ന്യൂഡൽഹി, ജൂൺ 30, 2021

രാജ്യത്തെ കോവിഡ്-19 രണ്ടാം തരംഗത്തിനിടയിൽ, ഇനിയും കോവിഡ്-19 തരംഗങ്ങൾ ഉണ്ടാവുകയാണെങ്കിൽ, അത് കുട്ടികളെ പ്രതികൂലമായി ബാധിക്കുന്നതിനുള്ള ഉയർന്ന അപകടസാധ്യതയെക്കുറിച്ച് നിരവധി ചോദ്യങ്ങൾ മാധ്യമങ്ങളിൽ ഉയർന്നിട്ടുണ്ട്.

ഈ ആശങ്കയെക്കുറിച്ച് വിദഗ്ദ്ധർ, പല പ്ലാറ്റ്ഫോമുകളിലും വിശദീകരിച്ചിട്ടുണ്ട്.

2021 ജൂൺ 1 ന് കേന്ദ്ര ആരോഗ്യ മന്ത്രാലയത്തിന്റെ കോവിഡ്-19 നെക്കുറിച്ചുള്ള വാർത്ത സമ്മേളനത്തിൽ, നീതി ആയോഗ് അംഗം (ആരോഗ്യം) ഡോ. വി. കെ. പോൾ, കുട്ടികൾക്ക് അണുബാധയുണ്ടാവുകയാണെങ്കിൽ ഫലപ്രദമായ സംരക്ഷണവും ചികിത്സയും നൽകുന്നതിന് ആവശ്യമായ ആരോഗ്യ സംവിധാനങ്ങൾ ഏർപ്പെടുത്തിയിട്ടുണ്ടെന്ന് അറിയിച്ചിരുന്നു. കുട്ടികളിലെ കോവിഡ്-19 പലപ്പോഴും രോഗലക്ഷണങ്ങളില്ലാത്തതാണ്, അപൂർവ്വമായി മാത്രമേ ആശുപത്രി പ്രവേശനം ആവശ്യമായി വരികയുള്ളൂ എന്ന് അദ്ദേഹം പറഞ്ഞു. എങ്കിലും രോഗബാധിതരായ കുട്ടികളിൽ, വളരെ ചെറിയ ശതമാനം പേർക്ക് ആശുപത്രിവാസം വേണ്ടിവന്നേക്കാം എന്നും അദ്ദേഹം പറഞ്ഞു
(https://pib.gov.in/PressReleasePage.aspx?PRID=1723469).

2021 ജൂൺ 8 ന്‌ നടന്ന കോവിഡ്-19 നെക്കുറിച്ചുള്ള വാർത്താ സമ്മേളനത്തിൽ, എയിംസ്, ന്യൂഡൽഹി ഡയറക്ടർ ഡോ. രൺ‌ദീപ് ഗുലേറിയ, കോവിഡ് തുടർ തരംഗങ്ങളിൽ, കുട്ടികൾക്ക് ഗുരുതരമായ രോഗബാധയുണ്ടാകുമെന്ന് തെളിയിക്കുന്നതിന് ഇന്ത്യയിൽ നിന്നോ, ആഗോളതലത്തിൽ നിന്നോ ഒരു വിവരവും ഇല്ലെന്ന് പറഞ്ഞു. ആരോഗ്യമുള്ള കുട്ടികളിൽ, ആശുപത്രി വാസം ആവശ്യമില്ലാതെ തന്നെ, നേരിയ രോഗലക്ഷണങ്ങളോടെ അസുഖം ബാധിക്കുകയും പിന്നീട് ഭേദമാവുകയും ചെയ്തു. അതേസമയം, ഇന്ത്യയിൽ രണ്ടാമത്തെ തരംഗത്തിനിടെ കോവിഡ്-19 അണുബാധയെത്തുടർന്ന് ആശുപത്രിയിൽ പ്രവേശിപ്പിച്ച കുട്ടികൾക്ക് ഒന്നുകിൽ അനുബന്ധ രോഗാവസ്ഥയോ അല്ലെങ്കിൽ പ്രതിരോധശേഷിക്കുറവോ ഉണ്ടായിരുന്നതായി അദ്ദേഹം പറഞ്ഞു (https://www.pib.gov.in/PressReleasePage.aspx?PRID=1725366).

2021 ജൂൺ 25 ന് നാഷണൽ ടെക്നിക്കൽ അഡ്വൈസറി ഗ്രൂപ്പ് ഓൺ ഇമ്മ്യൂണൈസേഷൻ (എൻടിഎജിഐ) പ്രവർത്തക സമിതി അധ്യക്ഷൻ, ഡോ. എൻ. കെ. അറോറ, 2-18 വയസ്സിന് ഇടയിൽ പ്രായമുള്ള കുട്ടികളിൽ, കോവാക്സിൻ പരീക്ഷണം ആരംഭിച്ചതായും ഈ വർഷം സെപ്റ്റംബർ - ഒക്ടോബർ മാസങ്ങളിൽ ഇതിന്റെ ഫലം ലഭിക്കും എന്നും പറഞ്ഞു. കുട്ടികൾക്ക് അണുബാധ പിടിപെട്ടേക്കാമെങ്കിലും അവർക്ക് ഗുരുതരമായ രോഗം വരില്ലെന്ന് അദ്ദേഹം പറഞ്ഞു (https://pib.gov.in/PressReleseDetailm.aspx?PRID=1730219).

കുട്ടികളിൽ (18 വയസ്സിന് താഴെയുള്ളവർ) കോവിഡ്-19 കൈകാര്യം ചെയ്യുന്നതിനുള്ള മാർഗ്ഗനിർദ്ദേശങ്ങൾ കേന്ദ്ര ആരോഗ്യ കുടുംബക്ഷേമ മന്ത്രാലയം 2021 ജൂൺ 18 ന് പുറത്തിറക്കിയിട്ടുണ്ട്
(https://www.mohfw.gov.in/pdf/GuidelinesforManagementofCOVID19inCHILDREN18June2021final.pdf). 

RRTN/SKY