প্রধানমন্ত্রীগী লোইশঙ
পি.এম.না পি.এম. কিয়র্স ফোর চিলদ্রেন স্কিমগী মখাদা কান্নবশিং পীথখ্রে
“পি.এম. কিয়র্স ফোর চিলদ্রেন অসি সেন্সিতিবিতী লৈবগা লোয়ননা নখোয়গীদমক লৈবাক অসিদা লৈরিবা মীপুম খুদিংমক্না লেপ্পি হায়বা ৱাফম অসি তাক্লি”
“অৱাবা তানফম অসিদা ইমা ভারতিনা অঙাংশিং নখোয়গীদমক লৈরি”
“অৱাবা তানফম অসিদা অফবা লাইরিকশিংনা নখোয়গী থাজবা মরুপ ওইহল্লু”
“ঙসি, ঐখোয়গী সরকার অসিনা চহি ৮ মপুং ফারকপগী মতম অসিদা লৈবাক অসিগী থাজবা অমসুং ইরৈবাকচাশিংনা মশাদা থমজরিবা থাজবা অসি অমুক্তা ওইখিদ্রিবা মওংদা হেনগৎলক্লি”
“হৌখিবা চহি ৮ অসি লায়রবশিংগী য়াইফনবা অমসুং শেবা তৌনবগীদমক কত্থোক্তুনা লাকখি”
“হৌজিক্তি লায়রবশিংগী মরক্তা খ্বাইদগী লায়রবশিংনা কান্নবশিং ফংগনি হায়না থাজবা থম্লি। থাজবা অসি হেনগৎহন্নবা ঐখোয়গী সরকারনা হৌজিক ১০০% এম্পাৱর্মেন্তগী কেম্পেন অমা চত্থরি”
Posted On:
30 MAY 2022 11:35AM by PIB Imphal
প্রধান মন্ত্রী শ্রী নরেন্দ্র মোদীনা ঙসি ভিদিও কনফরেন্সকী থোংদা পি.এম. কিয়র্স ফোর চিলদ্রেন স্কিমগী মখাদা কান্নবশিং ফংহনখ্রে। থৌরম অসিদা কন্নেক্ত তৌখিবশিং অদুগী মরক্তা কেন্দ্রগী মন্ত্রী শ্রীমতি স্মৃতি ইরানি, কাউন্সিল ওফ মিনিস্তর্সকী অতোপ্পা মেম্বর কয়া অমসুং মুখ্য মন্ত্রীশিং য়াওখি।
মীতিন অদুদা ৱা ঙাংলদুনা প্রধান মন্ত্রীনা কোরোনানা মরম ওইদুনা মখোয়গী নুংশিজরবা মীশকশিংগা কাইনখ্রবা অঙাংশিংনা মখোয়গী পুন্সিদা থেংনরিবা অৱাবশিং অদুগীদমক নুংঙাইতবা ফোঙদোকখি। “নুমিৎ খুদিংগী থেংনবা অৱাবা, নুমিৎ খুদিংগী মায়োক্নবা শীংনবশিং। ঙসি থৌরম অসি মখোয়গীদমক পাঙথোক্লিবা, ঐখোয়গী ইরক্তা তিল্লিবা অঙাংশিং অসিনা থেংনরিবা অৱাবা অসি ৱাহৈনা ফোঙদোকপা ঙম্লোই”, নুংঙাইতবনা থল্লবা প্রধান মন্ত্রীনা অঙাংশিংদা ফোঙদোকখি। মহাক্না মখোয়দা মহাক্না ৱা ঙাংলিবা অসি প্রধান মন্ত্রী অমা ওইনা নত্তে ইমুংগী মীওই অমা ওইনা ঙাংলিবনি হায়খি।
মতৌ অসুম্না প্রধান মন্ত্রীনা হায়খি “পি.এম. কিয়র্স ফোর চিলদ্রেন অসি মমা অমসুং মপা অনিমক লৈখিদ্রবা কোরোনানা চৈথেং পীরিবা অঙাংশিংগী অৱাবশিং কোকহন্নবা পাইখৎপা অপীকপা খোঙথাং অমনি। পি.এম. কিয়র্স ফোর চিলদ্রেন অসি সেন্সিতিবিতী লৈবগা লোয়ননা নখোয়গীদমক লৈবাক অসিদা লৈরিবা মীপুম খুদিংমক্না লেপ্পি হায়বা ৱাফম অসিসু তাক্লি”। প্রধান মন্ত্রীনা করিগুম্বা কনাগুম্বা অমনা প্রোফেস্নেল কোর্স নত্ত্রগা হায়র এজুকেসনগীদমক এজুকেসন লোন অমা মথৌ তারবদি পি.এম. কিয়র্সনা মদুদসু মতেং পাংগনি হায়না ফোঙদোকখি। অতোপ্পা নোংমগী তঙাই-ফদবশিং অদু থুংহন্নবগী অতোপ্পা স্কিমশিংগী খুত্থাংদা মখোয়গীদমক থা খুদিংগী লিশিং ৪ পীনবা থৌরাং তৌখি। অঙাংশিং অসিনা চহি ২৩ শুরকপদা লুপা লাখ ১০ পীবগী মথক্তা আয়ুশ্মান কার্দকী খুত্থাংদা হেল্থ কবরেজ পীগনি অমসুং সাইকোলোজিকেল হেল্প অমসুং ইমোস্নেল হেল্পকীদমক সমবদ হেল্পলাইনগী খুত্থাংদা ইমোস্নেল কাউন্সেলিংসু পীগনি।
