নহারোল অমসুং শান্ন-খোৎনবগী মন্ত্রালয়
স্পোর্তস মন্ত্রী অনুরাগ থাকুরনা শিন্দুনা ভারতকী ওলিম্পিক মেদলিস্তশিংবু হেরোগুম্না তরাম্না ওকখ্রে
তোকিও ২০২০ অসি ভারতকী ওইনদি অহানবা কয়া উবা ফংখিবা ওলিম্পিক গেম্স অমা ওইখি: অনুরাগ থাকুর
তীম ইন্দিয়াগী মাইপাকপা অসি অনৌবা ভারতনা মালেমবু করম্না খুদুম চন্নবা ইনোৎ হাপ্পগে হায়বগী মমিং অমা তারি: অনুরাগ থাকুর
Posted On:
09 AUG 2021 8:24PM by PIB Imphal
ঐখোয়গী ওলিম্পিক শান্নরোইশিংনা তোকিওদা মখোয়গী থোইদোক হেন্দোক্না শীংথানীংঙাই ওইবা মথৌনা-মরিংজেল উৎলুরবা মতুংদা হাল্লকপা অসিদা লৈবাক অসিগী কোনুংদা ঙসিগী নুমিদাং ৱাইরম অসি অতৈ নুমিৎ অমত্তগা মান্নদবা অমা ওইখি।
য়ুথ এফিয়র্স এন্দ স্পোর্তসকী কেন্দ্রগী মন্ত্রী শ্রী অনুরাগ থাকুরনা মেদলিস্ত তরেৎ মমিং ওইনা পল্লবদা, নীরজ চোপ্রা, রভি কুমার দহিয়া, মিরাবাই চনু, পি.ভি. সিন্ধু, বজ্রং পুনিয়া, লোভলিনা বোর্গোহেন অমসুং নুপাগী নেস্নেল হোকী তীমবু ঙসি ন্যু দিল্লীদা লৈবা অশোকা হোতেলদা তরাম্না ওকপগী অচৌবা থৌরম অমদা ওকখ্রে। মখোয়বু তরাম্না ওকপগী থৌরমদা শরুক য়াখিবশিংগী মরক্তা লো এন্দ জস্তিসকী কেন্দ্রগী মন্ত্রী শ্রী কিরেন রিজিজু; য়ুথ এফিয়র্স এন্দ স্পোর্তসকী রাজ্য মন্ত্রী শ্রীরভি মিত্তল অমসুং স্পোর্তস ওথোরিতী ওফ ইন্দিয়াগী দিরেক্তর-জেনরেল, শ্রী সন্দিপ প্রধানসু য়াওখি।
গোল্দ মেদলিস্ত নীরজ, সিলভর মেদলিস্ত রভি, ব্রোঞ্জ মেদলিস্ত বজ্রং, লোভলিনা অমসুং মনপ্রীতনা ঙরাং নুমিদাং তোকিও ২০২০গী লোইশিনবগী থৌরমদা শরুক য়ারবা মতুংদা শাংনা ফ্লাইৎ তোংদুনা লাক্লবা মতুংদা ভারত্তা হল্লকখিবনি। মখোয়গা লোইননা তরাম্না ওকপগী থৌরম অদুদা অতৈ মেদলিস্ত মিরাবাই অমসুং সিন্ধুসু শরুক য়াখি।
স্পোর্তস মন্ত্রী, শ্রী অনুরাগ থাকুরনা হায়, “তোকিও ২০২০ অসি ভারতকী ওইনদি অহানবা কয়া উবা ফংখিবা ওলিম্পিক গেম্স অমা ওইখি। তীম ইন্দিয়াগী মাইপাকপা অসি অনৌবা ভারতকী অপাম্বশিং অমসুং স্পোর্তস য়াওনা মালেমবু... করম্না খুদুম চন্নবা ইনোৎ হাপ্পগে হায়বগী মমিং অমা তারি। ওলিম্পিক গেম্সনা ঐখোয়দা সেল্ফ-দিসিপ্লিন অমসুং দেদিকেসননা চেম্পিয়নশিং ওইহনবা ঙম্মি উৎখ্রে। তীম ইন্দিয়ানা মাই পাকখি অমসুং ইথিল পীখি অমরোমদনা ভারত মচাশিংনা মফম কয়াদা থৌগৎপা অমসুং হরাও-নুংঙাইবা ফোঙদোকখি। তশেংনা স্পোর্তস অসি অমত্তা ওইহল্লিবা অথোইবা লম অমনি মরমদি ঐখোয়গী শান্নরোইশিং অসি খুঙ্গংশিং অমসুং শহরশিংদগী, অৱাংদগী মখা, নোংপোক্তগী নোংচুপদগী লাকখি। মখোয়গী খোঙচৎ অসি অখাং কনবা অমসুং শান্ন-খোৎনবদা অথোইবা ওইবগী ফিদম্নীংঙাই ওইবা ৱারী অমনি।”
