ভারত ইমানা - য়াইফরে

ভারত ইমানা - য়াইফরে

মীয়াম্না নুংশিবা গুজরাতকী মুখ্য মন্ত্রী শ্রীমান ভুপেন্দ্র ভাই পতেলজী, গুজরাত ভারতিয় জনতা পার্তীগী প্রসিদেন্ত, সি.আর. পাতিল, কেন্দ্রগী মন্ত্রী মন্দলদা লৈরিবা ঐহাক্কী মরুপ, পর্শোত্তম রুপালাজী, মনশুখ মন্দাবিয়াজী, দাঃ মহেন্দ্র মুঞ্জাপারা, ঐখোয়গী সেনিয়র নেতা, শ্রী বজুভাইৱালাজী, শ্রী বিজয় রুপানী, পতেল সেবা সমাজ ত্রস্তকী ত্রস্ত্রী পুম্নমক, দোনর, ঐখোয়বু থৌজানবীনবগীদমক্তা মফমসিদা মশিং য়াম্না লাকপীরিবা ঐখোয়গী নুংশিরবা সন্ত, গুজরাত সরকারগী অতোপ্পা মন্ত্রী, এম.এল.এ., এম.পি. অমসুং কালেনগী নুংশানা য়ক লাওনা শারবসু ঐখোয়বু থৌজানবীনবগীদমক্তা মশিং য়াম্না লাকপীরিবা ঐহাক্কী ইচিল-ইনাওশিং!

ঙসি মফমসিদা মাতুশ্রী কে.দি.পি. মলতি-স্পিসিএলিতী হোস্পিতাল অমা শঙ্গারিবা অসিদা ঐহাক্না য়াম্না নুংঙাইবা ফাওই। হোস্পিতাল অসিনা সাউরাস্ত্রাগী হকশেলগী সেবা হেন্না ফগৎহনবদা তেংবাংগনি। সরকারনা হোৎনবগা মীয়াম্না হোৎনবগা পুনখিবা মতমদা সেবা তৌবা ঙম্বগী পাঙ্গলনা শরুক য়াম্না হেন্না হেনগৎলি। রাজকোত্তা শারিবা অসিগুম্বা মতমগা চুনবা হোস্পিতালনা মসিগী চাউরবা খুদম অমা ওইরি।

ইচিল ইনাওশিং,

কেন্দ্রদা লৈরিবা বি.জে.পি.না লুচিংবা এন.দি.এ. সরকারনা লৈবাক সেবা তৌরকপা চহি ৮ মপুং ফারি। চহি ৮গী মমাংদা অদোম্না ঐহাকপু কায়না পাউজেল পীখিবনি, অদুবু অদোমগী নুংশিবদি নোংম-নোংমগী হেনগৎলি। ঐহাক্না হৌজিক্তি গুজরাতকী লমদম লাক্লবনিনা গুজরাতকী মীয়াম খুদিংনা ইকোক নোল্লগা নোল্লুকচনীংই। অদোম্না ঐহাক্কী মফমদা পীবীখিবা সন্সকার, পরা, সমাজকীদমক্তা করম্না হিংগনি হায়না অদোম্না তাকপীবা, ৱাফম কয়া অমা তাকপীখিবা অদুনা ঐহাক্না চহি ৮ লৈবাক্কী সেবা তৌরকপদা চিত্থবা অমত্তা লৈহন্দ্রিবনি। মসিদি অদোমগী, লমদম অসিগী, নুংশিজরবা বাপু অমসুং সর্দার বল্লব ভাই পতেলগী শেংলবা লমদম্না পীবিবা সন্সকারনা মরম ওইরগা লৈবাকপু ইকায়বা নংহনগদবা থবক অমত্তা ঐহাক্না চহি ৮ অসিদা পাংথোকখিদ্রিবনি। লৈবাক্কী মীওই অমত্তনা ইকায়গদবা থবক অমত্তা তৌখিদ্রিবনি।

