নমস্কার!

লাইনীংবশিংনা লৈবাক্কী মীয়ামদা ইথিল পীনবগীদমক্তা মন্ত্রা অসি তাকপীরম্মি – ‘চরাইবেতী, চরাইবেতী’।

পাউমী অমগীদমক্তদি, মসিগী মন্ত্রা, খুন্নাইগী মাঙদা করিগুম্বা অনৌবা অমা পুথোক্নবা অনৌবা পামজবা অমসুং ৱাখল্লোন থীদোকপা হায়বসিদি মহৌশাগী মতাগুম্না পাংথোকপা থৌওংনি। রাম বহাদুর রাইজীনা মহাক্কী পুন্সি চুপ্পগী খোঙচত্তা ‘সাধনা’ অসিগা মরী লৈনদুনা ঐখোয়গী মাঙদা অসিগুম্বা থবক অমা পীবিবা অসিদা ঐহাক্না নুংঙাইবা ফাওই। মসিগী লাইরিক, ‘ভারতিয় সম্বিধানঃ অনকহি কহানী’ অসিনা লাইরিক মমিংগা চুনগনি অমসুং লৈবাক্কী মাঙদা সংবিধানবু য়াম্না পাক শনবা মওং অমদা থমগনি হায়বগী ঐহাক্না থাজবা থম্লি। ঐহাক্না রাম বহাদুর রাইজী অমসুং লাইরিক অসি ফোঙবদা মরী লৈনরিবা মীওই পুম্নমকপু অসিগুম্বা চিং লেম্লবা থবক্কীদমক্তা থাগৎচরি।

মরুপশিং,

অদোম পুম্নমক্না লৈবাক্কী লাইরিক লাইশু হৈবা মীওই কাঙলুপকী মীহুৎ ওইরি। মহৌশানা তাবা হায়বদুনি, অদোম্না লাইরিক অসি ফোঙবগী অখন্নবা নুমিৎ অমসুং মতম লেপ্লি! হৌজিক্কী মতমসিদি লৈবাক্কী নীংতম্বগী অমৃত মহোৎসবনি। ঐখোয়গী সংবিধানগী দিমোক্রেতিক দাইনামিজমগী অহানবা নুমিৎ শক্তাক্তুনা মতমদুগী রাস্ত্রপতি রাজেন্দ্র প্রসাদনা অশেংবা সংবিধানগী অহানবা এমেন্দমেন্ততা খুৎয়েক পীখিবসি জুন ১৮দনি। অদুগা অসিগুম্বা নুমিৎ অসিমক্তদা, ঐখোয়গী সংবিধানবু অখন্নবা মিৎয়েংদগী য়েংবা লাইরিক অমা ঐখোয়না ঙসি ফোঙলি। মসিনা ৱাখল্লোনগী তোঙানবা মতৌ অমসুং অশেংবা অমসুং অচুম্বগীদমক্তা থিজিন হুমজিন্নবা ঐখোয়দা ইথিল পীরিবা ঐখোয়গী সংবিধানগী খ্বাইদগী মপাঙ্গলনি।

মরুপশিং,

ঐখোয়গী সংবিধান্না লৈবাক্কী চারোন শুরোন কয়াগী মঙলান মঙফাওনহনবা ঙম্বা মনিং তম্বা ভারতকী শক্তম অমগা লোয়ননা ঐখোয়গী মাঙদা লাক্লি। কন্সতিত্বেন্ত এসেমব্লীগী সংবিধান শেম্বগী অহানবা মীফম নীংতম্বা ফংদ্রিঙৈগী থা কয়াগী মমাঙদা, দিসেম্বর ৯, ১৯৪৬তা পাংথোকখি। মীফম অসিগী মরুমদা পুৱারী ওইরবা য়াম্না পাক চাউরবা ৱাখল্লোন, মতম অমসুং ফিভম কয়া লৈখি। পুৱারী অমসুং সংবিধানগী মরমদা নীংথিনা লৌশিং লৈবা মীওই খুদিংনা ৱাফম অসি শোইদনা খঙগনি। অদুবু, ঐহাক্না পুম্নমক অসিদা ইমোস্নেল ওইবা ৱাফম অমসু উবা ফংলি। মতমদু তংদু লৈতাদবনা থনবা মতম্নি, ঐখোয়গী নীংতম ইহৌনা শিংনবা কয়া থেংনবা মতম্নি, অদুবু লৈবাক্কী থাজবনা অদুক্কী মতিক চেৎখি, মখোয়না নীংতম্বা ফংগনি হায়বগী মপুং ফানা থাজবা লৈখি। নীংতম্বা ফংদ্রিঙৈগী মতম কয়াগী মমাঙদগী লৈবাক অসিনা নীংতম্বগীদমক্তা শেম শাখ্রবনি অমসুং মশাগী সংবিধানগী ফ্রেমৱর্ক করি ওইহনসিগে হায়না খন্ন-নৈনবা হৌখ্রবনি। মসিনা ভারতকী সংবিধান অসি শুপ্নগী লাইরিক অমখক নত্তে; মসিদি ৱাখল্লোন, খোঙফম চেৎপা অমসুং নীংতম্বদা থাজবা থম্বনি।

মরুপশিং,

ঙসিদি, নীংতম্বগী অমৃত মহোৎসব মনুংসিদা, নীংতম ইহৌগী তাঙ্কক কয়াগী অমুক্তা লীথোক্ত্রিবা ৱারী কয়া মীয়াম মাঙদা পুরক্নবা লৈবাক অসিনা অমত্তা ওইনা হোৎনমিন্নরি। মশাগী পুম্নমক কত্থোকখ্রবা ফাওবদা কাওথোকপীরবা লান্মী, নীংতম ইহৌদা অনৌবা মাইকৈ পীরবা ফাওবদা কাওথোকখ্রবা থৌদোক অমসুং নীংতম ইহৌদা পাঙ্গল হাপখিবা ৱাখল্লোনশিং অসি ঐখোয়না নীংতম্বা ফংলবা ফাওবদা ঐখোয়দগী লাপ্না অদুমক লৈরি। তুংগী মতমগী ভারতকী মমাংগী মতমগী ৱাখল্লোনবু অমুক্কা হন্না মপাঙ্গল লৈহন্নবগীদমক্তা লৈবাক্না হায়রিবা ৱারীশিং অসিবু অমুক্কা হন্না পুন্সিল্লি। মরম অদুনা, লৈবাক্কী ঙসিগী নহারোলশিংনা অমুক্তা লিথোকখিদ্রিবা পুৱারী কয়াগী মতাংদা থিজিন হুমজিন্দুনা ঙসিদি ৱারী অমুক্কা হন্না ইরি। অমৃত মহোৎসবকী মখাদা থৌরম কয়া শীন-লাঙলি। মসিগী লাইরিক, ‘ভারতিয় সম্বিধানঃ অনকহি কহানী’ অসিনা লৈবাক্কী অসিগুম্বা খোঙজং অসিদা শাফু পীগনি। নীংতম্বগী পুৱারীগা লোয়ননা, ঐখোয়গী সংবিধানগী মীয়াম্না খঙদবা তাঙ্ককশিংনা লৈবাক্কী নহারোলশিংদা অনৌবা ৱাখল অমা খলহনগনি অমসুং মখোয়গী লৌশিং পাকথোক চাউথোকহনগনি। রাম বহাদুরজীনা লাইরিক অসিগী কোপী অমা ঐঙোন্দা মমাঙদা হান্ননা পীরকখ্রবনি। লমাই খরা ঐহাক্না ফাক্তুনা পাবদা নুংঙাইবা ৱাখল্লোন অমসুং পোৎলম কয়া অমা ঐহাক্না থেংনখি। অদোম্না অসুম্না ইখিবনি, “ভারতকী সংবিধানগী পুৱারীবু নীংতম ইহৌ মনুংদা মাঙখ্রবা থৌওং অমনি হায়না লৌনরম্মবনি, অদুবু মসি তসেংবা নত্তে। সংবিধান নীংথিনা খঙবা হায়বসি লৈবাক মীয়াম খুদিংগী মথৌদাংনি”। অদোম্বু এম.আই.এস.এ.গী মখাদা ইমর্জেন্সী মনুংদা ফাদোক ওইনা থমখিবা মতমদা, সংবিধান্দা অদোম্না অখন্ননা থৱাই য়াওবগী মতৌবু অমুক হন্না হৌদোকখিবনি হায়না অদোম্না লাইরিক্কী অহৌবদা ইরি। হায়বদি, সংবিধান্না অদোমগী মফমদা ইশাগী হক করিনো খঙহনখি অমসুং অদোম্না মসিদা কুপ্না নৈনরুবা মতমদা সংবিধানবু সিবিক দ্যুতীনি হায়বা ৱাখল্লোন অদোম্না খঙখি। হক অমসুং ইথৌগী অসিগুম্বা মরী অসিনা ঐখোয়গী সংবিধানবু য়াম্না অখন্নবা অমা ওইহল্লিবনি। করিগুম্বা ঐখোয়গী হক লৈরবদি, ঐখোয়গী ইথৌসু লৈ; অদুগা ঐখোয়গী ইথৌ লৈরবদি, ঐখোয়গী হকসু মান্ননা মপাঙ্গল লৈগনি। মরম অদুনা, লৈবাক অসিনা নীংতম্বগী ‘অমৃত কাল’ অসিদা থৌদাং খঙবগী মতাংদা ৱারী শারি অমসুং ইশাগী ইথৌদা অসুক য়াম্বা মিৎয়েং চঙলিবনি।

মরুপশিং,

ঐখোয়না অনৌবা ৱারেপ অমগা লোয়ননা তুংলমচৎকীদমক্তা চঙশিনবা মতমদা, ঐখোয়গী লৌশিংনা ঐখোয়গী এৱিয়র্নেস ওইরকই। খঙলকপা হায়বসিনা ঐখোয়বু হেন্না খঙবা হেনগৎহল্লি। মরম অদুনা, ঐখোয়না লৈবাক অমা ওইনা, ঐখোয়না সংবিধান নীংথিনা খঙলিবা অসিগী মখা পোন্না ঐখোয়গী সংবিধানগী তৌবা ঙম্বগী মতিক শিজিন্নবা ঙমগনি। গান্ধীজীনা ঐখোয়গী সংবিধানগী ৱাখল্লোন্দা করম্না লুচিংবগে, ধর্মদা য়ুম্ফম ওইবা তোঙানবা ইলেক্তোরেল সীস্তেম মুত্থত্তুনা সরদার পতেলনা ভারতকী সংবিধানবু কম্ম্যুনেলিজমদগী করম্না মনীং তমহনখিবগে, দাঃ অম্বেদকরনা ফ্রেতর্নিতীবু সংবিধানগী প্রিএম্বলদা মতৌ করম্না য়াওহনখিবগে অমসুং ‘এক ভারত শ্রেস্থ ভারত’কী মওং করম্না শেমখিবগে, অমসুং দাঃ রাজেন্দ্র প্রসাদকুম্বা স্কোলরশিংনা সংবিধানবু ভারতকী থৱাইগা মতৌ করম্না মরী লৈনহনখিবগে। অসিগুম্বা মমাঙদা খঙনদ্রিবা ৱারী কয়াবু লাইরিক অসিনা ঐখোয়দা নৌনা শক্তাক্লি। হীরমশিং অসিনা ঐখোয়গী তুংগী মতমদা করম্বা মাইকৈদা চৎকদগে হায়না লমজিংগদৌরিবনি।

মরুপশিং, ভারত অসি মহৌশাদগী হৌনা মনীং-মখা তম্নবা ৱাখল খনবা লৈবাক অমা ওইদুনা লাক্লি। করিমত্তা তৌনীংদবা নত্ত্রগা হোংদনা লৈবা হায়বসি ঐখোয়গী মহৌশাগী চৎনবীগী শরুক অমা কৈদৌনুংদা ওইরক্ত্রি। কন্সতিত্বেন্ত এসেমব্লী শেম্বদগীনা মসিগী খন্ন-নৈনবা ফাওবা, সংবিধান চৎনবা হৌরকপদগীনা হৌজিক্কী থাক অসি ফাওবা, ঐখোয়না দাইনামিক অমসুং প্রোগ্রেসিব ওইবা সংবিধান অমা লেপ্তনা উদুনা লাক্লি। ঐখোয়না মরৈ কয়া য়েৎনখ্রে, ৱাহং কয়া হংখ্রে, খন্ন-নৈনখ্রে অমসুং অহোংবা কয়া পুরকখ্রে। অসিগুম্বা লেপ্তবা থৌওংশিং অসিনা ঐখোয়গী মীয়াম অমসুং মীয়ামগী ৱাখল্লোনগা মতম পুম্বদা লোইনগনি হায়বগী ঐহাক্না থাজবা থম্মি। ঐখোয়না লেপ্তনা থিজিন হুমজিন্দুনা মমাংদা লৈরম্বা মতমশিংদগী য়াম্না হেন্না ফবা তুংগী মতম অমা শেমগনি। নীংথিনা খঙ-হৈরবা মীওইশিংনা লৈবাক্কী অসিগুম্বা দাইনামিজম অসিবু মান্নবা মওংদা লুচিংবীগনি। মসিগী থাজবা অসিগা লোয়ননা, ঐহাক্না পুম্নমকপু থাগৎচরি।

দিস্ক্লেমরঃ মসিদি প্রধান মন্ত্রীগী ৱারোলগী চাউরাকপা ৱাহন্থোক্নি। অশেংবা ৱারোলদি হিন্দিদা থমখিবনি।

****