প্রধানমন্ত্রীগী লোইশঙ
প্রধান মন্ত্রীনা ইম্ফাল, মনিপুরদা চাউখৎ-থৌরাংগী তোঙান-তোঙানবা প্রোজেক্তশিং শঙ্গাবগা লোয়ননা উরেপ উয়ুংসু তমখ্রে
“নেতাজীনা ভারতকী নিংতম্বগী গেতৱেনি হায়বীরম্বা অৱাং-নোংপোক্না অনৌবা ভারতকী মঙলান মঙফাওনবগী গেতৱে অমা ওইরক্লি”
“ঐখোয়না অৱাং-নোংপোক্কী ওইথোকপা য়াবশিং মঙফাওনহন্নবা হোৎনরি”
“ঙসিদি, লৈবাক্কী নহাশিংনা মনিপুরগী শান্নরোইশিংদগী ইথিল লৌরি”
“মনিপুরনা ‘ব্লোকেদ রাজ্য’দগী মালেমগী ত্রেদ খুমাং চাউশিলহনবা রাজ্য অমা ওইরে”
“ঐখোয়না মনিপুরগী তংদু-লৈতাবা ফিভম ঙাক্তুনা থম্বা তাই অমসুং মনিপুরবু চাউখৎপগী অনৌবা থাক্তা পুখৎপা তাই। দবল ইঞ্জিন সরকার খক্তনা মসিবু ওইথোকহনবা ঙমগনি”
Posted On:
04 JAN 2022 3:14PM by PIB Imphal
প্রধান মন্ত্রী, শ্রী নরেন্দ্র মোদীনা ঙসি ইম্ফাল, মনিপুরদা লুপা করোর ১৮৫০গী চাউখৎ-থৌরাংগী প্রোজেক্ত ১৩ শঙ্গাখ্রে অমসুং লুপা করোর ২৯৫০গী চাউখৎ-থৌরাংগী প্রোজেক্ত ৯গী উরেপ উয়ুং তমখ্রে। মসিগী প্রোজেক্তশিং অসিদি রোদ ইনফ্রাস্ত্রকচর, থক্নবা ঈশিং পীবা, হকশেল, অর্বান দিভেলপমেন্ত, হাউজিং, ইনফোর্মেসন তেক্নোলোজী, স্কিল দিভেলপমেন্ত, আর্ত অমসুং কলচরগা মরী লৈনবশিংনি।
প্রধান মন্ত্রীনা লুপা করোর ১৭০০ চঙনা শাগদবা নেস্নেল হাইৱে প্রোজেক্ত ৫গী উরেপ উয়ুংসু তমখি। মহাক্না এন.ঐচ. ৩৭তা লৈবা বারাক তুরেল মথক্তা লুপা করোর ৭৫ চঙনা শাখিবা থোং অমসু শঙ্গাখি অমসুং থোং অসিনা সিলচর অমসুং ইম্ফালগী ত্রাফিকপু কোমহল্লগনি। মহাক্না মনিপুরগী মীয়ামদা লুপা করোর ১১০০ চঙনা শাখিবা মোবাইল তাৱর ২৩৮৭ খুৎশিন্নখি।
প্রধান মন্ত্রীনা ইম্ফাল শহরদা ঈশিং পীগদবা লুপা করোর ২৮০ চঙনা শাখিবা ‘থৌবাল মলতিপর্পজ প্রোজেক্তকী ৱাতর ত্রান্সমিসন সীস্তেম”; তমেংলোন জিলাগী খুন ১০গী ঈশিং পীগদবা লুপা করোর ৬৫ চঙনা শাখিবা ৱাতর সপ্লাই স্কিম প্রোজেক্ত; অমসুং সেনাপতিগী মীয়ামদা ঈশিং পীনবা লুপা করোর ৫১ চঙনা শাখিবা সেনাপতি দিস্ত্রিক্ত হেদক্বার্তর ৱাতর সপ্লাই স্কিমগী ওগমেন্তেসন অমসু শঙ্গাখি।
প্রধান মন্ত্রীনা চাউরাকপা লুপা করোর ১৬০ চঙনা পি.পি.পি. বেসিস্তা ইম্ফালদা শাগদবা ‘স্তেত ওফ দি আর্ত কেন্সর হোস্পিতাল’গী উরেপ উয়ুং তমখি। মহাক্না লুপা করোর ৩৭ চঙনা দি.আর.দি.ও.গা খুৎশম্ননা কিয়ামগৈদা শাখিবা ‘ফমুং ২০০গী কোবিদ হোস্পিতাল’সু শঙ্গাখি। মহাক্না ইন্তিগ্রেতেদ কম্মান্দ অমসুং কন্ত্রোল সেন্তর (আই.সি.সি.সি.), ‘ইম্ফাল তুরেলগী দিভেলপমেন্ত ওফ ৱেস্তর্ন রিভরফ্রন্ত (ফেজ ১)’ অমসুং ‘থাঙ্গাল বজারগী দিভেলপেম্নত ওফ মাল রোদ (ফেজ ১)’ য়াওনা লুপা করোর ১৭০ চঙনা ‘ইম্ফাল স্মার্ত সিতী মিসন’গী মখাদা শাখিবা প্রোজেক্ত অহুমসু শঙ্গাখি।
প্রধান মন্ত্রীনা চাউরাকপা লুপা করোর ২০০ চঙনা শাগদবা ‘সেন্তর ফোর ইনভেন্সন, ইন্নোভেসন, ইনক্যুবেসন অমসুং ত্রেনিং (সি.আই.আই.আই.তি.)গী উরেপ উয়ুং তমখি। মহাক্না হরিয়ানাগী গুরগাওদা লুপা করোর ২৪০ হেন্না চঙনা শাগদবা মনিপুর ইন্সতিত্যুৎ ওফ পর্ফোরমিং আর্ৎসকী উরেপ উয়ুংসু তমখি।
প্রধান মন্ত্রীনা মীতিন অসিদা ৱা ঙাংবদা ঙসিদগী হৌনা, হায়বদি জনুৱারী ২১, মনিপুরনা স্তেতহুদ ফংখিবগী ৫০শুবা কুমওন হৌরগনি হায়খি। ৱাফম অসিনা ভারতকী নিংতম্বগী চহি ৭৫শুবগী অমৃত মহোৎসবকী থৌরমগা পুনবা অসিনা ইথিল অমসু ওইরি হায়না মহাক্না ফোংদোকখি।
প্রধান মন্ত্রীনা মনিপুরগী মীয়ামগী থৌনা ফবসিদা ইকায় খুম্নবা উৎলদুনা লৈবাক অসিগী মীয়াম মরক্তা নিংতম্বগী ৱাখল্লোন্দা থাজবা হৌখিবা অসি নেতাজী মচু অহুমগী ফিরালবু অহানবা ওইনা পাইহনখিবা মোইরাং লমদমদগী হৌখিবনি হায়না ফোংদোকখি। নেতাজীনা ভারতকী নিংতম্বগী গেতৱেনি হায়বীরম্বা অৱাং-নোংপোক্না অনৌবা ভারতকী মঙলান মঙফাওনবগী গেতৱে অমা ওইরক্লি। ভারতকী নোংপোক অমসুং অৱাং-নোংপোক থংবা মফম অসিনা ভারতকী চাউখৎপগী হৌরকফম ওইগনি হায়বা ৱাফমদা থাজববু অমুক হন্না নীংশিংলদুনা ফিভম অসি ঙসিদি লমদমসিগী শাহৌ অসিদা উবা ফংলে হায়না মহাক্না পাউদমখি।
প্রধান মন্ত্রীনা ঙসি শঙ্গাখ্রিবা অমসুং উরেপ উয়ুং তমখ্রিবা চাউখৎ থৌরাংগী স্কিম কয়া অসিগীদমক্তা মনিপুরগী মীয়াম্বু থাগৎপা ফোংদোকখি। মনিপুরদা মপুং ফাবা মেজোরিতীগা লোয়ননা মরা চেৎনা অমসুং মথৌ নীংথিনা পাংথোক্তুনা পাল্লিবা সরকার অসিবু শেমহনখিবগীদমক্তা মনিপুরগী মীয়াম্বু থাগৎপসু ফোংদোকখি। অসিগুম্বা মরা চেৎপা অমসুং মীয়াম্না পামজনা খনখিবা সরকার অসিনা মরম ওইদুনা লৌমী লাখ ৬কী ইমুংনা কিসান সম্মান নিধীগী মখাদা লুপা করোর চা কয়া ফংলিবা; লাইরবা ইমুং লাখ ৬না পি.