ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ତାଙ୍କ ବାସଭବନରେ ଟୋକିଓ ୨୦୨୦ ପାରାଲିମ୍ପିକ୍ କ୍ରୀଡାର ଭାରତୀୟ ଦଳ ପାଇଁ ଅଭ୍ୟର୍ଥନା ସମାରୋହର ଆୟୋଜନ କରିଛନ୍ତି । ଏହି ଦଳରେ ପାରା-ଆଥଲେଟ୍ସ ଏବଂ ସେମାନଙ୍କ କୋଚ୍ ମଧ୍ୟ ସାମିଲ ହୋଇଥିଲେ ।

ପ୍ରଧାନମନ୍ତ୍ରୀ ସମଗ୍ର ଦଳ ସହିତ ଏକ ଖୋଲା ଏବଂ ଅନୌପଚାରିକ କଥାବାର୍ତ୍ତା କରିଥିଲେ । ପାରାଲିମ୍ପିକ୍ସରେ ଐତିହାସିକ ପ୍ରଦର୍ଶନ ସହିତ ରେକର୍ଡ ଭାଙ୍ଗିବା ପାଇଁ ସେ ସେମାନଙ୍କୁ ଅଭିନନ୍ଦନ ଜଣାଇଛନ୍ତି । ସେ କହିଛନ୍ତି ଯେ ସେମାନଙ୍କର ଏହି ସଫଳତା ଦେଶର ସମଗ୍ର କ୍ରୀଡ଼ା ଜଗତର ମନୋବଳକୁ ଯଥେଷ୍ଟ ବୃଦ୍ଧି କରିବ ଏବଂ କ୍ରୀଡ଼ା ପ୍ରତିଯୋଗୀମାନେ ଆଗକୁ ଆସିବାକୁ ଉତ୍ସାହିତ ହେବେ । ସେ ଆହୁରି ମଧ୍ୟ କହିଛନ୍ତି ଯେ ସେମାନଙ୍କର ପ୍ରଦର୍ଶନ ଦ୍ୱାରା କ୍ରୀଡା ପ୍ରତି ଆଗ୍ରହ ଅନେକ ଗୁଣ ବୃଦ୍ଧି ପାଇଛି ।

ପ୍ରଧାନମନ୍ତ୍ରୀ ବିଶେଷ ଭାବରେ ଦଳର ଅଦମ୍ୟ ଆବେଗ ଏବଂ ଇଚ୍ଛାଶକ୍ତିର ପ୍ରଶଂସା କରି କହିଛନ୍ତି ଯେ ପାରା-ଆଥଲେଟ୍ସମାନେ ସେମାନଙ୍କ ଜୀବନରେ ପ୍ରତିକୂଳ ପରିସ୍ଥିତିକୁ ପ୍ରତିହତ କରି ଏପରି ଉଲ୍ଲେଖନୀୟ ପ୍ରଦର୍ଶନ ଦେଇଛନ୍ତି । ଯେଉଁମାନେ ପଦକ  ହାସଲ କରିପାରି ନାହାନ୍ତି ସେମାନଙ୍କ ମନୋବଳ ବଢାଇ ପ୍ରଧାନମନ୍ତ୍ରୀ କହିଛନ୍ତି ଯେ ଜଣେ ପ୍ରକୃତ କ୍ରୀଡ଼ାବିତ୍‍ ପରାଜୟ କିମ୍ବା ବିଜୟ ଦ୍ୱାରା ହତାଶ ହୁଅନ୍ତି ନାହିଁ ଏବଂ ଆଗକୁ ବଢନ୍ତି । ସେ କହିଛନ୍ତି ଯେ ସେମାନେ ଦେଶର ରାଷ୍ଟ୍ରଦୂତ ଏବଂ ସେମାନଙ୍କର ଉଲ୍ଲେଖନୀୟ ପ୍ରଦର୍ଶନ ଦ୍ୱାରା ସେମାନେ ବିଶ୍ୱ ସ୍ତରରେ ଦେଶର ସମ୍ମାନ ବୃଦ୍ଧି କରିଛନ୍ତି ।