চহিশিং অসিদা লাইরবগী ‘সেবা’, ‘সুহাসন’ অমসুং ‘গরীব কলয়ান’দা খ্বাইদগী অহেনবা মিৎয়েং চঙখি। সবকা সাথ, সবকা বিকাস, সবকা বিশ্বাস, সবকা প্রয়াসকী মন্ত্রনা লৈবাক চাউখৎপগী শাফু পীখি। ঐখোয়না মসিগী চহি ৮ অসিদা পুজ্য বাপু অমসুং সর্দার পতেলগী মঙলানগী ভারত শেম্নবা থম্মোই শেংনা থবক তৌখি। নুংশিজরবা বাপু অমসুং সর্দার পতেলনা লাইরবা, দলিত, শোত্থরবা, ত্রাইবেল অমসুং নুপীশিংগী মপাঙ্গল হাপ্পগী মঙলান মঙলমখি। স্বচ্ছতা অমসুং স্বস্থনা লৈবাক্কী ৱাখল্লোনগী শরুক ওইবা ভারত অমগী মঙলান অমা মঙলমখি।

মরুপশিং,

ইমুং করোর ৩ হেনবগী পক্কা য়ুম লৈরে, ইমুং করোর ১০ হেনববু মপান্দা অমাংবা তৌবদগী মনিং তমহল্লে, ইচে-ইচল করোর ৯ হেনববু চাকখুমগী মৈখুদগী কল্লে, ইমুং করোর ২.৫ হেনবনা মৈ ফংলে, ইমুং করোর ৬ হেনবনা ময়ুমদা তোতি ঈশিং ফংলে অমসুং বেনিফিশরী করোর ৫০ হেনবনা লুপা লাখ ৫ ফাওবগী হেল্থ কভরেজ লেম্না ফংলে। হায়রিবশিং অসি শুপ্নগী মশিং নত্তে, মসিদি ঐখোয়গী লৈবাক্কী সেবাগী মনুংদা লাইরবশিংগী পুন্সিদা ইকায় খুম্নজবা লাক্নবা ঐখোয়না খোঙফম চেৎনা হোৎনখিবগী খুদম্নি, মরুপশিং।

ইচিল ইনাওশিং,

লাইরবগী সরকার লৈ, মখোয়বু করম্না সেবা তৌই, মখোয়বু মপাঙ্গল হাপ্নবা করম্বা থবক পায়খৎলি, মসি লৈবাক পুম্বনা ঙসি উরবনি। চহি ১০০গী মনুংদা অমুকখক থোকপা শাথীরবা লাইচৎ মনুংদা লাইরবশিংনা মশাগী পুন্সিদা খুদোংচাদবা থেংনহন্দনবা থবক পায়খৎখি। লাইচৎ হৌরবা মতুংদা লাইরবগী চাবা থকপগী খুদোংচাদবা থেংনবা হৌরকখি, মদুদা ঐখোয়না লৈবাক্কী চেং হৱাইগী থোঙবু লৈবাক মীয়ামগীদমক্তা হাংদোকখি। ঐখোয়গী ইমা, ইচেল ইচলশিংনা ইকায় খুম্ননা হিংবা ঙমহন্নবা মখোয়গী জন ধন বেঙ্ক একাউন্ততা হকথেংননা শেল হাপখি, লৌমী অমসুং শিন্মীশিংগী বেঙ্ক একাউন্ততা শেল হাপখি, মখোয়গী ইমুংগী চাকখুম কৈদৌনুংদা মুৎহনখিদে। লাইয়েংবগী খুদোংচাদবা হেনগৎলকপা মতমদা, ঐখোয়না তেস্তিংদগী হৌদুনা লাইয়েংবা ফাওববু লাইরবশিংগীদমক্তা লাইথোকহনখি। ভেক্সিন লাকপা মতমদসু লৈবাক মীয়াম্না ভেক্সিন লেম্না ফংহনখি। অদোম পুম্নমক্না ভেক্সিন কাপথোক্লে কো? কনানা লুপা অমা ফাওবা পুথোকপা তাখিবগে?

ইচিল ইনাওশিং,

নাকল অমদনা শাথীরবা কোরোনাগী লাইনা, নাকল অমদনা অদোম্নসু উরে, লান কন্না শোক্নরি। তি.ভি.গী মতম তংখাইদি লানগী পাউনা পুম্নমকপু ৱাহল্লি। অসিগুম্বা তাঞ্জা অসিদসু ঐখোয়না ঐখোয়গী লাইরবা ইচিল-ইনাও, মিদ্দল ক্লাসকী মীওইশিংনা অৱাবা থেংনদনবা লেপ্তনা হোৎনরি। হৌজিক্তি, ঐখোয়গী সরকারনা লৈবাক মীয়াম খুদিংদা খুদোংচাবশিংবু ১০০% ফংহন্নবা খোঙথাং পায়খৎলি। মশাগী হক্কী ফংফম থোকপা খুদিং মশানা ফংগদবনি। 

মীয়াম খুদিংদা মখোয়গী ফংফম থোকপা শোইদনা ফংহন্নবা পান্দম থম্লকপা মতমদা শেঞ্জা থুমজা লৈরক্লোই, অচান মীরায় খায়বা লৈরক্লোই। খুরা মাম্মগী চৎনবী লৈরক্লোই, জাৎ-বিজাৎকী খেন্নবা লৈরক্লোই। মরম অদুনা, ঐখোয়গী সরকারনা খুদোংচাবা ফংহনবগা মরী লৈনবা স্কিমশিংগী সেচ্যুরেসন থাক ১০০%গী চাংদা য়ৌহন্নবা থৱাই হকচাং য়াওনা হোৎনরি। ঐখোয়না হোৎনরিবা অসিনা লৈবাক্কী লাইরবা, লৈবাক্কী মিদ্দল ক্লাসকী মপাঙ্গল হাপকনি, মখোয়গী পুন্সিবু হেন্না লাইথোকহনগনি।

জসদন্দা অহানবা সুপর স্পিসিএলিতী হোস্পিতাল লৈখ্রে। অদুগা অতকোত্তা ঐহাক্না লাকপসিদা হোস্পিতাল অসিবু য়েংবগী খুদোংচাবা ফংজখি। দোনর অমসুং ত্রস্ত্রী কয়া অমগা উন্নবগী খুদোংচাবা ফংখি। ত্রস্তীশিংনা সাহেব তুং হন্দুনা খক য়েংগনু, মসিদা লাকপা মীওই অমত্তনা কৈদৌনুংদা হন্দুনা চৎলরোই। মসিদি ত্রস্তী অসিনা মহাক্কী ইনখোলনুং মক্তদা ঙাঙবা অমসুং থাজবগী মতৌনি। ঐহাক্না ভারতভাই বোধরা, পতেল সেবা সমাজকী মরুপ খুদিংবু থাগৎলিবমখৈ লোইবা নাইরোই। পতেল সেবা সমাজনা কত্থোকপগী ৱাখল্লোনগা লোয়ননা ঙসি পাংথোক্লিবা চাউরবা থবক অসি ইকায় খুম্নবগী মতিক চাবনি। মসিদগী ইথিল লৌদুনা অদোম খুদিংনা খুন্নাইগী করিগুম্বা অমা পাংথোকপগী অপাম্বা লৈরি।

