প্রধান মন্ত্রী শ্রী নরেন্দ্র মোদীনা ঙসি নই দিল্লীগী জি.এম.সি. বালয়োগী ওদিতোরিয়মদা উপ রাস্ত্রপতি শ্রী এম. বেঙ্কৈয়া নাইদুগী বিদাই পীবগী থৌরমদা শরুক য়াখ্রে।

থৌরম অসিদা ৱা ঙাংলদুনা প্রধান মন্ত্রীনা শ্রী বেঙ্কৈয়া নাইদুনা মতম চুপ্পদা খিং-খিং লৌনা অমসুং থবক-থৌরমদা শরুক য়াবগী মগুন অদুগী মতাংদা পল্লদুনা গুন অসিনা মহাকপু মতম চুপ্পদা পব্লিক লাইফকী থবক-থৌরমশিংগা লোয়ননা কন্নেক্ত তৌদুনা থমগনি হায়না ফোঙদোকখি। শ্রী মোদীনা শ্রী বেঙ্কৈয়া নাইদুগা পুন্না মতম শাংনা থবক তৌমিন্নরকখিবা অদু নীংশিংখি অমসুং বজপায়ীগী সরকারগী মতমদা মন্ত্রী ওইনা পোর্তফোলিও খন্নবা হায়বদা মহাক্না রুরেল দিবেলপমেন্ত ওইনা খনখিবা অদু নীংশিংখি। পোর্তফোলিও অসি চাউখৎহন্নবা হোৎনবদা মহাক্না শীংথানীংঙাই ওইনা শরুক তমখি। প্রধান মন্ত্রীনা হায়খি মদুদি শ্রী নাইদুনা পোর্তফোলিও – রুরেল দিবেলপমেন্ত লোয়ননা অর্বান দিবেলপমেন্ত অনিমক পাইখি। প্রধান মন্ত্রীনা উপ রাস্ত্রপতি অসি রাজ্য সভাগী চিয়রমেন অমসুং উপ রাস্ত্রপতিগী ফম পাইখিবা রাজ্য সভাগী অহানবা মেম্বর ওইদুনা অখন্নবা অমা ওইখি। মসিগা লোয়ননা পার্লিয়ামেন্তরী এফিয়র্স মন্ত্রী ওইরকপগী এক্সপরিয়েন্স অদুনা মহাকপু সভা অসি নীংথিনা অমসুং লায়না চল্লাইখি হায়না প্রধান মন্ত্রীনা ফোঙদোকখি।

প্রধান মন্ত্রীনা শ্রী নাইদুনা সভা, মেম্বরশিং অমসুং কম্মিতিশিংগী মতিক-ময়াইশিংবু শক্তি পীনবা অমসুং হেনগৎহন্নবা হোৎনখি হায়না থাগৎখি। প্রধান মন্ত্রীনা হায়খি মদুদি মহাক্না পার্লিয়ামেন্তয়ন পুম্নমক্তা থমখিবা থাজবশিং অদু থুংহন্নবা ঐখোয়না মতম চুপ্পদা হোৎনবা হায়বা অসি মরু ওই।

শ্রী নাইদুগী মতম নীংথিনা শীজিন্নবগী মতৌবু থাগৎলদুনা প্রধান মন্ত্রীনা কোরোনাগী অথিংবশিং লৈরিঙৈ মনুংদা উপ রাস্ত্রপতিনা ‘এলি-য়াত্রা’শিং তৌখিবা অদুবু নীংশিংখি, হায়বদি মহাক্কী শাংলবা পব্লিক লাইফতা থেংনখিবা মীওইশিংগা ফোন্দা পাউ ফাউন্দুনা, অৱাবা মতমশিং অদুদা মখোয়বু থেমজিনবীখি অমসুং পুক্নিং থৌগৎখি। মসিগা মান্নবা মওংদা মহাক্না লাইচৎ মনুংদা এম.পি.শিংগা পাউ ফাওনখি। প্রধান মন্ত্রীনা বিহারদা চৎখিবা খোঙচৎ অমদা শ্রী নাইদুনা মহাক্কী হেলিকোপ্তর অদু ফোর্স লেন্দিং তৌখি অমসুং মহাক্না লৌমী অমবু মতেং পাংখিবা অদু নীংশিংখি। প্রধান মন্ত্রীনা হায়খি মদুদি শ্রী নাইদুনা ঙসি ফাওবা লৌমী অদুগা অমসুং মহাক্কী ইমুং-মনুংগা পাউ ফাওনরি। প্রধান মন্ত্রীনা মহাক্না পব্লিক লাইফতা চপ মান্নবা কত্থোকপা অমসুং লৌশিং অসিনা তুংদা লাক্কদবা মতমশিংদা মহাক্না মীয়ামবু মখা তাবা লমজিংখিগনি হায়না থাজবা ফোঙদোকখি।

শ্রী নাইদুনা মমা লোলবু লুন্না খঞ্জবা অদুগী মতাংদা প্রধান মন্ত্রীনা আর্তিফিসিএল ইন্তেলিজেন্স অমসুং অতোপ্পা অনৌবা তেক্নোলোজীশিংগী শক্তি শীজিন্নদুনা মীয়ামগীদমক সর্ভিস অমসুং প্রদক্তশিং দিবেলপ তৌনবা পুথোকখিবা ভাসিনী – নেস্নেল পব্লিক দিজিতেল প্লেৎফোর্ম ফোর লেংগ্বেজেসকী মতাংদা পনখি। মহাক্না সভা অনিমক্কী মেম্বরশিংদা মসি য়েংনবা হায়খি। মহাক্না রাজ্য সভাগী স্পীকর অমসুং  দিপুতী চিয়রমেন্দা মমা লোলদা দিবেৎ তৌনবদা শীজিন্নবা অফবা অনৌবা ৱাহৈশিং খোমজিন্নবা অমসুং লৈবাক অসিগী লোলশিংগী মগুন হাপনবা মখোয়বু হাপচিনহনখি। অফবা ৱাহৈশিংগী কল্লেক্সন অমা ফোঙবগী চহিগী ওইনা ত্রেদিসন অমা হৌদোক্তুনা বেঙ্কৈয়াজীগী মমা লোল নুংশিংবগী লেগেসী অদু মাংদা পুখৎনবা মহাক্না ফোঙদোকখি।

****