ভারত ইমানা য়াইফরে,

ভারত ইমানা য়াইফরে,

ফম্বাকথক্তা লেঙশিনবিরিবা গুজরাৎকী মীয়াম্না য়াবা পুকচেল তপ্পা মুখ্যমন্ত্রী শ্রী ভুপেন্দ্র ভাই পতেল, ২০১৯গী মীখলদা ভারত পুম্বদা খ্বাইদগী য়াম্বা মার্জিনগা লোয়ননা মায় পাকখিবা, গুজরাৎ প্রদেশ ভারতিয় জন্তা পার্তীগী চেয়রমেন অমদি পার্লিয়ামেন্ততা ঐগী খোঙবু ওইরিবা শ্রীমান সি.আর. পাতিল, গুজরাৎ লৈঙাক্কী মন্ত্রী মন্দলগী মীওইশিং, এম.পি.শিং, এম.এল.এ.শিং অমসুং মশিং য়াম্না লেঙশিনবিরিবা জামনগরগী ঐগী নুংশিরবা ইচিল ইনাও অমদি ইচে ইচলশিং,

মরূপশিং,

ভরুচতগী জামনগর ফাওবা, গুজরাৎকী য়াইফনবগীদমক, গুজরাৎকী চাওখৎনবগীদমক পায়খৎলিবশিং অসি অঙকপগী মশক্নি‍। ঙসি মফমসিদা প্রোজক্ত নিপান মীয়ামদা কত্থোক্লি অমদি উরেপ উয়ুং তম্লি‍। ময়াম পুম্নমক্কী মফমদা ঈশিং, মৈ অমসুং কন্নেক্তিভিতীগা মরী লৈনবা প্রোজেক্তশিং অসিগীদমক্তা নুংঙাইবা ফোঙদোকচরি‍। ঙসি বাল্মিকী সমাজকী অখন্নবা মীতিন শঙ অমসু মীয়ামগী মফমদা কত্থোক্লি‍। মসিনা ঐখোয়গী ইচিল ইনাওশিংদা খুন্নাইগী ওইবা থৌরমশিং পাঙথোকপদা মতেং ওইরগনি‍।

মরূপশিং,

ঙসি জামনগরনা অঙকপা অমা তৌরে‍। ঐনা এয়রপোর্ত্তগী মফম অসি ফাওবা লাকপদা থেঙলিবসি লম্বীদা ঐবু তরাম্ন ওকপিরম্বা, থৌজাল পীবিরকপশিংদুননি, অসিগুম্না থৌনা হাপ্পিরকপা অসি কৈদৌঙৈদসু কাউবা ঙম্লরোই, অদুগা ঐবু হেন্না নুংঙাইহল্লিবদি ইমা অমদি ইচে ইচল মশিং য়াম্না থোরক্তুনা ঐবু ওকপিরম্বদুনি‍। অহল ওইরবী ইমাশিংনা মীনুংসি উৎপিরকপা, থৌজাল পীবিরকপা, মদুদগী হেনববু কাসীগী লৈমায়সিদা করি লৈরমখিগদগে‍। অপীকপা কাসীগী থৌজাল অমদি অচৌবা কাসীগী এম.পি.‍। নবরাত্রী লোইখিবদা ঙায়রি, অদুগা কোরোনাগী চহি অনিসিদা পুম্নমক ইংথরুরবনি‍। হন্দক্তি গুজরাৎকী কাচিন কোয়াদা নবরাত্রীবু নুংঙাইনা পাঙথোকপা অমদি জামনগরদসু নবরাত্রীবু চাউনা পাঙথোকপা ঐনা উবা ফংই‍। নবরাত্রী লোইখ্রে, দসহরাসু লোইখ্রে অদুগা হৌজিক দিৱালীগী থৌরাংসু তৌবা হৌরে‍। অদোমসু নীংশিংবিরমগনি, চাউরাক্না চহি কুনলোমগী মমাঙগী অসিগুম্বা মতমসিদা, জামনগর, সৌরাস্ত্র, কত্চ য়াওনা গুজরাৎ পুম্বদা য়ুহা হাদুনা নীকখিবা‍। গুজরাৎ অশিবগী ফিজং মরুমদা তুম্লিবগুম খনখি‍। অৱাবা মতমদু কয়ামুক য়াম্না অকিবা ফংখিবগে হায়ববু, য়ুহা হাখিবদুগী মতুংগী অহানবা নবরাত্রী, অহানবা দিৱালী গুজরাৎকী য়ুমথোঙ অমত্তদা পাঙথোক্নখিদে‍। য়ুহা হাবগী লাংফমদুনা নীংবা কায়বা কয়া পুদুনা লাকখিবনা, ঐখোয়না, মীয়াম্না গুজরাৎ অমুক হন্না হৌগৎপা ঙম্লরোই হায়না লৌনরুরবনি‍। অদুবু মফমসিদদি অৱাবা কয়া খাঙদুনা লাক্লবা মীওইশিং ঙাক্তনি‍। মফমসিদা অৱাবদুবু শিংনদুনা মীয়াম্না হোৎনদুনা মরোমদোম লেপখৎলকখি‍। মশানা মশাবু থাজবা, ফিরেপকী পাঙ্গলনা নীংহন্নববু নাথৈরমদুনা গুজরাৎপু লেপহনবতা নত্তনা গুজরাৎ চেনখৎলকখি অমদি ঙসিদি লৈবাকসিবু খোঙজেল হাপ্তুনা মাঙজিল থানা চেল্লি‍। অদোমসু য়েংবিয়ু, অশিবগী ফীজঙ মরুমদা তুম্লুরবা কচ্ছকী চাওখৎপা, ফজবা অমদি মহৌশাগী নীংথিবা য়েংনবগীদমক লৈবাক্কী অমদি মালেমগী মফম কয়াদগী মীওইশিং কচ্ছতা লাক্লি‍। ঐখোয়গী জামনগরগী সেংচুএরীদা উচেক ৱায়াশিং য়েংবা লাক্নরি‍। ঙসি জামনগরদা লাকপসিদা জামনগরগী মীয়ামদা হায়নজিংবদি, থা অনিরোমগী মমাঙদা কচ্ছকী ভুজীয়া দুঙ্গরদা য়ুহা হাবদা ঐখোয়দগী শেৎনখ্রবা মীওইশিংদুগী নীংশিং খুদম ওইন স্মৃতিবন কৌবা অঙকপগী মশক ওইবা নীংশিং খুফম অমা শেমগৎখি‍। অমেরিকাদা ৯-১১গী মতুংদা পোইন্ত জিরোদা শেমগৎলিবা নীংশিং খুফম, নৎত্রগা জাপানগী হিরোসিমাদা নীংশিং খুফমশিংদুদগী করিমত্তা তাবা নত্তে‍। অসুম্না গুজরাৎকী য়ুহা হাবদা শেৎনা খাইনখ্রবা মীওইশিংদুগী নীংশিং খুফমদুদা স্মৃতিবন শেমগৎপনি‍। জামনগরদা থৱায় মাঙখিবশিংগী নীংশিং খুদমসু মফমদুদা থম্লি‍। মরম অসিনা ঐনা হায়জনিংবদি, মখোয় মখোয়গী নক্ন-চান্নবা মীওইশিং শেৎনখিবা ইমুংশিংনা স্মৃতিবন্দা অমুক্তং ওইরবসু চত্তুনা মখোয়গী ইমুংগী মীওইশিংগী মমিং ইদুনা থম্লিবা অদুদা লৈ কৎপিয়ু হায়বসিনি‍। অদুগা জামনগরগী মীওই অমা হেক্তা কচ্ছ চৎপা য়াওরবদি ভুজদা লৈরিবা স্মৃতিবন অসিদা চঙবা কাউবিগনু হায়বা ৱাফমসিমা ঐনা থমজরি‍।