প্রধান মন্ত্রীনা লাইচৎ অসিগী খ্বাইদগী অৱাবা চৈথেং অদু থৌনা লৈনা মায়োক্নখিবগীদমক অঙাংশিং অসিদা ইকাই খুম্নবা উৎখি অমসুং মখোয়গী মমা-মপাগী মীনুংশিং অদু করিগুম্বা অমত্তনা মহুৎ শিনবা ঙম্লোই হায়না ফোঙদোকখি। “অৱাবা তানফম অসিদা ইমা ভারতিনা অঙাংশিং নখোয়গীদমক লৈরি”। লৈবাক অসিনা পি.এম. কিয়র্স ফোর চিলদ্রেনগী খুত্থাংদা মখোয়গী থৌদাংশিং থুংহন্নবা হোৎনরি হায়না মহাক্না ফোঙদোকখি। প্রধান মন্ত্রীনা লাইচৎ মনুংদা থেংনখিবা মীওইবগী মীনুংশি উৎখিবগী থৌদোকশিং, মরু ওইনা অৱাবা তারবা মীওইশিংগীদমক য়াইফনবা মীয়াম্না করম্না মতেং তৌখিবগে নীংশিংখি। প্রধান মন্ত্রীনা ফন্দ অসিনা কোরোনাগী মতমদা হোস্পিতালশিং শাবা, ভেন্তিলেতরশিং লৈবা অমসুং ওক্সিজেন প্লান্তশিং লিংখৎখিবদা চাউনা মতেং পাংখি হায়না ফোঙদোকখি। মসিনা মরম ওইদুনা পুন্সি কয়া কনবা ঙমখি, অমসুং ইমুং কয়াগী তুংগী পুন্সি কনবা ঙমখি।
অৱাবগী খ্বাইদগী ৱাবা পুংফমদসু করিগুম্বা ঐখোয়না ইশাদা থাজবা থম্লবদি আশাগী মঙাল অমা শোইনা উবা ফংগনি হায়না প্রধান মন্ত্রীনা ফোঙদোকখি। ঐখোয়গী লৈবাক অসিনা মসিগী অচৌবা খুদম অমা পীখি হায়না মহাক্না হায়খি। অঙাংশিং অসিদা অৱাবা অসিনা মাইথিবা ওইহল্লোইদবনি হায়না প্রধান মন্ত্রীনা পাউতাক পীখি। মহাক্না মখোয়দা মখোয়গী মথক থোংবা অমদি মখোয়গী ওজাশিংনা ঙাংবা তানবা হায়খি। মহাক্না অৱাবা তানফম অসিদা অফবা লাইরিকশিংনা মখোয়গী থাজবা মরুপ ওইনবসু হায়খি। মহাক্না মখোয়না লাইনা-তিন্না চেন্দনা লৈনবা অমসুং খেলো ইন্দিয়া অমসুং ফিৎ ইন্দিয়া মুফমেন্ত অসিগুম্বদা শরুক য়ানবা অমদি মাংজিল থানবা হায়খি। মখোয়দা য়োগ নুমিৎতসু শরুক য়ানবা হায়খি। নেগাতিবিতীনা থনখিবা ফীভম অদুদা ভারতনা মাগী মপাঙ্গলগী মীপাল তাংখি হায়না মহাক্না ফোঙদোকখি। “ঐখোয়গী বিজ্ঞানিক, ঐখোয়গী দোক্তর, অমসুং ঐখোয়গী নহারোলশিংদা ঐখোয়না থাজবা থমখি। অমসুং ঐখোয়না মালেমগীদমক আশাগী মঙাল ওইনা থোরকখি। ঐখোয়না সমস্যা ওইবগী মহুৎ সোল্যুসন পীরিবা অমা ওইখি। ঐখোয়না মালেমদা লৈরিবা লৈবাকশিংদা হীদাক-লাংথক, অমসুং ভেক্সিনশিং থাখি। অচৌবা লৈবাক্তা ফাওবা ঐখোয়না মখোয়গী প্রজা খুদিংমক্তা ভেক্সিন ফংহনবা ঙমহনখি”, হায়না মহাক্না ফোঙদোকখি। ঐখোয়গী লৈবাকঅসিনা খ্বাইদগী খোঙজেল য়াংনা চাউখৎলক্লিবা ইকনোমী অমা ওইরি অমসুং মালেমনা ঐখোয়না অনৌবা আশা অমসুং থাজবগা লোয়ননা মীৎয়েং থম্লক্লি, হায়না মহাক্না মখা তাখি।
