তেলঙ্গনাগী রাজ্যপাল শ্রীমতি তামিলসাই সৌন্দর্য়রাজন জী, কেন্দ্রগী মন্ত্রী মন্দলগী ঐগী খোঙবু শ্রী কৃষ্ণ রেদ্দী জী, তেলঙ্গনা লৈঙাক্কী মন্ত্রী, ইন্দিয়ন স্কুল ওফ বিজিনেস একজেক্যুতিব বোর্দকী চেয়রমেন, দীন, অতৈ প্রোফেসরশিং, ওজাশিং, মমা মপা অমদি ঐগী নুংশিরবা নহা মরূপশিং!

ঙসি ইন্দিয়ন স্কুল ওফ বিজিনেস চাউথোকচনিংঙাই ওইরবা খোঙচৎ অমগী মরুওইবা পন্দোল অমা লান্থোক্লে‍। ঐখোয় পুম্নমক্না আই.এস.বি.না চহি ২০ মপুং ফারকপগী থৌরম পাঙথোক্লি‍। ঙসি মশিং য়াম্লবা মরূপশিংনা মখোয়গী দিগ্রী ফংলি, সনাগী মেদল ফংলি‍। আই.এস.বি.বু মায় পাকপগী থাক অসিদা য়ৌহল্লকপদা মশিং য়াম্লবা মীওই কয়াগী হোৎনজমল য়াওরি‍। মখোয় পুম্নমকপু ঙসি নৌহৌননা নীংশিংবগা লোয়ননা ময়াম পুম্নমকপু, আই.এস.বি. প্রোফেসরশিং, ফেকল্তী, মহৈরোয় খুদিংমক, মখোয়গী মমা মপাশিং, আই.এস.বি.গী এলুমনাইজশিংগী মফমদা নুংঙাইবা ফোঙদোকচরি‍।

মরূপশিং,

ইং ২০০২দা মফমসিবু অত, জীনা লৈবাক্কী মফমদা কত্থোক্লমবনি‍। মতমদুদগী হৌরগা ঙসি ফাওবদা চাউরাক্না একজেক্যুতিব লিশিং ৫০রোম মফমসিদগী ত্রেন তৌদুনা থোরকখ্রে‍। ঙসি আই.এস.বি. এসিয়াগী মকোক থোংবা বিজিনেস স্কুলশিংগী মরক্তা অমা ওইরে‍। আই.এস.বি.দগী থোরকপা প্রোফেস্নেলশিংনা লৈবাক্কী বিজিনেসতা খোঙজেল হাপ্লি, অচৌ-অচৌবা কম্পনিশিংগী মেনেজমেন্ত য়েংশিল্লি‍। মফমসিগী মহৈরোয়শিংনা মশিং য়াম্লবা স্তার্তঅপশিং লিংখৎখ্রে, মশিং য়াম্লবা য়ুনিকোর্নশিং লিংখৎপদা মখোয়গী থৌদাং য়াওরি‍। মসি আই.এস.বি.গী কান্নবখক নত্তনা লৈবাক পুমবগী চাউথোকচনিংঙাইগী ৱাফম অমনি‍।

