প্রধানমন্ত্রীগী লোইশঙ
azadi ka amrit mahotsav

পি.এম.না আন্ধ্র প্রদেশকী ভীমাবরমদা মমিং লৈরবা নীংতম লান্মী অল্লুরী সীতারাম রাজুগী চহি চুপ্পা পাঙথোক্কদবা ১২৫শুবা মপোক কুমওন পালন থৌরম হৌদোকখ্রে


পি.এমনা ফুত ৩০ ৱাংবা অল্লুরী সীতারম রাজুগী শেঞ্জেংনা শাবা মীতম মাইখুম হাংখ্রে

“নীংতম ইহৌ অসি শুপ্নগী চহি খরগী, মফম খরগী, নত্ত্রগা মীওই খরগী পুৱারী খক্তা নত্তে”

“অল্লুরী সীতারাম রাজুবু ভারতকী নাৎ, আদিৱাসীগী শক্তম, থৌনা, ৱাখল্লোনশিং অমসুং ভেল্যুশিংগী খুদম অমনি”

ঐখোয়গী অনৌবা ভারত অসি মখোয়না মঙজরম্বা ভারত অদু ওইহনসি। লায়রবা, লৌমী, শিন্মী, শোত্থরবা, আদিৱাসী পুম্নমক্না মান্নবা খুদোংচাবা ফংবা অদুগুম্বা ভারত অমা ওইহনসি

“ঙসি অনৌবা ভারত অসিদা অনৌবা খুদোংচাবশিং, লমশিং, ৱাখল্লোনশিং অমসুং ওইথোকপা য়াবশিং লৈরে অমসুং ঐখোয়গী নহারোলশিংনা ওইথোকপা য়াবশিং অসি থবক্তা ওন্থোক্নবগী থৌদাং লৌগদবনি”

“আন্ধ্র প্রদেশ অসি অথৌবশিং অমসুং লৈবাকনীংবশিংগী লমদমনি”

“ভারত মচা করোর ১৩০না শীংনবা খুদিংদা হায়রি - ‘ঙম্লবদি ঐখোয়বু থিংলু লাও’”

Posted On: 04 JUL 2022 1:13PM by PIB Imphal

প্রধান মন্ত্রী, শ্রী নরেন্দ্র মোদীনা ঙসি আন্ধ্র প্রদেশকী ভীমাবরমদা মমিং লৈরবা নীংতম লান্মী অল্লুরী সীতারামন রাজুগী চহি চুপ্পা পাঙথোক্কদবা ১২৫শুবা মপোক কুমওন পালন থৌরম হৌদোকখ্রে। থৌরম অসিদা আন্ধ্র প্রদেশকী রাজ্যপাল, শ্রী বিস্বাভুশন হরিচন্দন, মুখ্য মন্ত্রী শ্রী ৱাই.এস জগন মোহন রেদ্দী, কেন্দ্রগী মন্ত্রী শ্রী জি. কিশন রেদ্দীসু শরুক য়াখি।

মীতিন অদুদা ৱা ঙাংলদুনা প্রধান মন্ত্রীনা হায়খি মদুদি ফজরবা লেগেসী লৈজবা আন্ধ্র প্রদেশী অথোইবা লমদম অসিবু ইকাই খুম্নবগী খুদোংচাবা অমা ফংজবদা নুংঙাইবা পোকই। মহাক্না আজাদী কা অমৃত মহোৎসব, অল্লুরী সীতারাম রাজুগী ১২৫শুবা মপোক কুমওন অমসুং রম্পা ক্রান্তিগী চহি ১০০ শুরকপা অসিগুম্বা অচৌবা থৌরমশিং পুনশিন্নবগী থৌওং অসি থাগৎখি। প্রধান মন্ত্রীনা অথোইবা ‘মন্যম বীরুদু” অল্লুরী সীতারাম রাজুগী নীংশিং খুবমদা মকোক নোন্না খুরুমখি  অমসুং লৈবাক পুম্বগী মহুৎ শিন্দুনা মহাকপু ইকাই খুম্নবা উৎখি। মহাক্না অথৌবা নীংতম লান্মী অসিগী ইমুংগী মীওইশিংগা উনবা ফংজবা নুংঙাইবা ফোঙদোকখি। প্রধান মন্ত্রীনা ‘আদিৱাসী পরমপরা’ অমসুং আন্ধ্র প্রদেশকী চৎনবীদগী হৌরকখিবা নীংতম লান্মীশিংদা ইকাই খুম্নবা উৎখি।

প্রধান মন্ত্রীনা অল্লুরী সীতারাম রাজুগী ১২৫শুবা মপোক কুমওন অমসুং রম্পা ক্রান্তিগী চহি ১০০ শুরকপগী কুমওন চহি চুপ্পা পাঙথোক্কনি হায়না ফোঙদোকখি। মহাক্না হায়, পন্দ্রঙ্গীদা মহাক্কী পোক্নফম শেমজিনবা, চিন্তাপল্লী থানে শেমজিনবা, মোগল্লুদা অল্লুরী ধ্যান মন্দির শাগৎপা, থবকশিং অসিনা ঐখোয়গী অমৃতকী ৱাখল্লোনশিংগী খুদমশিং ওইরি। প্রধান মন্ত্রীনা হায়খি মদুদি, ঙসিগী থৌরম অসিনা ঐখোয়গী নীংতম লান্মীশিংগী থৌনা ফরবা থৌওংশিং অদু মীপুম খুদিংমক্তা খঙহন্নবা ফিরেপ অদু উৎলি।

প্রধান মন্ত্রীনা হায়খী মদুদি নীংতম্বগী ইহৌ অসি শুপ্নগী চহি খরগী, মফম খরগী, নত্ত্রগা মীওই খরগী পুৱারী খক্তা নত্তে। মসিগী পুৱারী অসি ভারতকী কাচিন-কোয়া খুদিংমক্তা থোকখিবা ইহৌ, অচেৎপা ফিরেপ অমসুং কত্থোকখিবশিং অদুগী পুৱারীনি। মহাক্না মখা তারদুনা হায়খি, “ঐখোয়গী নীংতম ইহৌগী পুৱারী অসি ঐখোয়গী দাইভর্সিতী, নাৎকী পাঙ্গল অমসুং লৈবাক অসিগী ঐখোয়গী অপুনবা শক্তমগী খুদমনি”।

অল্লুর সীতারাম রাজুবু ভারতকী নাৎ, আদিৱাসীগী শক্তম, থৌনা, ৱাখল্লোনশিং অমসুং ভেল্যুশিংগী খুদম অমনি হায়না ফোঙদোক্লদুনা প্রধান মন্ত্রীনা হায়খি মদুদি সীতারাম রাজু গারুনা পোকপদগী হৌনা মহাক্কী কত্থোকখিবা, মহাক্কী পুন্সি খোঙচৎ অসি ঐখোয় পুম্নমক্তা ইথিল পীনবগী হৌরকফম অমা ওইরি। মহাক্না মহাক্কী পুন্সিবু আদিৱাসী খুন্নাইগী হকশিং ফংহন্নবা, মখোয়গী অৱা-নুংঙাইগীদমক অমসুং লৈবাক অসিগী নীংতম্বা ফংনবগীদমক কত্থোকখি। প্রধান মন্ত্রীনা হায়, “অল্লুরী সীতারাম রাজুনা লৈবাক অসিবু অমত্তা ওইবগী লিপুন্না পুনশিল্লিবা ‘এক ভারত শ্রেস্থ ভারত’কী ৱাখল্লোন অদু তাক্লি”।

প্রধান মন্ত্রীনা হায়খি, ভারতকী স্পিরিচুএলিজম্না অল্লুরী সীতারাম রাজুদা মীনুংশি অমসুং থৌজালগী ৱাখল্লোন, আদিৱাসী খুন্নাইগী শক্তাক অমসুং মান্নবা, লৌশিং অমসুং থৌনাগী হায়বা ৱাখল্লোন পোকহনখি। অল্লুরী সীতারাম রাজুগী অঙাং ওইরিঙৈ মতম অমসুং রম্পা ক্রান্তিদা থৱায় থাখ্রবশিংগ মতাংদা পল্লদুনা প্রধান মন্ত্রীনা হায় মখোয়না কত্থোকখিবা অদুনা ঙসি ফাওবা লৈবাক পুম্বগীদমক থৌনা অমসুং ইথিলগী হৌরকফম অমা ওইরিবনি। “প্রধান মন্ত্রীনা হায়, “লৈবাক অসিগী নহারোলনা নীংতম ইহৌ লমজিংই। ঙসি অসি লৈবাক্কী চাউখৎ-থৌরাংগীদমক নহারোলশিংনা মাংদা থোরক্নবা অফবা খুদোংচাবনি”। মহাক্না হায়খি, “ঙসি অনৌবা ভারত অসিদা অনৌবা খুদোংচাবশিং, লমশিং, ৱাখল্লোনশিং অমসুং ওইথোকপা য়াবশিং লৈরে অমসুং ঐখোয়গী নহারোলশিংনা ওইথোকপা য়াবশিং অসি থবক্তা ওন্থোক্নবগী থৌদাং লৌগদবনি”।

প্রধান মন্ত্রীনা হায় আন্ধ্র প্রদেশ অসি অথৌবশিং অমসুং লৈবাকনীংবশিংগী লমদমনি। মফম অসিদা পিঙ্গলী বর্কৈয়াগুম্বা নীংতম লান্মীশিং লৈ, মখোয়না লৈবাক অসিগী ফিরাল ৱাংনা পাইহনখি। মফম অসি কন্নেগন্তী হনুমন্তু, কান্দুকূরী বীরেসলিঙ্গম পন্তুলু অমসুং পোত্তী শ্রীরামুলূগুম্বা অথৌবশিংগী লমদমনি। প্রধান মন্ত্রীনা হায়, ঙসি অমৃতকাল অসিদা লান্মীশিং অসিনা মঙজরম্বা মঙলানশিং অদুবু মঙফাওনহনবগী থৌদাং অসি ঐখোয় লৈবাকমচা খুদিংমক্কীনি। ঐখোয়গী অনৌবা ভারত অসি মখোয়না মঙজরম্বা ভারত অদু ওইহনসি। লায়রবা, লৌমী, শিন্মী, শোত্থরবা, আদিৱাসী পুম্নমক্না মান্নবা খুদোংচাবা ফংবা অদুগুম্বা ভারত অমা ওইহনসি। প্রধান মন্ত্রীনা হায়খি মদুদি, হৌখিবা চহি ৮ অসিদা সরকারনা লৈবাক্কী আদিৱাসী ফুরুপকী য়াইফনবা চোকথবা লৈতনা থবক তৌদুনা লাকখি।

প্রধান মন্ত্রীনা হায়খি নীংতম্বা ফংলবা মতুং অহানবা ওইনা লৈবাক অসিদা আদিৱাসীশিং চাউথোকচবা পোকহল্লিবা হীরম অমসুং হেরিতেজ অদু উৎথোক্নবা ত্রাইবেল ম্যুজিমশিং শেমগৎলি। আন্ধ্র প্রদেশকী লম্বসিঙ্গীদা “অল্লুরী সীতারাম রাজধ মেমোরিএল ত্রাইবেল ফ্রীদম ফাইতর্স ম্যুজিয়ম”সু শাগৎলি। মসিগা মান্ননা, ভগৱান বিরসা মুন্দাগী মপোক নুমিৎ নবেম্বর ১৫বু রাস্ত্রিয় জনজাতীয় গোর্ব দিৱস হায়না লাউথোকখি। প্রধান মন্ত্রীনা হায়খি মীরৈবাক্কী লৈঙাকপশিংনা আদিৱসী ফুরুপপু তমথিনা ওৎ-নৈখি অমসুং মখোয়গী নাৎ মুত্থৎনবা হোৎনখি।

প্রধান মন্ত্রীনা হায়খি ঙসি স্কিল ইন্দিয়া মিসনগী খুত্থাংদা আদিৱাসী কলা-কোশলনা অনৌবা মশক অমা ফংলি। ‘ভোকেল ফোর লোকেল’না আদিৱাসী কলা কোশলবু শেন্থোক লৈনবা পাম্বৈ অমা ওইহল্লি। দিকেদ কয়া লিরবা আইন্না আদিৱাসীশিংনা ৱাগুম্বা উমংগী পোত্থোকশিং য়ানবা য়াহনদবা অদু ঐখোয়না অহোংবা পুরকখি অমসুং মখোয়দা উমংগী পোত্থোকশিংদা হক পীবীখি, হায়না মহাক্না ফোঙদোকখি। মসিগা মান্ননা উমংগী পোত্থোক কয়াগী এম.এস.পি. প্রোক্যুর্মেন্ত অসি ১২দগী ৯০দা হেনগৎহনখি। বন ঘন বিকাস কেন্দ্র ৩০০০ হেন্না অমসুং বন ঘন সেল্ফ হেল্প গ্রুপ ৫০,০০০ হেনবনা আদিৱাসীগী পোত্থোকশিং অমসুং কলা অসিবু মতমগা চুনবা খুদোংচাবশিং ফংহল্লি। এস্পিরেস্নেল দিস্ত্রিক্ত স্কিমশিংনা ত্রাইবেল দিস্ত্রিক্তশিংদা চাউনা কান্নবা পীরগনি অমসুং এজুকেসনগী লমদা একলব্য মোদেল স্কিল ৭৫০ হেন্না লিংখৎখি অমসুং নেস্নেল এজুকেসন পোলিসীগী মখাদা মমা লোলশিংদা মহৈ তমহল্লি।