প্রধান মন্ত্রীনা ঙসি মহাক্কী সরকার অসিনা চহি ৮ মপুং ফারকপদা লৈবাক অসিগী থাজবা, ইরৈবাকচাশিংনা মশাদা থমজরিবা থাজবা অসি অমুক্তা ওইখিদ্রিবা মওংদা হেনগৎলকপা অসিদা নুংঙাইবা ফোঙদোকখি। ২০১৪গী মমাংদা লৈবাক শিনবা থুংবদা শেঞ্জা-থুমজা, লুপা করোর লিশিং কয়াগী স্কেমশিং, নেপোতিজম, তেরোরিস্ত ওর্গনাইজেস অমসুং রিজনগী ওইবা খেন্নবা লৈরিবা অসিদা লাংগী লোইনাইদ্রবা অৱাবা অসিদা লৈবাক অসি লুপতুনা লৈখি। “খ্বাইদগী অৱাবা মতমশিং অসিসু হৌখি হায়বা অসিগী মসি অঙাংশিং নখোয়গীদমক খুদম অমসু ওইরি”, হায়না মহাক্না ফোঙদোকখি।
স্বচ্ছ ভারত মিসন, জন ধন য়োজনা নত্ত্রগা হর ঘর জল অভিয়ান অসিগুম্বা য়াইফ-থৌরাংগী পোলিসীশিং অসি পল্লদুনা প্রধান মন্ত্রীনা সরকার অসিনা সবকা সাথ, সবকা বিকাস, সবকা বিশ্বাস অমসুং সবকা প্রয়াসকী ৱাখল্লোনগা লোয়ননা মাংদা চংশিল্লি হায়না ফোঙদোকখি। হৌখিবা চহি ৮ অসি লায়রবশিংগী য়াইফনবা অমসুং শেবা তৌনবগীদমক কত্থোক্তুনা লাকখি, হায়না মহাক্না হায়খি। “ইমুংগী মীওই অমা ওইনা ঐখোয়না লৈবাক অসিদা লৈরিবা লায়রবশিংগী অৱাবশিং কোকহন্নবা অমসুং ইজ ওফ লিবিং হেনগৎহন্নবা হোৎনদুনা লাকখি”, হায়না প্রধান মন্ত্রীনা মখা তাখি।
প্রধান মন্ত্রীনা তেক্নোলোজী শীজিন্নবা হেনগৎলক্লিবা অসিনা সরকার অসিনা লায়রবশিংগী হকশিং ফংহনবা ঙমখি হায়না পনখি। হৌজিক্তি লায়রবশিংগী মরক্তা খ্বাইদগী লায়রবশিংনা মখোয়না সরকারগী স্কিমশিংগী কান্নবা অসি ফংগনি, মখোয়না মখা তানা ফংখিগনি হায়না থাজবা থম্লি। থাজবা অসি হেনগৎহন্নবা ঐখোয়গী সরকারনা হৌজিক ১০০% এম্পাৱর্মেন্তগী কেম্পেন অমা চত্থরি।
হৌখিবা চহি নিপান অসিদা ভারতনা ফংবা ঙমখিবা পনখৈ অসি মমাংদা কনাগুম্বা অমতনা থাজবা থম্লমখিদে হায়না প্রধান মন্ত্রীনা হায়খি। ঙসি মালেম শিনবা থুংবদা ভারতকী মীংচৎ হেনগৎলক্লি, ঐখোয়গী ভারতকী তৌবা ঙম্বগী শক্তি অদু মালেমগী ফম্পাকশিংদা হেনগৎলক্লি। ভারতকী খোঙচৎ অসিদা নহারোলশিংগী শক্তিনা লমজিংলি হায়না মহাক্না নুংঙাইবা ফোঙদোকখি। “নখোয়গী পুন্সি অদু নখোয়গী মঙলানশিংদা কত্থোকউ, মখোয় অদু শোইদনা মঙফাওনবা ঙমগনি”, হায়না ফোঙদোক্লদুনা প্রধান মন্ত্রীনা ৱা ঙাংবা লোইশিনখি।
***
(Release ID: 1829402)
Visitor Counter : 146
Read this release in:
Telugu
,
English
,
Urdu
,
Marathi
,
Hindi
,
Bengali
,
Assamese
,
Punjabi
,
Gujarati
,
Odia
,
Tamil
,
Kannada
,
Malayalam