কেন্দ্রগী মন্ত্রী মন্দলদা লৈরিবা ঐহাক্কী তেংবাং-মরুপ, শ্রী পিয়ুশ গোয়লজী, শ্রী সোমপ্রকাশজী, শ্রীমতি অনুপ্রিয়া পতেলজী, ইন্দস্ত্রী অমসুং এক্সপোর্তকা মরী লৈনবা মরুপ পুম্নমক, অতোপ্পা মীওই, ইবেম্মা অমসুং ইবুংঙোশিং!

মমাংগী চহি ৮দগী চত্থদুনা লাক্লবা অনৌবা ভারতকী মীয়ামদা মিৎয়েং চঙবা লৈঙাকপগী খোঙচত্তা মরূ ওইবা অতোপ্পা খোঙথাং অমা ঙসি পায়খৎলে। লৈবাক অসিনা অনৌবা অমসুং মতমগা চুনবা বানিজ্য ভবনগা লোয়ননা নিরয়াত পোর্তেল, হায়বা অনৌবা খুদোল অনি ফংলে। অনিসিগী রক্তগী অমনা ফিজিকেল ইনফ্রাস্ত্রকচরনি অমসুং দিজিতেল ইনফ্রাস্ত্রকচরনি। অনিসিনা ত্রেদ অমসুং কম্মর্সকা মরী লৈনবা ঐখোয়গী পথাপ্তা অহোংবা পুরকপগা লোয়ননা আত্মানির্ভর ভারত অমা ওইহন্নবা ঐখোয়গী অপাম্বগী ফিভম উৎলি। অদোম খুদিং, ত্রেদ অমসুং কম্মর্স, এক্সপোর্তকা মরী লৈনবা অপুনবা খুন্নাইবু অমসুং এম.এস.এম.ই.বুসু ঐহাক্না ঙসিগী থৌরম অসিগীদমক্তা থাগৎপা ফোংদোক্লি। ঙসি অসি লৈবাক্কী অহানবা ইন্দস্ত্রী মন্ত্রী, দাঃ শ্যামা প্রসাদ মুকর্জীগী লৈখিদবগী কুমওনসু ওইরি। মহাক্কী থৌশিল-থৌরাং, ৱারেপ, পান্দম অমসুং পুম্নমক অসিবু ফংবা হায়বসিনা নীংতম্বা ভারত্তা লম্বী তাকপগী য়াম্না মরু ওইবা থৌওং ওইখি। লৈবাক্না ঙসিদি, মহাক্কী মফমদা ইকায় খুম্নবা উৎলি।

মরূপশিং,

অনৌবা বানিজ্য ভবন্না অদোমগী মফমদা অনৌবা ইথিল, অনৌবা ৱারেপকা লোয়ননা লাক্লি হায়বা ঐহাক্না থাজৈ। মসিগী পান্দমদি কারবার তৌবদা হেন্না লাইথোকহনবনি অমসুং কারবার তৌবদা লাইথোকহনবগী খুত্থাংদা পুন্সি মহিংবুসু হেন্না লাইথোকহনগনি। খুদোংচাবা ফংবদা লাইহনবা হায়বসিনা ৱাফম অনিগী মরক্তা শম্নহন্নবা থোং ওইগনি। সরকারগা পাউ ফাওনবদা অয়েৎপা অমত্তা লৈহল্লোইদবনি অমসুং সরকারগা পাউ ফাওনবদা লাইহনবা হায়বসিনা সরকারগী খ্বাইদগী অহানবা মিৎয়েং চঙফম ওইরি। লৈবাক মীয়ামদা তঙাই ফদবা খুদোংচাবশিং লাইনা ফংহন্নবা, বেঙ্কিংগী খুদোংচাবা ফংহন্নবা, সরকারগী কাঙলোনশিংগা নকশিন্নহন্নবা, হীরমশিং অসিদা ঐখোয়গী মমাংগী চহি ৮গী লৈঙাকপগী থৌওংনা খ্বাইদগী মরু ওইনা লৌখি। ভারতনা মশাগী শেন্মিৎলোনগী চাউখৎ-থৌরাংগীদমক্তা থৌশিল-থৌরাং কয়া শেমখিবা, ৱারেপ কয়া লৌখিবশিংদা হায়রিবা ৱাফমশিংগী মমি কয়া ময়েক শেংনা তাবনি। খুঙ্গং, অপীকপা শহরশিংদা মুদ্র য়োজনাগী তেংবাংদগী ওন্তোপ্রিনর ওইখিবা মীওই করোর কয়া ওইরো, এম.এস.এম.ই.গী পোলিসী লাখ কয়া অমসুং বেঙ্ক ক্রেদিতকী মওংদা পুক্নিং থৌগৎপা ওইরো, স্ত্রীত ভেন্দর লাখ কয়াদা ক্রেদিতকী খুদোংচাবা পীখিবা ওইরো, স্তার্তঅপ লিশিং কয়াগী শাহৌগীদমক্তা লেপ্তনা হোৎনখিবা ওইরো, পুম্নমক অসিগী পাংথোকপগী নুংগী ওইবা ৱাখল্লোন্দি খুদোংচাবা লাইনা ফংহনবা হায়বসিনি। সরকারগী স্কিমশিংগী কান্নবা কয়া মীওই খুদিংদা য়ৌহনবা, অচান মীরায় নাইদনা য়ৌহনবা, হায়বসিদা মীওই পুম্নমক্কী চাউখৎপা ওইগদৌরিবনি। খুদোংচাবা লাইনা ফংহনবা অমসুং সবকা বিকাস হায়বা ৱাখল্লোনগী মমি অনৌবা বানিজ্য ভবন্দা তাবসিদা ঐহাক্না নুংঙাইবা ফাওই।

