PIB Headquarters
पत्र सूचना कार्यालयाचे कोविड-19 संबंधित बातमीपत्र
Posted On:
12 JUN 2021 9:38PM by PIB Mumbai
नवी दिल्ली/मुंबई 12 जून 2021
आरोग्य मंत्रालयाची कोविड-19 घडामोडींवरील माहिती
भारतात मागील 24 तासात 84,332 इतकी नव्या रुग्णांची नोंद झाली आहे. देशात आता सलग पाचव्या दिवशी दैनंदिन रुग्णसंख्येची नोंद 1 लाखांपेक्षा कमी झाली आहे. हे केंद्र आणि राज्ये- केंद्रशासित प्रदेशांच्या सततच्या आणि एकत्रितपणे केलेल्या प्रयत्नांचे परिणाम आहेत.
भारतातील सक्रीय रुग्णसंख्येत सातत्याने घसरण होत आहे. सध्या देशातील सक्रीय रुग्णसंख्या 10,80,690 इतकी आहे. सलग बाराव्या दिवशी ती 20 लाखांपेक्षा कमी आहे.
मागील 24 तासांत रुग्णसंख्येत एकूण 40,981 ने घट झाली आणि देशाच्या एकूण बाधित रुग्णसंख्येच्या ती केवळ 3.68 टक्के इतकी आहे.
कोविड संसर्गातून मोठ्या प्रमाणावर रुग्ण बरे होत आहेत. देशात सलग 30 व्या दिवशी दैनंदिन नव्या रुग्णांपेक्षा बरे होणाऱ्यांची संख्या अधिक आहे. मागील 24 तासात 1,21,311 रुग्ण बरे झाल्याची नोंद करण्यात आली आहे. दैनंदिन नव्या रुग्णांच्या तुलनेत 36,979 आणखी रुग्ण गेल्या 24 तासात बरे झाले आहेत.
महामारीच्या प्रारंभापासून कोविड – 19 संसर्ग झालेल्यांपैकी 2,79,11,384 लोक बरे झाले आहेत. तर मागील 24 तासात 1,21,311 रुग्ण बरे झाले. त्यामुळे बरे होणाऱ्यांचा कल वाढता असून बरे होण्याचा एकूण दर 95.07 % वर पोहोचला आहे.
देशात चाचण्यांच्या क्षमतेत सातत्याने वाढ कायम असून गेल्या 24 तासात एकूण 19,20,477 चाचण्या करण्यात आल्या. देशात आतापर्यंत एकूण 37.62 कोटींपेक्षा अधिक (37,62,32,162) चाचण्या करण्यात आल्या.
देशभरात एकीकडे चाचण्यांचे प्रमाण वाढत आहे त्याचवेळी साप्ताहिक पॉझिटिव्हिटीमध्ये घसरणीचा कल कायम आहे. साप्ताहिक पॉझिटिव्हिटी दर सध्या 4.94 % इतका, तर दैनंदिन पॉझिटिव्हिटी दर 4.39% टक्के इतका आहे. सलग 19 व्या दिवशी तो 10 टक्क्यांपेक्षा कमी आहे.
देशव्यापी लसीकरण मोहिमेअंतर्गत मागील 24 तासांमध्ये लसीकरणाने 25 कोटींचा टप्पा पार केला आहे. गेल्या 24 तासात 34,33,763 लसीकरणाच्या मात्रा देण्यात आल्या.
आज सकाळी 7 वाजेपर्यंत उपलब्ध झालेल्या माहितीनुसार, 34,64,228 सत्रांमध्ये एकूण 24,96,00,304 लसीच्या मात्रा देण्यात आल्या.
इतर अपडेट्स :
- देशव्यापी लसीकरण मोहिमेचा भाग म्हणून केंद्र सरकार, राज्य आणि केंद्रशासित प्रदेशांना कोविड प्रतिबंधक लसीच्या मात्रा मोफत पुरवित आहे. चाचणी, रुग्णाच्या संपर्कातील व्यक्तींचा शोध, उपचार आणि कोविडला प्रतिबंध करणारे वर्तन यासह लसीकरण हा सुद्धा महामारी प्रतिबंध आणि व्यवस्थापनाच्या धोरणाचा एक अविभाज्य भाग आहे.
- कोविन ॲप व्यवस्थेवरील नागरिकांची माहिती कथितरित्या (डेटा) हॅक म्हणजेच चोरी झाल्याच्या प्रकरणाचा तपास, इलेक्ट्रोनिक्स आणि माहिती तंत्रज्ञान मंत्रालयाच्या कॉम्प्युटर आप्तकालीन प्रतिसाद चमूद्वारे केला जात आहे.
- जीएसटी अर्थात वस्तू आणि सेवा कर परिषदेची 44वी बैठक आज केंद्रीय अर्थ व कॉर्पोरेट व्यवहार मंत्री निर्मला सीतारमण यांच्या अध्यक्षतेखाली व्हिडिओ कॉन्फरन्सिंगद्वारे झाली. कोविड -19 मध्ये मदत आणि व्यवस्थापनात वापरल्या जाणाऱ्या विशिष्ट वस्तूंवरील जीएसटी दरात 30 सप्टेंबर 2021 पर्यंत कपात करण्याचा निर्णय परिषदेने आपल्या बैठकीत घेतला आहे.
- केंद्र सरकार देशातील ग्रामीण भागात पुरेशा आरोग्यविषयक पायाभूत सेवासुविधा नियमितपणे पुरवत नसल्याचा आरोप करणारे वृत्त काही प्रसारमाध्यमांनी दिले आहे. केंद्र सरकारने केलेले दुर्लक्ष आणि उदासीनतेमुळे, ग्रामीण भागात कोरोनाचा मोठा संसर्ग झाला, असा आरोपही त्यात करण्यात आला आहे. महामारीच्या संकट काळात केंद्र सरकारने गावांकडे पूर्ण दुर्लक्ष केल्याचेही या वृत्तात म्हटले आहे.
- एका प्रख्यात आंतरराष्ट्रीय मासिकाने आपल्या लेखात अंदाज वर्तवला आहे की भारतात कोविड -19 च्या मृत्यूच्या अधिकृत आकड्यांपेक्षा पाच ते सात पटीने अधिक मृत्यू झाले आहेत. हा लेख काल्पनिक आकडेवारीवर आधारित असून ती आकडेवारी निराधार असून लेख चुकीची माहिती देणारा आहे.
- नुकत्याच केलेल्या अभ्यासाचा दाखला देणारे प्रसारमाध्यमातील काही अहवाल असे सांगतात की, 'विषाणूचे निरनिराळे प्रकार पाहता, कोविशील्डच्या मात्रांमधील अंतर कमी करणे इष्ट ठरेल.'
- काही ट्विटर वापरकर्त्यांनी अलिकडेच ग्रामीण भागातील कोविड -19 व्यवस्थापनाविषयी ट्विट केले होते. या ट्वीटमध्ये उपस्थित केलेल्या मुद्यांमध्ये गाव पातळीवर चाचणी , अलगीकरण आणि क्लिनिकल व्यवस्थापन सुविधांचा अभाव, आरोग्यसेवा कामगारांकडून औषधांचा अति वापर , पीपीईची कमतरता इ.चा समावेश होता.
- कोविड-19 रुग्णांवर उपचार करताना त्यांच्या प्रकृतीत सुधारणा करण्याच्या उद्देशाने कॉल्किसीन या औषधाची सुरक्षितता आणि प्रभावीपणा तपासून पाहण्यासाठी वैज्ञानिक आणि औद्योगिक संशोधन परिषद (सीएसआयआर) आणि लक्साई लाईफ सायन्सेस यांना भागीदारीमध्ये दुसऱ्या टप्प्यातील दोन प्रकारच्या वैद्यकीय चाचण्या करण्याची परवानगी डीसीजीआयने दिली आहे. या महत्त्वाच्या चाचण्यांमध्ये सीएसआयआरच्या हैदराबाद येथील इंडियन इन्स्टिट्युट ऑफ केमिकल टेक्नॉलॉजी (आयआयसीटी) आणि जम्मू येथील इंडियन इन्स्टिट्युट ऑफ इंटेग्रेटीव्ह मेडीसीन (आयआयआयएम) या संस्थाची लक्साई लाईफ सायन्सेस सोबत भागीदारी आहे.
- येत्या 21 जून ला साजऱ्या होणाऱ्या सातव्या आंतरराष्ट्रीय योग दिनानिमित्त एक विशेष ऑनलाईन कार्यक्रम शुक्रवारी रात्री आयोजित करण्यात आला होता. या कर्टन रेझर कार्यक्रमानिमित्त अनेक नामवंत योग गुरु आणि योग अभ्यासकांसह दोन केंद्रीय मंत्रीदेखील या ऑनलाईन व्यासपीठावर एकत्र आले होते. आपल्या वैयक्तिक हितासाठी तसेच मानवतेच्या कल्याणासाठी जागतिक समुदायाने योगाभ्यासाचा अवलंब करावा, असे आवाहन या सर्व मान्यवरांनी केले. यावेळी योगाला समर्पित अशा ‘नमस्ते योगा’ या ॲपचेही उद्‌घाटन करण्यात आले.
- राष्ट्रीय औषध मूल्य प्राधिकरण (एनपीपीए) च्या दिनांक 3 जून 2021 च्या अधिसूचनेनुसार ऑक्सिजन कॉन्सेन्ट्रेटर्ससाठी वितरकांच्या किमतीवर (पीटीडी) ट्रेड मार्जिन मर्यादा 70 टक्के ठेवण्यात आली आहे. त्यानुसार ऑक्सिजन कॉन्सेन्ट्रेटर्सच्या एकूण 104 उत्पादक / आयातदारांनी 252 उत्पादने / ब्रँडसाठी सुधारित कमाल किरकोळ किंमत (एमआरपी) सादर केली आहे .
Jaydevi PS/P.Malandkar
सोशल मिडियावर आम्हाला फॉलो करा: 
@PIBMumbai 
/PIBMumbai 
/pibmumbai 
pibmumbai[at]gmail[dot]com
(Release ID: 1726681)
Visitor Counter : 148