স্পোর্তস মন্ত্রীনা মখা তারদুনা হায়, মসিদা অহানবা কয়া উবা ফংখি, মেম্বর ১২৮কী ভারতকী কন্তিজেন্ত, ওলিম্পিক মেদল ৭ ফংবা, ঐখোয়গী এথলেতিক্স ইভেন্তদা অহানবা ওলিম্পিক গোল্দ মেদল, পি.ভি. সিন্ধুনা থংনা-থংননা ওলিম্পিক গেম্সতা মেদল অনি লৌবা, চহি ৪১গী মতুংদা ভারতকী নুপাগী তীমনা হোকীদা মেদল (ব্রোঞ্জ) ফংখিবা অমসুং নুপীগী হোকী তীমনা পুৱারী ওইনা সেমি-ফাইনেল্সতা চংখিবা। ঐখোয়গী ওইনা ভারত্তগী অহানবা নু্পী সেলরনা ওলিম্পিক্সকীদমক ক্বালিফাই ওইখি – নেথ্রা কুমানন, ভারত্তগী অহানবা ভারত মচা ফেন্সরনা ওলিম্পিক্স চংবা ঙমখি – ভবনি দেবি, ইক্বেস্ত্রিয়ন ইভেন্তিদা ভারত মচা অমনা খ্বাইদগী ফজবা মফম কনবা ঙমখি – ফৌৱদ মির্জা, ভারত মচা রোৱরশিংগী ওইনা খ্বাইদগী ফজনা লোইশিনখিবা, অদিতীনা গোল্ফতা খ্বাইদগী ৱাংবা মফম য়ৌবা ঙমখিবা ভারত মচা অমা ওইখি অমসুং অভিনাশ সবলেনা স্তীপলচেজতা নেস্নেল রেকোর্দ অমা থম্বা ঙমখি। অমসুং মখা তাবা ওইনা, ভারত্তা স্পোর্তসকী য়ুম্ফমশিং অসি মখোং চেৎলি হায়না হায়জগে; প্রধান মন্ত্রী শ্রী নরেন্দ্র মোদীগী লুচিং মখাদা তি.ও.পি.শিং অমসুং খেল ইন্দিয়া অসিগুম্বা তোঙান-তোঙানবা স্কীমশিং অসিনা পোদিয়ম য়োবা ঙম্বগী ফলশিং অদু উৎপা ঙমখ্রে। ঐখোয়না মখা তানা ঐখোয়গী শান্নরোইশিং শৌগৎকনি অমসুং ভারত অসি শান্ন-খোৎনবগী পাৱরহাউস অমা ওইহন্নবা হোৎনগনি হায়না মন্ত্রীনা থাজবা পীখ্রে।
শ্রী কিরেন রিজিজুনা শান্নরোই পুম্নমক্কী পর্ফোর্মেন্সশিংবু থাগৎখ্রে অমসুং ২০২৮কী ওলিম্পিক্সদা ভারত অসি ফোর্স অমা ওইনা উরগনি হায়না নৌহৌনা নীংশিংখ্রে। “ঙসি ঐখোয়গী চেম্পিয়ন ওইরক্লবা শান্নরোইশিংগা লোইননা মফম অসিদা লেপমিনবা অসিদা ঐহাক ঙমখৈ লৈতনা নুংঙাইবা পোকই। মসি ভারতনা ওলিম্পিক্সতা খ্বাইদগী ফজবা পর্ফোর্মেন্স উৎপা ঙমখিবা পুৱারী ওইহৌরগদবা ইভেন্ত অমনি। ঐখোয়না চহি ৪১গী মতুংদা হোকীগী মেদল অমা লৌবা অমসুং এথেলেতিক্সতা অহানবা গোল্দ লৌখিবদা ঐখোয়না য়াম্না চাউথোকচবা পোকই। অমসুং শুপ্নগী ঐখোয়গী মেদল লৌরকপশিং নত্তনা তোকিওদা চৎখিবা ঐখোয়গী শান্নরোই খুদিংমক্না মখোয়গী অঙম্বা থাক্তা হোৎনখি অমসুং মখোয় পুম্নমকপু ঐহাক্না থাগৎপা ফোঙদোকচরি। মসি শুপ্নগী অহৌবা অমনি মরমদি ভারতনা স্পোর্তকী লমদা অমুক হন্না হল্লকপা হৌজিক্তি উবা ফংলে অমসুং ২০২৮ ওলিম্পিক্সতা ভারত অসি ফোর্স অমা ওইনা উরগনি হায়না ঐহাক্না থাজৈ” হায়না শ্রী রিজিজুনা ফোঙদোকখ্রে।
