ভারতনা আই.পি. ইন্নোবেসন ইকোসিস্তেমগী হীরমদা অতোপ্পা মাইলস্তন অমগা ফংবা ঙমখ্রে, অমরোমদা হৌখিবা চহি ১১ অসিদা অহানবা ওইনা জেনুৱারী-মার্চ ২০২২গী ক্বাতরদা ইন্দিয়ন পেতেন্ত ওফিসতা দোমেস্তিক্কী পেতেন্ত ফাইলিং তৌরকপগী মশিংদগী ইন্তর্নেস্নেল পেতেন্ত ফাইলিং তৌরকপগী মশিংনা হেনখ্রে হায়বদি ফাইল তৌরকখিবা অপুনবা পেতেন্ত এপ্লিকেসন ১৯৭৯৬কী মনুংদা ১০৭০৬তি ইন্দিয়ন এপ্লিকেন্তশিংনা ফাইল তৌরকপা ওইখি অমদি ৯০৯০না নন-ইন্দিয়ন এপ্লিকেন্তশিং ওইখি। মসি মখাদা পীরিবা অসিদা তাক্লি:

গ্রাফ: ইন্দিয়ন এপ্লিকেন্ত অমদি নন-ইন্দিয়ন এপ্লিকেন্তনা ফাইল তৌরকখিবা ক্বাতর-ক্বাতরগী ওইবা পেতেন্ত এপ্লিকেসনশিং

কম্মর্স এন্দ ইন্দস্ত্রী, কঞ্জুমর এফিয়র্স, পব্লিক দিস্ত্রিব্যুসন অমসুং তেক্সতাইল্সকী কেন্দ্র মন্ত্রী, শ্রী পিয়ুশ গোয়লনা ইন্নোবেসন য়োকখৎতুনা, অমসুং কমপ্লাইএন্সগী পোৎলুম হন্থহন্দুনা ভারত্তা আই.পি.আর. রেজিম মপাঙ্গল কনখৎহন্নবা দি.পি.আই.আই.তি.না লৌখৎখিবা লেপ্পা নাইদবা খোঙথাংশিং অসিবু থাগৎপা ফোঙদোকখি। দি.পি.আই.আই.তি অমসুং আই.পি. ওফিসকী অপুনবা খোঙথাং অসিনা খুন্নাইগী শরুক পুম্নমক্তা আই.পি. এৱের্নেস পীবদা হেনগৎহনবা ঙমখি। খোঙথাংশিং অসিনা নাকল অমরোমদা আই.পি.আর. ফাইলিং তৌরকপগী মশিং হেনগৎহনখি, নাকল অমদনা আই.পি. ওফিসশিংদা পেতেন্ত এপ্লিকেসন পন্দুনা লৈবা হন্থহনখি। মহাক্না মসিনা ভারতপু গ্লোবেল ইন্নোবেসন ইন্দেক্সকী মকোক থংবা লৈবাক ২৫গী মনুংদা য়াওনবা ভারতকী অচৌবা পান্দম অদুদা খোঙথাং অমা নকশিলহল্লগনি হায়নসু ফোঙদোকখি।

হৌখিবা চহি খরা অসিদা ভারতী আই.পি. রেজিম চাউখৎহন্নবা সরকারনা লৌখৎখিবা মরু ওইবা থৌশিল খরগী মনুংদা ওনলাইন ফাইলিংদা ১০%গী ফী কনসেসনশিং পীবা, স্তার্ত-অপশিং, অপীকপা এন্তিতীশিং অমসুং এজুকেস্নেল ইন্সতিত্যুসনশিংগীদমক ৮০%গী ফী কনসেসন অমসুং অতোপ্পা কেতগোরীশিংগা লোয়ননা স্তার্তঅপশিং অমসুং এম.এস.এম.ই.শিংগী একজামিনেসন খোঙজেল য়াংখৎহন্নবা প্রোবিজনশিং য়াওখি। নেস্নেল আই.পি.আর. পোলিসীনা থোনখিবা য়ুম্ফম অমসুং সরকারনা পাইখৎখিবা খোঙথাংশিং অসিনা ভারতকীদমক মখাদা পীরিবা মাইপাকপশিং অসি ফংবা ঙমহনখি:

• ২০১৪-১৫দা ফাইল তৌরকখিবা পেতেন্তশিং অসি ৪২৭৬৩ ওইরম্বগদগী ২০২১-২২দা চহি ৭কী মতম অসিদা ৬৬৪৪০ ওইদুনা ৫০% হেনগৎলকখি।
• ২০১৪-১৫গা (৫৯৭৮) চাংদম্নবা মতমদা ২০২১-২২দা (৩০,০৭৪) পেতেন্তশিং পীখিবা অসিদা শরুক মঙাগী ময়াদা হেনগৎলকখি।
• ২০১৬গী দিসেম্বরদা থা ৭২ ওইরম্বদগী পেতেন্ত একজামিনেসনগী মতম অসি তোঙান-তোঙানবা তেক্নোলোজিকেলগী লমশিংগীদমক হৌজিক থা ৫-২৩দা হন্থখ্রে।
• ভারতকী গ্লোবেল ইন্নোবেসন ইন্দেক্সতা লৈরিবা রেঙ্কিং অসি ২০১৫-১৬দা ৮১শুবদা লৈরম্বদগী ২০২১দা ৪৬শুবদা (রেঙ্ক +৩৫) হাইগৎলকখি।

গ্রাফ: চহি খরা অসিদা পেতেন্ত এপ্লাইকেসন ফাইল তৌরকপা অমসুং পীথখিবা

*******