মরূপশিং,

ঐনা তাবদা ঙসিগী থৌরম অসি হায়দরবাদ অমসুং মোহালি কেম্পসশিংগী অপুনবা গ্রেজুএসন থৌরম্নি হায়না তায়‍। ঙসি পাস তৌদুনা থোকখিগদৌরিবা মহৈরোয়শিংগী মফমদা মরুওইবা তাঙ্কক অমা ওইরিবগী মরমদি লৈবাকসিনা নীংতমবগী চহি ৭৫শুবা কুমওন পাঙথোক্লি, অমৃৎ মহোৎসব পাঙথোক্লি‍। ঐখোয়না হৌখিবা চহি ৭৫গী ফীভমশিং য়েংলি অমদি লাক্কদৌরিবা চহি ২৫গী পান্দমশিংগী লম্বী পরিংসু য়াৎলি‍। নীংতমবগী অমৃৎ মতমসিদা লাক্কদৌরিবা চহি ২৫গী পান্দম থম্লিবা অসি ফংবদা অদোম পুম্নমক্কী মরুওইবা থৌদাং লৈ‍। অদুগা ঙসি ভারতকী লৈরিবা মঙলান, মীয়ামগী মশাবু থাজবা, অনৌবা ভারত অমা শেম্নবগী মতিংশিং অসিনা অদোমগীদমক্তসু মশিং য়াম্লবা থোঙ কয়া হাংলগনি‍। অদোমসু য়েংবিয়ু, ঙসি ভারতনা জি২০ লৈবাকশিংগী মনুংদা খ্বাইদগী খোঙজেল য়াঙনা চেনখৎলক্লিবা শেন্মিৎলোন অমা ওইরি‍। স্মার্তফোন দেতা শীজিন্নবগী মতমঙদা ভারতনা মকোক্তা লৈরি‍। ইন্তর্নেৎ শীজিন্নবা মশিংদা ভারতনা অনিসুবদা লৈ‍। গ্লোবেল রিতেল ইন্দেক্সতা ভারতনা অনিসুবদা লৈ‍। মালেমগী অহুমসুব খ্বাসদগী চাউবা স্তার্তঅপ ইকোসিস্তেম ভারত্তা লৈ‍। মালেমগী অহুমসুব খ্বাইদগী চাউবা কঞ্জ্যুমর কৈথেল ভারত্তা লৈ‍। অসিগুম্বা ৱাফম কয়া অমা ঐনা অদোমগী মাঙদা পুথোকপা ঙম্মি, খুৎ থেক্তুনা পাবা ঙম্মি‍। কোরোনাগুম্বা মালেমগী লাইচৎ মরক্তা ঐখোয় পুম্নমক্না অমদি মালেমসিনা ভারতকী নীংহন্নবা লৈতবা থৌনা উখ্রে‍। চহিচাসিগী খ্বাইদগী চাউবা লাংফম মতমসিদা মালেমগী সপ্লাই চেন্দা চাউনা অকায়বা পীখি‍। অদুগা লালনসু লাংফম অসিবু হেন্না শাথৎহনখি‍। ময়ামসিগী মরক্তা ভারতনা ঙসি চাওখৎপগী অচৌবা মফম অমগী শক্লোন্দা লিৎখৎলক্লি‍। মমাঙ চহিদা ভারত্তা হৌজিক ফাওবগী ওইনা খ্বাইদগী য়াম্না, রেকোর্দ ওইনা এফ.দি.আই. লাকখি‍। ঙসিদি মালেমসিনা ভারতপু বিজিনেস ওইনা উনরক্লি, অমদি মসি লৈঙাকখক্তনা হোৎনবনা ওইরকপা নত্তে‍। মসিদা আই.এস.বি.গুম্বা বিজিনেস স্কুলশিংগী, মফমসিদগী থোকখিবা প্রোফেস্নেলশিংগী, লৈবাকসিগী নহারোলশিংগী অচৌবা থৌদাং য়াওরি‍। স্তার্তঅপ ওইরবসু, নৎত্রগা ত্রেদিস্নেল বিজিনেস ওইরবসু, মেনুফেকচরিংগী ওইরবসু নৎত্রগা সর্ভিস সেক্তরদা ওইরবসু ঐখোয়না নহাশিংনা মালেমসিবু লমজিংদুনা চৎপা ঙম্মি হায়বা উৎলি‍। ঐনা হায়রিবসি চুমবরা, অদোম ইশানা ইশাবু থাজবা ঙমবরা ঙমদবরা‍। ঐদি ইশানা ইশাবু থাজৈ‍। অদোমদি থাজবিবরা?