ফেক্তরী, বস স্তেসন, রেলৱে স্তেসন শঙ্গাবা চৎপা খুদিংদা অদোম্না নীংথিনা মায় পাকপা ওইয়ু, হোৎনবা কন্দুনা পোত্থোক য়াম্না পুথোকপা ওইয়ু হায়না হায়নীংই। অদুবু, হোস্পিতালগী ওইনদি করি হায়গনি, ঐখোয়না হোস্পিতালশিংবু হাঙদুনা অদুমক লৈহন্নবা ঐখোয়গী অকোয়বগী ফিভমদা অহোংবা পুরকপগী তঙাই ফদবদি লৈ। মীওই অমত্তনা মসিদা লাকপগী তঙাই ফদবা লৈতবা হায়বা পাম্মি। অদুগা মশা মউ ফবা মীওইশিংদি মসিদা লাকপগী মথৌ করিসু তাদ্রে। অদুগা চৎপা তারবসু, হান্নদগী হেন্না মশা ফগত্তুনা য়ুমদা হনবা পাম্মি। মসিগুম্বা থবক অসি হোস্পিতাল অসিদা ওইথোক্লগনি। গুজরাত অসিদা আরোগ্যগী মতাংদা খোঙজেল য়াঙলিবা, ইনফ্রাস্ত্রকচর শেম-শাদুনা লৈরিবা, অদুগী থবক কয়ানা হৌজিক লোইরিবা থাক অসিগী ওইনা শ্রী ভুপেন্দ্র ভাই পতেল অমসুং মহাক্কী তীম্বু থম্মোই শেংনা থাগৎচনিংই। মসিগী কান্নবনা গুজরাতকী মীয়াম খুদিংনা ফংলগনি। অদুগা রাজকোত হায়রিবা মফমসিদি মনাক নকপগী জিলা মরি-মঙাশিংনসু মখোয়গী মফম্মক্নি খনবা মফমনি। মখোয়না মশাগী মফমদগী লাকপদা শুপ্নগী মিনিৎ ৩০দা য়ৌবা ঙম্মি। রাজকোত মফমসিদা গুজরাতকী এমস অমা ফংলিবা অসিগী থবকসু হৌজিক খোঙজেল য়াঙনা পায়খৎলি।

মতম খরগী মমাংদা জাম্নগরদা লাকখি, মদুদা মালেমগী ত্রেদিস্নেল মেদিসিনগী সেন্তর অমা দবল্যু.ঐচ.ও.গী খুত্থাংদগী উরেপ উয়ুং তমখি। নাকল অমদনা জাম্নগরদা অয়ুর্বেদ লৈরে, অদুগা নাকল অমদনা রাজকোত্তা এমস লৈরগনি। হোই, বাপু অদোমগী চাউথোকচনীংঙাই হেনগৎলে। মরুপশিং, দিকেদ অনিগী মমাংদা ঐহাক্না অদোমগী মতেং পাংবগী খুদোংচাবা ফংজখি। মতমদুদা, গুজরাত্তা মেদিকেল কোলেজ ৯ খক লৈরম্মি। অসিগুম্বা ৱাফমশিং অসি অদোম্না নীংশিংবরা নত্ত্রগা কাওথোকপরা? মসিদি অনৌবা চারোন শুরোন্দা তাকপীগদবনি। নত্ত্রবদি, করি ফিভমদা লৈরম্বগে মখোয়না করম্না খঙগনি। মেদিকেল কোলেজনা ৯খক অদুগা দাক্তর ওইনীংবনা মীওই কয়া? দাক্তর তম্বা ফংনবা শুপ্নগী সিৎ ১১০০ খক লৈরম্মি। অশুক চাউরবা গুজরাতকী সীত অসি শুপ্নগী ১১০০! ঙসিদি, লন্নাই অমসুং সরকারগী মেদিকেল কোলেজ পুল্লগা ৩০দি গুজরাত্তা লৈরে তাবদা অদোম্না নুংঙাইবা ফাওগনি। মসি খক্তা নত্তে, গুজরাত অমসুং লৈবাক্কী জিলা খুদিংদা মেদিকেল কোলেজ অমমম লৈহনবা হায়বসি ঐহাক্কী অপাম্বনি। মতম অমদা এম.বি.বি.এস. অমসুং পি.জি.গী সীত শুপ্নগী ১১০০ খক লৈরম্বা, অদুগা হৌজিক্না সীত ৮০০০ লৈরে।