ইচিল ইনাওশিং,

ঙসি জামনগরগী লমদমসিদা লাকপা মতমদা চাউথোকচবগা লোয়ননা জাম সাহব মহারাজা দিগবিজয়সিংহগী মফমদা ইকোক নোঞ্জরি‍। মহারাজা দিগবিজয়সিংহনা মহাক্কী থৌজাল হৈবা মতৌ অমদি থৌওংনা মালেমগী অনিসুবা লাঞ্জা মতমদা পোলেন্দগী মীয়ামগা শেমগৎলম্বা মরীনা মখোয়গী পুক্নিংদা মিনুংসিগী মীতম হকখি‍। মদুগী কান্নবা, ঙসিসু ভারত পুম্বনা ফংলি‍। য়ুক্রেন্দা ভারতকী মহৈরোয় কয়া পন্দুনা লৈখিবা, মহৈরোয় লিশিং কয়াবু বোম অমসুং নোংমৈ মরু মরক্তগী পুথোরকপা তাখি‍। অচৌবা লাংফম্নি, অদুম ওইনমক ঐখোয়না শেমগৎখিবা মরীদুনা মরম ওইরগা মখোয়বু পুথোরকখি‍। অদুগা য়ুক্রেন্দগী পুথোরক্লবা মতুংদা পোলেন্দ লৈঙাক্না পাংলকখিবা মতেঙশিং অদু দিগবিজয়সিংহগী থৌজাল হৈবা মতৌদুননি‍। জাম সাহবকী ময়োল্লম অসি চাওখৎপগী অনৌবা পন্দোলশিং লোম্বা ঙম্নবা ঐখোয়না হোৎনবা তাই‍। চাউখৎপা হেন্না পুরক্তুনা জামনগরগী মীংচৎ হেনগৎহনবনা মহারাজা দিগবিজয়সিংহ জী জাম সাহবকী মফমদা কৎচবা মরম চাবা শ্রদ্ধাঞ্জলি ওইগদৌরিবনি‍। অদুগা হৌজিক্না জাম সাহব খত্রুতুল্য সিংহ জীগী থৌজাল কয়া ঐনা ফংজরি‍। মরক্তা মহাক্কা উনদুনা থৌজাল লৌবা চৎচখি‍। ঐখোয় পুম্নমক হকচাঙ ফনা অমদি পুন্সি নুংশাংনা লৈনবগীদমক মতম পুম্বদা থৌনিজরি‍। অদুগা মহাক্না তাকপিরম্বা লম্বীদা মতম পুম্নমক্তা চৎপা ঙম্বা ওইনবা হোৎনসি‍। মরূপশিং, জামনগর ক্রিকেৎকী তাইবঙদসু মশাগী ফিরাল পাইহল্লি‍। জামনগরনা ক্রিকেৎকী তাইবঙদা ঙসিসু ভারতকী মচু অহুমগী ফিরাল পায়দুনা চৎলি‍। জামনগর অমসুং সৌরাস্ত্রগী শান্নরোয়শিংনা ক্রিকেত্তা হৈশিংবা কয়া উৎলি‍। অদুগা ত্রোফী লৌরকপা মতমদা গুজরাৎকী মীংচৎ উরোং খিল্লবনি‍। অসুম্না য়াম্লবা মতিক্না থল্লবা, থৌগলগী ৱাখল্লোন্না মালেম ইমাবু খুরুমদুনা মতম পুম্বদা নুংঙাইনা লৈরি‍। লোয়ননা অদোমগী পুক্নিংগী থৌগল লেপ্পা লৈতনা তৌনবা ঐনা শকখিবা ৱাশকসু লেঙদনা লৈরি‍।