ধান মন্ত্রীনা হায়খি “মন্যম বীরুদু” অল্লুরী সীরারাম রাজুনা ব্রিতিশকী মায়োক্তা লান্থেংনবদা - ‘ঙম্লবদি ঐহাকপু থিংলু লাও’ হায়বা অসি উৎখি। ঙসি লৈবাক অসিনা মাংদা লৈরিবা শীংনবশিং, অৱাবশিং অসি থৌনা অসিগা লোয়ননা, ইরৈবাকচা করোর ১৩০গা লোয়ননা, অপুনবগী শক্তমগা লোয়ননা, মপাঙ্গল-থৌনাগা লোয়ননা মায়োক্নবদা হায়রি – ‘ঙম্লবদি ঐখোয়বু থিংলু লাও’ হায়না ফোঙদোক্লদুনা প্রধান মন্ত্রীনা ৱারোল পীবা লোইশিনখি।

থৌরম অসিগী নুংগী ওইবা ৱারোল

আজাদী কা অমৃত মহোৎসবকী শরুক অমা ওইনা, সরকার অসিনা নীংতম লান্মীশিংনা লৌরম্বা থৌদাংশিং অদুবু মতিক চানা মশক খঙবীনবা অচেৎপা ফিরেপ লৌরি অমসুং লৈবাক শিনবা থুংবদা লৈরিবা মীয়ামদা মখোয়গী মরমদা খঙহল্লি। খোঙথাং অসিগী শরুক অমা ওইনা, প্রধান মন্ত্রী, শ্রী নরেন্দ্র মোদীনা ভীমাবরমদা মমিং লৈরবা নীংতম লান্মী, অল্লুরী সীতারাম রাজুগী চহি চুপ্না চত্থগদবা ১২৫শুবা মপোক কুমওন থৌরম হৌদোকখি। ইং কুমজা ১৮৯৭কী জুলাই ৪দা পোকখিবা, অল্লুরী সীতারাম রাজু অসি ইস্তর্ন ঘাত রিজনগী আদিৱাসী ফুরুপশিং হকশিংবু ঙাকশেন্দুনা থম্নবা ব্রিতিশকী মায়োক্তা মহাক্না চত্থখিবা লান অদুগীদমক্তা নিংশিংনরি। ইং কুমজা ১৯২২দা হৌদোককিবা রম্পা ক্রান্তি মহাক্না লুচিংখি। মহাকপু লমদম অদুগী মীয়াম্না “মন্যম ৱীরুদু” (জঙ্গলশিংগী অথৌবা) হায়না খঙনৈ।

সরকার অসিনা চহি চুপ্পা পাঙথোক্কদবা থৌরম অসিগী শরুক অমা ওইনা থৌশিল কয়া পাঙথোক্নবা থৌরাং তৌরি। ৱিজয়নগরম জিলাগী পন্দ্রঙ্গীদা অল্লুরী সীতারমনগী পোক্নফম লমদা অমসুং চিন্তাপল্লী পুলিস স্তেসন (রম্পা ক্রান্তিগী চহি ১০০ মপুং ফাবগী – মসিগী পুলিস স্তেশন অসিদা লান্দাখিবা অদুনা রম্পা ক্রান্তিগী অহৌবা ওইখিবা) মফম অসিবু হান্নগুম্না অমুক শেমগৎলগনি। সরকারনা মুরল পেন্তিংশিংগী অমসুং এ.আই. ইনেবল্দ ইন্তরেক্তিব সীস্তেমগী খুত্থাংদা নীংতম লান্মী অসিগী পুনশি ৱারী উৎলিবা, ধ্যান মুদ্রাদা লৈরিবা অল্লুরী সীতারামগী মীতমগা লোয়ননা মোগল্লুদা লৈবা অল্লুরী ধ্যানা মন্দির শাবগী অয়াবসু পীখ্রে।

*****



(Release ID: 1839120) Visitor Counter : 80