ইচল ইনাওশিং, মসিদসু ঐখোয়না থৌনা লৈবা থবক পাংথোকখি। লাইরবা মমা-মপাগী অঙাংনা দাক্তর ওইগনি হায়বগী মঙ মঙই। অদুবু, মখোয়না ইংলিশ মিদিয়ম নত্ত্রগা গুজরাতী মিদিয়মদা মহৈ তম্বরা অমুক্তা হংবীয়ু। হৌজিক্তি, ইংলিশ ওইরো, গুজরাতী মিদিয়ম ওইরো, দাক্তর ওইনা মহৈ তম্বগী থোঙ অনিমক্তা হাংলে। ঐখোয়না কাংলোন শেমদোক্লে, দাক্তর, ইঞ্জিনিয়র ওইনবগীদমক্তা মহৈরোইশিংনা মমালোলদা মহৈ তম্বা হৌজিক য়ারে।

মরুপশিং, দবল ইঞ্জিন সরকারনিনা দবল কান্নবা শোইদনা ফংফম থোকইকো? অদুগা ঐহাক্কী গুজরাতী মরুপশিংনদি খঙফম থোকই, মাম্মগী য়ুমদা চাক চাবা চৎখিবা, অদুগা থোংলিবা মীওইদুনা ইমা ওইরবা, মসিগী ৱাহন্থোক খঙবা তাবনি। দবল ইঞ্জিন সরকারনা গুজরাতপু চাউখৎ-থৌরাংগী অনৌবা থাক অমদা পুখৎনবা থবক তৌরি। চাউখৎপগী মাঙদা লাক্কদবা খুদোংচাদবা খুদিংবু মাঙহনখিবনি। মরম অদুনা গুজরাতনা খোঙজেল থুনা চাউখৎপা ঙম্লিবনি। ইং ২০১৪গী মমাংদা গুজরাত্তা প্রোজেক্ত কয়া লৈরম্মি। মসিগুম্বা প্রোজেক্ত অসি দিল্লীদা হেক য়ৌখিবগা প্রোজেক্ত অদুমকপু উবীদবা সরকার অমা দিল্লীদা পাল্লম্মি। মখোয়না প্রোজেক্তকী মহুত্তা মোদী ওইনা উবনি। মদুদা অদুম মখোয় খঈদৌ শাউগৎপনি। অদুনা খুদক্তা হেক্তা রিজেক্ত নত্ত্রগা কেন্সেল তৌবনি। থবক কয়া অমবু শো লোনশিনবীখি। মখোয়না নর্মদা ইমাবু থিংদুনা ফম্লিবনি। অমুক্তা য়েংবীয়ু। সরদার সরোবর দাম শান্নবগীদমক্তা ঐহাক্না চরা হেনবা তাখিবনি। নিংশিংলিকো? অদুবু চরা হেনবগী মহৈ ফংখি, সরদার সরোবর দাম শাদুনা লোইরে। য়াম্না ফবা স্কিম ওইখ্রে। অদুগা নর্মদা ইমানা কৎচ-কথিয়াৱারগী লমদমদা লাক্তুনা ঐখোয়গী পুন্সিগী মশেক মঙাল থোকহনলি। ঐখোয়গী লমদমদা অসিগুম্বা থবক পাংথোকই। হৌজিক্তি, সরদার সরোবর, সরদার বল্লব ভাই পতেল, মালেমগী খ্বাইদগী চাউবা মীতম, মালেম পুম্বদা সরদার সাহেবকী মমিং ঙাক্তা ঙাইরি। অদুগা মীয়াম্না মসিদা চৎলুবা মতমদা গুজরাত্তা অসুক য়াম্না চাউবা থবকপু অসুক য়াম্না থুনা করম্না পাংথোকপা ঙম্লিবনো হায়না ঙক্নরিবনি। মসিনি, গুজরাতকী মপাঙ্গল, ইচিল ইনাওশিং।

