প্রধানমন্ত্রীগী লোইশঙ
প্রধান মন্ত্রীনা লুপা করোর ১৮০০ হেনবা শেনফমগী চাউখৎ-থৌরাংগী খোঙথাং কয়া শঙ্গাবগা লোয়ননা উরেপ উয়ুং তমখ্রে
“কাশীনা ঙসি হেরিতেজকা লোয়ননা চাউখৎপগী শক্তম অমা উৎপীরে”
“ঐহাক্কী কাশীনা সবকা সাথ, সবকা বিকাস, সবকা বিশ্বাস অমসুং সবকা প্রয়াসকী নীংথিরবা খুদম অমা ওইরে”
“শোর্ত-কত্তগী লৈবাক্কী কৈদৌনুংদা কান্নবা ওইদে হায়বা পাউজেল অমা কাশীগী মীয়াম্না লৈবাক পুম্বদা পীবিরে”
“সরকার অসিনা লাইরবশিংগী শিংনবা পুম্নমক্কী ৱারোইশিন পুরক্নবা মতম পুম্বদা হোৎনদুনা লাক্লি, মখোয়গী অৱা-নুংঙাইদা খোঙলোই ওইনবা হোৎনরি”
“ঐখোয়গী ইফমদা চাউখৎপা হায়রগা অরং-অরাক নত্তে। ঐখোয়গী ওইবা চাউখৎপগী ৱাহন্থোক্তি লাইরবা, দলিত, শোত্থরবা, ত্রাইবেল, ইমা, ইচে-ইচল পুম্নমক্কী মপাঙ্গল হাপ্পনি”
Posted On:
07 JUL 2022 5:23PM by PIB Imphal
প্রধান মন্ত্রী, শ্রী নরেন্দ্র মোদীনা ঙসি ভরানসিগী সিগ্রাদা লৈবা দাঃ সম্পুর্নানন্দ স্পোর্ত স্তেদিয়মদা পাংথোকপা থৌরম অমদা লুপা করোর ১৮০০ হেনবা শেনফমগী চাউখৎ-থৌরাংগী প্রোজেক্ত কয়া শঙ্গাবগা লোয়ননা উরেপ উয়ুং তমখ্রে। উত্তর প্রদেশকী রাজ্যপাল, শ্রীমতি অনন্দিবেন পতেল অমসুং উত্তর প্রদেশকী মুখ্য মন্ত্রী য়োগী অদিত্যনাথনা থৌরম অসিদা অতোপ্পা মীথুংলেন কয়াগা লোয়ননা শরুক য়াখি।
প্রধান মন্ত্রীনা থৌরমগী অহৌবমক্তদা উত্তর প্রদেশ অমসুং কাশীগী মীয়ামদা মখোয়না হন্দক্তা পাংথোকখিবা মীখলদা চাউনা শৌগৎপীবগীদমক্তা থাগৎপা ফোংদোকখি।
কাশীনা মতম পুম্বদা চঙ-চঙ লাওবা অমসুং ইচেলনা থনবা মফম ওইরি হায়না প্রধান মন্ত্রীনা হায়খি। হেরিতেজ অমসুং চাউখৎপগা পুন্না চৎমিন্নবা শক্তম অমা কাশীনা হৌজিক লৈবাক পুম্বদা উৎপীরে। লুপা করোর লিশিং কয়াগী প্রোজেক্ত কয়া অমা মায় পাক্না লোইশিনখ্রে অমসুং প্রোজেক্ত কয়া অমসু হৌজিক হৌজিকমক পায়খৎলি হায়না প্রধান মন্ত্রীনা হায়খি। কাশীগী থৱাইদি শিবা নাইদবনি, অদুবু, কাশীগী মশাদা লেপ্তনা ফগৎহনবগী থৌওংসু অদুমক চত্থরি হায়না মহাক্না ফোংদোকখি। চাউখৎ-থৌরাংশিং অসিনা কাশীবু মোবাইল, প্রোগ্রেসিব অমসুং সেন্সিতিব ওইবা হেনগৎহল্লি হায়না মহাক্না ফোংদোকখি। “ঐহাক্কী কাশীনা সবকা সাথ, সবকা বিকাস, সবকা বিশ্বাস অমসুং সবকা প্রয়াসকী নীংথিরবা খুদম অমা ওইরে”, হায়না মহাক্না হায়খি।