মরূপশিং

মরম অসিনা ঙসি ভারতপু, ভারতকী নহারোলশিংবু, অমদি ভারতকী পোত্থোকশিংবু অনৌবা ইকায়খুম্নবা অমদি অনৌবা থাজবা অমগা লোয়ননা য়েংনরিবনি‍।

মরূপশিং,

ঙসি দিমোক্রেতিক ওইবা মওংদা থাক অসি য়ৌনা থবক কয়া তৌবা ঙম্লিবা ফীভম অসিগুম্না, মফমসিদা চৎন-পথাপ নৎত্রগা ফিরেপ অমা লৌবা ঙম্লিবসিনা মালেম পুমবনা তমজনফম ওইহল্লি‍। মরম অসিনা ঐখোয়না তত্তনা ভারতকী সোলুসনশিংগী মালেমগী ওইনা চৎনবা হেক হেক উরিবনি‍। মরম অসিনা ঙসিগী মরুওইরবা নুমিৎসিদা ঐনা ময়ামগী মফমদা হায়জনিংবদি অদোমগী লনাইগী পান্দমশিংবু লৈবাক্কী পান্দমশিংগা মরী শমজিন্নবিয়ু হায়বসিনি‍। অদোম্না তম্লিবা, অদোমদা ফাওরিবা, অদোম্না য়াৎলিবা থৌরাংশিংদুদা লৈবাক্কী য়াইফনবা ৱাফম কমদৌনা হাপচিনগনি হায়বসিদা মতম পুম্নমক্তা ৱাখল খনবিয়ু, শোয়দনমক্কী খনবিয়ু‍। ঙসি লৈবাকসিদা ইজ ওফ দুইং বিজিনেসকী ওইরবসু, অরিবা চৎন-কাঙলোন অমসুং কমপ্লাইএন্স লিশিং ২ মখায় হেনববু মুত্থৎপগী থবক ওইরবসু তেক্সকী য়াম্লবা চৎন-কাঙলোনশিং মুত্থত্তুনা জি.এস.তি.গুম্বা মনুং মপান ফাওনা উবা ঙম্বা ফীভম পুরকপা ওইরবসু, ওন্ত্রপ্রিন্যুর অমসুং ইনোভেসন্দা পুক্নিং থৌগৎপা ওইরবসু, অনৌবা স্তার্তঅপ পোলিসী ওইরবসু, দ্রোন পোলিসী ওইরবসু, অনৌবা স্তার্তঅপ কয়া লিংখৎলকপা ওইরবসু, ২১শুবা চহিচাগী মথৌ তাবশিং ফংহনগদবা নেস্নেল এজুকেসন পোলিসী চৎনহনবা ওইরবসু, লাক্লিবা অওনবা খুদিংমক অদোমগুম্বা নহাশিংগীদমক্তনি‍। অদোমগুমবা নহাশিংদগী লাক্কদৌরিবা সোলুসনশিংবু থবক ওইনা পায়খৎনবগীদমক, অদোমগী ৱাখল্লোনশিংবু লৈবাক্কী থৌনা ওইহন্নবগীদমক ঐখোয়গী লৈঙাক্না মতম পুম্নমক্না নহারোলশিংগীদমক্তা লেপকনি‍।

মরূপশিং,

ৱাফম অমা ঐনা হঞ্জিন হঞ্জিন হায়বা, রিফোর্ম, পর্ফোর্ম, ত্রান্সফোর্মগী ৱাফম ঐনা হেক হেক হায়বা অদোমসু তাবিরম্লগনি‍। হায়রিবা লাইৱা অসিনা ঙসি লৈবাসিগী লৈঙাক্লোন অসিবু মশক তাক্লিবনি‍। ৱাফমসি অদোমগুমবা মেনেজমেন্ত মহৈরোয়শিং, প্রোফেস্নেলশিংগীদমক্তা য়াম্না মরুওইবনি‍। ৱাফমশিং অসি ঐনা অদোমগী মফমদা হায়রিবগী মরমদি অদোম্না মফমসিদগী থোকখ্রগা য়াম্লবা খুজিল থৌরাংগী ফিরেপ লৌরুগদৌরিবনি‍। দ্রোইংবোর্দ খক্তদা ফজবা, চেখক্তদা ফজবা অদুগা থবক ওইনা পায়খৎপদা মহৈ অমত্তা ফংবা ঙমদ্রবদি অদুগুম্বা থৌরাং অদুগী কান্নবা লৈতে‍। মরম অসিনা থৌরাং য়াৎপগী মীৎয়েঙ অসি থবক ওইনা পায়খৎপা অমদি মদুনা পীগদৌরিবা মহৈদুদা য়ুম্ফম ওইগদবনি‍। রিফোর্ম, পর্ফোর্ম, ত্রান্সফোর্মগী লাইৱাসিনি কমদৌনা খুজিল থৌরাংশিংবু, লৈঙাক্লোনবু নৌনা শক্তাক্লিবগে হায়বসি অদোমগুম্বা নহাশিংনা খঙজিনহন্নিংই‍।

মরূপশিং,

হৌখিবা চহি ৮গা মদুগী মমাঙগী চহি ৩০রোমগী মতমগা অদোম্না চাংদম্নদুনা য়েংলবদি ৱাফম অমা শোয়দনা চোংথোরক্কনি‍। ঐখোয়গী লৈবাকসিদা অওনবা পুরকপগী তঙাইফদবদুদি মতম পুম্নমক্তা ফাওদুনা লাকখি, অদুবু লৈঙাক্লোনগী মতিং মতম পুম্নমক্তা ৱাত্তুনা লাকখি‍। হৌখিবা চহি ৩০রোমসিদা লৈঙাক্লোনগী তংদু লৈতদবা ফীভম লৈখিবনা মরম ওইরগা মতম শাংনা লৈঙাক্লোনগী মতিং ফুদোকপা ঙমদনা লাকখিবনি‍। মরম অসিনা লৈবাকসিনা অওনবা পুরকপা, অচৌবা ফিরেপ লৌবা ঙমদনা লাকখিবনি‍। ২০১৪গী মতুংদা লৈবাকসিগী লৈঙাক্লোনগী মতিংসু ফুদোকপা ঙম্লে অমদি লেপ্পা লৈতনা অওনবা কয়াসু পুরক্লি‍। করিগুম্বা পুকচেল শেংনা, তিং ফুদোক্তুনা অওনবা পুরকপগী খোঙথাঙ মাঙলোমদা থাংজিল্লবদি মীয়াম্নসু মথন্তা শৌগৎলকই হায়বা ঐখোয়না উৎলে‍। ফিনতেক্কী খুদম ঐখোয়গী মাঙদা তাদুনা লৈরে‍। মতম অমদা বেঙ্কিংবু প্রিভিলেজ অমা ওইনা লৌনরমবা লৈবাক অসিদা ফিনতেকনা মীচম মীয়ামগী পুন্সিদা অহোংবা পুরক্লি‍। বেঙ্কশিংগী মরমদা মীয়ামদা থাজবা পোকহন্নবা য়াম্না ৱানা হোৎনরমবা মফমসিদা ঙসিদি মালেমগী অপুনবা দিজিতেল ত্রাঞ্জেক্সনগী চাদা ৪০ ভারত মচাশিংনা তৌরি‍। ঐখোয়গী হকশেলগী সেক্তরসু অচৌবা শিংনবা অমত্তা মায়োক্নবা ঙম্লোই হায়না লৌনরম্লিবনি‍। অদুবু হেল্থ সেক্তরদা অওনবা পুরক্নবগীদমক তিং থোক্না হোৎনখিবগী মহৈ ঙসি চহিচা অসিগী খ্বাইদগী চাউবা লাইচৎ মতমসিদা উবা ফংখ্রে‍।‍ কোরোনানা থোঙজিন্দা লেপ্লরবা মতমদা মফমসিদা পি.পি.ই. কিত্স পুথোকপা অমত্তা লৈতবগুম্বনি, কোরোনাগীদমক্তা মথৌ তাবা ইনফ্রাস্ত্রকচরসু লৈরমদে‍। অদুবু উনা উনা পি.পি.ই. মেনুফেকচরর ১১০০ হেনবগী নেৎৱর্ক ভারত্তা শেমগৎলকখি‍। কোরোনা চাংয়েং তৌনবগীদমক্তসু হৌরকবা মতমদা লেব্স দজন খরখক্তা লৈরম্মি‍। তেনখ্রবা মতমদা লৈবাকসিদা তেস্ত লেব্স লিশিং অমা মখায় হেনবগী নেৎৱর্ক শেমগৎখি‍। কোবিদ ভেক্সিনগী মতাঙদদি মপান লৈবাকশিংদগী ভেক্সিন লৈবাকসিদা ফংগদ্রা ফংলোইদ্রা হায়না নুংনাংবা পোক্নরম্মি‍। অদুবু ঐখোয়না ইশাগী ভেক্সিন পুথোকখি‍। ভেক্সিন কয়ামুক য়াম্না শাবগে হায়ববু লৈবাকসিদা ভেক্সিন দোজ করোর ১৯০ হেন্না কাপথোকখ্রবনি‍। ভারতনা মালেমগী লৈবাক ১০০ হেনবদসু ভেক্সিন ফংহনখি‍। মতৌ অসুম্না মেদিকেল এজুকেসন্দসু ঐখোয়না অওনবা কয়া মথং মথং পুরকখি‍। লৈবাকসিগী মেদিকেলগী গ্রেজুএৎ অমসুং পোস্ত গ্রেজুএৎকী সীত মশিং লিশিং ৯০দগী লাখ অমা মখায় হেল্লে‍।

মরূপশিং,

হৌখিবা চহি নিপানসিদা লৈবাকসিনা মাগী মতিং ফুদোক্লি, মদুগী মহৈনা অচৌবা অহোংবা অমসু লাক্লে‍। হৌজিক ব্যুরোক্রেসীসু লৈজবা পাঙ্গল ফুদোক্তুনা অওনবা পুরক্নবা হোৎনরি‍। সিস্তেমদি হান্নগীদুনি অদুবু হৌজিক মহৈদি অপামবদু ফংলে‍। অদুগা হায়রিবা চহি নিপানসিদা পুক্নিং খ্বাইদগী থৌগৎখিবদি মীয়াম্না শরুক য়াশিল্লকবসিনি‍। লৈবাকসিগী মীয়াম্না চোংথোরক্তুনা অওনবা পুরকপদা খোঙজেল হাপ্লি‍। হায়রিবা অসি ঐখোয়না স্বচ্চ ভারত অভিয়ান্দা উরি‍। অদুগা হৌজিক ভোকেল ফোর লোকেল অমসুং আত্মনিরভর ভারত অভিয়ান্দসু ঐখোয়না মীয়াম্না শরুক য়ারকপগী থৌনা উবা ফংলি‍। মীয়াম্না মতেং পাংলক্লবদা মদুগী মহৈ শোয়দনা ফংই‍। হায়বদি লৈঙাক্কী ফীভমদা লৈঙাক্না অওনবা পুরক্লি, ব্যুরোক্রেসীনা মথৌ তৌরি অদুগা মীয়ামগী মতেংগা লোয়ননা অহোংবা পুরক্লি‍।

মরূপশিং,

রিফোর্ম, পর্ফোর্ম, ত্রান্সফোর্মগী দাইনামিক্স অসি অদোমগীদমক্তা অচৌবা কেস স্তদী অমনি, অদোমগী থিজিন্নবগী হীরম অমনি‍। আই.এস.বি.গুম্বা অচৌবা লুপশিংনা পুক্নিং লুপশিন্দুনা, নৈনদুনা মালেমগী মাঙদা পুথোকফম থোকই‍। মফমসিদগী মহৈ তমদুনা থোকখিবা নহাশিংনা রিফোর্মো পরফোর্ম, ত্রান্সফোর্মগী লাইৱা অসিবু হীরম খুদিংদা শীজিন্ননবা হোৎনফম থোকই‍।

মরূপশিং,

লৈবাকসিগী শান্ন-খোৎনবগী ইকোসিস্তেমদা লাক্লিবা অহোংবা অসিগী মায়কৈদা অদোমগী পুক্নিং চিংশিনবা পাম্মি‍। করি মরম লৈবগীনো ২০১৪গী মতুংদা শান্ন-খোৎনবগী ফম্পাক খুদিংদা শিংথানিংঙাই ওইরবা খুৎশান্না উবা ফংলিবসি? মসিগী খ্বাইদগী চাউবা মরমদি ঐখোয়গী শান্নরোইশিংনা মশানা মশাবু থাজবদুনি‍। নীংথিনা হৈশিংবশিংবু থিরগা মখোয়দা খুৎশম্নদুনা লমজিংববদা, মনুং মপান ফাওনা উবা ঙমবা সেলেক্সন লৈরবা মতমদা, ত্রেনিংগী, হিদান্নবগী হেন্না ফবা ইনফ্রাস্ত্রকচর লৈরবা মতমদা মশানা মশাবু থাজবা ঙম্লকই‍। খেলো ইন্দিয়াদগী হৌরগা ওলিম্পিক্স পোদিয়ম স্কিম ফাওবদা অসিগুম্বা য়াম্লবা অওনবা পুরক্তুনা ঙসি শান্ন-খোৎনবগী লমদা অহোংবা পুরক্লবা মতমদা ঐখোয়গী মীৎমাঙদা উরি, পুক্নিংদা ফাওরি‍।

মরূপশিং,

মেনেজমেন্তকী লমদা পর্ফোর্মেন্স, ভেল্যু এদিসন, প্রদক্তিভিতী অমসুং মোতিভেসনগী ৱা কয়া ঙাঙনরি‍। করিগুম্বা অদোম্না মীয়ামগী খুজিন থৌরাংদা ফজরবা খুদম অমা উবা পাম্লবদি এস্পিরেস্নেল দিস্ত্রিক্ত প্রোগ্রামবু অদোম্না শোয়দনা থিজিনফম থোকই‍। লৈবাকসিদা চাওখৎ লমজেলদা য়াম্না শোত্থনা লৈবা দিস্ত্রিক্ত ১০০ হেন্না লৈ‍। লৈবাকসিগী স্তেত খুদিংদা য়ামদ্রবদা এস্পিরেস্নেল দিস্ত্রিক্ত অমা অনিদি অদুমক লৈরি‍। চাওখৎপগা মরী লৈনবা পেরামিতর খুদিংদা হায়রিবা দিস্ত্রিক্তশিং অসি য়াম্না শোত্থনা লৈরম্মি‍। মসিগী শাফু লৈবাকসিগী অপুনবা পর্ফোর্মেন্সদা, রেতিংদা, অপুনবা থৌওংদা নেগেতিব ওইবা শাফু অমা পীরি‍। মসি খঙনা খঙনা করিসু তৌরমদে, অওনবা পুরকপা উদে, ফীভম শোত্থনা লৈরি অমদি লৈঙাকশিংনা করি তৌরি‍। মখোয়বু শোত্থরবনি হায়না লাথোকখি‍। মখোয়দি শোত্থহৌরবা দিস্ত্রিক্তশিংনি হায়বা ৱাখল্লোন অসি অসুম চেলহন্দুনা লৈরবদি পুক্নিং অদুমক হন্থদুনা লৈবা তাবনি‍, অওনবা অমত্তা পুরকপা ঙম্লরোই‍। লৈঙাক্কী সিস্তেমদা খ্বাইদগী প্রদক্তিব ওইদে, পাঙদবনি হায়না লৌরিবা ওফিসরশিংবু হায়রিবা দিস্ত্রিক্তশিং অসিদা থবক পুহন্দুনা নঙগী মরাইবক্তা তম্লমবা মফমদুদা চৎলু হায়না হায়রম্মি‍।

অদুবু মরূপশিংও

ঐখোয়না পরিং হোংদোকখি‍। হান্না শোত্থহৌরবা দিস্ত্রিক্তনি হায়নরমবশিং অদুবু ঐখোয়না এস্পিরেস্নেল দিস্ত্রিক্ত হায়না লাউথোক্তুনা হায়রিবা দিস্ত্রিক্তশিং অসিদা চাওখৎপগী ইহুল পোকহন্নবা, খৌরাংবা অমা পোকহন্নবা ফিরেপ লৌখি‍। লৈবাকসিগী মতিং লৈবা, নহা ওইরিবা থৌমীশিংবু পুক্নিং থৌগত্তুনা হায়রিবা দিস্ত্রিক্তশিং অসিদা থারি‍। হায়রিবা দিস্ত্রিক্তশিং অসিদা পায়খৎলিবা থবক থৌরম খুদিংমকপু অখন্ননা য়েংশিনহল্লি, দেসবোর্দতা রিএল তাইম ওইনা য়েংশিন্নবা ফীভম শেম্লি‍। অৱাৎপা লৈরকপা মফমশিংদা হায়রিবশিং অদু কোকহন্নবা হোৎনরি‍। অদুগা মরূপশিং, হায়রিবা দিস্ত্রিক্তশিং অসিগী মরক্তগী ময়াম অমদি হান্না চাওখৎলবনি হায়না লৌনরমবা দিস্ত্রিক্তশিংদগী হেন্না নীংথিনা পর্ফোর্ম তৌরকপা উবা ফংলি হায়বসি খঙবদা অদোম শোয়দনা নুংঙাইগনি‍। মতম অমদা শোত্থহৌরবা দিস্ত্রিক্তনি হায়নরমবদু লৈবাক্কী চাওখৎপগী পেরামিতরশিংদা চিংথরবদশিংদুনা ঙসি এস্পিরেস্নেল দিস্ত্রিক্ত ওইরক্তুনা লৈবাক্কী চাওখৎ লমজেলদা খোঙজেল হাপ্লরি‍। হৌজিক ঐখোয়না স্তেতশিংদা হায়রিবা পরিং অসিবু হেন্না খোঙজেল য়াঙ্খৎহন্নবা পাউতাক পীরি‍। দিস্ত্রিক্ত খুদিংদা চাওখৎপগী লমদা শোত্থহৌরবা ব্লোকশিং অদুমক লৈ‍। অসিগুম্বা ব্লোকশিংবু মশক খঙদোক্তুনা এস্পিরেস্নেল ব্লোক অভিয়ানবু থবক ওইনা পায়খৎলি‍। লৈবাকসিদা লাক্লিবা অওনবা, মসিগী ঈ-পাউশিং অদোমগী খুজিল থৌরাং য়াৎপগী ফিরেপ লৌবদা, মেনেজমেন্ততা চাউনা মতেং ওইগনি‍।

