওইরো, শেনফম অসিনা মখোয়দা মতেং য়াম্না পীরি। অদুগা লোন মতম চানা শিংবা মীওইশিংগী শেন্দোই অমুক কোকপীরি। মসিদগী হেনবা কান্নবা কদাইদা ফংলিবগে? কিসান ক্রেদিত কার্দ অসিনা শা-য়েন লোইবা মীইওইশিংগী পুন্সি মহিং য়াম্না নুংঙাইহল্লে, অমসুং মমাংগী দিকেদ অনিদা গুজরাতকী হিথাংফমশিংদা লাকখিবা চাউখৎ-থৌরাংনা গুজরাতকা নুংঙাই য়াইফবগী অনৌবা লম্বী অমগা শম্নহনখ্রে।

ঐখোয়না সাগরমালা স্কিমগী মখাদা ভারতকী সমুদ্র তোর্বানগী ইনফ্রাস্ত্রকচর হেন্না ফগৎহন্নবা সীপোর্তখক্তগী নত্তনা পোর্ত লেদ দিভেলপমেন্তকী থবক থৌরমশিংদা মিৎয়েং চঙদুনা থবক কয়া পায়খৎলে। মসিদা য়ুম্ফম ওইদুনা, গুজরাতকী সমুদ্র তোর্বানশিংদা সাগরমালাগী প্রোজেক্ত কয়া উরে। জুনাগর খক নত্তনা, অনৌবা কোস্তেল হাইৱেনা পোর্বন্দর, জাম্নাগর, দেবভুমী দ্বার্কা, মোর্বীদগী সেন্ত্রেল অমসুং সাউথ গুজরাত ফাওনা শম্নগনি অমসুং মসিনা গুজরাতকী অপুনবা সমুদ্র মপালদা কন্নেক্তিবিতী পীগনি।

ইচিল ইনাওশিং,

মমাংগী চহি৮দা ইমা অমসুং ইচে-ইচল কয়াগী পুন্সি মহিং নুংঙাইহন্নবা থবক কয়া মথং মথং পায়খৎখি অমসুং মসিনা মরম ওইরগা মখোয়না ইকায় খুম্নবা পুন্সি হিংবা ঙমহনখি অমসুং মখোয়দা কান্নবা পীগদবা খুদোংচাবা কয়া ঐখোয়না শেমখি। মসিনা মরম ওইরগা, গুজরাতনা ঐহাক্কী শক্তি কবচ ওইরে, মসিগীদমক্তা ঐহাক্না ইমা, ইচেল ইচলশিংগী মফমদা মতম পুম্বদা লমন তোন্সিল্লবনি। লৈবাক্কীদমক্তা অচৌবা খোঙথাং কয়া পায়খৎখ্রে অমসুং ইমা-ইবেল অমসুং ইচে ইচলশিংনা মসিগী হকথেংনবা কান্নবা ফংখি। স্বচ্ছ ভারতকী মখাদা অমাংশঙ করোর কয়া শাখি, ঐখোয়গী মফমসিদা অমাংশঙবু জাজ্রু হায়না কৌই, অমসুং অৱাং ভারতকী নুপীশিংনা খোঙথাং অসি মখোয়গী চাউথোকচনীংঙাই ওইবা খুদোংচাবনি হায়নরি। অমাংশঙ করোর কয়া শাদুনা ঐখোয়না নুপীশিংবু শিংনবা কয়াদগী মনীং তমহনখি, মখোয়গী হকশেলসু য়াম্না ফগৎহনবদা তেংবাংখি। ঐখোয়না উজ্বালা য়োজনাগী মখাদা গ্যাস কন্নেক্সন পীবগী খুদোংচাবা শীনখি অমসুং মতাং অসিদা ঐহাক্না ভুপেন্দ্র ভাইবুসু থাগৎচরি। হন্দক্কী দিৱালী কুহ্মৈগীদমক্তা খন্দুনা মহাক্না গ্যাস সিলিন্দর লেম্না পীবগী ৱারেপ লৌরে অমসুং মসিনা ঐখোয়গী লাইরবা ইমুংশিংদা দিৱালী পাংথোকহনগনি।

