ଯୋଗାଯୋଗ ମନ୍ତ୍ରଣାଳୟ

କୋଭିଡ-19 ସଂକ୍ରମଣ ବ୍ୟାପିବା ସହ 5ଜି ପ୍ରଯୁକ୍ତିର କୌଣସି ସମ୍ପର୍କ ନାହିଁ

Posted On: 10 MAY 2021 8:16PM by PIB Bhubaneshwar

5ଜି ମୋବାଇଲ ଟାୱାରର ପରୀକ୍ଷାମୂଳକ ବ୍ୟବହାର କାରଣରୁ କରୋନା ଭୂତାଣୁର ଦ୍ଵିତୀୟ ଲହରୀ ବ୍ୟାପିଥିବା ସମ୍ପର୍କରେ ସାମାଜିକ ଗଣମାଧ୍ୟମରେ କେତେକ ବିଭ୍ରାନ୍ତିକରଣ ସୂଚନା ପ୍ରସାରିତ ହେଉଥିବା ସଞ୍ଚାର ମନ୍ତ୍ରଣାଳୟ ଅଧୀନ ଟେଲିଯୋଗାଯୋଗ ବିଭାଗ (ଡିଓଟି)ର ଦୃଷ୍ଟିକୁ ଆସିଛି। ବିଭାଗ ପକ୍ଷରୁ ଜାରି ପ୍ରେସ ବାର୍ତ୍ତାରେ କୁହାଯାଇଛି ଯେ ଏହି ସବୁ ବାର୍ତ୍ତା ମିଥ୍ୟା ଏବଂ ସମ୍ପୂର୍ଣ୍ଣ ଭାବେ ବିଭ୍ରାନ୍ତିକର। ଏହି ପ୍ରେସ ବାର୍ତ୍ତାରେ ଦେଶର ଜନସାଧାରଣଙ୍କୁ ସଚେତନ କରାଯାଇ କୁହାଯାଇଛି ଯେ କୋଭିଡ-19 ସଂକ୍ରମଣ ବ୍ୟାପିବା ସହିତ 5ଜି ଟେକ୍ନୋଲୋଜିର କୌଣସି ସମ୍ପର୍କ ନାହିଁ। ତେଣୁ ସେମାନେ ଏହି ପ୍ରସଙ୍ଗରେ ବ୍ୟାପୁଥିବା ଏପରି ମିଥ୍ୟା ସୂଚନା ଓ ଗୁଜବ ଦ୍ୱାରା ଦିଗହରା ହୁଅନ୍ତୁ ନାହିଁ। କୋଭିଡ-19 ମହାମାରୀ ସହିତ 5ଜି ପ୍ରଯୁକ୍ତିର ସମ୍ପର୍କ ରହିଥିବା ନେଇ ଯେଉଁ ଦାବି କରାଯାଉଛି ତାହା ସମ୍ପୂର୍ଣ୍ଣ ଭୁଲ ଏବଂ ଏହାର କୌଣସି ବୈଜ୍ଞାନିକ ଆଧାର ନାହିଁ। ଅଧିକନ୍ତୁ, ଏଠାରେ ଏହା ମଧ୍ୟ ସୂଚୀତ କରାଯାଉଛି ଯେ ଭାରତର କୌଣସି ସ୍ଥାନରେ ଏବେସୁଦ୍ଧା 5ଜି ନେଟୱାର୍କର ପରୀକ୍ଷା ଆରମ୍ଭ ହୋଇନାହିଁ। ତେଣୁ 5ଜି ପରୀକ୍ଷା ଓ ନେଟୱର୍କ କାରଣରୁ ଭାରତରେ କରୋନା ଭୂତାଣୁ ବ୍ୟାପୁଥିବା ଖବର ସମ୍ପୂର୍ଣ୍ଣ ଭାବେ ଆଧାରହୀନ ଏବଂ ଭୁଲ୍।

ମୋବାଇଲ ଟାୱାରରୁ ନନ-ଆୟୋନାଇଜିଂ ରେଡିଓ ଫ୍ରିକୁଏନ୍ସି ବାହାରିଥାଏ ଏବଂ ଏହାର ଅତି କମ୍ ଶକ୍ତି ରହିଛି ଯାହାର ମଣିଷଙ୍କ ସମେତ କୌଣସି ଜୀବନ୍ତ କୋଷିକାକୁ କ୍ଷତି ପହଞ୍ଚାଇବାର କ୍ଷମତା ନାହିଁ। ଟେଲିଯୋଗାଯୋଗ ବିଭାଗ ପକ୍ଷରୁ ରେଡିଓ ଫ୍ରିକୁଏନ୍ସି କ୍ଷେତ୍ର (ଯାହାକି ବେସ ଷ୍ଟେସନ ନିର୍ଗମନ) ନିମନ୍ତେ ଏକ୍ସପୋଜର ସୀମା ନିର୍ଦ୍ଧାରଣ କରାଯାଇଛି। ଏହା ଡବ୍ଲୁଏଚଓର ସୁପାରିସ ଏବଂ ନନ-ଆୟୋନାଇଜିଂ ରେଡିଏସନ ପ୍ରୋଟେକ୍ସନ ଉପରେ ଗଠିତ ଅନ୍ତର୍ଜାତୀୟ କମିଶନ (ଆଇସିଏନଆଇଆରପି)ର ନିର୍ଦ୍ଧାରିତ ନିରାପତ୍ତା ସୀମା ଠାରୁ ଦଶଗୁଣା ଅଧିକ କଠୋର।