শ্রী নিসিথ প্রমানিক ভারতকী শান্নরোইশিংগী পর্ফোর্মেন্স অদুবু থাগৎলদুনা নখোয়না ভারতপু চাওথোকচবা পোকহল্লে হায়না ফোঙদোকখি। মেদল ফংলকপা পুম্নমকপু থাগৎপা ফোঙদোক্লদুনা ভারতকী কন্তিজেন্তনা তোকিও ওলিম্পক্সতা মেদল ৭ লৌদুনা ওলিম্পিক্স অতৈদগী খ্বাইদগী মশিং য়াম্না মেদল লৌবা ওইরি হায়না শ্রী প্রমানিক্না মখা তাখি। মসি লাক্কদবা চারোলশিংনা চাংদম্নগদবা মশান্নশিংদা শরুক য়ানবা অমসুং ভারতকী মাই পাকপা পুরক্নবা ইনোৎকী অচৌবা হৌরকফম অমা ওইরদুনা পুৱারী ওইরগবা অমসুং কাওঙম্লরোইদবা থৌরম অমা ওইরগনি।
নুপাগী জেবলিন থ্রো ফাইনেলদা মিতর ৮৭.৫৮ লংদুনা এথলেতিক্সতা ভারতকী ওইনা পুৱারী ওইরবা গোল্দ লৌখিবা নীরজ চোপ্রাদগী হৌরগা ভারতকী ওইনা তোকিও ২০২০ অসিদা ‘অহানবা’ কয়ামরুম অমসুং অতোপ্পা মশক থোকপশিং উবা ফংখি। নিংতমলবা ভারতকী এথলেতিক্সতা অহানবা গোল্দ মেদল ওইবতা নত্তনা এথলেতিক্সতা মেদল লৌবা ঙম্বা অহানবা ভারত মচাসু ওইখি।
পি.ভি. সিন্ধুনা রিও ২০১৬দা সিল্ভর অমসুং তোকিও ২০২০দা ব্রোঞ্জ লৌসুনা থংন-থংননা ওলিম্পিক্স মেদল অনি লৌখিবা ভারতকী অহানবা নুপী শান্নরোই ওইখি। মিরাবাই চনুনা মমিং লৈরবা কর্নম মালেশ্বরিগী মতুংদা লৈবাক অসিদগী ৱেতলিফতিংদা মেদল লৌবা ঙম্বা অনিশুবা শান্নরোই অমসুং সিল্ভর মেদল লৌবা ঙম্বা অহানবা ৱেতলিফতর ওইবা ঙমখি।
অমরোমদা ভারতকী নুপাগী হোকী তীম্না মোস্কো ওলিম্পিক্স ১৯৮০দা গোল্দ মেদল লৌখিবদগী হোকীদা অহানবা ওইনা ওলিম্পিক্সতা মেদল লৌখ্রে, অদুগা ভারতকী নুপী হোকী তীম্না অহানবা ওইনা ওলিম্পিক্সতা সেমি-ফাইনেল চংবা ঙমখি। তোকিও গেম্স অসিদা রেকোর্দ ওইনা ভারত্তগী শান্নরোই ১২৮না শরুক য়াখি অদুগা মেদল ৭ লৌদুনা মমাংগী ওলিম্পিক্সশিংদগী মেদল খ্বাইদগী মশিং য়াম্না লৌবা ঙম্বা ওইখি।
রভি দাহিয়ানা লৈবাক অসিদগী ওলিম্পিক্সতা সিল্ভর মেদল ফংখিবা অনিশুবা রেস্তলর ওইখ্রে অদুগা লবলিনা বোর্গোহেন্না মমিং লৈরবা মেরী কোমগী মতুংদা ওলিম্পিক্সতা ব্রোঞ্জ মেদল ফংখিবা অনিশুবা নুপী ওইখ্রে অমসুং অপুনবগী ওইনা ওলিম্পিক্স মেদল ফংখিবা অহুমশুবা ভারতকী বোক্সর ওইখ্রে। গেম্স অসিগী অতোপ্পা মশক নাইরবা শান্নরোইশিংগী মনুংদা ভাবানি দেবী, নেথ্রা কুমানন অমসুং অদিতী অশোক য়াওরি। অদুগা ভাবানিনা ফেন্সর মশান্না হেক হাপচিল্লকপদগী ওলিম্পিক্সতা ভারত্তগী শরুক য়াখিবা অমত্তা ঙাইরবা ফেন্সর ওইরি, নেথ্রানা ভারত্তগী ওলিম্পিক্সকীদমক ক্বালিফাই ওইখিবা অহানবা নুপী সেলর ওইরি। অমরোমদা অদিতী অশোক্না গোল্ফতা ৪শুবদা তাখিদুনা ওলিম্পিক্সতা মশান্না অসিদা ভারতকী ওইনা খ্বাইদগী ৱাংনা মফম রেজিস্তর তৌখিবা ওইরি।
*******
(Release ID: 1744229)
Visitor Counter : 256
Read this release in:
English
,
Urdu
,
Marathi
,
Hindi
,
Bengali
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam