শ্রী অরিন্দম বাগচী, ওফিসিএল স্পোক্সপর্সনঃ ভদ্রলোক অমসুং ভদ্রমহিলা অদোম খুদিংদা ঐহাক্না য়াইফ পাউজেল পীজরি। অদোম্না থেংলবা মতমসিদা ঐখোয়গা পুনবীরিবা অমসুং ভারত্তা লৈবীরিবা ঐখোয়গী লাইব স্ত্রীমদা শরুক য়াবীরিবশিংদা থাগৎপা ফোংদোকচরি। খুরুমজরি অমসুং তরাম্না ওকচরি। প্রধান মন্ত্রী, শ্রী নরেন্দ্র মোদী হৌজিক রোমগী খোঙচত্তা রোমদা লৈরি অমসুং ঙসিনা খোঙচৎকী অহানবা নুমিৎনি। হৌজিক করি থবক চত্থরি অমসুং ঐখোয়না করি থৌরাং লৈবগে হায়বগী মতাংদা হায়বীগদবা ভারতকী ফোরেন সেক্রেতরী, শ্রী হর্শ বর্ধন সিংহনা মফমসিদা লৈরি অমসুং মহাক্না মফমসিদা লৈবীবসি ঐখোয়গী লাইবক ফবনি। সর, ঐহাক্না মতম মাংহনবা তৌদনা, ঐহাক্না অদোমগী মফমদা ফম্বাক শিন্নজরি।

শ্রী হর্শ বর্ধন সিংহ, ফোরেন সেক্রেতরীঃ খুরুমজরি অমসুং গুদ ইভনীং, মীদিয়াগী মরুপশিংগা অমুক্কা উন্নজবা ফংবসি ঐহাক্না য়াম্না নুংঙাইজৈ। প্রধান মন্ত্রীনা ঙসি অয়ুক্তা রোমদা য়ৌরকখ্রে হায়বসি অদোম পুম্নমক্না খঙবীরম্লগনি। মহাক্কী খোঙচৎকী মরু ওইবা মরমদি ১৬শুবা জি.২০ সম্মিত্তা শরুক য়াবনি। অদুবু, মহাক্না মসিগী খুদোংচাবা অসি লৌদুনা লৈবাক অমসুং সরকার কয়াগী মকোকথোংবা লুচিংবশিংদা বাইলেতরেল মীফম কয়া অমসু ফমগনি। মফমসিদা য়ৌরবা তুংদা, প্রধান মন্ত্রীনা য়ুরোপিয়ন কাউন্সিলগী প্রসিদেন্ত, হিস এক্সেলেন্সী, শ্রী চার্ল্স মিছেল; অমসুং য়ুরোপিয়ন কম্মিসনগী প্রসিদেন্ত, হার এক্সেলেন্সী, কুমারী উর্সুলা ভোন দর লেয়েনগা উন্নখি। বেকগ্রাউন্দগী মতাংগী ওইনদি, অতোপ্পা হীরম কয়াগা লোয়ননা মালেমগী শেন্মিৎলোন অমসুং হকশেলগী ফীভম্না লাইচত্তগী ফগৎলকপা, তুং কোইনা চৎকদবা চাউখৎপা অমসুং অইং-অশা হোংবগী মতাংদা খন্ন-নৈননবা হয়েংগী জি.২০ সম্মিত্তা প্রধান মন্ত্রীনা শরুক য়াগনি হায়বসি অদোম্নসু খঙনরবদুনি।

ঐখোয়গী জি.২০ শের্পা, ঐখোয়গী কম্মর্স অমসুং ইন্দস্ত্রী মন্ত্রীনা অকুপ্পা মরোল খরদি পাউদমখ্রে হায়বা ঐহাক্না খঙজরে। মরম অদুনা, ঐহাক্না প্রধান মন্ত্রীনা ঙসি পাংথোকখিবা থবক-থৌরম খরদা মিৎয়েং চঙগে। য়ুরোপিয়ন কম্মিসন অমসুং কাউন্সিলগী প্রসিদেন্ত উন্নখিবগা লোয়ননা ইতলীগী প্রধান মন্ত্রী, হিস এক্সেলেন্সী, মারিও দ্রাঘীগা হৌজিক্তা ফমখিবা মীফমগী মতাংদা পাউদমজগে। মখোয়গী খন্ন-নৈনখিবা মরু ওইবা হীরমশিংদি জি.২০ সম্মিৎকা মরী লৈনবা ঙাক্তনি অমসুং শেন্মিৎলোন অমসুং হকশেলগী ফীভম্না কোবিদতগী মালেমগী থাক্তা ফগৎলকপগী মতাংদসু খন্ন-নৈনখি। অইং-অশা হোংবগী মতাংদা খন্ন-নৈনবগা লোয়ননা অফঘানিস্তান অমসুং ইন্দো-পেসিফিক্কী হৌজিক্কী ইরাং য়াওনা রিজনেল অমসুং মালেমগী অপাম্বগা মরী লৈনবা ৱাফম কয়াসু মীফম অনিমকসিদা খন্ন-নৈনখি।