মরূপশিং,

অদোম খুদিংনা এস.ও.পি., হায়বদি, স্তেন্দর্দ ওপরেতিং প্রোসিজর হায়বা ৱাহৈ অসি নীংথিনা খঙনরম্লগনি। মসিদি থবক তৌবগী অনৌবা থৌওংনি। মমাংগী মতমগী সরকারনা প্রোজেক্ত অমা হৌদোকপা মতমদা করম্বা মতমদা লোইশিনগনি হায়বগী গেরেন্তী অমত্তা লৈতববু মমাংগী সরকারগী এস.ও.পি.নি হায়না খন্নরম্মি। রাজনিতীগী কান্নবগীদমক্তা মরী লৈনবা ৱাফম লাউথোক্কনি, অদুবু মদুবু করম্বা মতমদা লোইশিনগনি হায়বগী মতাংদদি কনামত্তা লুনা খল্লমদে। চৎনবী অসিবু ঐখোয়না করম্না হোংদোকপগে হায়বগী খুদমসি ঙসিগী ভবন্না ওইরি, অদুগা হৌজিক্তসু হায়খিবগুম্না, ঐহাক্না জুন ২২, ২০১৮দা ভবন অসিগী উরেপ উয়ুং তমখিবা অমসুং ঙসি জুন ২৩, ২০২২দা শঙ্গাবা অসিসু য়াম্না তান চান্নবা থৌদোক অমনি। মরক অসিদা কোরোনানা মরম ওইরগা খুদোংচাদবা কয়া পীখি। খুদোংচাদবশিং অসিগী মরক্তা ঐখোয়না ৱারেপ অমা লৌখি, মদুগী মহৈদি ঙসি ঐখোয়গী মাঙদা লৈরে। উরেপ উয়ুং তমখিবা অদুবু অপীবা মতমগী মনুংদা শঙ্গানবগীদমক্তা থম্মোই শেংনা থবক হৌবা হায়বসিনা ঙসিগী অনৌবা ভারতকী অনৌবা এস.ও.পি. ওইরবনি। মমাংগী চহি খরগী মনুংসিদা দিল্লীমক্তদসু অদোম্না মসিগুম্বা খুদম কয়া উরম্লগনি। ঙসিদগী নুমিৎ খরনিগী মমাংদসু ঐহাক্না প্রগতী মাইদানগী মনাক্তা ইন্তিগ্রেতেদ ত্রাঞ্জিত কোরিদোর শঙ্গাবগী খুদোংচাবা ফংজখি। সরকারগী প্রোজেক্তশিংনা চহি কয়া পন্দুনা লৈতনা মতম চানা লোইশিল্লকপা মতমদা সরকারগী স্কিমশিংনা মখোয়গী পান্দম ফংগনি, মসিগী মতমসিখক্তদা লৈবাক্কী তেক্সপেয়রশিংবু ইকায় খুম্নবা হৌরক্কনি। ঐখোয়না পি.এম. গতিশক্তি নেস্নেল মাস্তর প্লানগী মওংদা অনৌবা মতমগা চুনবা প্লেতফোর্ম অমা ঙসিদি লৈরে। মসিগী বানিজ্য ভবন্না লৈবাক্কী ‘গতি শক্তি’দা শাফু পীগনি।