ইচিল ইনাওশিং,

য়ুম্থোং খুদিংদা ঈশিং য়ৌরে, তোতি ঈশিং য়ৌরে। মমাংগী মতমদা মুখ্য মন্ত্রীবু কৌবগী পাউজেলদা খুঙ্গংগী প্রধানশিংনা মখোয়গী খুঙ্গংদা হেন্দ পম্প অমত্তা খিনবীয়ু হায়জখিবা থৌওং য়াম্না থোক্লম্মি। হেন্দ পম্প খিনবীবা মুখ্য মন্ত্রী ধোন থিন্দুনা তরাম্না ওক্নরম্মি। মীপুম খুদিংনা হেন্দ পম্প ঙাইনরম্মি, হৌজিক্তি য়ুম্থোং খুদিংদা তোতি ঈশিং য়ৌরে। অশেংবা ঈশিং ফংবদগী হকশেল ফবসু হেনগৎলে, অঙাং নাবগী চাং হন্থরে, শিংনবা কয়া লোইশিল্লে। প্রধান মন্ত্রী মাত্রু বন্দনা য়োজনাগী মখাদা ইমা, ইচেল ইচলশিংগী মচি লৈবা চিঞ্জাক ফংহল্লে, মীরোনবীগী পুক্নুংদা লৈরিবা অঙাংশিং নিংথিজনা চাউরে, নাম্মা শোইরগা পোক্লক্কনি হায়বগী অৱাবা লৈহন্দ্রে। মশা মউ ফবা অঙাং পোক্লকপা মতমদা লৈবাক্কী তুংগী মতমগী অফবসু ওইরিবনি। ঐখোয়গী সরকারগী পি.এম. অৱস য়োজনাগী মখাদা পীরিবা য়ুমশিংবু ইমুংগী নুপীগী মিংদা পীগনি। য়ুহা হাখ্রবা তুংদা পীখিবা য়ুম কয়াসু নুপীশিংগী মিংদা পীখি। মসিগী মরমদি, ঐখোয়না ইমাশিংনা করম্বা ফিভমদা হিংলকখি হায়বা খঙবগীনি। লৌ ওইরো, দুকান ওইরো, গাড়ি ওইরো নুপাগী মিংদা ঙাক্তা পীরম্মি, মপুরোইবা লৈখিদ্রবা ওইরগনা মচানুপাগী মিংদা পীরম্মি। নুপীশিংগী মিংদা করিমত্তা লৈরমদে, অদুদি মখোয়না খুদোংচাবা নংবা মতমদা মখোয়না কদাইদা চৎকনি, করি তৌগনি। সরকারগী য়ুম নত্ত্রগা খুদোংচাবা ফংবা খুদিং নুপীগী মিংদা ফংহনগদবনি হায়না অদোমচা নচানুপা ঐহাক্না হোৎনজরে। ঙসিদি, নুপীশিংনা মখোয়গী মিংদা য়ুম ফংলে, লাখপতিশিংগী মরক্তা মখোয়সু মনুং চল্লে। ঙসিদি, ঐখোয়গী সরকারনা সেল্ফ হেল্প গ্রুপ অমসুং সখী মন্দলগী খুত্থাংদা খুঙ্গং কয়াগী নুপীশিংগী ওন্তোপ্রিনর্শিপ পুক্নিং থৌগৎলি, লৈবাক শিনবা থুংবগী করোর ৮দগী হেনবা নুপীশিংনা সেল্ফ হেল্প গ্রুপকী কান্নবা কয়া ফংনরি। মুদ্র য়োজনাগী মতেংদগী নুপীশিংনা গেরেন্তী য়াওদনা বেঙ্কতগী লোন ফংনরি। লোন অসি মীপুম খুদিংগীনি অদুবু, লোন ফংবশিংগী ৭০%না নুপী ওইবদা ঐহাক্না নুংঙাইবা ফাওরি। মখোয়না পীক্কেরা চাউগেরা কারবার কয়া তৌরি অমসুং অতোপ্পা মীওই ২-৩বুসু থবক পীবা ঙম্লি।

ইচিল ইনাওশিং,

ঐখোয়না লৈবাক্কী ফিভম অমা শেমদোক্নবগীদমক্তা দিকেদ অনিগী মমাংদা ৱারেপ অমা লৌখি। এসিয়াগী খ্বাইদগী রোপৱেশিংগী মরক্তা ঐখোয়গী গিরনারগী রোপৱেসু অমা ওইরে। লৌউ-শিংউ, ঙাগী পোত্থোক ফজনা পুথোক্লিবা ঐহাক্কী জুনাগরগী কেশোর এয়র্পোর্তনা মথৌ পাংথোকপা হৌরে। ঐহাক্না ওফিসর খরসু হৌজিক কৌখ্রবনি। ঐহাক্না এয়র্পোর্ত অসিবু নুমিৎ কয়াদগী য়েংলি হায়না ঐহাক্না হায়খি। মসিদা অনৌবা খরা পাংথোকপা য়াই, রিসর্চ অমুক্তা তৌবীয়ু, মসিবু খরা চাউথোকহনবীয়ু, মসিদগী হকথেংননা হৈনৌ থাবা য়াহনসি হায়খি। মফমসিগী উহৈ, মনা মশিং চৎহনসি, মালেমগী তুরিস্তশিংনা গিরগী নোংশা য়েংবা লাকহনসি, সোম্নাথ দাদাগী খুয়াখাদা লাকহনসি, ঐখোয়গী গির্নার য়েংবা লাকহন্সি, অদুনা তনৱে খরা চাউথোকহন্সি হায়বনি, মখোয়না মতম খরা পীবিয়ু, রিসর্চ পাংথোক্লগা হায়রক্কে খুম্লকখি। ঐহাক্না খরা থুজনসি হায়খি, ঐহাক্কী ৱাখল্লোন্দা করিগুম্বা অমা লাকপা মতমদা ঐহাক্তি করিগুম্বা অমা পাংথোক্ত্রবদি নুংঙাইতে। পাম্বৈ অমা অদুমক পুথোক্নবা হোৎনৈ। চাউখৎ থৌরাং পুরক্কদবনি হায়বগী ৱাফমদা লেপ্লগা চৎলি। হিন্দুস্তানগী অচৌবা শহরশিংনা ফংলিবা খুদিংমক ঐহাক্কী জুনাগরসু ফংগদবনি। ঐহাক্না মসিগীদমক্তা হোৎনরি। গির সোম্নাথ য়াওনা মসিগী অপুনবা লমদম অসি লাইনীংবগী লমদম্নি হায়না খঙনরিবনি। গির্নারগী তলহতীদা কোইবা চৎপগী ঐহাক্কী মতম অমা লৈরম্মি। সন্তশিংগী মরক্তা লৈবদা ঐহাক্না নুংঙাইবা ফাওরম্মি। সন্ত অমসুং সুরাগী মসিগুম্বা পুংবা, ঐখোয়গী মন্দির, জৈন মীয়ামগী দতাত্রেয়া নীংবগী মফমসু লৈ, মসিদা করি লৈত্রিবগে? লৈবাক পুম্নমক্কী পুক্নিং চিংশিনবা ঙম্বগী মপাঙ্গল ঐখোয়গী লমদমসিদা লৈরে। মরম অদুনা, হিন্দুস্তানগী মীপুম খুদিংবু মফমসিদা শোইদনা লাকহনগদবনি। মসিগীদমক্তা ফেসিলিতী কয়া শেমগৎপা তাবনি, অদুগা থবকশিং অসি শোইদনা পাংথোক্কনি হায়না ঐহাক্না থাজবা থম্লি। ঐখোয়গী গিরগী নোংশানা ঙংবা মখোল মালেম্না তাবা পাম্মি। মসি তাবা মতমদা গুজরাতকী মখোলসু তাবা ফংগদৌরিবনি।

চহি ২০সিদা গিরগী নোংশা মশিংনা শরুক অনি হেনগৎলকপবু মালেম্না ঙসি য়েংনরি। হিন্দুস্তানগী মীপুম খুদিংনা চাউথোকচবা ফাওগদবা মওংদা মখোয়গী ঙাক শেনখি। ঐখোয়গী কেশোর এয়র্পোর্ত চাউখৎলকপা মতমদা লমদমসিগী চাউখৎ থৌরাংনা অনৌবা থাক্তা য়ৌগনি। থবক্কী অনৌবা খুদোংচাবা কয়া লৈরক্কনি। মফমসিদা হোতেল, রেস্তোরেন্ত, তেক্সী, ওতো অমসুং অতোপ্পা খুদোংচাবা কয়া লৈরক্কনি। গুজরাতকী সাউরাস্ত্রা, কৎচ, কথিয়াৱার অসি লৈবাক নীংবগী লমদম্নি। লৈবাক্কী অফবদা অহেনবা মিৎয়েং চঙবা লমদম্নি। অদুনা, ঐহাক্না য়াম্না মরু ওইবা ৱাফম অমা থমজনীংই। লমদম অসিগী মপাঙ্গলদা ঐহাক্না চাউথোকচরি। মফমসিগী বিরজী নোংশানা ঙংবা মখোল তারগা চাউরকপশিংনা মদুগা মাইয়োক্নবগী পাঙ্গলসু লৈদুনা চাউরকখিবনি।

ইচিল ইনাওশিং,

য়ুনিভর্স অসিদা মঙ্গলয়ান অমসুং চন্দ্রয়ান থাদুনা মায় পাকপা ফংবসি ঐখোয়গী সাইন্তিস্তশিংগী মমাইনি, ঐখোয়না মসিদা নুংঙাইবা ফাওরিবনি। মসিদা চাউথোকচবা হায়রগা, মখোয়গী মরক্তা গুজরাতকী সাইন্তিস্ত অমত্তা য়াওবদি নত্তে, মখোয়দি তমিল নাদু, কেরলা বেঙ্গালোরদগী ঙাক্তনি। অদুবু, থবক অমা হেক্তা ওইরো, হিন্দুস্তানগী মফম অমত্তগী মীওই অমনা লৈবাক্কী ফনবা থবক অমা তৌবা খুদিংদা ঐখোয় পুম্নমক্না চাউথোকফম থোক্তবরা? ওলিমিপক্সকী খোঙজেল চেন্নরি, হরিয়ানাগী নহা অমনা লৈবাক্কী মচু অহুমগী ফিরাল পায়হল্লি, গোল্দ মেদল লৌদুনা লাক্লি, মহাক্না হরিয়ানাদগী ওইরবসু অদোমসু অদুম নুংঙাইবা ফাওগদবা নত্ত্রো?

ঐহাক্না মসিগুম্বা গুজরাত অসিবু ইকায় খুম্নজরি। অদোম্না অমত্তা ওইবগী মতৌসি ঙাক্তুনা চৎপীয়ু, চাউখৎ থৌরাং হেন্না খুমাং চাউশিলহন্সি। অদুগা চাউখৎ থৌরাংগী থবক কয়া ঙসি হৌদোক্লিবসিনা য়ুম্থোং খুদিংদা য়ৌরকপা ওইসনু। দিৱালী লাকপসিদা অদোম পুম্নমক্কী মফমদা য়াইফ পাউজেল পীজরি। অনৌবা চহিগী মতমসু লাক্লে, অনৌবা ৱারেপ অমগা লোয়ননা চৎমিন্নসি, মসিগীদমক্তা পুম্নমকপু য়াইফ পাউজেল পীজরি।

ভারত ইমানা য়াইফরে, ভারত ইমানা য়াইফরে, ভারত ইমানা য়াইফরে।

ইচিল ইনাওশিংবু অমুক্কা হন্না থাগৎচরি!

দিস্ক্লেমরঃ ৱারোল অসি প্রধান মন্ত্রীনা গুজরাতীদা থমখিবনি। মসিদি মদুগী ৱাহন্থোক্নি।