|
রাস্ত্রপতিগী লোইশঙ
গনতন্ত্রা দিবস নুমিৎ ২০২২গা মাংওইননা ইকায় খুম্ননীংঙাই ওইরবা ভারতকী রাস্ত্রপতি শ্রী রাম নাথ কোবিন্দনা লৈবাক মীয়ামদা থম্বা ৱারোল
Posted On:
25 JAN 2022 7:45PM by PIB Imphal
নুংশিরবা লৈবাক মীয়াম,
খুরুমজরি!
- ঐহাক্না ৭৩শুবা গনতন্ত্রা দিবস নুমিৎকা মাংওইননা মীয়াম খুদিংদা থম্মোই শেংবা য়াইফ পাউজেল পীজরি। থৌরম অসিদি ঐখোয় খুদিংদা অমত্তা ওইনা চেনবা, ভারত মচা ওইবগী মতৌগী হরাওবা ফোংদোকপা নুমিৎনি। মসিগুম্বা শেংলবা ইথিলনা মীয়াম্না য়ানবা মওং অমা ফংখিবসি ইং ১৯৫০গী ঙসিগী নুমিৎ অসিদনি। নুমিত্তুদা, ভারতপু গনতন্ত্রা চৎপা খ্বাইদগী চাউবা লৈবাক ওইনা শেমখি অমসুং “ঐখোয় মীয়াম” হায়বা ৱাহৈসিনা ঐখোয় পুনবগী মিৎয়েংনা ইথিল পীবা ইথোক্লবা মওং ওইরিবা ঐখোয়গী সংবিধানবু ওইহনখি। ঐখোয়গী গনতন্ত্রগী দাইভর্সিতী অমসুং মতি লৈববু মালেম পুম্বনা শিংথানরি। গনতন্ত্রা দিবস নুমিৎ হায়না চহি খুদিংগী হরাওবা ফোংদোক্লিবা অসি ঐখোয়গী অমত্তা ওইবা অমসুং লৈবাক অমা ওইবগী ইথিল অসিবুনি। হন্দক্কী চহিগী হরাওবা ফোংদোকপা অসি কোবিদ লাইচৎ লৈবনা থোইদোক্না চাউনা পাংথোক্তবদি য়াই, অদুবু মসিগী ইথিল অসিবুদি নম্থবা ঙম্লোই।
- ঙসিগী থৌরম অসিদা, স্বরাজ অমগী মঙলানগীদমক্তা মশক থোকপা মথৌনা উৎখিবা অমসুং মীয়ামদা নীংতম্বগীদমক্তা লান্থেংননবা ইথিল পীখিবা শক্নাইরবা নীংতম লান্মীশিংবু ঐখোয়না অমুক্কা হন্না নীংশিংসি। নুমিৎ নিনিগী মমাং, জনুৱারী ২৩দা, নুংগী পাঙ্গল হাপ্পা ‘জয় হিন্দ’গী খোল্লাও শিজিন্নখিবা নেতাজী সুভাস চন্দ্র বোসকী চাম্মগা কুন মঙাশুবা মপোক কুমওন ঐখোয় খুদিংনা পাংথোকখি। নীংতম্বা ফংনা মহাক্না হোৎনখিবা অমসুং ভারতপু খ্বাইদগী হেনা ওইহন্নবা মহাক্না য়েংলম্বা মিৎয়েংনা ঐখোয় খুদিংগী ইথিল ওইরি।
- দোক্যুমেন্ত অসি শেমখিবা কন্তিত্বেন্ত এসেমব্লীদা মতমদুগী খ্বাইদগী ৱাখল লৈরবা মীওইশিং য়াওখিবসি ঐখোয়গী ওইনা য়াম্না লাইবক ফবনি। মখোয়না ঐখোয়গী নীংতম ইহৌবু লুচিংখিবা লমজিং মৈরাশিংনি। শাংলবা চহি কয়াগী মতুংদা, ভারতকী থৱাইনা অমুক হন্না মিৎকপ থোক্লকখি অমসুং মখোয়গুম্বা তোঙানবা নুপা নুপীশিং অসিনা ঐখোয়গী অনৌবা অয়ুক অমা পুবীরকখি। মখোয়না আর্তিকল, ফ্রেজ অমসুং ৱাহৈ খুদিংমক মীয়ামগী মহুৎ শিন্দুনা য়াম্না কুপ্না খন্ন-নৈনখি। থৌওং অসিনা চহি ৩গী মতম চঙনা চত্থখি। অকোনবদা, দাঃ বাবাসাহেব অম্বেদকরনা দ্রাফতিইং কমিতীগী চেয়রমেন ওইনা ঐখোয়গী ফাউন্দিং দোক্যুমেন্ত ওইরিবা অসিগী ইকোন কোনবা ভর্জন শেম-শাখি।