ইচিল ইনাওশিং

হৌজিক্তা ভুপেন্দ্র ভাইনা পাঙ্গল মঙাগী মরমদা তাকপিরম্মী‍। হায়রিবা চাওখৎপগী ফিরেপ মঙাসিনা গুজরাৎনা মশাবু মপাঙ্গল কলহনবনি, অদুগা হায়রিবা ফিরেপ মঙাসিনা হিমালয়গী মতৌগুম ঙসি গুজরাৎপু মাঙদা পুদুনা চৎলি‍। অহানবা ফিরেপ্তি মীয়ামগী পাঙ্গল, ৱাখল লৌশিংগী পাঙ্গল, ঈশিংগী পাঙ্গল, ইনর্জীগী পাঙ্গল অমসুং ঙাকশেলগী পাঙ্গল হায়রিবা ফিরেপ মঙাসিগী য়ুম্বীদা লেপ্তুনা ঙসিদি গুজরাৎনা মপাঙ্গল কন্না অমদি অথোইবা মতৌদা অনৌবা পন্দোল কয়া লোম্বা ঙম্লি‍। অদুগা চহি ২০-২৫গী মমাঙদা ঐখোয়গী মফমসি করি ফীভমদা লৈরম্মী হায়বা নীংশিংবিরমগনি‍। গুজরাৎকী চহি ২০-২৫গী নহাশিং, নৌনা পোক্লক্লিবা অঙাংশিংসিদি লাইবক ফরবনি মরমদি মখোয়না অৱাবা খুদোংচাদবা কয়া থেংনরকখিদ্রবনি, মখোয়গী লাইবক্তা তম্লমখিদ্রবনি‍। ঐখোয়না অরৈবা থৌনা শীজিন্নদুনা অসিগুম্বা অৱাবা ফীভমশিংদগী কোক্ননবা থৌরাং লৌখৎখি‍। ঙসি ঐনা লম্বীদা লাকপদা নহা কয়া লম্বী মতাইদা লেপ্তুনা লৈরম্বা উরকই‍। য়ুমদা হল্লগা হংবিয়ু, চহি ২০-২৫গী মমাঙদা জামনগর অমদি কাথীয়াবারদা মরি ফীভম ওইরম্বগে হায়না‍। মফমসিদা লৌবুক্তা ঈশিং ফংহন্নবগীদমক খুদোংচাদবা কয়া মায়োক্নরম্মী, অঙাংশিং ঈশিং খৌরাংলকপা মতমদা মমাশিংনা চফু পায়দুনা কিলোমিতর অহুম লাপ্না ঈশিং শোকপা চৎনরম্মী‍। অদুগুম্বা মতমদু ঐখোয় থেংনরক্লবনি‍। অদুবু ঙসিদি ফীভম অসি ফনা য়াম্না হোংলে, পুং কয়া তেঙ্কর লাকখিদবা, লাক্লগসু লাইন্দা লেপতুনা ঙায়রগা তেঙ্কর য়ৌশিল্লকপদা ঈশিং লোইখ্রে হায়রকপা কয়াদুগী অৱাবদু কাউনখ্রে‍। কাথীয়াবার পুম্বদা ফীভম অসি লৈরম্বনি‍।

ঐনা নীংথিনা নীংশিংবা মতম অমা লৈরম্মী, মদমদুদা ঐ রাজনিতী য়াওদ্রি‍। নোংমা ঐনা পাউচেদা ফোতো অমা থেংনখি, ফোতো অদু জামনগরগীনি‍। করি ফোতোনো? মতমদুগী গুজরাৎকী মুখ্যমন্ত্রী জামনগরদা লাক্লম্মী‍। করি মরমগীনো হায়ববু ঈশিং তেঙ্কী অমা শঙ্গানবগীদমক্তনি‍। হায়রিবা ঈশিং তেঙ্কী অদু শঙ্গাবগী পাউ পাউচেগী অহানবা লামায়দা হাপ্লকখি‍। অদুগা ঙসিদি মতম অমগী গুজরাৎকী বজেত্তগী হেনবা শেন্ফমগী প্রোজেক্তশিং মীয়ামদা কত্থোক্লি অমদি উরেপ উয়ুং তম্লি‍। মসিদগী খঙবা ঙম্বদি গুজরাৎপু মাঙদা পুখৎনবগী থৌরাংদা হীরম অমত্তদা পন্থহন্বা ঙম্লরোই‍। হৌজিক ঐখোয় অৱাংবা থাক্তা চোংখৎপা মতম ওইরে‍। অদুগা ঐখোয় ঙক থাঙ্গত্তুনা চৎপা মতম ওইরে ইচিল ইনাওশিং‍।