মরূপশিং,

ঙসি লৈবাকসিদা বিজিনেসকী মাইওন হোংলক্লিবা অমদি বিজিনেসকী পাক চাউবসু হেনগৎলক্লিবা অসিনা মরম ওইরগা অদোম্না ৱাফম অসিবু খঙজিনবা মথৌ তাই‍। ঙসি ভারতকী শেন্মিৎলোনগী শক্লোন, স্মোল, মেদিয়ম, কোত্তেজ অমসুং ইনফোর্মেল এন্তরপ্রাইজ ফাওবদা শন্দোরক্লি‍। হায়রিবা বিজিনেসশিং অসিনা মীওই লাখ কয়াদা থবক পীরি‍। মখোয়গী মতিং য়াম্না লৈ, মখোয়দা মাঙদা চঙশিন্নবা ফিরেপ ৱাংনা লৈ‍। মরম অসিনা লৈবাকসিগী শেন্মিৎলোনলগী চাউখৎ লমজেলগী অনৌবা পন্দুপ অমা হাংদোরক্লিবা মতমসিদা ঐখোয়না ৱাফম অমসি নীংশিংবা তাই‍। ঐখোয়না অপীকপা বিজিনেসশিংদসু চপ মান্ননা মীৎয়েং চঙবা মথৌ তাই‍। মখোয়দা অচৌবা ফম্বাক পীবা তাই, চাউখৎলক্নবগী হেন্না ফবা খুদোংচাবা পীবা তাই‍। ঐখোয়না মখোয়বু লৈবাকসিগী অমদি মপান লৈবাকশিংগী অনৌবা কৈথেলশিংগা মরী শাগৎনবা হোৎনবা তাই‍। ঐখোয়না মখোয়বু তেক্নোলোজীগা হেক য়ারিবমখৈ পুনশিন্নবা মথৌ তাই‍। হায়রিবা ৱাফম অসিদা আই.এস.বি.গুম্বা লুপশিংগী, আই.এস.বি.গী মহৈরোয়শিংগী থৌদাং য়াম্না মরু ওই‍। তুংগী বিজিনেস লুচিংবা অমগী শক্লোন্দা ময়াম পুম্নমক্না বিজিনেস পুম্নমকপু হেন্না পাকথোক চাউথোকহন্নবা মাঙদা থোরক্তুনা থৌদাং য়াবা মথৌ তাই‍। অদোম্না অপীকপা বিজিনেসশিংবু চাওথোকহনবদা মতেং পাংলবদি, অদোম্না ওন্ত্রপ্রিন্যুর লাখ কয়া পুথোকপদা মতেং পাংলবদি, ইমুং করোর কয়াগী মতেং পাংগদৌরিবনি হায়বসিসু অদোম্না য়েংবা তাই‍। ভারতপু ফ্যুচর রেদী ওইহন্নবগীদমক ভারতপু মরোমদোম লেপচবা ঙমহন্নবা ফিরেপ ঐখোয়না লৌবা তাই‍। মসিদসু অদোমগুমবা বিজিনেস প্রোফেস্নেলশিংগী চাউরবা থৌদাং লৈ‍। অমদি মসিমক অদোমগী ওইনদি মওং অমদা লৈবাক্কী থৌগলগী অথোইবা থৌওং অমা ওইগদৌরিবনি‍।

মরূপশিং,

লৈবাক্কীদমক করিগুম্বা খরা তৌরম্নবা অদোমগী ৱাখল্লোন্দুনা লৈবাক অসিবু চাওখৎপগী অনৌবা থাক অমদা পুখৎকদৌরিবনি‍। ঐনা আই.এস.বি.দা, আই.এস.বি.গী মহৈরোয়শিংদা, নহারোলশিংদা চাউনা থাজবা থম্লি‍। অদোম্না পান্দম অমগা লোয়ননা হৌজিক লৈরিবা ফীভমসিদগী মপান্দা থোকপিরকউ‍। অদোমগী পান্দমবু লৈবাক্কী পান্দমগা মরী শমজিন্নবিয়ু‍। ঐখোয়না করিগুম্বা খরা তৌবা মতমদা লৈবাকসিগী মপাঙ্গল কলহন্নবা হোৎনগনি হায়বা ফিরেপ অসিগা লোয়ননা অদোম্না করিগুম্বা খরা হোৎনরকপা মতমদা অদোম শোয়দনা মায় পাক্কনি‍। অমুক্কা হন্না, ঐনা মেদল খুদোল তমজনবা তাঞ্জা ফংলিবা মরূপশিং অমদি মখোয়গী পান্দম ফংলবা মীওইশিংবু অমদি মখোয়গী ইমুং মনুংশিংগী মফমদা য়াইফ পাউজেল পীজরি‍। অদুগা আই.এস.বি.না ভারতকী চাওখৎ লমজেলগী খোঙফম শেমখিগনি, অসিগুম্বা মীরোলশিংনা লৈবাক্কীদমক কত্থোকপগী ৱাখল্লোন্দা থবক পায়খৎলক্কনি হায়বগী থাজবা অসি থমজবগা লোয়ননা অদোমবু হন্না হন্না থাগৎচরি‍!

***