ই.য়ু.গী ওইনা পল্লবদা, হন্দক্কী চহিগী মেদা ই.য়ু. প্লস ২৭কী মওংদা পাংথোকখিবা ভারত-ই.য়ু. লুচিংবশিংগী মীফম অমসুং জুলাই ২০২০দা পাংথোকখিবা ১৫শুবা ভারত-ই.য়ু. সমিত্তা মশক থোকপা ৱারী-ৱাতাই কয়া শান্নখিবশিংবু লুচিংবশিংনা নীংশিংনখি হায়না ঐহাক্না খঞ্জৈ। ই.য়ু. অসি ভারতকী মরু ওইবা খোঙলোইশিংগী মনুংদা অমনি অমসুং লুচিংবশিংনা ঙসিগী মীফমদসু রাজনিতী অমসুং ঙাক-শেনবগী মরী, লল্লোন-ইতিক অমসুং শেল থাদবগী মরীগা লোয়ননা মমাংগী ভারত-ই.য়ু. সম্মিত্তা য়ানবা পুরক্তুনা চৎনবা হৌখিবা ‘রোদমেপ ২০২৫’ মনুং চনবা হীরম কয়াবু লুচিংবশিংনা হঙ্গৎনা য়েংখৎনখি। ঐহাক্না পনখিবগুম্না, মখোয়না অইং-অশা হোংবগী মতাংদা চাউখৎপা পুরকপা, কোবিদ-১৯ লাইচৎ অমসুং হৌজিক মতমগা মরী লৈনবা মালেম অমসুং রিজনেলদা চাউখৎপগী অপাম্বশিংগী মতাংদসু খন্ন-নৈনখি।

প্রধান মন্ত্রীনা অইং-অশা হোংবগী ফিভম, অফঘানিস্তান অমসুং ইদো-পেসিফিক্কী মতাংদা লৈবা ভারতকী ৱাখল্লোন্দা মিৎয়েং চঙখি। ই.য়ু. অমসুং ইতলীগী প্রধান মন্ত্রীনা ভারতকী তসেংনা তীকা থাখ্রবা মীওইশিংগী মশিং অমসুং অহানবা দোজ কাপখ্রবা মীওইশিংগী চাদা ওইবা চাংগী মতাং অনিমক্তা লৈবাক অসিনা তীকা থাবগী খোঙজংদা মশক থোকপা মাই-পাকপা ফংবদা থাগৎপা ফোংদোকখি। প্রধান মন্ত্রীবু তরাম্না ওক্নবগীদমক্তা লাকখিবা ইন্দিয়ন কম্ম্যুনিতীগী য়াম্লবা মীয়ামগী মমাংদা প্রধান মন্ত্রীনা ঙসিগী নুংথিলদা পিয়াজা গান্ধীদা লৈবা মহাত্মা গান্ধীগী খুভমদা লৈ কৎখি। লাকখিবা মীয়াম্নসু থৱাই য়াওনা লৈ কৎনখি।

ঐখোয়না হৌজিক ৱারী শান্ন-শান্ননা, ইতলীদা লৈবা ভারত মচাশিংগী লুপকী মেম্বর, ইতালিয়ন হিন্দু য়ুনিয়ন, ইতালিয়ন কনগ্রেগেসন ফোর কৃষ্ণ কন্সিয়সনেস, সিখ খুন্নাই অমসুং মালেমগী লাঞ্জাওদা ইতালীদা লাল-শোক্নবদা শরুক য়াখিবা ভারতকী লান্মীশিং নীংশিংবগী থৌরমশিংদা শরুক য়াবা ইন্সতিত্যুসনশিং য়াওনা তোঙান-তোঙানবা লুপশিংগী ভারতকী মরুপশিংগা প্রধান মন্ত্রীগা তোঙান্না উন্নরি। মহাক্না মীফমশিং অসিদা ইন্দোলোজিস্ত অমসুং সন্সকৃৎ স্কোলর কয়া অমগসু ৱারী শাগনি। খুন্নাইশিং অসিগী মীহুৎশিংনা ভারত অমসুং ইতালীগী মরক্তা লৈরিবা মরী হেন্না চেৎশিলহন্নবা থৌদাং লৌরিবশিংবু প্রধান মন্ত্রীনা য়াম্না থাগৎলি।

ইতালীগী প্রধান মন্ত্রীগী ওফিসিএল ওফিস অমসুং লৈফম ওইরিবা পালাজো চিগিদা ইতালীগী প্রধান মন্ত্রীগা উন্নবগী ওইনদি, হন্দক উন্নরিবা অসিনা হকথেংননা থেংনবা অহানবনি। প্রধান মন্ত্রীনা হন্দক্কী ওগস্ত ২৭তা অফঘানিস্তানগী ইরাংগী মতাংদা ৱারী শাখিবগী থৌদোক য়াওনা প্রধান মন্ত্রী দ্রাঘীগা মমাংদা কয়ারক ৱারী শাখ্রবনি, প্রধান মন্ত্রী দ্রাঘীনা শ্রী মোদীদা অফঘানিস্তানগী মতাংদা পাংথোকপা মালেমগী সম্মিত্তা শরুক য়ানবা পাউজেল পীরকখিবা অমসুং প্রধান মন্ত্রী, শ্রী নরেন্দ্র মোদীনা শরুক য়ারুবগী মতাংদা অদোম্নসু খঙনরবনি অমসুং মসিগী মতাংদসু ঙসি ৱারী শাবদা য়াওখি। নবেম্বর ২০২০দা পাংথোকখিবা ভারত-ইতালী ভর্চুএল সম্মিৎকী মতুং তারকপদা লাকখিবা চাউখৎপগী ফিভমশিংগী মতাংদা মখোয়না ৱারী শাখি হায়না ঐহাক্না খল্লি। মখোয়না মসিদা নত্তনা, খুৎশম্নবগী অতোপ্পা হীরমশিংদসু মিৎয়েং চঙনখি।

রিন্যুএবল অমসুং ক্লিন-ইনর্জীগী মতাংদা লৈবাক অনিগী লৈনরিবা মরীদা অনৌবা শাফু পীনবগীদমক্তা, ভারত অমসুং ইতালীনা ইনর্জী ত্রাঞ্জিসনগী মতাংদা স্ত্রেতজিক পার্ত্নরশিপ অমা পায়খৎলগনি হায়বা অপুনবা ৱারোল অমা লাউথোকখি অমসুং গ্রীন কোরিদোর প্রোজেক্ত অচৌবা, স্মার্ত গ্রিদ, ইনর্জী স্তোরেজ সোল্যুসন, গ্যাস পুথোক-পুশিন তৌবা, ৱেস্ত তু ৱেল্থ হায়না কৌনরিবা ইন্তিগ্রেতেদ ৱেস্ত মেনেজমেন্ত, গ্রীন হাইদ্রোজেন পুথোকপা অমসুং শিজিন্নবা  অমসুং বাইওফুএল খুমাং চাউশিলহনবগী মতাংদা খুৎশম্ননা চৎমিন্নবগী য়ানবসু পুরকখি। ভারত অমসুং ইতালীনা মীফম অসিগী মনুংদা তেক্সতাইলগী মতাংদা থবক তৌমিন্নবগী য়ানচে অমগী খুৎয়েকসু পীনখি। মখোয়না মাইকৈ অনি থোক্না শেল থাদবগী, মরু ওইনা ইতালীনা কা-হেন্না হৈথোই-শিংথোইবা ক্লিন ইনর্জী অমসুং রিন্যুএবল সেক্তরগী মতাংদা, কান্নরবা ৱাফমশিং খন্ন-নৈনখি।

ঙসিগী রোমগী অহানবা নুমিৎ অসিদি য়াম্না কান্নখ্রে হায়বা অদোম্না উরে। হয়েংদি, প্রধান মন্ত্রীনা ভেতিকান শহরদা হিস হোলিনেস, পোপ ফ্রান্সিসকা উন্নগনি অমসুং মসিগী মথংদা মহাক্না জি.২০ সেসন্দা শরুক য়াগনি অমসুং মসিদা মহাক্না বাইলেতরেল মীফম অতোপ্পা কয়া অমসু পাংথোক্কনি অমসুং মসিগী মতাংদা ঐহাক্না অদোমদা লেপ্তনা খঙহনগনি।

শ্রী অরিন্দম বাগচী, ওফিসিএল স্পোক্সপর্সন: সরবু থাগৎচরি। ঐখোয়না ৱাহং খরা লৌজগনি। ফোরেন সেক্রেতরীনা অতোপ্পা থবক অমসু চৎকদবা লৈবনা, মতমগী অকক্নবা তসেংনা লৈরে। অদুনা, ঐহাক্না থৌরম হৌজরগে। সিধান্ত।

সিধান্তঃ হাই, ঐহাক দবল্যু.আই.ও.এন.দগী সিধান্তনি। ঐহাক্কী ৱাহংদি, ই.য়ু.গী লুচিংবশিংগা ঙসি অয়ুক পাংথোকখিবা মীফমদা, ভেক্সিন সর্তিফিকেৎকী মতাংদা নাকল অনিমক্না শকখঙবগী মতাংদা মিৎয়েং চঙবগী ওইনা, ভারতকী ভেক্সিন অমসুং ভারতকী ভেক্সিন সর্তিফিকেৎ শকখঙনবা মিৎয়েং কয়া য়াম্না চঙখিবগে? তেরোরিজমগী মতাংদা অমুক লাকপদা, অদোম্না হায়বা য়ারগদি, ভারতনা হীরম অসিদা কয়া য়াম্বা মিৎয়েং চঙবগে অমুক্তা হায়বীয়ু।

মনিশ চান্দঃ সর, ঐহাক ইন্দিয়া রাইৎস নেতৱর্ক্কী মনিশ চান্দনি। ঐহাক্কী ৱাহংদি, ভারত অমসুং ইতালীনা অফ্রিকাগুম্বা থর্দ ৱর্ল্দ লৈবাকশিংদা থবক তৌমিন্নবগী মতাংদা মমাংগী সম্মিত্তা ৱাফম অমা হৌদোকখি। অদুগা ইন্দো-পেসিফিক্কী মফমশিং অসি হৌজিক্তি অদোমগী রাজনিতীগী লমদা খ্বাইদগী পুক্নিং চঙবা মফম অমা ওইরে।  ইন্দো পেসিফিক অমসুং থর্দ লৈবাকশিংদা খুৎশম্নদুনা থবক তৌমিন্নবগী অচেৎপা থৌরাং য়াৎপগী মতাংদা খন্ন-নৈনখিবা লৈরবরা?

ৱাঙাংলোই ১: ব্লুমবর্গ ন্যুজ। মন্ত্রীজী, কোবিদ-১৯গী ভেক্সিনশিংবু মালেমগী মফমশিংদা পুথোক-পুশিন তৌবদা হেন্না লাইহন্নবা ভেক্সিন অসিবু নাকল অনিমক্না শকখঙবগী মতাংদা জি.২০ মেম্বরশিংগী মফমদা ভারতকী মাইকৈদগী লৈবা চপ-চাবা ৱাহৌদোক্কী মতাংদা কুপ্না হায়বীবা য়াগদরা? প্রধান মন্ত্রীনা হয়েং পোপকা উন্নগদৌরিবা অসিগী করি পান্দম লৈবগে হায়বা কুপ্না হায়বা য়াগদরা? ঐহাক্না হায়নীংবদি, মখোয়না করি ৱাফম খন্নগদোইনো, অখন্ননা ভারতকী খৃস্তিয়নশিংগী ওইনা, নত্ত্রগা অতৈ করি লৈবগে? অদুগা অতোপ্পা ৱাফম অমনা...

শ্রী অরিন্দম বাগচী, ওফিসিএল স্পোক্সপর্সন: ঐখোয়দা মতমগী অকক্নবা লৈরে, অদুনা ….
ৱাঙাংলোই ১: কোপ ২৬ সম্মিৎকী মাংওইননা, অদোম্না ফন্দ অমসুং তেক ত্রান্সফরগী মতাংদা করি থাজবগে লৈবগে হায়বীবা য়াগদরা?  য়ু.এস.কা মসিগগী লৈনরিবা মরীগী মতাংদা মরু ওইনা, মরমদি, য়ু.এস.না ভারত্তা ফন্দ তেক্কী তেংবাং পীগনি হায়খিবা লৈখ্রে অমসুং মখোয়না ক্লাইমেৎকী মতাংদা খুৎশম্নবসু পাম্লি। থাগৎচরি।

শ্রী হর্শ বর্ধন সিংহ, ফোরেন সেক্রেতরীঃ সিধান্ত অমসুং ব্লুম্বর্গ অনিমক্না হংলবনিনা, ভেক্সিনেসন সর্তিফিকেত্তগী হান্না হেক্তা হৌরগে। ঐহাক্না খনবদা, ঐখোয়না মসিগী মতাংদা ই.য়ু.গী মীহুৎশিংগা ভারী শাখ্রে। লৈবাক কয়ানা কোবিদ লাইচত্তগী ফগৎলকপগা লোয়ননা হান্নগী ফিভমদা হঞ্জিল্লকপা লোয়না ভেক্সিন ফংবদা লায়হনবা অমসুং পুথোক-পুশিন তৌবগী মতাংদা ঐখোয়না ৱারী শানখ্রে। নাকল অনিমক্না ভেক্সিন শকখঙবগী মতাংদসু ঐখোয়না খন্নখ্রে। ঐহাক্না খনবদা মসি পাংথোকপা য়াবা থৌওংনি অমসুং মসিগী খুত্থাংদা ঐখোয়না মালেমদা লায়না থাদোক-থাজিন তৌবা য়াহনগ্নি। মসিগী অকুপ্পা মরোলদি লৈবাকশিংনা বাইলেতরেল ওইনা শেমগদবনি। য়ুরোপিয়ন য়ুনিয়ন অমসুং য়ুরোপিয়ন কাউন্সিলনা ময়ামগী ওইবা কাংলোন পীবখক ঙমগনি। মসি হায়বগা লোয়ননা, ই.য়ু. লৈবাক খরদি ঐখোয়গী ৱাহৌদোক্কী পাউখুম পীরকখ্রে অমসুং ঐখোয়না মসিগী মতাংদা থবক পায়খৎপসু হৌরে। মসিগী ৱাহংসি জি.২০দসু হংখ্রে। ঐখোয়না জি.২০দসু ভেক্সিনেসন সর্তিফিকেসনবু মাইকৈ অনিনা শকখঙনবা ৱাফম হৌদোকখ্রবনি। হৌজিক হৌজিকসু মসিগী মতাংদা ৱারী শারি। অদুগা লৈবাক অয়াম্বনা মালেমগী মফমশিংদা লায়না পুথোক পুশিন তৌবগী মতাংদা য়াম্না অপেনবা ফাওনরে। মসিগী মতাংদা চপ-চাবা ৱারোইশিন্দি লৈত্রি অদুবু লৈবাক কয়া অমনা পুবদা অমসুং ফংবদা লায়হনবা হায়বসি পাম্বনিনা, ঐখোয়না মসিদা পুন্না হোৎনমিন্নফম থোকই হায়না ঐহাক্না খল্লি। অদুগা প্রধান মন্ত্রেনা হায়খিবা ৱাফমদুনি ঐহাক্না হায়রিবসি।

মনিশনা থর্দ লৈবাকশিংদা থবক তৌবগী মতাংদা হংবা ৱাহংশিংগী ওইনা, অদোম্না অফ্রিকা, এসিয়ন লৈবাকশিং পল্লি। পল্লিবা ৱাহং অসি য়ুরোপিয়ন য়ুনিয়নগী থাক্কা মরী লৈনবনি হায়না ঐহাক্না খল্লি। ইন্দো পেসিফিক্কী ওইবা স্ত্রেতজী পেপর অমা হৌদোকখিবদু খঙনরে, প্রসিদেন্ত উর্সুলা ভোন দর লেয়েন অমসুং প্রসিদেন্ত চার্ল্স মিছেল অনিমক্না মখোয়গা ইন্দো পেসিফিক্কা লৈনবা মরীগী মরু ওইবা অমসুং অখন্নবা ওইনা ভারতকা থবক তৌমিন্নবগী মরু ওইবগী মতাংদা ৱাফম ফোংদোকখি। হীরম অসি অমুক্কা হেন্না কুপথনা খন্ন-নৈনফম থোকপনি হায়না লুচিংবশিংনা খল্লি হায়না ঐহাক্না লৌই অমসুং প্রধান মন্ত্রীনসু মখোয়গী অৱাংবা থাক্কী দেলিগেসন থারক্কনি হায়নসু পনবীখ্রে অমসুং ঐখোয়না ঐখোয়গী লৌশিং অমসুং থবক ওইনা থেংনরকখিবা কয়া লান্নবা য়াই। ইন্দো পেসিফিক্কী মতাংদা য়ুরোপিয়ন য়ুনিয়নগা তেংবাংমিন্নবগী থৌওংশিংবু মখা তানা চত্থনবগীদমক্তা ঐখোয়না তাস্ক ফোর্স অমা শেমগৎপা ফাওবা য়াই। ফ্রান্স, জর্মনী, নেদর্লেন্দগুম্বা য়ুরোপিয়ন য়ুনিয়নগী মেম্বর লৈবাক কয়া অমনা ইন্দো পেসিফিক্কী পেপর অমসুং স্ত্রেতজী পেপর কয়া পুথোকখিবগী মতাংদা অদোম্নসু খঙলবনি। ইন্দো পেসিফিক্কী ওইবা মখোয়গী পোলিসী লৈনা। ৱাখল মান্নবা লৈবাকশিংনা ইন্দো পেসিফিক্কী মতাংদা খুৎশম্নবগী তঙাই ফদবা হেনগৎলক্লি অমসুং পুম্নমক্না অমত্তা ওইনা য়ানরিবা ৱাফমসু মসিনি হায়না ঐহাক্না থাজবসু লৈ অদুগা প্রধান মন্ত্রীগা লুচিংবশিংগা ঙসি শানখিবা ৱারী-ৱাতাইশিংনা হীরম অসিগী মতাংদা পুক্নিং চঙনখি।

হিস হোলিনেস, পোপকা হয়েং উন্নবগী মতাংদা অমুক লাকপদা, প্রধান মন্ত্রীনা মহাক্কা তোঙানবা মীফম অমদা উন্নগনি হায়বদি ঐহাক খঙই, মহাক্না হকথেংননা মীওই অমমমগী মওংদা উন্নগনি। মদুগী মতুংদা দেলিগেসনগী থাক্কী ৱারী অমুক শাবা য়াই। ভেতিকান্না অকক্নবা ৱাফম অমত্তা থম্লক্ত্রি। হিস হোলিনেসকা ৱারী শাবগী ওইনদি, অকক্নবা ৱাফম নত্ত্রগা পান্দম লৈতবা অসিদি চৎনবী অমনি হায়না ঐহাক্না লৌই। মসিবু ঐখোয়না ইকায় খুম্নরি। ৱারী শাবগী হীরমশিংদা মালেমগী ওইবা মীয়ামগী মিৎয়েং অমসুং ঐখোয় খুদিংদা মরু ওইবা ওইরিবা কোবিদ-১৯, হকশেল অমসুং মসিগীদমক্তা ঐখোয়না মতৌ করম্না থবক তৌমিন্নবা য়াগনি, শান্তি অমসুং তংদু লৈতানা লৈনবা ঐখোয় পুন্না করম্না হোৎনগনি হায়বনচিংবা হীরম কয়াদা মিৎয়েং চঙগনি হায়না ঐহাক্না খল্লি।