ঐনা অহানবা ওইনা গুজরাৎকী মুখ্যমন্ত্রীগী শক্লোন্দা থৌদাং য়াবা মতমদা জামনগরগী অকোয়বগী ঐখোয়গী এম.এল.এ. লাকপা মতমদা করি পুরগা লাকপগে হায়ববু, পান্তী পুম্নমক্কী এম.এল.এ.শিং লাকখি, অদুগা ময়ামগী অৱাবা কোকহন্নবা থবক খরা থুনা পায়খৎপিনবা ৱাফম পুদুনা লাকখি‍। মফমসিদা লৈবাক খরা হৈদোক্লবদি লম্বী শেম্বা কৌরে, কচ্চা লম্বী শেম্নবগী ৱাফম এম.এল.এ.শিংনা পুখৎলক্লম্মী, অদুগী ঙসিদি ঐখোয়গী এম.এল.এ.শিংনা কোইলা থাবা লম্বী শেম্বিয়ু হায়রে‍। হৌজিক্তি লৈরক পামদ্রে, লেন মরিগী লম্বী পাম্লে‍। ঈশিংগী ৱা খন্নবা মতমদা মতম অদুগী এম.এল.এ.শিংনা মখোয়গী লমশিংদা হেন্দ পম্প খিন্নবা হায়রম্মী‍। অদুগা ঙসিদি সৌনী য়োজনাগী মখাদা ইমা নর্মদানা গুজরাৎ পুম্বা য়ৌনবা চৎলি‍। ইচিল ইনাওশিং, ইমা নর্মদাগী মনাক্তা চত্তুনা থৌজাল নীজরম্বা মতম অমা লৈরম্মী, অদুগুম্বা ইমা অদু ঙসিদি ঐখোয়দা অপেন্বা পোকপিরদুনা গুজরাৎকী কাচিন কোয়া শিন থুংনা চত্তুনা মীয়ামদা থৌজালগী ঈরিক খিক্লি‍। অনৌবা ময়োল চোংহল্লি, অনৌবা ইনোৎ হাপ্লি‍।

ঐনা সৌনী য়োজনা হৌদোকপাম তমদা জারকোৎকী এসেমব্লী হাউস মনুংদা, মতমদুগী ওপোজিসন্না অপেন্বা ওইখিদে‍। থবক হৌখি, মীখল লাকখি, মোদীসি অনৌবা অমা অমুক পুদুনা লাক্লগনি, সৌনী য়োজনা অসিদি পায়খৎপদা ওইরোইদবা অমনি হায়না খন্নরম্মী‍। অদুবু ঐনা অদোম হেন্দপম্পতগী হেন্না খনবা ঙমদ্রে, অদোম্না মারুতী কার তোংদুনা কোয়বা চৎপা য়াগদবা চাংদা চাউবা পাইপলাইন ঐনা তিংগনি হায়না হায়খি‍। ঙসিদি পাইপ তিংলে, অদুগা সৌনী য়োজনানা ইকোনশিং থনহল্লে, লৌবুকশিংদা ঈশিং য়ৌহল্লে‍। হন্দক্তি ঐখোয়গী লৌমী ঈচিন ইনাওশিংনা লশিংগী মমল, লৈবাক হৱাইগী মমল খুত্তা লদ্দু পায়বগুম্না ফংলে‍। মমাঙদা অসিগুম্বা মমল অমত্তা ফংখিদ্রিবনি, হৌজিক্তি ঐখোয়গী লালপুরদা ঈশিং য়ৌরে, লম হেক্তর কয়াদা ঈশিং ফংহল্লে‍। পাইপলাইনগী মতেংনা জামনগর, দ্বারিকা, রাজকোৎ, পোরবন্দরগী মীওই লাখ কয়ানা অরুবা অফবা ঈশিং থকপা ফংলগনি‍।

গুজরাত্তা জল জীবন মিসনগী মখাদা ফংহল্লিবা কান্নবা অমদি মসি পায়খৎপদা লৈরিবা খোঙজেল অসিগীদমক্তা ভুপেন্দ্র ভাই অমদি মহাক্কী কাঙবুগী মফমদা ভারত লৈঙাক্কী থৌরাং অসিবু অদোমগী লৈঙাক্না গুজরাত্তা খোঙজেল য়াঙনা পায়খৎপগীদমক্তা ঐনা নুংঙাইবা ফোঙদোকচরি‍। মসিনা মরম ওইরগা ঐখোয়গী ইমা-ইচে ইচলশিংগী থৌজাল ফংলে মরমদি ঈশিংগী পোৎলুম পুম্বা মখোয়না পুরম্বনি‍। য়ুমদা মীথুং লাক্কদবা লৈরবদি ঈশিংগীদমক্তাঐগী ইমা অমদি ইচে-ইচলশিংনা ৱাজখি‍। অদুনা হায়রিবা ইমা ইচে ইচলশিংগী কোকথক্তগী চফু কনানা থাংথবিগনি, মচা ওইবা ঐখোয়না থাংথবা নৎত্রগদি‍। ঙসিদি চাদা ১০০ পাইপকী ঈশিং ফংহনবগী থবক পায়খৎলি, য়ুম খুদিং ঈশিং ফংহনবগী থৌরাংনা মসিদগী থৌনা পাঙ্গল ফংবা ঙম্লগনি‍।

ঐখোয়গী লৈঙাক লায়রবশিংগী য়াইফনবগীদমক লেপ্পা লৈতনা হোৎনদুনা লাক্লি‍। হায়রিবা কোরোনাগী মতমসিদা অহানবা ৱাখিবসি লৈবাকসিগী লায়রবশিংগীদমক্তা ওইখি‍। লায়রবা ইমুংশিংগী চাকখুম মৈ মুত্তনবা লায়রবা য়ুমথোঙশিংদা চেঙ হৱাই লেম্না ফংহন্দুনা লৈবাকসিগী লায়রবা মীওই করোর ৮০বু চরা হেলহনখিদে‍। অদুগা মফমসিদদি চেঙ মরু অমত্তং ফাওবা চারবদি, থৌজাল পীবা কাউনদে, অদুগা ঐনা লৈবাকসিগী মীওই করোর ৮০রোমগী থৌজাল ফংলি, য়াম্লবা য়াইফরোল ফংজরি‍। ময়ামগী থৌজাল ফংজরি‍। প্রধান মন্ত্রীন গরীব কল্য়ান অন্ন য়োজনা দিসেম্বর ফাওবা শাংদোক্লগনি, অৱাবা তারবা মতমসিদা লায়রবশিংগী য়ুম অমত্তদা চাকখুম মৈ মুৎহল্লোই‍।