কাশীগী এম.পি.সু ওইরিবা প্রধান মন্ত্রীনা হায়খি, “কাশীগী মথৌ খঙবা মীয়াম্না লৈবাকপু মাইকৈ তাকপগী থৌওং পাংথোক্লিবশিং উবদা ঐহাক্না অপেনবা ফাওজৈ। শোর্ত-কত্তগী লৈবাক্কী কৈদৌনুংদা কান্নবা ওইদে হায়বা কাশীগী মীয়াম্না লৈবাক পুম্বদা খঙহল্লে”। মহাক্না লমদমসিগী মীয়াম্বু মতম খরগী অমসুং শমজিনবা লম্বীগী মহুত্তা মতম কুইনা চৎকদবা ৱারোইশিন্না হেন্না পাম্বগীদমক্তা থাগৎখি। ইনফ্রাস্ত্রকচর অমসুং অতোপ্পা হীরমশিংদা চাউখৎপা লৈরকপনা শহর অসিদা তুরিজম পুরক্লে অমসুং কারবারগী অনৌবা খুদোংচাবা কয়া পুরকপগা লোয়ননা কারবার তৌবদসু হেন্না লাইথোকহল্লে হায়না মহাক্না ফোংদোকখি।
ইকুই কুইদনা লাক্লগদবা মোন্সুন থাগী মতাংদা হায়রদুনা, প্রধান মন্ত্রীনা বাবা বিশ্বানাথপু নীংজবা লৈবাক অমসুং মালেমগী মীওই মশিং য়াম্বনা কাশীদা লাকপা হৌনরে হায়খি। মসিনা বিশ্বানাথ ধাম প্রোজেক্ত লোইরবা মতুংদা মসিনা অহানবা মোন্সুন কুহ্মৈ ওইরগনি অমসুং বিশ্বানাথ ধামগী মতাংদা মালেম পুম্বনা কয়া য়াম্না নুংঙাইবা ফাওনৈ হায়বসি অদোম্না হৌখিবা থা খরদা উবা ফংখ্রবনি মহাক্না ফোংদোকখি। লাইনীংবশিংগী এক্সপেরিএন্সশিংবু য়াম্না হেন্না নুংঙাইহন্নবা পান্দমগা লোয়ননা সরকারনা মাংজিল থানা চঙশিল্লি হায়না মহাক্না হায়খি। লাই নীংবগী তোঙানবা য়াত্রা কয়াবু হেন্না লাইথোকহল্লে অমসুং হেন্না নুংঙাইহল্লে।
“ঐখোয়গী ইফমদা চাউখৎপা হায়রগা অরং-অরাক নত্তে। ঐখোয়গী ওইবা চাউখৎপগী ৱাহন্থোক্তি লাইরবা, দলিত, শোত্থরবা, ত্রাইবেল, ইমা, ইচে-ইচল পুম্নমক্কী মপাঙ্গল হাপ্পনি”, হায়না প্রধান মন্ত্রীনা ফোংদোকখি। সরকারনা মীয়ামগী পক্কা য়ুম অমসুং য়ুম্থোং খুদিংদা তোতী ঈশিং য়ৌহন্নবা লেপ্তনা হোৎনরি হায়না মহাক্না পাউদমখি।
প্রধান মন্ত্রীনা ঐখোয়গী সরকারনা লাইরবশিংগী শিংনবা পুম্নমক্কী ৱারোইশিন পুরক্নবা মতম পুম্বদা হোৎনদুনা লাক্লি, মখোয়গী অৱা-নুংঙাইদা খোঙলোই ওইনবা হোৎনরি হায়না ফোংদোকখি। কোরোনাগী লেম্না তীকা থাবদগী হৌদুনা লাইরবশিংগী রাসন লেম্না পীনবা শীন-লাঙবা ফাওবদা সরকারনা অদোমগী সেবা তৌনবা খুদোংচাবা অমত্তা মাংহন্দে। দিজিতেল ইন্দিয়া, আয়ুশমান ভারত, মেদিকেল ইনফ্রাস্ত্রকচর মশিং হেনগৎলক্লিবা অসিনা মীয়ামগী অনৌবা খুদোংচাবা কয়া পীরি। নাকল অমদা, ঐখোয়না লৈবাক্কী শহরশিংবু মৈখুদগী মনিং তমহন্নবগীদমক্তা সি.এন.জি.দগী চেনবা গাড়িশিংগী ফেসিলিতীশিং হেনগৎহল্লি। অতোপ্পা নাকল অমদনা, ঐখোয়না গঙ্গাজীদমক্তা খঞ্জবা ঐখোয়গী হিহোনবশিংগী দিজল অমসুং পেত্রোলনা চলায়বা হিশিংবু সি.এন.জি.না মহুৎ শিলহন্নবা ওপসন পীরি হায়না প্রধান মন্ত্রীনা মখা তাখি।
শান্নরোইশিংনা অনৌবা স্পোর্ত সেন্তর ফংবনা মরম ওইরগা থৱাই য়াওবগী মতৌবু প্রধান মন্ত্রীনা উখি। ওলিম্পিক স্পোর্ত খুদিংগী খুদোংচাবা খুদিংমক কাশীদা লৈহন্নবা সরকারনা কন্না হোৎনরি হায়না প্রধান মন্ত্রীনা হায়খি। সিগ্রাগী নৌনা শেমদোক-শাদোক্লবা স্তেদিয়মদা মালেমগী থাক্তা লৈবা ফেসিলিতী কয়া হৌজিক শেমগৎলি হায়না মহাক্না ফোংদোকখি। দিকেদ তরুক লিরবা স্তেদিয়ম অসিদা ২১শুবা চহি-চাগী ফেসিলিতীশিং লৈহল্লগনি।
প্রধান মন্ত্রীনা কাশীগী মীয়ামদা গঙ্গা অমসুং ভরানসিবু লু-নান্না থম্নবা হায়খিবগা লোয়ননা মীয়াম্না শৌগৎপা অমসুং বাবা বিশ্বানাথকী থৌজালনা মরম ওইরগা শহর অসিগী অনীংবা অপাম্বা খুদিংমক মঙফাওনরগনি হায়বগী থাজবসু ফোংদোকখি।
চাউখৎ থৌরাংগী তোঙানবা খোঙথাং কয়া শঙ্গাবা অমসুং উরেপ উয়ুং তম্বা
হৌখিবা চহি ৮সিদা প্রধান মন্ত্রীনা ভরানসিগী ইনফ্রাস্ত্রকচর চাউখৎহনবদা অহেনবা মিৎয়েং চঙখি। মসিনা মরম ওইরগা শহর অসিগী শক্তমদা অপুনবা অহোংবা লাকখি। থৌওংশিং অসিগী খ্বাইদগী মরু ওইবা পান্দমদি মীচম মীয়ামগী পুন্সি মহিং হেন্না নুংঙাইহনবনি। মাইকৈ অসিদা অতোপ্পা খোংথাং অমা থাংজিনবা ওইনা, প্রধান মন্ত্রীনা থৌরমসিগী মনুংদা লুপা করোর ৫৯০ হেনবা শেনফমগী প্রোজেক্তশিং শঙ্গাখি। হায়রিবা প্রোজেক্তশিংগী মরক্তা ভরানসি স্মার্ত সিতী অমসুং অর্বান প্রোজেক্তকী মখাদা লৈবা প্রোজেক্ত কয়া য়াওরি। অহানবা ফেজতা নামো ঘাতকা লোয়ননা বাথিং জেত্তী শেমগৎপা; হি ৫০০গী দিজল অমসুং পেত্রোল ইঞ্জিনশিংবু সি.এন.জি.দা ওন্থোকপা; অরিবা কাশীগী কামেশ্বর মহাদেব ৱার্দপু নৌনা শেমগৎ-শাগৎপা অমসুং হারহুৱা, দাসেপুরগী খুঙ্গংদা ই.দবল্যু.এস. ফ্লেত ৬০০ হেন্না শাগৎপা; লাহারতারা-চৌকা ঘাত ফ্লাইওভরগী মখাদা অনৌবা ভেন্দিং জোন অমসুং অর্বান প্লেস শেমগৎপা; দশাশ্বমেধ ঘাত্তা তুরিস্ত ফেসিলিতী অমসুং মার্কেত কমপ্লেক্স শেমগৎপা; অমসুং আই.পি.দি.এস. ৱর্ক ফেজ-৩গী মখাদা নাগ্বাদা কে.ভি. ৩৩/১১গী সবস্তেসন শাবগী থৌওং কয়া মথক্তা পনখ্রিবা প্রোজেক্তশিংগী মনুং চল্লি।
প্রধান মন্ত্রীনা বাবাতপুর-কাপসেথী-ভাদোহি শোরোক্তা লেন মরিগী ওভর ব্রিজ (আর.ও.বি.) শাবা; সেন্ত্রেল জেল রোদকী ভরুনা তুরেল মথক্কী থোং; পিন্দ্রা-কাথিরাও শোরোক পাকথোকপা; ফুলপুর-সিধাউরা লিঙ্ক রোদ পাকথোকহনবা; খুঙ্গংগী শোরোক ৮ শেমগৎপা অমসুং মপাঙ্গল লৈহনবা; পি.এম.জি.এস.ৱাই. শোরোক ৭ শেম্বা অমসুং ধারসাউন-সিন্ধাউরা রোদ পাকথোক চাউথোকপগী থবকশিংসু শঙ্গাখি।
প্রধান মন্ত্রীনা জিলা অসিগী সিৱরেজ অমসুং ৱাতর সপ্লাই ফগৎহনবগা মরী লৈনবা প্রোজেক্তশিংসু শঙ্গাখি। হায়রিবশিং অসিগী মনুংদা ত্রেঞ্চ তেক্নোলোজী শিজিন্নদুনা ভরানসি শহরগী ওল্দ ত্রঙ্ক সিৱর লাইন নৌনা শেমদোকপা; ত্রান্স ভরাউনা লমদমদা সিৱর হাউস ২৫০০০ হেন্না শাবা; শহরসিগী সিস ভরাউনা মফমদা ঈশিং য়ুব শেমজিনবা; তাতেপুর খুঙ্গংদা রুরেল দ্রিঙ্কিং ৱাতর স্কিম্নচিংবা কয়া য়াওরি। শঙ্গাগদৌরিবা সোসিএল অমসুং এজুকেসন সেক্তরগা মরী লৈনবা তোঙানবা প্রোজেক্তশিংগী মনুংদা মাহগাও খুঙ্গংগী আই.তি.আই.; বি.ঐচ.য়ু.গী ভেদিক বিগ্যান কেন্দ্রগী অনিশুবা ফেজ; রাম্নগরগী সরকারগী গর্ল্স হোম; দুর্গাকুন্দগী সরকারগী ওল্দ এজ ৱিমেন হোমগী থীম পার্ক য়াওরি।
প্রধান মন্ত্রীনা বরা লালপুরগী দাঃ ভিম রাও অম্বেদকর স্পোর্ত কমপ্লেক্সকী সীন্থেতিক এথলেতিক ত্রেক অমসুং বাস্কেতবোল কোর্ত অমসুং সিন্ধাউরাগী নন-রেসিদেন্সিএল পুলিস স্তেসন বিলদিং, হোস্তেল কা শাবা, মির্জামুরাদ, চোলাপুর, জান্সা অমসুং কপসেথী পুলিস স্তেসনগী বেরেক অমসুং পিন্দ্রাদা ফাইয়র এক্সতিঙ্গিসর সেন্তর য়াওনা পুলিস অমসুং সেফতী ফাইয়র প্রোজেক্ত কয়াসু শঙ্গাখি।
প্রধান মন্ত্রীনা থৌরম মনুংদা লুপা করোর ১২০০ হেনবা শেনফমগী তোঙানবা প্রোজেক্ত কয়াগী উরেপ উয়ুংসু তমখি। মলতিপল রোদ ইনফ্রাস্ত্রকচর প্রোজেক্তশিং অসিগী মনুংদা লাহারতারা-বি.ঐচ.য়ু.দগী বিজয় সিনেমা ফাওবগী শোরোকপু লেন মরিদা পাকথোকপা; পান্দেপুর ফ্লাইওভরদগী রিংরোদ ফাওবগী শোরোকপু লেন মরিদা ওন্থোকপা; কুচাহেরীদগী সন্দাহা ফাওবগী শোরোকপু লেন মরিদা ওন্থোকপা; ভরানসি ভাদোহী রুরেল রোদপু পাকথোকহনবা অমসুং মপাঙ্গল হেন্না লৈহনবা; অনৌবা শোরোক মঙা শেমগৎপা অমসুং ভরানসি রুরেল মফমদা সি.সি. রোদ মরি শাবা; বাবতপুর-চৌবেপুর শোরোক্তা লৈবা বাবতপুর রেলৱে স্তেসনগী মনাক্তা আর.ও.বি. শাবগী থবকশিং য়াওরি। প্রোজেক্তশিং অসিনা শহর অমসুং খুঙ্গংগী শোরোকশিংগী ত্রাফিক হন্থহনবদা য়াম্না তেংবাংগনি।
লমদম অসিগী তুরিজমদা অনৌবা ইনোৎ হাপ্নবগীদমক্তা, ৱর্ল্দ বেঙ্কনা তেংবাংবা য়ু.পি. প্রো-পোর তুরিজম দিভেলপমেন্ত প্রোজেক্তকী মখাদা পায়খৎপা সার্নাথ বুধিস্ত সর্কিত শেমগৎপগী থবক, অশ্ত ভিনাকায়া, দ্বাদাশ জ্যোতির্লিং য়াত্রা, অশ্ত ভৈরব, নাব গাউরী য়াত্রাগী পাবন পাথ শেম্বা, পাঞ্চকোশী পরিক্রমা য়াত্রা মার্গতা স্তোপ্পেজ মঙাগী তুরিজম দিভেলপমেন্ত তৌবগী থবক অমসুং অরিবা কাশীগী তোঙানবা ৱার্দশিংগী তুরিজম দিভেলপমেন্তকী থবক কয়া য়াওনা প্রধান মন্ত্রীনা উরেপ উয়ুং তমখি।
প্রধান মন্ত্রীনা সিগ্রাগী স্পোর্ত স্তেদিয়ম নৌনা শেমগৎ-শাগৎপগী অহানবা ফেজকী থবক্কী উরেপ উয়ুংসু তমখি।
***
(Release ID: 1839942)
Visitor Counter : 160
Read this release in:
Bengali
,
Telugu
,
Kannada
,
Malayalam
,
Assamese
,
Odia
,
English
,
Urdu
,
Hindi
,
Marathi
,
Punjabi
,
Gujarati
,
Tamil