তেলেকম্ম্যুমিকেসন মিনিস্ত্রীগী দিপার্তমেন্ত ওফ তেলেকম্ম্যুমিকেসনস (দি.ও.তি.)না খঙহল্লক্লি মদুদি সোসিএল মেদিয়াগী প্লেতফোর্ম কয়া অমদা ৫.জি. মোবাইল তাৱর চাংয়েং তৌবনা কোরোনাভাইরসকী অনিশুবা ৱেব অসি থোক্লকপনি হায়না অরানবা পাও কয়া অমা শন্দোক্লি। দি.ও.তি.না প্রেসতা থোক্লরপা চেরোল অমদা মসি অরানবা পাওনি য়ুমফম য়াওদে হায়না ফোদোরক্লি। প্রেস স্তেতমেন্ত অসিনা মীয়ামদা খঙহল্লি মদুদি ৫.জি. তেক্নোলোজীগা কোবিদ-১৯ শন্দোকপগা মরী লৈনদে অমসুং হিরম অসিদা লান্না লমজিংদুনা অরানবা পাউ অমসুং তোংঙা শন্দোক্তনবা কন্না হায়রি। ৫.জি. তেক্নোলোজীগা কোবিদ-১৯ লায়চৎ শন্দোকপগা মরী লৈনৈ হায়না মরাল শিরিবা অসি অরানবনি অমসুং সাইন্তিফিক ওইবা য়ুমফম য়াওদে হায়রি। মসিগী মথক্তা, ভারত্তা ৫.জি. নেতৱার্ক্কী চাংয়েং অমত্তা তৌখিবা লৈখিদ্রি হায়না খঙহল্লক্লি। মরম অদুনা ৫.জি.গী ত্রাইয়েল অমসুং নেতৱার্ক্না ভারত্তা কোরোনাভাইরস থোকহল্লি হায়রিবা অসি য়ুমফম য়াওদবা অরানবা পাওনি হায়না হায়রি। 

মোবাইল তাৱরনা থোকহল্লিবা নন-আইয়োনাইজিং রেদিও ফ্রিক্বেন্সিশিং অসি য়াম্না পীকপা শক্তি অমনি অমসুং মসিনা মীওইবা য়াওনা অহিংবা জিব পানবা পুম্বগী সেলদা অমাং-অতা থোকহনবা ঙমদে। দিপার্তমেন্ত ওফ তেলেকম্ম্যুমিকেসনস (দি.ও.তি.)না রেদিও ফ্রিক্বেন্সি ফীল্দ (মদুদি বেজ স্তেসন ইমিসন) হায়রিবা অসিনা ইন্তর্নেস্নেল কমিসন ওন নন-আইয়োনাইজিং প্রোজেক্সন (আই.সি.এন.আই.আর.পি.) অমসুং দবল্যু.ঐচ.ও.না পীরিবা চৎনগদবা অসিদগী শরুক ১০ হেন্না চেকশিন্না অকক্নবা চৎনগদবা থম্লি।     

দি.ও.তি.না মাংজৌননা লৌখৎলবা খোঙথাংশি:

তি.এস.পি.এস.না য়াম্না চেকশিন্না চৎন-কাংলোনশিং ইন্নবা দি.ও.তি.না নিংথিনা থৌওং কয়া অমা পায়কৎতুনা লৈরে। অদুবু কনাগুম্বা মীওই অমনা মোবাইল তাৱরনা রেদিও ৱেবশিং অসি দিপার্তমেন্তনা পীরিবা অসিগী ৱাংমদা খুদোংথিনিঙাই ওইরে হায়বগী চিংনবা লৈরবদি, ই.এম.এফ.মিজরমেন্ত/তেস্তিং অমা তরঙ সনচার পোর্তেল https://tarangsanchar.gov.in/emfportal অসিদা হংবিবা য়াগনি।  

মোবাইল তাৱরদগী ই.এম.এফ. ইমিসন্না হকচাংদা শোকহল্লি হায়না প্রজা মীয়াম্না অকিবা ফাওরিবা অসি হন্থনবা, দি.ও.তি.না মীয়ামদা ই.এম.এফ. রেদিএসনগী মরমদা পাওজেল কয়া অমা শন্দোক্নবা খোঙথাং কয়া অমা লৌখৎলি মদুদি নেসন-ৱাইদ এৱেয়নেস প্রোগ্রাম, ই.এম.এফ.কা মরী লৈনবা হিরম কয়াদা পমফ্লেতস/ইনফোর্মেসন ব্রোচর য়েন্থোকপা, দি.ও.তি.গী ৱেবসাইত্তা ই.এম.এফ. কা মরী লৈনবা হিরমশিংদা মরীক চুম্বা পাউ হাপকৎপা, পাউচেদা খঙহনবা, “তরঙ সনচার” পোর্তেল হৌদোকপা অসিনচিংবা অসিনি। দি.ও.তি.গী ফিল্দ য়ুনিৎশিংনা মীয়ামদা মোবাইল তাৱরদগী ই.এম.এফ. ইমিসন্না হকচাংদা শোকহল্লি হায়রিবসিগী মতাংদা সাইন্তিফিক ওইবা মওংদা হেন্না খঙহন্নবা পাউজেল কয়া অমা পীনবা শিন্দুনা লাক্লি।

******