হৌজিক অমুক, কোপ ২৬তা অদোম্না পনখিবা ফন্দ অমসুং তেক্নোলোজীগী মতাংগী ওইনদি, প্রধান মন্ত্রীনা ৱাফম খরা তত্তনা পল্লি। শম্না হায়রবদা, চাউখৎলক্লিবা লৈবাকশিংনা মরী লৈনবা পান্দমগী খোঙফম চেৎপগী ওইনদি, হায়রিবা লৈবাকশিং অসিনা পেরিসকী পেরিস এক্কোর্দতা থম্নখিবা পান্দমশিং ফংনবা কন্না হোৎনবা অমসুং পান্দম ফংনবা কয়া য়াওদুনা, হান্নগী পান্দম ফংনদুনা, অহেনবা পান্দম অমুক্কসু থম্নবগী ফিভম উবা ফংলি। প্রধান মন্ত্রীনা ঐখোয় ইশাগী খুদম লৌদুনা, ভারতনা পেরিসকী এন.দি.সি.গী পান্দম ফংবদা খজিক্তং ঙাইবদগী হেন্দোক্লদনা থমখিবা পান্দম কয়াগী ফিভমশিংদগী হেন্দোক্না মাই পাকপা ফংবা ঙম্লে হায়দুনা ফোংদোকখ্রবনি। অদুগা লোয়ননা, ক্লাইমেৎ ফাইনান্সিং, গ্রীন ফাইনান্সিং অমসুং গ্রীন তেক্নোলোজীগী মতাংদা থম্লিবা চাউখৎলক্লিবা লৈবাকশিংগী পান্দমশিং ফংহন্নবা ঐখোয়না মতৌ করম্না তেংবাংবগে হায়বগী মতাংদা অহেনবা মিৎয়েং চঙলিবনি। থৌওং অসিদা ঐখোয়না খোঙফম চেৎপগী মথক্তা, মখোয়না পান্দম ফংনবা তেংবাংনবগীদমক্তা পাংথোক্তবা য়াদ্রবা থবকশিংগী শোইরোইদবা থৌরাং য়াত্তুনা হোৎনগদবনি। মসিগা লোয়ননা, অইং-অশা হোংবগী শিংনবশিং থেংননবগীদমক্তা খুদক্কী ওইবা থবক কয়া অমসু পায়খৎপগী মথৌ য়াম্না তাই। ভারতনা পায়খৎলিবা চান্ননবা শিনবা, অৱাবগী চাং হন্থহনবগী খোঙথাংশিংগী মতাংদা ৱারী কয়া অমসু শান্নরি। খন্ন-নৈনবশিং অসিনা কয়া য়াম্না কান্নবা ফংবগে হায়বসু ঐখোয়না য়েংবা তাই হায়না ঐহাক্না খল্লি। লৈবাক কয়া অমনা হৌজিক্কী মতমদা পাংথোকফম থোকপা থবক পাংথোক্তবা মরম্না, পান্দম ফংনবগীদমক্তা নত্তনা অতোপ্পা অহেনবা থবক কয়া অমসু পাংথোকপগী তঙাই ফদবা লৈরে হায়না প্রধান মন্ত্রীনা হায়খিবসু লৈরবনি। পুন্সি মহিংদা অহোংবা লাকপগুম্বা অতোপ্পা হীরম কয়া অমসু য়েংশিনবগী মথৌসু তারক্লি। ভারতনা মহৌশা ইমাগা মতম পুম্বদা নুংশি চান্ননা হিংদুনা লাক্লি, ঐখোয়না পর কেপিতাগী মতাংদা খ্বাইদগী নেম্বা ইমিত্তরশিংগী মনুং চল্লি। মসিগা লোয়ননা, থৌওংশিং অসি পাংথোকপগী পাম্বৈশিংগী মনুংদগী অমদি, অইং-অশা হোংবগী মতাংদা তেম্পেরচর থ্রেসহোল্দ মথন্তা হন্থহনগদবা মালেমগী ওইবা সস্তেনেবল লাইফ-স্তাইল অমা মতৌ করম্না হিংবা য়াবগে হায়বগী মতাংদা নীংথিনা য়েংশিনবা অসিনি। মরম অদুনা, অইং-অশাগী হোংবগী ঐখোয়গী পান্দমগী পাংথোকফম থোকপা থৌওং অমদি ঐখোয়গী পুন্সি মহিংদা অহোংবা পুরকপনি।