ইনফ্রাস্ত্রকচরনা য়াম্না থুনা চাউখৎলক্লিবা অসিগী কান্নবা গুজরাতনা ফংলি। তোঙান্না তাবা স্পীদ, স্কেলগা লোয়ননা গুজরাত্তা ইনফ্রাস্ত্রকচরগী থবকশিং মখা তানা চত্থরি। মসিনা গুজরাতকী পাকথোক চাউথোক্লিবা পথাপশিংদা য়াম্নাকান্নহনখি। ইন্দস্ত্রী হায়রগদি বদোদরাদগী বাপী ফাওবা খক্তদা মতম অমদা লৈরম্মি। নেস্নেল হাইৱেদা চৎপা মতমদা লম্বী নাকন্দা ইন্দস্ত্রী কয়া লৈবা উবনি। মসি ঐখোয়গী ইন্দস্ত্রী চাউখৎপগী মতৌনি। হৌজিক্তি গুজরাতকী মফম খুদিংদা অপীকপা ইন্দস্ত্রী অমসুং কার্খানা কয়ানা পীক থল্লে। ঐখোয়গী রাজকোতকী ইঞ্জিনিয়রিং ইন্দস্ত্রীনা মফম কয়াদা শাবা অচৌবা গারীশিংগী পার্ত লোইনা শারি। অহমেদবাদ-মুম্বাই বুলেট ত্রেন, হাইস্পীদ ত্রেনগী থবকসু হৌজিক খোঙজেল য়াঙনা পায়খৎলি। ৱেস্তর্ন দেদিকেতেদ কোরিদোরনা মুম্বাইদগী দিল্লী ফাওবা চেল্লি অমসুং মসিদা লোজিস্তিক্সকী থবকসু খোঙজেল য়াঙনা পায়খৎলি। গুজরাতকী হাইৱেশিংনা পাকথোক চাউথোকপা মতমদা কান্নবা য়াম্না ফংগনি অমসুং মসিনা গুয়জরাতকী হিথাংফমগী মপাঙ্গল হেনগৎহনবদা তেংবাংগনি। গুজরাতকী এয়র কন্নেক্তিবিতীনা পাকথোক চাউথোরক্লি। অদুগা ঐহাক্না পীক্লিঙৈদা রো-রো ফেরী সর্বিসকী মরমদা তাবা মতমদা মসি করিনো হংনবা ঐহাক্না নিংশিংলি। ঐহাক্না মুখ্য মন্ত্রী ওইরকপা মতমদসু মসি করিনো হংখিবনি। কদাইদা লৈবগে? অঙাং ওইরিঙৈদগী তাদুনা লাক্লবনি, ঙসিদি মসিনা থবক তৌবা হৌরে। মসিনা সুরত্তগী কথিয়াৱারদা লাকপদা কিলোমিতর ৩০০-৩৫০গী লম্বীদা পুং নিপান চঙবদো হৌজিক্তি য়াম্না তেনবা মতমদা য়ৌবা ঙম্লে।

মতৌ করম্না চাউখৎপা পুরকপগে হায়বা ঐখোয়না ঙসি উরে। এম.এস.এম.ই.না গুজরাতকী খ্বাইদগী চাউবা পাঙ্গল ওইনা থোক্লক্লি। সাউরাস্ত্রা শিনবা থুংবগী মফমদা থুম পুথোকপা নত্তনা অতোপ্পা ইন্দস্ত্রী অমত্তা লৈরমদবগী মতম ঐখোয়না থেংনখ্রে। কথিয়াৱারদা করিসু তৌফম লৈতবনা লমদমসিগী মীয়াম্না লৈবাক্কী তোঙানবা মফমশিংদা চৎনখিদুনা মফম অসি হাঙবা হৌরক্লম্লবনি। ঙসিদি, হিন্দুস্তানগী মীয়াম্না মফমসিদা লাকপা ওইনা পাম্নরে। হিথাংফম মশিং য়াম্না লৈরক্লে, মসিনা গুজরাতকী শক্তাক্তা অহোংবা লাকহল্লি। ঐখোয়গী মোর্বীদগী পুথোকপা তাইলনা মালেমদা অপাম্বা ফাওহল্লি।

ঐখোয়গী জাম্নগরগী ব্রাসকী ইনিদস্ত্রীনা মালেমদা য়ৌবগী চাং হেনগৎলক্লি। ঙসিদি ফার্মাস্যুতিকেল, হিদাক লাংথক্কী কম্পেনী য়াম্না লৈরে। সুরেন্দ্রনগরগী মনাক্তা হিদাক্কী কম্পেনী লাক্নবা হায়দুনা গুজরাত সরকারনা ওফর য়াম্না পীরমবা মতম অমা লৈরম্মি। অদু ফাওবদা কনামত্তা লাকপা নত্তে। ঙসিদি, হিদাক্কী কম্পেনী অচৌবা কয়ানা গুজরাত অমসুং সৌরাস্ত্রগী লমদমদা মরা তাদুনা কন্না চাউখৎলি। গুজরাত্না খোঙজেল য়াঙনা চাউখৎপা হীরম কয়াসু লৈরি।

আরোগ্যগী খুদোংচাবা কয়া হেনগৎলিবা অসিদা ঐহাক্না অসিগুম্বা পাকথোক চাউথোকপগীদমক্তা মীয়াম খুদিংবু থাগৎচরি। পি.এম.জে.এ.ৱাই. য়োজনা, অয়ুশমান য়োজনাগী চাউর-চাউরবা য়োজনা কয়া ঐখোয়গী গুজরাত্তা চলায়রি হায়না ঐখোয়গী ভুপেন্দ্র ভাইনা হায়বীরি। অমেরিকাগী অপুনবা মীশিংদগী হেনবনা কান্নবা ফংবা য়াবা য়োজনা ঐখোয়গী গুজরাত্তা ঙসি চলায়রি। য়ুরোপ লৈবাকশিংগী অপুনবা মীশিংদগীসু হেনবা মীশিংনা কান্নবা ফংবা য়াবা য়োজনা ভারত্তা ঙসি চলায়রি। মীওই করোর ৫০না অয়ুশমান কার্দকী খুত্থাংদগী য়াম্না অরুবা লাইনা ওইরো, মসিগীদমক্তা লুপা লাখ ৫ ফাওবগী শেনফম সরকারনা পুথোক্তুনা লাইয়েংলি।

মরুপশিং, লাইরবা অমসুং লাইরবগী অৱাবা করিনো হায়বা ঐহাক্না লাইরিক্তগী পাদুনা খঙবগী মথৌ তাখিদে, তি.ভি.দা য়েংদুনা খঙবগী মথৌ তাখিদে, ঐহাক্না মসিদি হান্নদগী খঙলবনি। ঐখোয়গী খুন্নাই অসিদা ইমা অমসুং ইচেশিংনা নাবা মতমদা ইমুং ৱাখ্রগনি খন্দুনা লাইয়েংদে, হাইদোক্তে, ইমুংদা অতোপ্পা নারক্লগসু মখোয়গী সেবা ওইনা তৌদুনা লৈ। মখোয়গী অনাবা হেন্দা হেঞ্জিল্লক্লগনা ইশ্বরদা মহাকপু লৌবীরো হায়না থৌনিবনি। মহাক্কী লাইয়েংবদা ইমুংনা শেল পুশিন্দুনা শেল তোলহৌগনি হায়বগী অকীবনা লাইয়েংদনা লৈথোকই।