- সংবিধানগী ৱাহৈশিংনা রাজ্য অমগী মথৌ তৌবগী থৌওংবু য়াম্না কুপ্না নৈনদুনা য়াম্না শাংলবসু, প্রীএম্বল অসিনা গাইদিং প্রিন্সিপলবু শম্লপ্না পীরি – দিমোক্রেসী, জস্তিস, লিবর্তী, ইক্বেলিতী অমসুং ফ্রেতর্নিতী। মখোয়না ঐখোয়গী লৈবাক্কী গনতন্ত্রনা লেপ্লিবা ফম্বাক শেম্লি। মখোয়শিং অসিদি ঐখোয়গী কলেক্তিব ইনহেরিতেন্স শেম্লিবা ভেল্যুশিংনি।
- মসিগী ভেল্যুশিং অসি ঐখোয়গী সংবিধান্দা নাগ্রিকশিংগী ফন্দামেন্তেল রাইত অমসুং ফন্দামেন্তেল দ্যুতীগী মওংদা মরু ওইবা থাক অমা পীরি। হক অমসুং থৌদাং হায়বসি মান্নবা শেনয়েক অমগী মমায় অনিনি। নাগ্রিকশিংনা ফন্দামেন্তেল দ্যুতী ইনবগী মতাংদা সংবিধান্দা পল্লিবা অসিনা ফন্দামেন্তেল রাইত মওং চুম্না ফংবগী অকোয়বগী ফিভম অমা শেম্লি। কৌরকপা মতমদা লৈবাক্কী সেবা তৌদুনা ফন্দামেন্তেল দ্যুতী পাংথোকপদগী ঐখোয়গী লৈবাক মচা করোর কয়া অমনা স্বচ্ছ ভারত অভিয়ান অমসুং কোবিদ তীকা থাবগী থৌওংবু মীয়ামগী ইহৌদা ওন্থোকখি। মসিগুম্বা খোঙথাং কয়ানা মায় পাকপসিগী ক্রেদিত অয়াম্বদি ঐখোয়গী মথৌ খঙবা নাগ্রিকশিংগীনি। ঐখোয়গী লৈবাক মীয়াম্না থৱাই য়াওনা শরুক য়াদুনা লৈবাক্কী ফনবা পায়খৎপা থবক-থৌরমশিংবু মপাঙ্গল হেন্না লৈহনগনি অমসুং অসিগুম্বা খোঙফম চেৎপগী মতৌ লেপ্তনা উৎকনি হায়বগী ঐহাক্না থাজবা থম্মি।
- ভারতকী সংবিধান অসি কনস্তিত্বেন্ত এসেমব্লীনা নবেম্বর ২৬, ১৯৪৯দা শেমদুনা শিজিন্নবা হৌখিবনি অমসুং ঐখোয়না নুমিৎসিবু সংবিধানগী নুমিৎ হায়না ঙসিসু পালন তৌরি। অদুবু, মসিদি থা অনিগী মতুংদা চৎহনবা হৌখি। মসিগী মরমদি, ভারতনা মপুং ফাবা নীংতম্বা তাল্লসি হায়না ইং ১৯৩০দা ৱারেপ লৌখিবা অদুবু শকখঙবনি। ইং ১৯৩০দগী ১৯৪৭ ফাওবা, জনুৱারী ২৬পু ‘পুর্না স্বরাজ নুমিৎ’ হায়না পাংথোকখি, অমসুং নুমিত অসি সংবিধান চৎনবা হৌনবা খনখিবা নুমিত ওইরিবনি।
- মহাত্মা গান্ধীনা ইং ১৯৩০দা ‘পুর্না স্বরাজ নুমিৎ’পু মতৌ করম্না পাংথোক্কদগে হায়না ইখি। মহাক্না হায়খিবদু ঐহাক্না পাউদম্লিঃ