এম. গরীব কলয়ান স্কিমগী মখাদা কান্নবা ফংলিবা; পি.এম.এ.ৱাই.গী মখাদা য়ুম লিশিং ৮০ ফংলিবা; অয়ুশমান য়োজনাগী মখাদা লুপা লাখ ৪.২৫ ফাওবগী লেম্না লাইয়েংবগী খুদোংচাবা ফংলিবা; গ্যাস কন্নেক্সন লাখ ১.৫ ফংলিবা; মৈগী কনেক্সন লাখ ১.৩ ফংলিবা; অমাংশঙ লিশিং ৩০; ভেক্সিন দোজ লাখ ৩০ হেন্না লেম্না ফংলিবা অমসুং রাজ্যসিগী জিলা খুদিংদা ওক্সীজেন প্লান্ত লৈবগী মায় পাকপগী থবকশিং ওইথোকপা ঙম্লিবনি হায়না মহাক্না মখা তাখি।
প্রধান মন্ত্রীনা মহাক্না প্রধান মন্ত্রী ওইদ্রিঙৈদা মনিপুরদা কয়ারক হন্না লাক্লম্লে হায়না নিংশিংখি। মহাক্না মীয়ামগী অৱাবা খঙই, “মরম অদুনা, ইং ২০১৪গী মতুংদা, ঐহাক্না দিল্লী-ভারত সরকারবু অদোমগী থোংজিন্দা পুরক্লিবনি” হায়না ফোংদোকখি। ওফিসর অমসুং মন্ত্রী খুদিংদা মফমসিদা চত্তুনা লমদমসিগী অপাম্বগী মতুং ইন্না সেবা তৌনবা মহাক্না হায়খিবা লৈখ্রবনি। “কাউন্সিল ওফ মিনিস্তরদা লমদমসিদগী মরু ওইবা মীওই মঙা য়াওরিবসি মীয়াম্না উরিবসিনি”, হায়না প্রধান মন্ত্রীনা মীয়ামদা তাকখি।
প্রধান মন্ত্রীনা সরকার অসিনা চহি ৭ হোৎনরকপগী মহৈ অসি হৌজিক্তি অৱাং-নোংপোক লমদম, মরু ওইনা মনিপুরদা উবা ফংলে হায়খি। ঙসিদি মনিপুরনা অহোংবা নাইবা থবক তৌবগী অনৌবা চৎনবী অমগী খুদম ওইরক্লি। মসিগী অহোংবশিং অসিদি মনিপুরগী কলচর অমসুং মসিবু ঙাক শেন্নবনি। মসিগী অহোংবা অসিদা কন্নেক্তিবিতী অসিসু মিৎয়েং চঙবা হীরম অমা ওইরি অমসুং ক্রিএতিভিতী অসিসু চপ মান্ননা মরু ওই হায়না মহাক্না ফোংদোকখি। লম্বী শোরোক্কী ইনফ্রাস্ত্রকচরগা লোয়ননা হেন্না ফবা মোবাইল নেৎৱর্ক লৈবনা লমদমসিগী কন্নেক্তিবিতীবু হেন্না ফগৎহনগনি হায়না প্রধান মন্ত্রীনা শন্দোক্না তাকখি। সি.আই.আই.তি.না লমদমসিগী নহাশিংগী ক্রিএতিভিতী অমসুং ইনোভেসনগী ইথিলদা তেংবাংগনি। মতমগা চুনবা কেন্সর হোস্পিতাল অসিনা লাইয়েংবগী মাইকৈদা হেন্না ফগৎহনগনি অমসুং মনিপুর ইন্সতিত্যুৎ ওফ পরফোর্মিং আর্ত অমসুং গোবিন্দজী মন্দির শেমজিনবনা কলচরগী হেরিতেজপু য়োকখৎকনি।
প্রধান মন্ত্রীনা মহাক্কী সরকারনা অৱাং-নোংপোক্কীদমক্তা ‘এক্ত ফোর দি ইস্ত’কী ৱারেপ লৌখি হায়না ফোংদোকখি। ইশ্বরনা মহৌশাগী রিসোর্স কয়া, তৌবা ঙম্বগী মতিক কয়া লমদমসিদা পীবিরি হায়না মহাক্না হায়খি। মফমসিগী ওইনা তুরিজমগী মতাংদা চাউখৎপগী ওইথোকপা য়াম্না লৈ। অসিগুম্বা ওইথোকপা য়াবশিংবু মঙফাওনহন্নবা অৱাং-নোংপোক্কী লমদমদা থবক ওইনা হৌজিক পায়খৎলি হায়না মহাক্না মখা তাখি। অৱাং-নোংপোক্না ভারতকী চাউখৎপগী গেতৱে ওইরক্লি হায়না মহাক্না ফোংদোকখি।
প্রধান মন্ত্রীনা হায়খিবদা, মনিপুর হায়বসি লৈবাক্কী খ্বাইদগী তাঙলবা মনি পীবা রাজ্য অমা ওইদুনা লাক্লি। মফমসিগী নহাশিং, মরু ওইনা লমদমসিগী নুপীমচাশিংনা লৈবাক অসিবু মালেম শিনবা থুংবদা মমিং চৎহল্লি। অদুগা ঙসিগী মতমসিদা মরু ওইনা, লৈবাক্কী নহাশিংনা মনিপুরগী শান্নরোইশিংদগী ইথিল লৌরি।
প্রধান মন্ত্রীনা হায়খিবদা, দবল ইঞ্জিন সরকার অসিনা লেপ্পা লৈতনা হোৎনবদগী, ঙসিদি, লমদম অসিদা লালহৌবগী অমসুং অকি-অখংগী ফিভম লৈত্রে, তংদু লৈতাবা অমসুং চাউখৎপগী মঙাল ওইনা উরে হায়না মহাক্না ফোংদোকখি। অৱাং-নোংপোক্না খুৎলায় থাদোক্লে অমসুং চাউখৎপগী লমজেলদা য়াওরে। দিকেদ কয়াদগী পন্দুনা লাক্লবা য়ানবগী ৱারী কয়াবু ঐখোয়গী ঙসিগী সরকারনা লৌশিন্দুনা অসিগুম্বা পুৱারী ওইরবা এক্কোর্দ কয়াগী ৱারোইশিন পুরক্লে হায়না প্রধান মন্ত্রীনা ফোংদোকখি। মনিপুরনা ‘ব্লোকেদ রাজ্য’ ওইরম্বদগী হৌজিক্তি মালেমগী ত্রেদকী লম্বী য়াৎলে।
ঙসিগী ২১শুবা চহি-চাগী দিকেদ অসি মনিপুরগী ওইনা য়াম্না মরু ওই হায়না মহাক্না ফোংদোকখি। মহাক্না মমাংদা মাঙখ্রবা মতমগী খনবদা নুংঙাইতবা ফোংদোকখি। হৌজিক্তি, মাঙহনবা য়াবা মিৎকুপ অমত্তা লৈত্রে হায়না মহাক্না হায়খি। “ঐখোয়না মনিপুরগী তংদু-লৈতাবা ফিভম ঙাক্তুনা থম্বা তাই অমসুং মনিপুরবু চাউখৎপগী অনৌবা থাক্তা পুখৎপা তাই। দবল ইঞ্জিন সরকার খক্তনা মসিবু ওইথোকহনবা ঙমগনি” হায়না মহাক্না মখা তানা ফোংদোকখি।
***
(Release ID: 1787436)
Visitor Counter : 261
Read this release in:
English
,
Urdu
,
Marathi
,
Hindi
,
Bengali
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam