প্রধানমন্ত্রীগী লোইশঙ

পি.এম.না নভেম্বর ১৯দা য়ু.পি.দা চৎকনি অমসুং লুপা করোর ৬২৫০রোমগী ওইগদবা তোঙান-তোঙানবা চাউখৎ-থৌরাংগী প্রোজেক্তশিং শঙ্গাগনি


পি.এম.না ঈশিং ৱাৎপগী মায়োক্নরিবা সমস্যা অসি কোকহনবদা মতেং পাংনবা অমসুং লৌমীশিংদা খ্বাইদগী মথৌ তারিবা মতেং পীনবা মহোবাদা প্রোজেক্তশিং শঙ্গাগনি

পি.এম.না মেগা ৱাত ৬০০কী অলত্রামেগা সোলর পাৱর পার্ক্কী উরেপ উয়ুং তমগনি অমসুং ঝান্সীদা অতল এক্তা পার্ক শঙ্গাগনি

Posted On: 17 NOV 2021 1:59PM by PIB Imphal

প্রধান মন্ত্রী শ্রী নরেন্দ্র মোদীনা নভেম্বর ১৯, ২০২১দা  উত্তর প্রদেশকী মহোবা অমসুং ঝান্সীগী জিলাশিংদা চৎকনি।

ঈশিংগী অৱাবা কোকহন্নবা শীংথানীংঙাই ওইবা থৌশিল অমদা নুমিৎ য়ুংবা মতুং নুংথিল পুং ২:৪৫ তাবা মতমদা মহোবাদা প্রধান মন্ত্রীনা তোঙান-তোঙানবা চাউখৎ-থৌরাংগী প্রোজেক্তশিং শঙ্গাগনি। প্রোজেক্তশিং অসিনা লমদম অসিদা ঈশিংগী অৱাৎপা মায়োক্নবগী সমস্যা কোকহনবদা মতেং ওইরগনি অমসুং লৌমীশিংদা খ্বাইদগী হেন্না মথৌ তারিবা মতেং অদু ফংহল্লগনি। প্রোজেকশিং অসিদা অর্জুন সহায়ক প্রোজেক্ত, রতোলী ৱেয়র প্রোজেক্ত, ভৱানী দাম প্রোজেক্ত অমসুং মঝগাও-মোরোক স্প্রিনক্লর প্রোজেক্ত য়াওরি। প্রোজেক্তশিং অসিগী অপুনবা শেনফম অসি লুপা করোর ৩২৫০ হেন্না হেল্লি অমসুং মখোয়না মথৌ তৌরকপনা মহোবা, হমীরপুর, বান্দা অমসুং ললিতপুরগী জিলাশিংদা লৈবা লম হেক্তর ৬৫০০রোমদা ঈথৈ-লৌখোঙ য়ৌহনবদা মতেং ওইরগনি, লমদম অসিগী লৌমী লাখ কয়াদা কান্নবা ফংহল্লগনি। প্রোজেক্তশিং অসিনা লমদম অসিদা থক্নবা ঈশিংসু ফংহল্লগনি।

নুমিদাং ৱাইরম পুং ৫:১৫ তারকপা মতমদা প্রধান মন্ত্রীনা থৌরম অমদা শরুক য়াগনি, মসিদা মহাক্না ঝান্সীদা লৈবা গরোথাদা মেগা ৱাত ৬০০কী অলত্রামেগা সোলর পাৱর পার্ক্কী উরেপ উয়ুং তমগনি। মসি লুপা করোর ৩০০০ হেন্না চংনা শাগনি অমসুং মসিনা কান্নবা অনি পীবদা মতেং ওইরগনি মদুদি ইলেক্ত্রিসিতী মমল হোংহল্লগনি অমসুং গ্রিদ স্তেবিলিতী লৈহল্লগনি।

প্রধান মন্ত্রীনা ঝান্সীদা অতল এক্তা পার্কস শঙ্গাগনি। হান্নগী প্রধান মন্ত্রী শ্রী অতল বিহারি বাজপয়ীগী মমিং লৌদুনা থোনখিবা পার্ক অসি লুপা করোর ১১ চংনা শাখি, অমসুং মসি স্ক্যের মিতর ৪০,০০০রোম পাক-চাউই। মসিদা লাইব্রেরী অমা লোয়ননা শ্রী অতল বিহারি বাজপয়ীগী মীতম অমা লৈ। মীতম অসি মমিং লৈরবা স্কল্পতর, স্তেচ্যু ওফ য়ুনিতী শাখিবা মীওই, শ্রী রাম সুতরানা শাখি।

***



(Release ID: 1772737) Visitor Counter : 195


Read this release in: Assamese , English , Urdu , Marathi , Hindi , Bengali , Punjabi , Gujarati , Odia , Tamil , Telugu , Kannada , Malayalam