অদুগা অমনা, ৱন নেসন ৱন রাসন কার্দনি‍। মমাঙদা জামনগর অসি য়াম্না পাক শন্না খঙনরমদে‍। অপীকপা কাসীগুম জামনগরসু পীক্না লৌনরম্মী‍। খুঙ্গঙগী লোন্দাদা হায়রগদি ঐখোয়গী জামনগর ঙসিদি মচু মঙানা লৈতেংলে অদুগা ময়োল্লমগী লোন্দাদা হায়রগনা দিস্ত্রিক্ত পুম্বা কোস্মোপোলিতন ওইরে‍। লৈবাক শিনবা থুংবদগী থবক শুবা মীওইশিং ঙসি জামনগর দিস্ত্রিক্তা চরা তাল্লি‍। কনামত্তা অৱাৎ অপা লৈহন্দনবগীদমক্তা ৱন নেসন ৱন রেসন তেক্নোলোজী শীজিন্নদুনা, বিহারদগী লাকপা ওইরবসু, উত্তর প্রদেশতগী লাকপা ওইরবসু, মহারাস্ত্রদগী লাকপা ওইরবসু, অন্ধ্র প্রদেশতগী লাকপা ওইরবসু, তেলঙ্গনাদগী লাকপা ওইরবসু, কর্নাতকাদগী লাকপা ওইরবসু মখোয়গী খুলদা রাসন কার্দ পায়রগদি চাকখুম মৈ মুত্তনবা মফমসিদসু চেঙ ফংলগনি‍। জামনগর ওইল রিফাইনরী, ওইল ইকনমীগীদমক্তা মমীং চৎলি, চাউখ্রবা ইনর্জীগী মফম অসিনা লৈবাকসিগী ক্রুদ ওইলগী চাদা ৩৫দি জামনগরদা শুংদোকপনি, হায়বা ৱাফমসি তাবদা চাউথোকচবা ফাওরোইদবা মীওই জামনগরদা লৈরমগদরা‍। জামনগরদা ইন্দস্ত্রীগী লমদা চাওখৎপা পুরক্নবগীদমক নরেন্দ্র অমদু ভুপেন্দ্রগী দবল ইঞ্জিন লৈঙাক্না পাংদিং মান্ননা হোৎনরি‍। চহি ২০গী মমাঙদা মফম অসিদা ত্রাফিক্কী ফীভম কমদৌরম্মী‍। হৌজিক্তি জামনগরদা লম্বী পাকথোক্লে, ফীভম ফগৎহল্লে, ঋভরব্রিজ শারে, ওভরপাস শারে, ফ্লাইওভর শারে, ময়োল্লমগী ইনফ্রাস্ত্রকচর হেনগৎলকপগা লোয়ননা মীচম মীয়ামগী পুন্সিদা খুদোংচাববা হেনগৎহন্নবা থবকসু পায়খৎলি, অমদি গুজরাৎকী নোংচুপথংবা সমুদ্র খোঙবাল পরিংদা মচি অমদা মরোমদোম লৈরম্বা জামনগরনা ঙসিদি ঐখোয়বু য়োকপিরি‍।

জামনগরগা হিন্দুস্তানগী কাচিন কোয়া শিনবা থুংনা মরী শেমগৎনবা থবক পায়খৎকদবনি, মসিগীদমক্তা লুপা করোর লিশিং ২৬ চঙনা অমৃৎসর, ভতিন্দা, জামনগর কোরিদোর শেম্বা হৌরিবনি‍। জামনগরনা ভারত পুম্ববু, অৱাং ভারতপু মপাঙ্গল কলহন্নবা থবক পায়খৎলক্কদৌরি‍। মফমসিদা থৌনা, মফমসিগী পোত্থোক, মফমসিগী অপীকপা অচৌবা ইন্দস্ত্রী, লল্লোন ইতিকশিংগী শক্তম অৱাং ভারত লমদমদা রেলৱে ত্রেক অমগী খুত্থাঙদা থৌনা হাপকদৌরিবনি‍। পঞ্জাব, হরিয়ানা, রাস্থান, গুজরাৎ, উত্তর প্রদেশ, উত্তরাখন্দ নৎত্রগা হিমাচল ওইরবসু কোরিদোর অমগী খুত্থাঙদা গুজরাৎকী লল্লোন ইতিক অমদি মফমসিদী পোত্থোকশিং শেল ইচঙ চঙদনা, মসিদসু নত্তনা মফমসিগী মনা মশিং অমদি উহৈ ৱাহৈশিং অৱাং ভারত্তা য়ৌহনবা ঙমহল্লগনি‍। গুজরাৎ মচাশিংগী তোপ তোপ্পা হৈশিংবা অমা হায়রগদি করিসু কান্নদ্রবা পোৎলম অমগীসু শীজিন্নফম অমা হেক্তা পুথোকপদা ঐখোয় হৈথোই শিংথোই‍। হৈনৌ চারবসু মরুদগী মুখৱাস শেমদুনা করিমত্তা মাঙহন্দে‍। হইপরদা লৈরিবা মেগাৱাৎ ৪০গী সোলার পৱার প্রোজেক্ত মসিগী অথোইবা খুদম্নি‍। শীজিন্নবা য়াদ্রবা অরেম্বা লম্নি হায়না লৌনরম্বা মফমসিদা থৌরাং অসি পায়খত্তুনা মীয়ামদা উৎলিবনি‍। মসিনা তাকপদি তুরেল, খোঙবাল মপানগী মফমশিং, শীজিন্নদনা তারিবা মফমশিংসু শীজিন্নফম লৈ হায়বসিনি‍।