মরূপশিং,

উরেপ উয়ুং তম্বদগীনা শঙ্গাবা ফাওবদা বানিজ্য ভবন্না হৌজিক্কী কম্মর্সকী লমদা মতমসিদা ঐখোয়না চাউখৎলক্লিবা অসিগী খুদম অমসু ওইরি। মসিগী উরেপ উয়ুং তমখিবগী মতমদা মহাক্না ইন্নোভেসন পাংথোকপা অমসুং গ্লোবেল ইন্নোভেসন ইন্দেক্সতা ফগৎপগী তঙাই ফদবা লৈ হায়না ফোংদোকখিা ঐহাক্না ঙসিসি নীংশিংলি। ঙসিদি, ভারত অসি গ্লোবেল ইন্নোভেসন ইন্দেক্সতা ৪৬শুবা থাক্তা লৈরে অমসুং লেপ্পা লৈতনা ফগৎলি। ঐহাক্না মতমদুদা কারবার তৌবদা হেন্না লাইথোকহনবগী মতাংদসু ৱাফম থমখিবনি। ঙসিদি ভবন অসি শঙ্গারে অমসুং মীয়ামদা খুৎশিন্নরে। মসিগী মনুংদা হৌজিক ফাওবগী ওইনা কমপ্লাইএন্স লিশিং ৩২ হেন্না লৌথোকখ্রে। কমপ্লাইএন্স লিশিং ৩২, অমুক্তা খন্থবীয়ু। উরেপ উয়ুং তমখিবা মতমদা জি.এস.তি. চৎনবা হৌবসি থা খরখক্তা ঙাইরিবনি। মদুগী মতাংদা ৱাফম কয়া অমা ফোংদোক্নবা মতম্নি। ঙসিদি, থা অমদা লুপা করোর লাখ ১গী জি.এস.তি. খোমগৎপা হায়বসিদি মফম খুদিংদা পাংথোক্নরে। ভবন অসিগী উরেপ উয়ুং তম্বা মতমদা জি.ই.এম.দা লুপা করোর লিশিং ৯গী ওরদর লাকপগী ৱারী শারম্বনি। হৌজিক, পোর্তেল অসিদা স্মোল ওন্তোপ্রিনর লাখ ৪৫ হেনবনা রেজিস্তর তৌরে অমসুং লুপা করোর ২.২৫ হেনবগী ওর্দর পীরকখ্রে।

মরূপশিং,

ঐহাক্না মতমদুদা ইং ২০১৪দা মোবাইল য়ুনিত ২খক লৈরম্বদগী মতমদুদা মোবাইল য়ুনিত ১২০ য়ৌখিবগী মতাংদসু ৱারী শাখিবনি। ঙসিদি মশিং অসি ২০০ হেল্লে অমসুং ঐখোয়না ইম্পোর্ত খক্তা তৌরম্বদগী হেন্দোক্তুনা মালেমগী মোবাইল ফোন এক্সপোর্ত তৌবদা মপাঙ্গল লৈবা শক্তি অমসু ওইরক্লবনি। ঙসিদি, ভারত্তা চহি ৪গী মমাংদা লৈরম্বা রেজিস্তর তৌরবা ফিন্তেক মশিং ৫০০দগী য়াম্না হেনগত্তুনা ২৩০০ লৈরে। বানিজ্য ভবনগী উরেপ উয়ুং তমখিবা মতমদা ভারতা স্তার্তঅপ ৮০০০ চহি খুদিংগী শকখঙলম্মি, অদুবু ঙসিদি, মসিগী মশিংনা ১৫০০০ হেল্লে। পান্দম কয়া থমদুনা ঐখোয়না থম্মোই শেংনা থবক তৌবনা মরম ওইরগা চহি ১০০দা লাকপা অচৌবা লাইচৎ লৈরবা ফাওবদা ঐখোয়না মায় পাকপা কয়া ফংবা ঙমখ্রিবনি।

মরূপশিং,

ৱারেপ কয়া মঙফাওনহনবগী ৱাখল্লোন অমা হৌজিক ভারত্তা লাক্লিবা অসিগী নীংথিরবা খুদমদি ঐখোয়গী এক্সপোর্ত ইকো-সীস্তেম্নি। ঐখোয়না উরেপ উয়ুং তম্বগী থৌরমদা গ্লোবেল এক্সপোর্ত হেনগৎহন্নবা, এক্সপোর্ত হেনগৎহন্নবগীদমক্তা ভারতপু মেন্যুফেকচরিংগী পাম্নরবা পন্থুংফম ওইহন্নবা ৱারেপ লৌখিবনি। মমাংগী চহিদা পুৱারী ওইরবা মওংদা গ্লোবেল দিসরপসন থোক্তুনা সপ্লাই চেন মপুং ওইনা কায়খ্রবা ফাওবদা, বিলিয়ন দোল্লর ৬৭০, হায়বদি লুপা করোর লাখ ৫০গী পোত্থোক এক্সপোর্ত তৌখি। লৈবাক অসিনা মমাংগী চহিদা, শিংনবা কয়া থেংনরবসু, বিলিয়ন দোল্লর ৪০০, হায়বদি লুপা করোর লাখ ৩০গী পোত্থোক এক্সপোর্ত তৌবগী থ্রেসহোল্দ শোইদনা লানগনি হায়বা ৱারেপ লৌখিবনি। অদুগা ঐখোয়না মসিদগী হেন্দোক্তুনা বিলিয়ন দোল্লর ৪১৮, হায়বদি, লুপা করোর লাখ ৩১গী এক্সপোর্ত তৌবগী অনৌবা রেকোর্দ থমখি।

মরূপশিং,

মমাংগী চহিশিংগী মায় পাকপশিংনা পুক্নিং থৌগত্তুনা, হৌজিক্তি ঐখোয়না ঐখোয়গী এক্সপোর্তকী পান্দম হেনগৎলে অমসুং মদুবু ফংনবা হোৎনবগী চাংসু শরুক অনি হেনগৎলে। মসিগুম্বা অনৌবা পান্দমশিং ফংনবগীদমক্তা মীয়াম পুম্নমক্না হোৎনমিন্নবগী তঙাই ফদবা লৈ। ঙসিদি ইন্দস্ত্রী, এক্সপোর্ত তৌবা মীওইশিং অমসুং এক্সপোর্ত প্রোমোসন কাউন্সিলগী মীহুৎ কয়া য়াওরি। অদোম্না অতেনবা মতমগী পান্দম খক্তা নত্তনা অশাংবা মতমগী পান্দমসু থম্বীয়ু হায়না ঐহাক্না হায়জরি। পান্দম থম্বতা নত্তনা, মদু য়ৌনবা করি পাম্বৈ লৈবগে, সরকারনা করম্বা তেংবাংবা ঙমগনি, মসিগী মতাংদসু ঐখোয়না পুন্না হোৎনমিন্নবা হায়বসি য়াম্না তঙাই ফদবা ওইরে।

মরূপশিং,

নিরয়াত- নেস্নেল ইম্পোর্ত-এক্সপোর্ত ফোর য়র্লী এনালাইসীস ওফ ত্রেদ প্লেৎফোর্ম অসি মাইকৈ অসিদা পায়খৎখিবা খোঙথাংনি। মসিদা এক্সপোর্ত তৌবা মীওইশিং, সরকারগী তোঙান-তোঙানবা বিভাগ, রাজ্য সরকার, স্তেকহোলদর খুদিংগী তঙাই ফদবা রিএল তাইম দেতা ফংহনগনি। মসিনা সাইলো কয়া লৌথোকপদা তেংবাংগনি, ঐখোয়গী ইন্দস্ত্রী, এক্সপোর্তর খুদিংনা মরু ওইবা ৱারেপ লৌবদা তেংবাংগনি। মালেমগী লৈবাক ২০০ হেনবদা এক্সপোর্ত তৌরিবা কম্মোদিতী গ্রুপ ৩০ হেনবগা মরী লৈনবা মরু ওইবা ই-পাউশিং পোর্তেল অসিদগী লৌবা য়াগনি। জিলাশিংগী এক্সপোর্ত তৌবগী ই-পাউশিংসু পোর্তেল অসিদগী মতুং তারকপা মতমশিংদা লৌবা য়ারগনি। অদুগা ৱান দিস্ত্রিক্ত, ৱান প্রদক্তগী মরী লৈননা ঐখোয়না মিসন মোদতা পায়খৎলিবা থবকশিংসু মমৈথংদা অদুমক পুল্লগদবনি। মসিনা জিলাশিংবু এক্সপোর্ত তৌবগী মরু ওইবা সেন্তর ওইনা চাউখৎহন্নবা হোৎনরিবা থবকশিংবু হেন্না মপাঙ্গল লৈহনগনি। পোর্তেল অসিনা লৈবাক্কী রাজ্যশিংগী মরক্তা এক্সপোর্তকা মরী লৈনবা অফবা চাংয়েংনবগী ফিভম অমা লৈহনগনি হায়বগী ঐহাক্না থাজবা থম্লি। করম্বা রাজ্যনা এক্সপোর্ত কয়া য়াম্না তৌরি, পন্থুংফম কয়া য়াম্না য়ৌবা ঙম্লি, করম্বা পোত্থোক মখল কয়া য়াম্না এক্সপোর্ত তৌরিবগে হায়বা পুম্নমক খঙহনবা ঙমগনি।