“ঐখোয়গী পান্দম্বু ঐখোয়না অহিংশা অমসুং থমোই শেংবা থৌওং শিজিন্নদুনা ফংবা পাম্লিবসি নীংশিংলদুনা, ঐখোয়না থৌওং অসি ইশাবু শেংদোকচদুনা পাংথোকপা ঙমগনি। মরম অদুনা, ঐখোয়না পাংথোকপা ঙম্বগী শক্তি লৈদুনা ঐখোয়না নুমিৎ অসিবু হীরম অসিগীদমক্তা কত্থোক্কদবনি”।
- গান্ধীজীগী পাউতাক অসি মফম মতম নাইদবনি হায়সিদা চিংননীংঙাই লৈতে। মহাক্না ঐখোয়না গনতন্ত্রা দিবস নুমিৎপুসু মান্নবা মওংদা পাংথোকহনবা পাম্লমগনি। মহাক্না ঐখোয় খুদিংনা ইশাগী নুংদা য়েংহনীংই, খন্থহন্নীংই অমসুং অফবা মীওইবা অমা ওইনবা হোৎনহন্নীংই, মদুদগী মপান্দা অমুক য়েংদুনা অতোপ্পগা খুৎশম্নদুনা ভারত অমসুং মালেম্বু অফবা মফম অমা ওইহন্নবা তেংবাংহন্নীংই।
নুংশিরবা লৈবাক মীয়ামশিং,
- মালেম্না হৌজিক তেংবাংগী তঙাই ফদবা লৈরিবা অসিগুম্না মমাংদা অমুক্তা লৈখিদ্রি। কোরোনা ভাইরসকী ইরাং অসি চহি অনি হেঞ্জিল্লক্লে অমসুং হৌজিক ফাওবা মসিগী মাইয়োক্তা লান্থেংনরি। পুন্সি লিশিং কয়া কয়া মাঙখ্রে অমসুং মালেমগী শেন্মিৎলোন্না মসিগী চৈথেং হৌজিকসু থেংনরি। মালেম অসিনা মমাংদা অমুক্তা তাখিদ্রিবা অৱাবা মাইয়োক্নরে অমসুং ৱেব অমসুং মথংদা ৱেব অমা লাক্তুনা অনৌবা ভেরিএন্তনা অনৌবা শিংনবা ওইরি। মসিনা মীওইবা খুন্নাইদা অতৈদগী তোপ তোপ্পা শিংনবা অমা ওইহল্লি।
- লাইচৎ অসি ভারতকী ওইনা য়াম্না অরুবা ফিভম অমা ওইরমগদবনি। ঐখোয়গী মী কুঙনা অমসুং মীশিং য়াম্না লৈবা অমসুং চাউখৎলক্লিবা শেন্মিৎলোন ওইনা অসিগুম্লবা শক উদবা য়েক্নবা অসিগা মাইয়োক্ননবা রিসোর্সকী থাক লৈরমদে। অদুবু, অসিগুম্বা অরুবা তাঞ্জা অসিদা খক্তা ঐখোয়গী নীংহন্নদবগী মতিক্না মঙাল ওইনা থোক্লকপনি। ঐখয়না কোরোনা ভাইরসকী মমাংদা অতৈগা মান্নদবা থৌওং উৎখিবা অসিদা ঐহাক্না য়াম্না চাউথোকচৈ। অহানবা চহি মক্তদা, ঐখোয়না ইশাগী হেল্থ কেয়র ইনফ্রাস্ত্রকচরশিং ফগৎহন্দুনা অতোপ্পা লৈবাক্তা ফাওবা তেংবাংখি। অনিশুবা চহিদা, ঐখোয়না ইশাগী ভেক্সিন পুথোকচদুনা মালেমগী খ্বাইদগী চাউবা তীকা কাপ্পগী খোঙজং হৌদোকখি। খোঙজং অসিনা লৈবাক অসিদা থুনা য়াঙনা খুমাং চাউশিনলি। ঐখোয়না লাইচৎ মনুংদা অতোপ্পা লৈবাকশিংদা ভেক্সিন অমসুং মেদিকেলগী তেংবাংগা লোয়ননা তেংবাংখি। অসিগুম্বা ভারতকী হোৎনজমনবু মালেম পুম্বনা থাগৎনখি।
- অদুবু লাইবক থীবদি, ভাইরস অসিনা অনৌবা ম্যুতেসনগা লোয়ননা অমুক হল্লকপদা ঐখোয়না খুদোংচাদবা কয়াসু থেংনখি। মশিং থীঙমদ্রবা ইমুং কয়ানা অৱাবা মতম কয়া মাইয়োক্নখি। ঐখোয় পুন্না ৱামিন্নখিবা অসিবু ফোংদোক্নবা ৱাহৈ লৈখিদে। মীওই কয়াগী পুন্সি কনবা ঙমখিবা অসিনা তাল্লক অসিদা ঐখোয়বু নুংঙাইহনবা ৱাফম্নি। লাইচৎ অসি হৌজিকসু পাক শন্না শন্দোক্লিবা অসিনা ঐখোয়না চেকশিনবা লেপ্পা য়াদে। ঐখোয়না লৌখিবা চেকশিন থৌরাং খুদিংমক মখা চত্থখিগদবনি। মাস্ক উপ্পা অমসুং সোসিএল দিস্তেন্সিং তৌবনা কোবিদকা চুনবা লিচৎকী মরু ওইবা শরুক ওইদুনা লাক্লি। কোবিদ লাইচৎ অসিগা মাইয়োক্নরিবা অসিদা, ঐখোয়গী সাইন্তিস্ত অমসুং অখঙ-অহৈশিংনা হায়বা পাউতাক খুদিংমক ইনবা হায়বসিনা লৈবাক্কীদমক্তা পাংথোক্কদবা খ্বাইদগী মরু ওইবা ইথৌদাং ওইরি। ইরাং অসিবু মাইথীবা পীদ্রিবা ফাওবা ঐখোয়না হায়রিবা ইথৌদাং অসি পাংথোক্কদবনি।
- অসিগুম্বা ইরাংগী মতমসিনা ঐখোয় ভারত মচা পুম্নমক্তা ইমুং অমা ওইনা পুন্সিন্নবগী থৌওংগী মগুন খঙহল্লে। সোসিএল দিস্তেন্সিংগী মতমসিনা ঐখোয়বু হেন্না নক্ননা পুশিনবীরক্লি। ঐখোয় মশেল অসি কয়া য়াম্না তেংবাংনবগে হায়বা ঐখোয়না খঙলে। দাক্তর, নর্স অমসুং পেরামেদিক্সশিংনা শিংনবা অসিগী মাইয়োক্তা থোক্লক্তুনা মশাগী মপুন্সিগী খন্দমখৈ শাংল্বা পুঙ কয়া মথৌ তৌদুনা অনাবশিংবু লাইয়েংলি। অতোপ্পশিংনা লৈবাক্কী সপ্লাই চেন অমসুং অতোপ্পা থৌদাংশিং পাংথোক্তুনা লৈবাকপু মখা তানা মথৌ তৌহল্লি। কেন্দ্র অমসুং রাজ্যগী থাক্তা লৈরিবা লুচিংবা, পোলিসী শেম্বা, লৈঙাক্লোই অমসুং অতোপ্পা মীওইশিংনা মতম চানা তেংবাংলি।
- অসিগুম্বা থৌওংশিং অসিনা মরম ওইদুনা শেন্মিৎলোন্নবা মথৌ তৌবা হৌরক্লি। অৱাবা মাইয়োক্নবা মতমদা, মমাংগী চহিদা খুদোংচাদবা কয়া নংলুরবা মতুংদা শেন্মিৎলোন্না হন্দক্কী ফিস্কেল অসিদা মশক থোকপা শাহৌ লৌবগী ফিভম লৈরক্লিবা অসি ভারতকী ইথিলননি হায়বগী ময়েক লারবা খুদম অমসু মসিনা ওইরি। মসিনা মমাংগী চহিদা হৌদোকখিবা আত্মানির্ভর ভারত মিসনগী মায় পাকপগী মতৌ উৎলি। শেন্মিৎলোনগী সেক্তর খুদিংবু শেমকপা অমসুং তঙাই ফদবা মতমদা তেংবাংবদা সরকারনা অহেনবা মিৎয়েং চঙদুনা লাক্লি। লৌউ-শিংউ অমসুং পোত্থোক পুথোকপগী সেক্তরদা ফগৎলকপনা মরম ওইরগা ঐখোয়গী শেন্মিৎলোন্না মশক থোকপা থবক পাংথোকপা ঙমহল্লিবনি। ঐখোয়গী লৌমীশিং, মরু ওইনা লম পীক্না লৈজবা অপীকপা লৌমীশিংনা নেচরেল ফার্মিংবু থৱাই য়াওনা পাংথোকপা হৌরকপসিদা ঐহাক্না য়াম্না নুংঙাইবা ফাওই।
- স্মোল অমসুং মীদিয়ম ইন্তর্প্রাইসনা মীয়ামদা থবক পীবা অমসুং শেন্মিৎলোন্দা শাফু পীবদা অচৌবা থৌদাং য়ারি। ঐখোয়গী ইন্নোভেতিব ওইবা নহা ওইবা ওন্তোপ্রিনর্শিংনা স্তার্ত-অপকী ইকোসীস্তেম্বু নীংথিনা শিজিন্নদুনা অনৌবা মায় পাকপা কয়া পুরকখ্রে। মসিদি ঐখোয়গী লৈবাক্কী চাউরবা অমসুং মতিক লৈবা দিজিতেল পেমেন্ত প্লেৎফোর্ম্না মায় পাকপদগী থা খুদিংগী দিজিতেল ত্রাঞ্জেক্সন মিলিয়ন কয়া পাংথোকপা ঙমহল্লিবা অসিগী খুদম্নি।
- সরকারনা দেমোগ্রাফিক দিবিদেন্তকী কান্নবা লৌনবগীদমক্তা নাৎকী ভেল্যু অমসুং মতমগা চুনবা মহৈবু নীংথিনা পুন্সিন্নদুনা ওইহল্লিবা অনৌবা একুজেসন পোলিসীগী খুত্থাংদা অফবা অকোয়বগী ফিভম অমা শেম্লি। মকোক থোংবা ইন্নোভেতিব ইকোনোমী ৫০গী মনুংদা ভারতনা ফম কনবা ঙম্লে খঙবদা য়াম্না নুংঙাইবা ফাওই। হীরম খুদিংবু মনুং চলহনবগী মতাংদা মিৎয়েং চঙদুনা ঐখোয়না মেরিৎপু খুমাং চাউশিলহনবা ঙম্লিবা অসিদসু ঐহাক্না হেন্না নুংঙাইবা ফাওই।
লেদিজ অমসুং জেন্তলমেন,
- ঐখোয়গী শান্নরোইশিংনা মমাংগী চহিদা ওলিম্পিক্সতা মশাগী শক্তাকপা ঙমদুনা মায় পাকপা কয়া পুরকখি। অসিগুম্বা নহা ওইরিবা চেম্পিয়নশিংগী মায় পাকপনা ঙসিদি মিলিয়ন কয়াগী ইথিল ওইরি।
- মমাংগী থা খরদা, লৈবাক মীয়াম্না মখোয়গী তোঙান-তোঙানবা হীরমদা খোঙফম চেৎনা পাংথোকখিবা থৌওং কয়াদগী লৈবাক অমসুং খুন্নাইদা মপাঙ্গল হাপখিবগী মশক থোকপা খুদম কয়া উবা ফংখি। অদুবু, ঐহাক্না খুদম অনিমক পঞ্জগে। ইন্দিয়ন নেভী অমসুং কোচিন শিপয়ার্দ লিমিতেদকী থৌদাং খঙবা কাঙবু অমনা ঐখোয়গী নেভীদা ইন্দক্ত তৌরগদবা লমদমসিদা শাজবা মতমগা চুনরবা এয়রক্রাফ কেরিয়র আই.এ.সি. ভিক্রান্ত শাজখি। অসিগুম্না মতমগা চুনবা তেক্নোলোজীনা মরম ওইরগা, ভারত অসি হৌজিক্তি মালেমগী মকোক থোংবা নেভেল পাৱরগী মনুং চনবা ঙম্লে। মসিদি, দিফেন্সকী হীরমদা মরোমদোম লেপচবা ঙম্বগী মাইকৈদা চঙশিনবগী খ্বাইদগী মশক থোকপা খুদম অমনি। মসিগী মথক্তা, ঐহাক্না থৌদোক অমসু য়াম্না নুংঙাইনা লৌই। হরিয়ানাগী ভিৱানী জিলাগী সুই কৌবা খুঙ্গং অমদা, খুঙ্গং অসিগী লৌশিং লৈবা নাগ্রিক খরনা খুঙ্গং অসিবু ‘স্বা-প্রেরিত আদর্শ গ্রাম য়োজনা’গী মখাদা মীয়ামগী পুক্নিং খঙবা অমসুং ৱাখল লৈবা মতৌ উত্তুনা শেমদোকখ্রে। মশাগী খুঙ্গং নত্ত্রগা লমদমবু নুংশিজবা উৎপগী মসিগুম্বা থৌওং অসি য়াম্না থাগৎনীংঙাইনি অমসুং মতৌ তমজনীংঙাইনি। তৌবীমল খঙবা মীওইশিংগী মপুক্নিংদা মশাগী লমদম্বু নুংশিজবগী ইথিল লৈবনি। মসিগী খুদম অসিনা অনৌবা ভারত অমা – মপাঙ্গল লৈবা ভারত অমা, অমসুং মীয়ামগী অপাম্বা খঙবা ভারত অমা ওইরক্লি হায়বসিদা অমুক্কা হেন্না থাজহল্লে। থৌওং অসিদগী ইথিল লৌরদুনা, মতিক লৈবা অতোপ্পা মীয়াম্নসু মখোয়গী খুঙ্গং অমসুং শহরবু চাউখৎনবা মশাগী শরুক পীগনি হায়বগী ঐহাক্না থাজবা থম্লি।
- হীরম অসিগী মরী লৈননা, ঐহাক্না ইশাগী থৌদোক অমা মীয়ামদা তমজগে। ঐহাক্কী খুঙ্গং, কানপুর দেহাত জিলাগী পারোংখতা মমাংগী চহিগী জুন্দা চৎপগী তাঞ্জা ফংখি। মফমসিদা য়ৌবা মতমদা, ঐহাক্না ইশাগী খুঙ্গংশিগী শেংলবা লৈহাওবু ইকায় খুম্নবা উৎনিংবদগী ইশাগী ইরাইবক্তা লমদমসিগী লৈহাও তৈখি। ঐহাক্না মসি তৌবগী মরমদি, ঐহাক্না রাস্ত্রপতি ভবন্দা য়ৌবা ঙম্লিবসি, খুঙ্গং অসিগী থৌজালদগীনি খনবদগীনি। ঐহাক্না মালেমগী মফম অমা হেক্তদা লৈরবসু, ঐহাক্কী খুঙ্গং অমসুং লৈবাক্তি ঐহাক্কী থম্মোইনুংদা অদুমক লৈগনি। মশাগী হোৎনজমগী মতেংনা পুন্সিদা মায় পাক্লিবা মীওই খুদিংদা মশাগী হৌরকফম, মশাগী খুঙ্গং, শহর মচা নত্ত্রগা শহরবু মতম পুম্বদা নীংশিংবীয়ু হায়না ঐহাক্না হায়জরি। অদুগা, অদোম খুদিংনসু, ইশাগী অঙম্বা মওংদা ইশাগী পোক্নফম লমদমগী মতেং পাংগদবনি। অদোমগুম্লবা ভারতকী মায় পাক্লবা মীওইশিংনা ইশাগী পোক্নফম লমদমগী চাউখৎনবা করিগুম্বা খরবু হেক পাংথোক্লবদি, মদুগুম্বা থৌওংগী মতেংদগী লৈবাক পুম্বনা কান্নবা ফংগনি।
নুংশিরবা লৈবাক মীয়াম,
- লৈবাক্কী মিংচৎপু ৱাংনা থম্বগী থৌদাং পুরিবশিং অসি ঙসিদি ঐখোয়গী লান্মী অমসুং ঙাক-শেলগী মীওইশিংনি। হিমালয়গী ইংবনা খাঙবা ঙমদ্রবা মফমশিং অসি শারবা মরুভুমীগী লৈকংলাদা, মশাগী ইমুংদগী থাপ্না লৈদুনা মখোয়না মমা লৈবাক্কী ঙাক শেলগীদমক্তা লৈরি। মখোয়না মিৎকুপ নাহুম শিংনা লৈদুনা ঙমখৈবু ঙাক শেন্দুনা লৈরিবা অসিনা লৈবাক মনুংদা তংদু লৈতানা লৈবা ঙম্লিবনি, মখোয়গী মরুপশিংনা নুংঙাইবা পুন্সি হিংবা ঙম্লিবনি। থৌনা ফবা লান্মী অমনা মশাগী মথৌ পাংথোকপদা থৱাই থাখিবা মতমদা, লৈবাক পুম্বনা থৱাই ৱানৈ। মমাং থাদা থোকখিবা লাইবক থীবা থৌদোক অমদা, ঐখোয়না ঐখোয়গী থৌনা লৈরবা লৈবাক্কী কম্মান্দর – জেনেরেল বিপিন রাৱত, মহাক্কী লোয়নবী অমসুং থৌনা ফবা লান্মী কয়া লৈখিদে। মখোয়বু মাঙজবগী নুংঙাইতবা থৌদোক অসিনা লৈবাক পুম্ববু য়াম্না নুংঙাইহনখিদে।
লেদিজ এন্দ জেন্তলমেন,
- লৈবাক নীংবগী ইথিলনা নাগ্রিকশিংগী মরক্তা মথৌদাং পাংথোক্নবা পুক্নিং থৌগৎলি। অদোম্না দাক্তর, উকিল, দুকান ফম্বা, ওফিস কাবা, সেনিতেসনগী থবক তৌবা, নত্ত্রগা শিন্মী ওইরবসু, ইশাগী থৌদাংবু নীংথিনা পাংথোকপা হায়বসিনা অদোম্না লৈবাক্কীদমক্তা তম্বা খ্বাইদগী অহানবা অমসুং মরু ওইবা তেংবাং ওইগদবনি।
- আর্ম্দ ফোর্সকী সুপ্রীম কম্মান্দর অমা ওইনা, আর্ম্দ ফোর্সতা নুপীশিংগী মপাঙ্গল হাপ্পগী খ্বাইদগী মশক থোকপা চহি ওইখিবসিদা ঐহাক্না য়াম্না নুংঙাইবা ফাওই। ঐখোয়গী ইচানুপীশিংনা থাক অমা লাল্লে অমসুং অনৌবা হীরমশিংদা মখোয়শিংনা মতম শাংনা থবক তৌবা য়াবগী খুদোংচাবা লৈরে। সাইনিক স্কুলশিং অমসুং লেমজনীংঙাই ওইরবা নেস্নেল দিফেন্স একাদমীদগী লাকপা নুপীশিংগী তেংবাংদগী ফোর্সকী তেলেন্ত লাইন্দসু মপাঙ্গল হাপ্লগনি। মসিনা মরম ওইদুনা, ঐখোয়গী আর্ম্দ ফোর্সনা জেন্দরগী খল মান্নবগী ফিভমদগী কান্নবা য়াম্না ফংলগনি।
- তুংগী মতমগী শিংনবা কয়া মাইয়োক্নবা ঙম্নবা হৌজিক ভারতনা মফম চাবা থাক অমদা লৈরে হায়বা ঐহাক্না থাজৈ। ২১শুবা চহি-চা অসি অইং-অশা হোংবগী য়ুগ অমা ওইরক্লি, অমসুং ভারতনা মরু ওইনা রিনুএবল ইনর্জীগী মতাংদা লৌরিবা থৌনা লৈবা খোঙথাংগা লোয়ননা মালেমদা লম্বী তাক্তুনা হীরম অসিদা লুচিংবগী ফম অমা কল্লবনি। মীওই অমগী থাক্তসু, মীওই খুদিংনা গান্ধীজীগী পাউতাক নীংশিংবা য়াই অমসুং ঐখোয়গী অকোয়বদা লৈরিবা মালেম্বু তেংবাংবদা ইশাগী শরুক পীবা য়াই। ভারতনা মালেম্বু ইশাগী ইমুং মনুংনি খন্দুনা মতম পুম্বদা লাক্লি। মালেম পুম্বনা নুংশি চান্ননা লৈবগী ইথিলনা, ঐখোয়গী লৈবাক অমসুং মালেমগী খুন্নাই পুম্বনা কান্নবা অমসুং নুংঙাই য়াইফবা তুংগী মতম অমা পুরকপদা তেংবাংনি হায়বা ঐহাক্না থাজৈ।
নুংশীরবা লৈবাক মীয়াম,
- হন্দক্কী চহিসিদি, ভারতনা নীংতম্বগী চহি ৭৫ লান্থোকপা মতমদা মশক থোকপা থাক অমা লাল্লগনি। ঐখোয়না ‘নীংতম্বগী অমৃত মহোৎসব’কী থৌরমগী হরাও নুংঙাইবা পাংথোক্লি। অসিগুম্বা শক্নাইরবা চহি অসিগী নুংঙাইবা পাংথোকপগী থৌরম কয়া পাংথোক্লিবা অসিদা লৈবাক্কী নহাশিংনা থৱাই য়াওনা শরুক য়াবা উবসিদা ঐহাক্না নুংঙাইবা ফাওই। মসিদি, মথংগী চারোন-শুরোন খক্তা নত্তনা ঐখোয়না খুদিংনা তুংগী মতমশিংগা মরী লৈনবগী খ্বাইদগী ফরবা খুদোংচাবনি। অসিগুম্বা য়াইফরবা য়ুগ অসিদা ঐখোয়গী নীংতম ইহৌনা ইথিল পীবা তাঙ্কক অমা ওইরি। নীংতম্বগী ৭৫শুবা চহি অসিদা, ঐখোয়গী নীংতম ইহৌবু ওইথোকহনখিবা ভেল্যুশিংবু অমুক্কা হন্না খঙদোক্লসি। নুপা অমসুং নুপী কয়ানা নীংতম্বা ফংনবগীদমক্তা মশাগী মপুন্সি কত্থোকখি। ঐখোয়গী নীংতম লান্মীশিংনা ৱাখলনা লাম্বা ফংদ্রবা অৱাবা চৈথেং কয়া খাঙখিবা অমসুং মশিং থীঙমদবা কত্থোকপগী থৌদোকশিংনা ঐখোয়দা নীংতম্বা ফংবা অমসুং গনতন্ত্রা দিবসকী কুমহৈ ফংহল্লিবনি। হৌজিক, গনতন্ত্রা দিবস লাকপসিদা মখোয়গী হোৎনজমন অমসুং শিবা নাইররোইদবা কত্থোকখিবশিংবু অমুক হন্না নীংশিংলসি।
লেদিজ অমসুং জেন্তলমেন,
- ভারত অসি অরিবা সিভিলাইজেসন অমসুং নৌরিবা লৈবাক অমনি। ঐখোয়গী ওইনদি, লৈবাক শেমগৎপা হায়বসি লেপ্পা লৈতনা পাংথোক্কদবা থৌদাংনি। ইমুং অমদা লৈবগুম্না, লৈবাক অমগী ওইনসু, চারোন-শুরোন অমনা মথংগী চারোন-শুরোন্না নুংঙাই য়াইফনা লৈনবগীদমক্তা কন্না হোৎনৈ। ঐখোয়না নীংতম্বা ফংখিবা মতমদা, চহি কয়াদগী মীখা পোল্লম্বদা তাথী তাওইনা তৌবীরম্বনা ঐখোয়বু য়াম্না লায়রহল্লম্লে। অদুবু, চহি ৭৫গী মনুংদা ঐখোয়না মশক থোক্না চাউখৎপা ঙমখি। অনৌবা খুদোংচাবা কয়ানা অনৌবা চারোন শুরোনবু ঙাইরি। ঐখোয়গী নহারোলশিংনা খুদোংচাবশিং অসিগী কান্নবা লৌদুনা মায় পাকপগী অনৌবা থাক কয়া শেম্লে। মসিগুম্বা শক্তি, থাজবা অমসুং ওন্তোপ্রিনর্শিপ অসিদগী লৈবাক্না চাউখৎ-থৌরাংগী লম্বীদা মখা তানা চত্থদুনা মালেমগী খুন্নাইদা ফংফম থোকপা মশাগী ফংফম থোকপা মতিক চাবা মফমদা য়ৌগনি হায়বগী ঐহাক্না থাজৈ।
- ঐহাক্না মীয়াম্বু নুংঙাইরবা গনতন্ত্রা দিবস নুমিৎকী য়াইফ পাউজেল অমুক্কা হন্না পীজরি।
থাগৎচরি’
জয় হিন্দ!
*****
(Release ID: 1792612)
|