ঙসিদি, মখোয়গুম্বী ইমাশিংগীদমক্তা দিল্লীদা মচানুপা ফম্লবনি, মখোয়গী অৱাবা হন্থনবা, মখোয়গী ওপরেসনগী তঙাই ফদবা মতমদা ওপরেসন লেপ্তনবা, ঐখোয়না অয়ুশ য়োজনা চলায়রি। অয়ুশমান কার্দ পুদুনা লাকপা অনাবশিংনা হোস্পিতালশিংদা সরকারনা লাইয়েংবগী খুদোংচাবা কয়া ফংলি। মসিনা মরম ওইরগা, মীওই অমত্তনা মশাগী ফুরিৎখাওদগী শেল পুথোকপগী মথৌ তাদ্রে। মিদ্দল ক্লাস ইমুংনা দাইবিতিজ নাবা মীওইগী হিদাক লাংথক লৈবদা থা অমদা লুপা ১২০০-১৫০০দি শোইদনা চঙই। অসুক য়াম্না শেল মখোয়না থা খুদিংগী করম্না পুথোকপা ঙমগনি। মসিগীদমক্তা হিদাক হোংনা ফংহন্নবা হিন্দুস্তানগী কাচিন কোয়া খুদিংদা জন ঔশধী কেন্দ্র হাংলিবনি। থাদা লুপা ২০০০গী হিদাক লৈরম্বা অদু, জন ঔশধী কেন্দ্রশিংদা শুপ্নগী লুপা ১০০দা ফংহল্লি। হিদাক্কী মমলগী মতাংদা কনা অমত্তা মথৱাই নুংঙাইহন্দ্রে।

লু-নানবা, ঈশিং অমসুং অকোয়বগী ফিভম হায়বসি হকশেল ফনা লৈবদা য়াম্না মরু ওইবা হীরমশিংনি। ঐখোয়না মালেমগী য়োগ নুমিৎ পাংথোক্লি। অদোমগী হকশেল ফনা লৈবা, গুজরাতকী অঙাং খুদিংনা হকশেল ফনা লৈবা, গুজরাতকী তুংগী য়ুম্বীরোল তেক্ত কায়দনা লৈবা, ঐহাক্না মসিগীদমক্তা থৌনিজরি। অসিগুম্বা ৱারেপ অসিগা লোয়ননা ঐহাক্না ঙসিগী নুংঙাইরবা থৌরম অসিদা খুন্নাইগী লুচিংবশিংবু থম্মোই শেংনা য়াইফ পাউজেল পীজরি। দোনর, মখোয়গী মমা ওইবীশিংবুসু অসিগুম্বা মচা পোকপগীদমক্তা থাগৎচবগা লোয়ননা য়াইফ পাউজেল পীজরি। মখোয়গী মচাশিংনা খুন্নাইগীদমক্তা চাউরবা থবক কয়া পাংথোক্লি। মখোয় পুম্নমকপু য়াইফ পাউজেল পীজরি, অদোম খুদিংবু খুরুমজরি। অদোম্না ঐহাকপু নুংশিবিরি। মীয়াম মশিং য়াম্না লাক্তুনা য়াইফ পাউজেল পীবিরি, মসিগী পাউজেল অসিনা ঐহাক্কী খ্বাইদগী চাউবা পাঙ্গল ওইরিবনি। মসি ঐহাক্কী লন্নি। ইচে-ইচল লিশিং কয়ানা কথিয়াৱারী চৎনবীগী মখা পোন্না কোকথক্তা কলস হাপ্তুনা নুংশা অসিদা লেপ্তুনা ঐহাকপু য়াইফ পাউজেল পীবিরি। ঐহাক্কী ইমা, ইচে-ইচল, সর্ব সমাজকী ইচলশিংনা মশাগী য়ুমদা থৌদোক অমা থোকপগুম্না ঐহাক্কী ইফমদা থৌজানবীরি। ঐহাক্না অদোম পুম্নমকপু খুরুমজরি। অদোমগী থৌজালনা ঐহাক্না গুজরাত অমসুং লৈবাক্কী সেবা তৌবা ঙম্লিবনি। অদোম্না লেপ্তনা থৌজানবীয়ু। থাগৎচরি।

ভারত ইমানা - য়াইফরে

ভারত ইমানা – য়াইফরে

হন্না-হন্না থাগৎচরি!

***