ଡିଓଟି ଦ୍ୱାରା ପୂର୍ବରୁ ଗ୍ରହଣ କରାଯାଇଥିବା ପଦକ୍ଷେପ

ଡିଓଟି ନିକଟରେ ଏକ ସୁଦୃଢ଼ ଢାଞ୍ଚାଗତ ପ୍ରକ୍ରିୟା ରହିଛି ଯାହାଫଳରେ ଟିଏସପିଗୁଡ଼ିକ ଏହି ସୁପାରିସ କରାଯାଇଥିବା ସର୍ତ୍ତାବଳୀକୁ ଅଧିକ କଡ଼ାକଡ଼ି ପାଳନ କରିପାରିବେ। ତେବେ, ଯଦି କୌଣସି ନାଗରିକଙ୍କର କୌଣସି ମୋବାଇଲ ଟାୱାରରୁ ନିର୍ଗତ ରେଡିଓ ତରଙ୍ଗ ବିଭାଗ ପକ୍ଷରୁ ନିର୍ଦ୍ଧାରିତ ନିରାପଦ ସୀମା ଠାରୁ ଅଧିକ ଥିବା ନେଇ ସନ୍ଦେହ ହୁଏ ତା’ହେଲେ ସେ ଚାହିଁଲେ ତରଙ୍ଗ ସଞ୍ଚାର ପୋର୍ଟାଲ https://tarangsanchar.gov.in/emfportal ରେ ଇଏମଏଫ ମାପିବା/ପରୀକ୍ଷା କରିବା ନିମନ୍ତେ ଅନୁରୋଧ କରିପାରିବେ।

ମୋବାଇଲ ଟାୱାରରୁ ବାହାରୁଥିବା ଇଏମଏଫର ସ୍ୱାସ୍ଥ୍ୟ ଉପରେ ପ୍ରଭାବ ସମ୍ପର୍କରେ ଜନସାଧାରଣଙ୍କ ମନରୁ ଭୟ ଦୂର କରିବା ଲାଗି ଡିଓଟି ପକ୍ଷରୁ ଇଏମଏଫ ରେଡିଏସନ ସମ୍ପର୍କରେ ସାଧାରଣରେ ସଚେତନତା ସୃଷ୍ଟି କରିବା ଲାଗି ଦେଶବ୍ୟାପୀ ସଚେତନତା କାର୍ଯ୍ୟକ୍ରମ ଆୟୋଜନ କରାଯାଉଛି। ଏହାଛଡ଼ା ଇଏମଏଫ ସଂକ୍ରାନ୍ତ ବିଷୟ ଉପରେ ପ୍ରଚାରପତ୍ର/ପୁସ୍ତିକା ବଣ୍ଟନ, ଡିଓଟିର ୱେବସାଇଟରେ ଇଏମଏସଫ ସଂକ୍ରାନ୍ତ ପ୍ରସଙ୍ଗରେ ବିସ୍ତୃତ ସୂଚନା ଦିଆଯାଉଛି, ସମ୍ବାଦପତ୍ରରେ ବିଜ୍ଞାପନ ଦିଆଯାଉଛି, “ତରଙ୍ଗ ସଞ୍ଚାର” ପୋର୍ଟାଲ କାର୍ଯ୍ୟକ୍ଷମ କରାଯାଇଛି। ଡିଓଟିର କ୍ଷେତ୍ରୀୟ ୟୁନିଟଗୁଡ଼ିକ ସାଧାରଣ ସଚେତନତା କାର୍ଯ୍ୟକ୍ରମ ଆୟୋଜନ କରୁଛନ୍ତି ଏବଂ ମୋବାଇଲ ଟାୱାରରୁ ବାହାରୁଥିବା ଇଏମଏଫର ସ୍ୱାସ୍ଥ୍ୟ ଉପରେ ପ୍ରଭାବ ସମ୍ପର୍କରେ ବୈଜ୍ଞାନିକ ତଥ୍ୟ ଆଧାରରେ ଲୋକମାନଙ୍କୁ ସଚେତନ କରୁଛନ୍ତି।

 

*******

 

P.S

 



(Release ID: 1717782) Visitor Counter : 121