ପ୍ରଧାନମନ୍ତ୍ରୀ କହିଛନ୍ତି ଯେ ସେମାନଙ୍କର "ତପସ୍ୟା, ପୁରୁଷାର୍ଥ ଏବଂ ପରାକ୍ରାମ” ମାଧ୍ୟମରେ ପାରା-ଆଥଲେଟ୍ସମାନଙ୍କ ପ୍ରତି ଲୋକଙ୍କ ଦୃଷ୍ଟିଭଙ୍ଗ ବଦଳିଛି । ସେ କହିଛନ୍ତି ଯେ ଆଜାଦି କା ଅମୃତ ମହୋତ୍ସବ ଉତ୍ସବ ଅବସରରେ ସେମାନେ କ୍ରୀଡା ଜଗତ ବାହାରେ କିଛି କ୍ଷେତ୍ର ଚିହ୍ନଟ କରିବା ଉଚିତ ଏବଂ ସେମାନେ କିପରି ଲୋକଙ୍କୁ ଉତ୍ସାହିତ କରିପାରିବେ ଏବଂ ପରିବର୍ତ୍ତନ ଆଣିବାରେ ସାହାଯ୍ୟ କରିବେ ତାହା ଅନୁସନ୍ଧାନ ହେବା ଉଚିତ୍‍ ।

ସେମାନଙ୍କୁ ନିମନ୍ତ୍ରଣ ଦେଇଥିବାରୁ ପାରା ଆଥଲେଟ୍ସମାନେ ପ୍ରଧାନମନ୍ତ୍ରୀଙ୍କୁ ଧନ୍ୟବାଦ ଜଣାଇବା ସହ ତାଙ୍କ ସହ ଗୋଟିଏ ଟେବୁଲରେ ବସିବା ଏକ ବଡ଼ ସଫଳତା ବୋଲି କହିଥିଲେ । ସେମାନଙ୍କର ପ୍ରୟାସରେ ନିରନ୍ତର ମାର୍ଗଦର୍ଶନ, ପ୍ରେରଣା ଏବଂ ସମର୍ଥନ ପାଇଁ ସେମାନେ ତାଙ୍କୁ ବିଶେଷ ଭାବରେ ଧନ୍ୟବାଦ ଜଣାଇଥିଲେ ଏବଂ କହିଥିଲେ ଯେ ଅନ୍ୟ ଦେଶର କ୍ରୀଡାବିତ୍‍ମାନେ ଆଶ୍ଚର୍ଯ୍ୟ ଚକିତ ହୋଇଥିଲେ ଯେତେବେଳେ ସେମାନେ ଜାଣିଲେ ଯେ ଭାରତୀୟ କ୍ରୀଡାବିତ୍‍ମାନେ ପ୍ରଧାନମନ୍ତ୍ରୀଙ୍କ ତରଫରୁ ଅଭିନନ୍ଦନ ଫୋନ୍ କଲ ପାଇଛନ୍ତି । ସେମାନଙ୍କ ପ୍ରଶିକ୍ଷଣ ପାଇଁ ସର୍ବୋତ୍ତମ ସମ୍ଭାବ୍ୟ ବ୍ୟବସ୍ଥା ପ୍ରସ୍ତୁତ କରିବାରେ ସରକାର କିପରି କୌଣସି ସୁଯୋଗ ଛାଡି ନାହାଁନ୍ତି ବୋଲି ସେମାନେ ଦର୍ଶାଇଛନ୍ତି ।

ଅନେକ ଖେଳାଳି ସେମାନଙ୍କର ସ୍ୱାକ୍ଷରିତ ଖେଳ ଉପକରଣ, ଯାହା ସହିତ ସେମାନେ ପଦକ ଜିତିଥିଲେ ତାହାକୁ ପ୍ରଧାନମନ୍ତ୍ରୀଙ୍କୁ ଉପହାର ଦେଇଥିଲେ । ସମସ୍ତ ପଦକ ବିଜେତାଙ୍କ ଦ୍ୱାରା ଦସ୍ତଖତ ହୋଇଥିବା ଏକ ଉତ୍ତରୀୟ ମଧ୍ୟ ପ୍ରଧାନମନ୍ତ୍ରୀଙ୍କୁ ଉପହାର ଦିଆଯାଇଥିଲା । ସେ କହିଛନ୍ତି ଯେ କ୍ରୀଡା ଉପକରଣ ନିଲାମ ହେବ ଏବଂ ଆଥଲେଟ୍ସମାନେ ତାଙ୍କୁ ସ୍ୱାଗତ କରିବେ । ଏହି ଅବସରରେ କେନ୍ଦ୍ର କ୍ରୀଡ଼ା ମନ୍ତ୍ରୀ ଏବଂ କେନ୍ଦ୍ର ଆଇନ ମନ୍ତ୍ରୀ ମଧ୍ୟ ଉପସ୍ଥିତ ଥିଲେ ।

HS