মরূপশিং,

ঐখোয়না তোঙান-তোঙানবা লৈবাকশিংগী চাউখৎ-থৌরাংগী খোঙচৎ য়েংলুবা মতমদা, মখোয়গী এক্সপোর্ত হেনগৎলকপা মতমদা চাউখৎলকই হায়বা ঐখোয়না উবা ঙম্লে। মসিনা হায়বদি চাউখৎপা লৈবাক অমা ওইহনবদা এক্সপোর্তকী অচৌবা থৌদাং লৈ হায়বনি। মসিদগী থবক্কী খুদোংচাবসু হেনগৎলি, মশানা মশাবু থবক পীজবগী ওইথোকপসু হেলহল্লি। ভারতনা মমাংগী চহি ৮দা মশাগী এক্সপোর্ত লেপ্পা লৈতনা হেনগৎলক্লি, এক্সপোর্তকা মরী লৈনবা পান্দম খুদিং ফংবা ঙম্লি। এক্সপোর্ত হেনগৎহন্নবা হান্নদগী হেন্না ফবা থৌশিল থৌরাং, কাঙলোনশিং লাইথোকহনবা অমসুং পোত্থোকশিংবু অনৌবা কৈথেলদা পুবগী থৌওংনা মতেং চাউনা পাংখি। ঐখোয়গী এক্সপোর্তরশিংগী থবক খুদিংদা শেল য়াম্না চঙদনা কান্নবা হেন্না ফংহন্নবগীদমক্তা ঐখোয়না লোজিস্তিক্স সপ্পোর্তা অহেনবা মিৎয়েং চঙলি। পি.এল.আই. স্কিম্না মেন্যুফেকচরিং হেনগৎহন্নবা মতেং কয়াম্না পাংলি হায়বা পুম্নমক্না খঙনরে। ঐখোয়গী এক্সপোর্তর মরুপশিংগী পাউতাক্কী মখা পোন্না ঐখোয়না পোলিসীদা শেমদোকপা পুরক্লিবা কয়ানসু হায়রিবা থবকশিংদা য়াম্না তেংবাংখি। ঙসিদি, সরকারগী মন্ত্রালয়, বিভাগ খুদিংনা ‘হোল ওফ গভর্নমেন্ত এপ্রোচ’কা লোয়ননা এক্সপোর্ত হেনগৎহনবদা ঙসি খ্বাইদগী অহানবা মিৎয়েং চঙলি। এম.এস.এম.ই. মন্ত্রালয় নত্ত্রগা এক্সতর্নেল এফিয়র্স, এগ্রিকলচর নত্ত্রগা কম্মর্স মন্ত্রালয় ওইরো, পুম্নমক্না মান্নবা পান্দম অমগীদমক্তা মান্ননা হোৎনরি।। ঐখোয়গী এক্সপোর্ত তৌবগী পোত্থোকশিংগী মনুংদা খ্বাইদগী য়াম্লিবসি ইঞ্জিনিয়রিংগী পোত্থোক ওইবসি ঐখোয়না উবা ফংলে। মসিগী এক্সপোর্ত হেনগৎহনবদা এম.এস.এম.ই.না অখন্নবা থৌদাং য়ারি। লৈবাক্কী অনৌবা সেক্তর কয়ানা মখোয়গী এক্সপোর্ত মতৌ করম্না হেনগৎহল্লকপগে হায়বসু ঐখোয়না উরি। এস্পিরেস্নেল জিলা কয়াদগীসু মখোয়গী এক্সপোর্তকী চাং য়াম্না হেনগৎলে। লশিং অমসুং হেন্দলুমগী পোত্থোক্কী এক্সপোর্ত্তা ৫৫%গী চাংদা হেনগৎলক্লিবা অসিনা গ্রাসরুত লেভেলদা করম্না থবক পায়খৎলি হায়বা তাক্লি। সরকারনা ভোকেল ফোর লোকেল অভিয়ান, ‘ৱান দিস্ত্রিক্ত, ৱান প্রদক্ত’ স্কিমগী খুত্থাংদা লোকেলগী পোত্থোকশিংদা অহেনবা মিৎয়েং চঙলি। মখোয়না এক্সপোর্ত হেনগৎহনবদসু তেংবাংলি। ঐখোয়গী পোত্থোক কয়া অমা মালেমগী অনৌবা লৈবাকশিংদা অহানবা ওইনা এক্সপোর্ত তৌবা হৌরে। ঐখোয়গী লোকেলগী অশেংবা ৱাহন্থোক ওইনা গ্লোবেল ওইবগী মাইকৈদা খোঙজেল য়াঙনা চঙশিল্লি। সিতাভোগ, মিথাইবু বাহরেন্দা, নাগালেন্দগী অতেকপা কিং চিল্লীবু লন্দন্দা, অসমগী অতেকপা বর্মিজ অঙ্গুরবু দুবাইদা, ছতিসগরগী ত্রাইবেলগী মাহুৱা পোত্থোকপু ফ্রান্সতা অমসুং কার্গিলগী খুমানিবু দাইবাইদা এক্সপোর্ত তৌরি। অর্বুৱা, বেলিজ, বর্ম্যুদা, গ্রেনাদা অমসুং স্বিৎজর্লেন্দগুম্বা অনৌবা কৈথেলশিংদা হেন্দলুমগা মরী লৈনবা পোত্থোক থারি। ঐখোয়না ঐখোয়গী লৌমী, ফিশা-লোনশা তৌবা মীওই অমসুং ঐখোয়গী নাৎকী ওইবা পোত্থোকশিংবু এক্সপোর্ত ইকোসীস্তেমগা মরী লৈনহন্নবগীদমক্তা জি.আই. তেগগিং তৌবগী থৌওংদা তেংবাংবগা লোয়ননা অহেনবা মিৎয়েংসু চঙলি। মমাংগী চহিদা য়ু.এ.ই. অমসুং ওস্ত্রলিয়াগগী মরক্তা লল্লোন-ইতিক্কী য়ানচেগী খুৎয়েক পীনখিবা অমসুং অতোপ্পা লৈবাকশিংগসু মরী লৈনবা হীরমদা চাউখৎ-থৌরাং কয়া লৈখ্রে। মীরমদা লৈরিবা ভারতকী দিপ্লোমেতিক ইন্সতিত্যুসনশিংবু অচৌবা শিংনবা কয়াবু ভারতকী খুদোংচাবদা ওন্থোক্নবগীদমক্তা কন্না হোৎনখিবগীদমক্তা ঐহাক্না থাগৎলি। মসিগীদমক্তা ঐহাক্না মখোয়বু ইকায় খুম্নজরি অমসুং মখোয়গী থবকশিংগী মরমদা হায়রিবমখৈ লোইবা নাইরোই।

মরূপশিং,

লৈবাক চাউখৎহন্নবগীদমক্তা অনৌবা কৈথেল কয়াবু কারবারগীদমক্তা মশক খঙদোকপা অমসুং মখোয়গী তঙাই ফদবশিং খঙলবা তুংদা চুনবা পোত্থোক পুথোকপা হায়বসি য়াম্না মরু ওই। অমগা-অমগা তেংবাংমিন্নবা অমসুং থাজবদা য়ুম্ফম ওইদুনা কারবার তৌবনা কয়া য়াম্না চাউখৎপা পুরকই হায়বা ঐখোয়গী কারবার তৌবা মীওইশিংনা মমাংগী মতমদা উৎপীখ্রে। ভেল্যু অমসুং সপ্লাই চেনগী মতাংদা ঐখোয়না তম্লিবা ৱাফম অসিবু অমৃত কাল অসিদা মপাঙ্গল হেন্না লৈহনগদবনি। মসিগুম্বা ভেল্যুশিং অসিদা য়ুম্ফম ওইরগা ঐখোয়না য়ু.এ.ই. অমসুং ওস্ত্রেলিয়াগী মরক্তা লল্লোন-ইতিক্কী য়ানবগী ৱাফম পুরকপনি। অতোপ্পা লৈবাকশিংগসু মরী লৈনবা হীরমদা চাউখৎ-থৌরাং কয়া লৈখ্রে।