অফঘানিস্তানগী মতাংদা ৱারী শারিবা অসিদা তেরোরিজমগী হীরম অসি ময়েক শেংনা পুথোক্লক্লি। অইং-অশা হোংবগী ফিভম অমসুং অফঘানিস্তানগী হীরম অনি অসি লুচিংবশিংনা শরুক য়াদুনা মতম চঙনা পাংথোক্কদবা থৌওংনি। অফঘানিস্তানগী মতাং অসি তোঙান্না তানা য়েংগদবা হীরম নত্তে হায়না প্রধান মন্ত্রীনা ময়েক শেংনা তাকপীখ্রে, অফবা অমসুং তংদু লৈতাবা লৈঙাক লৈহনবা ঙমদবা, শিংনবশিংগা মাইয়োক্নবা ঙমদবা অসি অহেনবা মিৎয়েং চঙফম থোকপা থৌওং অমা ওইরি অমসুং লমদ্ম অসিদগী থোক্লকপা খুদোংচাদবশিংবু হন্থহন্নবা ঐখোয় খুদিংনা শৌগৎফম থোকই হায়না ঐহাক্না খল্লি। মসিদি মালেমগী খুন্নাইনা নীংথিজনা য়েংশিনগদবা হীরম অমনি হায়না ঐহাক্না খল্লি। অফঘানিস্তানগী ফিভম অসিগী খ্বাইদগী মরু ওইবা মরম পুথোক্লদুনা মসিদা কুপ্না য়েংশিনবগী মথৌ তাই হায়না মহাক্না থমখ্রে। ৱাফম অসি য়াম্না মরু ওইবনি অমসুং য়ুরোপিয়ন য়ুনিয়ন অমসুং ইতালীদা লৈরিবা ঐখোয়গী পার্তনরশিংনা নীংথিনা  খঙলে। মখোয়নসু হীরম অসি তসেংনা য়েংশিনবগী মথৌ তারে হায়বা ৱাফমসু ফোংদোক্লে। হ্যুমেনতরিয়নগী ফিভমশিংদা মিৎয়েং চঙলিবসি অচুম্বনি অমসুং প্রধান মন্ত্রী, দ্রাঘীনা অফঘানিস্তানগী মীয়াম্না হৌজিক থোক্লিবা থৌদোকশিং অসিনা মরম ওইদুনা খুদোংচাদবা থেংনহন্দনবা তেংবাংবগী থৌওংশিং চত্থবগী মতাংদা জি.২০ সম্মিত্তা ফোংদোকখ্রবনি। প্রধান মন্ত্রীনা লৈঙাক্লিবা মীওইশিং অমসুং তেংবাংগী তঙাই ফদবা লৈরিবা লৈবাক্কী মীয়ামগী মরক্তা খেন্নবা অমা লৈগদবনি হায়বা ৱাফম থমখি। ঐখোয়না হ্যুমেনিতরিয়নগী তেংবাংশিং পীখি হায়না প্রধান মন্ত্রীনা হায়খ্রবনি। তেংবাংশিং অসি অফঘানিস্তান শিনবা থুংনা য়ৌহনগদবনি অমসুং লমদমসিগী মীয়ামশিংনা তেংবাংশিং অসি হকথেংননা ফংহন্নবা ঐখোয়না হোৎনগদবনি।

ঐহাক্না বাইলেতরেল মরীগী মতাংদা পন্নিংবা ৱাফম অমদি, হন্দক্কী চহি খরসিদা, ইতালীগা লৈনরিবা মরীনা মশক থোক্না ফগৎলকই হায়বগী ৱাখল্লোন অমা লৈরি অমসুং প্রধান মন্ত্রীনসু লৈনরিবা মরী, মরু ওইনা, শেল থাদবা, লল্লোন-ইতিক, মীয়াম মশেল লৈনবা মরীদা নুংশি-চানবা অমসুং ইকায় খুম্নবগী ফিভমশিং  উবা ফংই অমসুং প্রধান মন্ত্রী, দ্রাঘীদসু ৱাখল্লোন অসিগা চপ মান্ননা হন্নীংবগী অপাম্বা লৈ হায়রি। ঐখোয়গী প্রধান মন্ত্রীনা ভারত্তা লাক্নবা পাউজেলসু পীখ্রবনি। মহাক্না প্রসিদেন্ত চার্ল্স মিছেল অমসুং উর্সুলা ভোন দর লেয়েনবুসু ভারত্তা লাক্না পাউজেল পীখ্রবনি। মরম অদুনা, অখন্নবা হীরম খরদা, ঐহাক্না কোবিদ লৈবনরা হায়না খল্লি, থৌওং খরা লান্নবগী থৌওংসু থোক্লি। ঐখোয়না অসিগুম্বা ফবা থবক থৌরমশিং মখা চত্থহন্নীংই অমসুং ঐখোয়গী মরক্তা লৈনরিবা দিপ্লোমেতিক্কী মরীশিংদা চাউখৎপগী থৌওং লেপ্তনা লৈহন্নীংই। প্রধান মন্ত্রীনা পাউজেল্লিবা অসিসু হীরম অসিগী মরী লৈনৈ হায়বসি ঐহাক্না অদোম্নসু খলহন্নীংই।

শ্রী অরিন্দম বাগচী, ওফিসিএল স্পোক্সপর্সন: সরবু থাগৎচরি। ৱাহং অমা অনিমুক হংবা য়াখিগনি। প্রনয়।

প্রনয় উপাধ্যায়ঃ ঐহাক এ.বি.পি. ন্যুজকী প্রনব উপাঘ্যায়নি। গ্লোবেল সপ্লাই চেন অসি তোঙান-তোঙানবা মগুন চেলহনবসি য়াম্না মরু ওইবা ৱাফম অমনি অমসুং ভারতনা মসিগী মতাংদা অহেনবা মিৎয়েংসু চঙলি। ই.য়ু. অমসুং ই.য়ু.গী প্রসিদেন্তকা উন্নখিবদা হীরম অসিগী মতাংদা ৱারী শাখিবরা অমসুং মসিগী মতাংদা ভারতনা করম্বা থৌওং পাংথোক্তুনা মখা তানা চত্থগে হায়না খল্লিবগে?

ৱাঙাংলোইঃ অদোম্না ইন্দো-ইতালিয়ন মীফমগী মতাংদা করিগুম্বা খরা হায়বীবা য়াগদরা, মরু ওইনা, শেন্মিৎলোন্দা তেংবাংমিন্নবগী অনৌবা পনখৈশিংগী মতাংদা?

শ্রী অরিন্দম বাগচী, ওফিসিএল স্পোক্সপর্সন: থাগৎচরি।

শ্রী হর্শ বর্ধন সিংহ, ফোরেন সেক্রেতরীঃ য়াম্না ফরে। ঐহাক্না মসিগী পাউখুম হান্না থুনা পীরগে। ঐহাক্না হায়খিবগুম্না, প্রধান মন্ত্রী অনিনা লল্লোন-ইতিক অমসুং শেল থাদবসি য়াম্না মরু ওই হায়না খল্লি। ইতালীগী প্রধান মন্ত্রীনা হায়খিবদা, ভারত্তা শেল থাদনীংবা, কারবার তৌমিন্ননীংবা ইতালীগী কম্পেনী কয়া অমা লৈ। মতম য়াম্না লৈতবনা মরম ওইদুনা, মহাক্না অকুপ্পা মরোলদি হায়বা নঙখিদ্রে। অদুবু, প্রধান মন্ত্রী মোদীনা মহাক্না ভারত অমসুং ইতালীগী কম্পেনীশিংনা তেংবাংমিন্নদুনা থবক তৌমিন্নবা পাম্মি, ভারত্তা শেল থাদবগী মতাংদা ইতালীগী পুক্নিং চিংশিন্নীংই, মরু ওইনা, রিন্যুএবল ইনর্জী অমসুং ই-ত্রান্সপোর্তেসনগী ৱাহৌদোক অমা হৌজিক-হৌজিক লৈরিবা ওতোমোবিল সেক্তরদা অমসুং চকা অনি, অহুম পানবা ইলেক্ত্রিক্কী গারী অফবা কয়া শাবা ইতালীগী কম্পেনী কয়া অমসু লৈরি। মরম অদুনা, হীরমশিং অসিদা থবক তৌবদা কান্নবগী ওইথোকপা য়াবা কয়া অমা ঐহাক্না উবা ফংই। মরম অদুনা, লল্লোন-ইতিক্তা শেল থাদবা, ভারত অমসুং ইতালীগী মরক্তা শেন্মিৎলোনগী থৌওং কয়া লান্নবগী মতাংদা কান্নবা ৱারী কয়া লুচিংবা অনিনা ফমখিবা মীফমদা শান্নরমগনি হায়না ঐহাক্না খল্লি।

(হিন্দিদা ঙাংখিবা) প্রনয়জী, অদোমগী ৱাহং অসি সপ্লাই চেনগী মতাংদা ওইরে। নীংহন্নবা নাইদবা সপ্লাই চেন অসি য়াম্না মরু ওই। মসিগী মতাংদা ই.য়ু. অমসুং প্রধান মন্ত্রীগা ৱারী শাখি অদুবু য়াম্না কুপ্না খন্ন-নৈনবদি ঙমখিদ্রে। মসিগী মতাংদা নাকল অনিমক্না মখা তানা থবক পায়খৎপা পাম্মি হায়বসিমদি য়ানবা পুরকখি অমসুং মপাঙ্গল লৈবা সপ্লাই চেন অমা ঐখোয়না শেম্বা পাম্লিবা অসিগী ওইনসু তুংগী মতমদা পার্ত্নর অনিনা খুৎশম্নদুনা থবক তৌমিন্নগনি।

শ্রী অরিন্দম বাগচী, ওফিসিএল স্পোক্সপর্সন: সর, হিন্দি খঙদবা মীওই কয়া অমা য়াওরি। মরম অদুনা ঐহাক্না মসিগী ৱাহন্থোক অমুক্তা হন্দুনা হায়জগে। নীংহন্নবা নাইদবা সপ্লাই চেন অসি য়াম্না মরু ওই। মসিগী মতাংদা ই.য়ু. অমসুং প্রধান মন্ত্রীগা ৱারী শাখি অদুবু য়াম্না কুপ্না খন্ন-নৈনবদি ঙমখিদ্রে। মসিগী মতাংদা নাকল অনিমক্না মখা তানা থবক পায়খৎপা পাম্মি হায়বসিমদি য়ানবা পুরকখি অমসুং মপাঙ্গল লৈবা সপ্লাই চেন অমা ঐখোয়না শেম্বা পাম্লিবা অসিগী ওইনসু তুংগী মতমদা পার্ত্নর অনিনা খুৎশম্নদুনা থবক তৌমিন্নগনি।

শ্রী হর্শ বর্ধন সিংহ, ফোরেন সেক্রেতরীঃ মসি মরু ওইনা, ইন্দো পেসিফিক্কী মতাংদনি।

শ্রী অরিন্দম বাগচী, ওফিসিএল স্পোক্সপর্সন: মসিগা লোয়ননা, ঐখোয়না মীদিয়া ব্রিফিং লোইশিঞ্জরে। ঐখোয়গী নাক্তা মফমসিদা লাকপীবগী থাগৎচরি। ঐহাক্না সরবুসু, ঐখোয়গী মরক্তা তিনবীবগী থাগৎচরি। ঐখোয়না মথংদসু ই-পাউ কয়া অমা পীবা ঙমগনি হায়বগী থাজবা থম্লি। ঐখোয়গী সোসিএল মীদিয়া অমসুং ৱেবসাইত্তা য়েংবীয়ু। থাগৎচরি। নমস্কার।

শ্রী হর্শ বর্ধন সিংহ, ফোরেন সেক্রেতরীঃ থাগৎচরি।

*****