য়ুথ এফিয়র্স অমসুং স্পোর্ত মন্ত্রালয়না নীংতম্বগী অমৃত মহোৎসব- ইন্দিয়া@৭৫গী শরুক অমা ওইনা জুন ৩, ২০২২দা লৈবাক শিনবা থুংবদা মালেমগী সাইকল নুমিৎ পাংথোক্কনি। নীংতম্বগী অমৃত মহোৎসবকী মার্চ ১২, ২০২১দা পাংথোকখিবা কর্তেন রাইজর হৌদোকপগী ৱারোল ওইনা প্রধান মন্ত্রীনা থমখিবা ৱারোলদগী ইথিল লৌরদুনা য়ুথ এফিয়র্স অমসুং স্পোর্ত মন্ত্রালয়না এক্সন অমসুং রিজোল্ব @৭৫গী য়ুম্বীগী মখাদা নীংতম্বগী অমৃত মহোৎসব পাংথোকপগী থৌরম অমগী ৱাখল্লোন পুথোকখি।

জুন ৩, ২০২২দা তারিবা মালেমগী সাইকল নুমিৎকী শরুক অমা ওইনা, য়ুথ এফিয়র্স বিভাগনা মখোয়গী পাইওনিয়র য়ুথ ওর্গনাইজেসন অনি, মিং ওইনা পল্লবদা, নেহরু য়ুবা কেন্দ্র সঙ্গথন (এন.ৱাই.কে.এস.) অমসুং নেস্নেল সর্ভিস স্কিম (এন.এস.এস.)না তেংবাংদুনা থৌরম মরি মতম অমত্তদা পাংথোক্কনি। থৌরমশিং অদুদি, দিল্লীদা মালেমগী বাইসাইকল নুমিৎ হৌদোকপা, রাজ্য/য়ু.তি. ৩৫গী কোনুং, লৈবাক্কী আইকোনিক ওইবা মফম ৭৫ অমসুং ব্লোক খুদিংদা বাইসাইকল রেল্লী পাংথোকপনি।

য়ুথ এফিয়র্স অমসুং স্পোর্তকী কেন্দ্র মন্ত্রী, শ্রী অনুরাগ থাকুরনা হয়েং নই দিল্লীগী মেজর ধ্যান চান্দ স্তেদিয়মদগী মালেমগী বাইসাইকল নুমিৎকা মরী লৈননা লৈবাক শিনবা থুংবদা পাংথোক্কদবা প্রোগ্রাম হৌদোক্কনি অমসুং মসিদা কেন্দ্র মন্ত্রীনা নহা ওইরিবা সাইক্লিস্ত ৭৫০গা লোয়ননা কিলোমিতর ৭.৫ অথাপ্পদা সাইকল থৌগনি। মখা তাবা ওইনা, রাজ্য/য়ু.তি. ৩৫গী কোনুং অমসুং লৈবাক শিনবা থুংবগী আইকোনিক ওইরবা মফম ৭৫দা এন.ৱাই.কে.এস.না সাইকল রেল্লী পাংথোক্কনি অমসুং মসিদা শরুক য়াবা সাইক্লিস্ত ৭৫না কিলোমিতর ৭.৫গী অথাপ্পদা সাইকল থৌগনি। মসিদা নত্তনা, নেহরু য়ুবা কেন্দ্র সঙ্গথন্না মখোয়গী নহা ভলন্তিয়র অমসুং য়ুথ ক্লবকী মেম্বরশিংনা শৌগত্তুনা সাইকল রেলীশিং অসিবু মশা-মশানা য়াওনীংবগী মতুং ইন্না লৈবাক্কী ব্লোক খুদিংদা য়ৌহনগনি।

মতৌ অসুম্না, জুন ৩, ২০২২গী মালেমগী বাইসাইকল নুমিৎ অসিদা লৈবাক শিনবা থুংবদা সাইকল রেলী শীনগনি। খোঙথাং অসিগী খুনুং চনবা ওইনা, ৱাহৌদোক থম্লবা সাইকল রেলীগী খুত্থাংদা নহা ওইরিবা সাইক্লিস্ত লাখ ১.২৯না নোংমদা, হায়বদি, জুন ৩, ২০২২দা কিলোমিতর লাখ ৯.৬৮ হেনবগী অথাপ্পদা সাইকল থৌগনি।

থৌওংশিং অসিগী পান্দমদি মীয়াম্না মশা মউ ফনা লৈনবা অমসুং কা হেন্না নোইবা, তনবা, ৱাখল ৱাবা, লাইনানচিংবা কয়াদগী ঙাকথোকপা ঙম্নবা সাইকল থৌবগী হৈনবী লৈনবা পুক্নিং থৌগৎপনি। মীচম মীয়াম্না সাইকল থৌবা হৌনরকপা মতমদা কার্বন ফুৎপ্রিন্ত হন্থহনবদসু য়াম্না তেংবাংবা ঙমগনি। মালেমগী বাইসাইকল নুমিৎ পাংথোক্তুনা মীয়ামগী নোংমগী পুন্সিদা য়ামদ্রবদা মিনিৎ ৩০দি হকচাং শাজেল য়াওহন্নবা “ফিতনেস কি দোজ, এক ঘন্তা রোজ” হায়বা পাউজেল পীগনি।

মালেমগী বাইসাইকল নুমিৎ পাংথোকপগী মনুং চনবা মরু ওইবা থৌরমশিংদি বজ ক্রিএসন অমসুং মেসেজ এমপ্লিফিকেসন, ফিতনেসকী মতাংদা এৱিয়র্নেস শন্দোকপা অমসুং বাইসাইকল রেলী লম্থাবনি। য়ুথ ভলন্তিয়রশিংবু নীংতম্বগী অমৃত মহোৎবকা মপা চান্ননা মশাগী খুঙ্গং অমসুং লৈকাইশিংদা অসিগুম্বা মান্নবা সাইকল শীন-লাঙনবা অমসুং শরুক য়ানবা পুক্নিং থৌগৎলি। মীয়াম অমসুং মরু ওইনা, নহাশিংনা মখোয়গী সোসিএল মিদিয়া চেনেলশিংদা Cycling4India অমসুং #worldbicycleday2022 শিজিন্নদুনা বাইসাইকল রেলীগী মতাংদা মীয়ামদা হেন্না খঙহন্নবা হোৎনবা য়াই।

শক্নাইরবা মীওই, মীয়ামগী মীহুত, পি.আর.আই. লুচিংবা, সোসিএল ৱর্কর, শান্নরোই অমসুং অতোপ্পা অথোইবা মীওইশিংবু থৌরমশিং অসিদা তোঙান-তোঙানবা থাক্তা শরুক য়াবীনবা অমসুং অতোপ্পদা পুক্নিং থৌগৎনবা হায়জরি।

কেন্দ্র সরকারগী মন্ত্রালয়, রাজ্য সরকার অমসুং অতোপ্পা লুপশিংদা মখোয় মশাগী লমদমশিংদা পাংথোকপা বাইসাইকল রেলীদা শরুক য়ানবা হায়জরি। মালেমগী বাইসাইকল নুমিৎ পাংথোকপা অসিবু মীয়াম্না শাফু পীবা থৌরম ওইহন্নবগীদমক্তা মরুপ, ইমুং-মনুং অমসুং পীয়র গ্রুপ্নচিংবশিংদা থৌরমশিংদা অসিদা মশিং য়াম্না য়াওবীনবসু হায়জরি।

*******