মরূপশিং,

মমাংগী চহি ৮দা লৈবাক অসিদা লাকখিবা চাউখৎ-থৌরাংদা ভারত মচা খুদিংবু চাউথোকচহল্লি। ৱাখল্লোন অসিগী লোয়ননা থবক তৌদুনা, ঐখোয়না নীংতম্বগী অমৃত কাল অসিদা লাক্কদৌরিবা চহি ২৫গীদমক্তা লেপখিবা ৱারেপশিংবু মঙফাওনহন্নবা থবক তৌবা তাই। ঙসিদি, অনৌবা ভবনসু শাবা লোইরে, অনৌবা পোর্তেলসু হৌদোক্লে। অদুবু, ঐখোয়গী থৌদাংদি মসিদা লোইদ্রি, অনৌবা ৱারেপ, শক্তিগা লোয়ননা অনৌবা মায় পাকপা ফংনবগীদমক্তা ঐখোয়না খোঙেজল য়াঙনা চৎপা অমুক মওং অমদা চৎপা হৌরবনি। হন্দক্তা শেমগৎ-শাগৎখিবা পোর্তেল অমসুং প্লেতফোর্মশিংবু চাং নাইনা য়েংশিন্নবা ঐহাক্না বিভাগ খুদিংগী মফমদা হায়রি। ঐখোয়না খুৎলায়শিং অসি শেমগৎ-শাগৎপগী পান্দম, পান্দম কয়া য়াম্না ফংলিবগে অমসুং করিগুম্বা খুদোংচাদবা থেংনরবদি, মখোয়গী ৱারোইশিন পুরক্নবা অথুবা মতমদা হোৎনগদবনি। ঐহাক্না ইদস্ত্রীগী মরুপ, এক্সপোর্তরশিংদা অদোমগী ৱারোলশিংবু ফোঙনা সরকারদা তম্বীয়ু, ইন্নোভেতিব ওইবা ৱারোইশিন পুরকপীয়ু, পাউতাক পীবীয়ু, ঐখোয়না পুন্না মদুগী ৱারোইশিন পুরকমিন্নসি হায়জনীংই। অদোম্না এক্সপোর্ত পোর্তেলদা চঙবীয়ু অমসুং মসিদা করি হাপচিনবা য়াগনি, করি লৌথোকপা য়াগনি তাকপীয়ু। জিলাগী থাক্তা এক্সপোর্ত হেনগৎহন্নবা ঐখোয়না করি তৌবা য়াই? দিস্ত্রিক্ত লেবেলদা ঐখোয়না হেলথী ওইবা এক্সপোর্ত কম্পিতিসন পাংথোকহনবা তাবনি। ঐখোয়গী মেন্যুফেকচররশিংগী মরক্তসু ৱর্ল্দ ক্লাস পেকেজিংদা জিরো দিফেক্ত, জিরো ইফেক্তকী কম্পিতিসন পুরকপা তাবনি। ঐখোয়না পুম্নমক্কী তেংবাং, পাউতাক, হায়বদি, পুম্নমক্কী প্রয়াসতগী ঐখোয়গী মাঙদা লৈরিবা চাউরবা পান্দম অসি ফংগনি হায়বগী থাজবা থম্মি। ঐহাক্না পুম্নমকপু অনৌবা ভবনগীদমক্তা থাগৎলি অমসুং ঙসিগী য়াইফরবা থৌরম অসিদা ঐহাকপুসু শরুক য়াবীনবগীদমক্তা পাউজেল পীবিরকপগী ঐহাক্না মরী লৈনবা বিভাগপু থাগৎচরি। অদোম পুম্নমকপু অমুক্কা হন্না থাগৎচরি অমসুং ঐহাক্কী য়াইফ পাউজেল পীজরি।

*****