মরূপশিং,

লৌমীশিং য়াইফনবা, লায়রবশিংগী পুন্সি মহিং ফগৎহন্নবা, ইন্দস্ত্রী চাউখৎনবা নৎত্রগা ইন্ফ্রাস্ত্রকচরগী খুদোংচাবা হেনগৎহন্নবা ৱাফম ওইরবসু, হীরম খুদিংদা গুজরাৎনা চাওখৎপগী অনৌবা পন্দোল লোমদুনা লাক্লি‍। অদুগা জামনগরদি মালেমগী থাক্তা মফম কনবা ঙম্লে‍। জামনগরদা, দব্লিউ.ঐচ.ও., কোরোনানা মরম ওইরগা মীয়াম্না খঙনরিবা দব্লিউ.ঐচ.ও. অসিগী সেন্তর ফোর গ্লোবেল ত্রেদিস্নেল মেদিসীন জামনগরদা লৈ‍। জামনগরদা অয়ুর্বেদ য়ুনিভর্সিতী লৈরম্মী, মদুগী মথক্তা মসিনা অনৌবা পন্দুপ অমনি‍। ঙসিদি জামনগরগী অয়ুর্বেদ য়ুনিভর্সিতী নেস্নেল য়ুনিভর্সিতীগী মফম ফংলে‍। ঐখোয়গী জামনগর হায়বদি অপীকপা কাসী ওইজরবসু ঐখোয়গী জামনগর অসি সৌভাগ্য নগরগী শক্লোন্দা খঙনৈ‍। ঐখোয়গী জামনগরদা সিন্দুর, খুজী, বিন্দী, বান্ধনী হায়রিবশিং অসি ঐখোয়গী জামনগরগী শক্তম্নি‍। অদুগা ঐখোয়না লৈঙাকসিনা গুজরাৎকী বান্ধনী কলাবু পাক শন্না শকখঙহন্নবগীদমক অনৌবা থৌরাং অমা লৌখৎলে‍। হস্তকলা সেতু য়োজনাগী খুত্থাঙদা, জামনগরগী ব্রাস ইন্দস্ত্রী লৈঙাক্কী তোঙান তোঙানবা থৌরাংশিংগী কান্নবা ফংলি‍। ঐ নীংশিংলি, ঐনা নৌনা প্রধান মন্ত্রী ওইরকপা মতমদা জামনগরদগী পুক্নিং নুংনাংনিংঙাই ওইবা পাউ অমা লাকখি, ময়াম্না ঐ উনবা লাকখি‍। মতমদুদা ব্রাস ইন্দস্ত্রীবু অৱাফমদগী ঐখোয়না কনখি‍।

ইচিল ইনাওশিং,

ঐখোয়গী জামনগর নৎত্রগা রাজকোৎ ওইরবসু মফমসিদা কাথীয়াবারগী ইঞ্জিনিয়রিং ইন্দস্ত্রীশিংদা অপীকপা পিনসু শাই অদুগা এয়রক্রাফ্তকী স্প্যার পার্তসু শাই, অসিগুম্বা থৌনাসি ঐখোয়না শেমগৎখিবনি‍।

মরূপশিং,

লৈবাকসিদা লল্লোন ইতিক তৌবদা লায়থোকহল্লে‍। অয়েৎ অপন হন্থহনবা, লৈঙাক্না খুৎ থিংজিনবা হন্থহনবা হায়বসসিনা ঐগী খ্বাইদগী চাউবা পান্দম্নি‍। অপীক-অপীকপা ইন্দস্ত্রীশিংদা লৈঙাক্না খুৎ থিংজিনবা হন্থহন্নবা হোৎনবদা ঐনা মরুওইবা মীৎয়েঙ থম্লি‍। মমাঙদদি লৈঙাক্কী মফমদা থবক অমা হায়রুবদা ফোর্ম অমা মেনগনি, অতোপ্পা অমা হায়রুবদা অতোপ্পা ফোর্ম অমা মেনগনি, ফোর্ম কয়ামুক য়াম্না মেনশিনবগে হায়ববু কারখানাদা ক্লর্ক থম্লবসু ফোর্ম মেনবগী লোইবা নাইরোই‍। অদুবু অদোম ৱাফম অমা খঙবদা নুংঙাইগদবা, মরুওইনা অপীক অপীকপা ইন্দস্ত্রীশিংনা নুংঙাইবগবা ৱাফমদি লৈঙাক্না হান্না মথৌ তারম্বা কম্প্লাইএন্স মচা মচা লিশিং ৩০০রোম মুত্থৎখ্রে‍। অদুগা মসিগী খ্বাইদগী চাউনা কান্নবদি ঐখোয়গী এম.এস.এম.ই. সেক্তরনা ফংলি‍। মমাঙগী লৈঙাক্না তৌরম্বদুদগী লাইনা কনবিরবনি‍। করিগুম্বা অদোমগী কারখানা লৈরবা অদুগা তোইলেৎ বাথরুম অদু থা তরুক শুনু হাইদ্রবদি লৈঙাক্না খজিক্তং য়ানিংদ্রবদি থা তরুক থিংজিনবনচিংবা তৌরম্মী‍।

অসিগুম্বা কাঙলোন কয়া লৈরম্মী, অংগ্রেজকী মতমগী কাঙলোন চৎনরম্মী‍। লৈবাকসিগী লল্লোন ইতিক তৌবা মীওইশিং জেলদা চঙহন্দনবগীদমক্তা মসিগা মরী লৈনবা কাঙলোন লিশিং অনিরোম ঐনা মুত্থৎখ্রে‍। অদুগা মফমসিদা তিনবিরিবা লল্লোন ইতিক তৌবা মীওইশিংগী মরক্তা অসিগুম্বা কাঙলোনশিং লৈরগদি ঐঙোন্দা হায়বিয়ু ঐ য়েংশিঞ্জগে‍। করিসু লৈতবা ৱাফম অমগী জেলদা থাজিনবা, অসিগুম্বা মীনায় নাইথাংগী ৱাখল্লোনশিং অদুদগী কোকহন্নবা ঐনা থৌরাং পায়খৎপনি‍। হায়রিবা থৌরাং অসি মখা চত্থখিগনি‍। ইজ ওফ দুইং বিজিনেসতা ঐগী লৈঙাক্না থম্লিবা মীৎয়েঙসিগী মমাঙদা মশিং থানরমদে‍। মরমদি মীপুম খুদিংদা খোঙলৌ পল্লৌনবগীদমক তেবল অমদগী অমদা চৎপা তারম্মী‍। মফমসিদা আর্তী কৎলু, মফমদুদা ইরাৎ থৌনি তৌ, মফমদুদা প্রসাদ কৎলু হায়বনচিংবা চৎনরম্মী‍। ইজ ওফ দুইং বিজিনেস লৈহন্নবগীদমক কাঙলোন হোংদোকপনা মরম ওইরগা মালেম পুম্বগী রেঙ্কিং ফংলমদে অমদি চাউনা মফম কাখৎপা ঙম্লমদে‍। ঐবু ২০১৪দা প্রধান মন্ত্রী ওইনা অদোমগী থৌগল তৌনবা থাবিবা মতমদা, ভারত ১৪২শুবা মফমদা লৈরম্মী, চহি মঙা তরুক হোৎনরবা মতুংদা হৌজিক্তি মরূপশিং ঐখোয় ৬৩শুবা মফমদা লৈবা ঙম্লে‍। হৌজিকসু মখা তানা হোৎনরবদি ৫০গী মথক্তা পুরকপা ঙমগনি‍। অসুম্না চাউখ্রবা অহোংবা অসি চেদখক্তা নত্তনা বিজিনেস অচৌ মচা পুম্নমক্না মসিগী কান্নবা ফংননবা থবক পায়খৎলিবনি‍।

মালেমদা ভারতকী মফম য়েংবিয়ু, মীওই কয়াগী অয়ুক্কী চা থকপা য়ারম্লোই‍। মালেমগী মফম শিনবা থুংবদগী মীওইশিংনা চে ইরক্লি, ৱর্ল্দ বেঙ্কনা ইরক্লি, আই.এম.এফ.না ইরক্লি, অচৌ অচৌবা ইকনমিস্তশিংনা ইরক্লি মদুদি মালেম পুম্বনা লুপথরবা মতমদা, ইংলেন্দা হৌখৎবা চহি ৫০দা পোৎ মমল তাঙবা অসুম্না থোকখিদ্রিবা ফীভমসিদা, অমেরিকাদা হৌখিবা চহি ৪৫গী মনুংদা খ্বাইদগী পোৎ মমল তাঙ্খৎপা ফীভমদা, চাওখৎ খোঙজেল থীন্থবা মতমসিদা, শেন্দোয়গী চাং হেনগৎলক্লিবাও মালেম পুম্বদা শেলথুমগী লমদা তংদু লৈতাদবা ফীভম লৈরিবা মতমসিদা ভারত মথন্তনা খোঙজেল য়াঙনা চেনখৎলি‍। ২০১৪গী মমাঙদা ভারত মালেমগী শেন্মিৎলোন্দা ১০শুবা মফমদা লৈরম্মী, অদুগা তেনখ্রবা মতমসিদা ১০শুবা মফমদগী কাখৎলক্তুনা ৫শুবদা লৈরে‍। মালেমগী মকোক থোংবা শেন্মিৎলোন মঙাগী মনুংদা ঐখোয় চল্লবনি‍। তরুকশুবদগী মঙাশুবদা কাখৎলকপা মতমদা লৈবাক পুম্বদা অনৌবা থৌনা হাপখি, মরমদি মোদীনা প্রধানমন্ত্রী ওইবগী নত্তে, মরমদি মঙাশুবা মফমদা হান্না লৈরম্লিবসি ঐখোয়বু চহি ২৫০ হেন্না লৈঙাক্লম্বা, মখোয়গী মীনায়গুম থম্লম্বা লৈবাক্তুনা লৈরম্বনি, ঙসিদি ভারতনা মখোয়বু তুংদা থম্লমদুনা মাঙদা কাখৎলকপনি‍। পুম্নমকসিদা লৈঙাকখক্তদা শিংথানবা তৌদে, ঐদি পুক্নিং ইতিং তিংবা মীশক্নি অমদি মসিগীদমক্তা ঐখোয়গী শিন্মী ইচিল ইনাওশিং, লৌমী ইচিল ইনাওশিং, স্ত্রীৎ ভেন্দরশিং, লল্লোন ইতিক তৌরিবা মীওইশিং পুম্নমক্কী থৌদাং য়াওরি‍। মখোয় পুম্নমক্না মরম ওইরগা লৈবাকসিনা মাঙদা চেনখৎপা ঙম্লিবনি, অমদি মসিগীদমক্তা ঐনা মখোয়বু হন্না হন্না ইকোক নোঞ্জরি‍।

মরূপশিং,

গুজরাৎ লৈঙাক্না চয়োল অমগী মমাঙদা অনৌবা ইন্দস্ত্রিএল পোলিসী পুথোকখি, অদুগা মায়কৈ খুদিংদা মদুবু থাগৎনখি‍। গুজরাৎপু পন্থহল্লোইদবা ইন্দস্ত্রিএল পোলিসী পুথোরকপগদীমক্তা ভুপেন্দ্র অমদি মহাক্কী খোঙবুগী মফমদা নুংঙাইবা ফোঙদোকচরি‍। অদুগা মসিদা অনৌবা ইন্দস্ত্রীগী কাঙলোন, অনৌব স্তার্তঅপ অমদি মাইক্রো ইন্দস্ত্রীশিংগীসু য়াম্না কান্নগদবা ৱাফম কয়া য়াওরি‍। গুজরাৎকী নহা লাখ কয়াবু থবক পীবা ঙম্বা, গুজরাৎকী নহাশিংনা মতমগা চুনরবা ইন্দস্ত্রিএল পোলিসী অসিগী কান্নবা লৌনবা হোৎনবদা মখোয়বু খুৎশম্নদুনা পুননবা ঐ থৌরাং তৌদুনা লৈরি‍।

ঐখোয়গী জামনগরগী হিথাংফম পরিং, ঐখোয়গী সমুদ্র খোঙবাল খুদোংচাবা কয়ানা থল্লবা মফম্নি‍। মফমসিদা বাইওদাইভর্সিতী মখল চাম্ম চাম্ম লৈ অমদি হন্দক্তা ভারতনা প্রোজেক্ত দোল্ফিন হৌদোকখি‍। চীতাগী মতাঙদদি লৈবাকসিদা থাগৎনরি, হৌজিক্তি দোল্ফিন্দা পুক্নিং লুপশিল্লগনি, জামনগরদা দোল্ফিন লৈহন্নবা, য়োকখৎনবা অমদি চাওখৎহন্নবগীদমক থৌরাং পায়খৎলে‍। মসিনা মরম ওইরগা জামনগর, দারিকা, বেৎ দারিকাগী সমুদ্র খোঙবান পরিংবু ইকো-তুরিজমগী অচৌবা মফম অমা ওইনা শেমগৎলগনি‍। অদুগা ইচিল ইনাওশিং ভুপেন্দ্র ভাইবু থোৎ মেঙবা, ইচঙ থৌবা মীওইনি হায়বা মতমদা গুজরাৎ পুম্বগী ৱাখলসু মান্নরমগনি‍। সমুদ্রগী পরিংদা কাঙলোন্না য়াদবা দামশিং লোন্না তুমিন শারম্মী‍। অদুগা নুংঙাইরিবদি ইচঙ থৌবা মীওইবগী মিনুংশি চেনবা লুচিংবনা তৌরকপা মতমদদি মখা ফাওবা খঙদুনা য়ানিংদবা অমত্তা লৈতনা চেন্নখি‍। মসি পুকচেল শেংবা ইচঙ থৌবগী মহৈনি, মসিদসু নত্তনা গুজরাৎ পুম্বগী সমুদ্র খোঙবালবু ভুপেন্দ্র ভাইনা শিৎ নানহল্লি‍। লো এন্দ ওর্দরগী লমদসু নীংথিনা ফগৎলে, গুজরাত্তা হৌখিবা চহি ২০দা ইং-তপ্পা ফীভম উবা ফংলে‍। মসিনা মরম ওইরগা নুংঙাই য়াইফবগী থোঙ হাংলে মরূপশিং, গুজরাৎনা অনৌবা ফিরেপকা লোয়ননা খুৎশম্নদুনা চৎলি‍। মমাঙদদি নুমিৎ খুদিং ইরাঙ থোক্লম্মী, জামনগরসু মসিদা য়াওরম্মী, ঙসিদি পুম্নমক অদুদগী নীংতম্বা ফংলে, ঙসিদি গুজরাত্তা নরেন্দ্র-ভুপেন্দ্রগী দবল ইঞ্জিন লৈঙাক লৈদুনা স্কীম পুম্নমক খোঙজেল য়াঙনা পায়খৎলি‍। হায়রিবা খোঙজেল অসি লেঙদনা লৈহনগদবনি, অমদি চাওখৎ থৌরাংশিং অসিনা জামনগর অমসুং সৌরাস্ত্রগী য়ুম্বী ওইগদৌরিবনি‍। নহারোলশিংগী পুন্সিদা ইং-তপ্পা পুন্সি অমা ফংলগনি হায়না ঐনা থাজৈ অমদি মসিগীদমক্তা ঐখোয়না থবকসু পায়খৎলি‍।

ইচিল ইনাওশিং,

জামনগর লমদমবু ইকোক নোঞ্জরি, ময়াম পুম্নমকপু ইকোক নোঞ্জরি‍। অদুগা অমুক হন্না লম্বীদা ঐবু থৌজানবিরম্বা ইমা-ইচে ইচলশিং, মখোয়বু উনজবনা ঐগী পুন্সিবু মহৈ য়ালহল্লে, ঙসি অসি ঐগীদমক্তা মহৈ য়াল্লবা নুমিৎনি‍। য়াম্লবা থৌজালশিং অসিগীদমক্তা মখোয়গী লমন তোনশিঞ্জরে‍। ময়াম পুম্নমক খুৎ অনিমক থাঙ্গত্তুনা ঐগা লোয়ননা লাউবিরকউ‍।

ভারত ইমানা য়াইফরে, ভারত ইমানা য়াইফরে‍।

***