କୃଷିକ୍ଷେତ୍ରର ଉନ୍ନତି ସହ ସାମଗ୍ରୀକ ବିକାଶ ଓ ଆକାଂକ୍ଷିତ ଭାରତ ପାଇଁ କେନ୍ଦ୍ର ଅର୍ଥ ଓ କର୍ପୋରେଟ ବ୍ୟାପାର ମନ୍ତ୍ରୀ ନିର୍ମଳା ସୀତାରମଣ ଆଜି ସଂସଦରେ ଆଗତ କେନ୍ଦ୍ରୀୟ ବଜେଟରେ ନଅଟି ପ୍ରମୁଖ ଘୋଷଣା କରିଛନ୍ତି ।

ସ୍ୱାମୀତ୍ୱ ଯୋଜନା

ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳକୁ ସ୍ୱାମୀତ୍ୱ ଯୋଜନା ସଂପ୍ରସାରଣ ନିମନ୍ତେ ଶ୍ରୀମତୀ ନିର୍ମଳା ସୀତାରମଣଙ୍କ ପ୍ରସ୍ତାବ – ଗ୍ରାମରେ ଜମି ମାଲିକାନାରେ ସ୍ୱଚ୍ଛତା ଆଣିବା ଉଦ୍ଦେଶ୍ୟରେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଗତବର୍ଷ ସ୍ୱାମୀତ୍ୱ ଯୋଜନା ଆରମ୍ଭ କରିଥିଲେ । ଏହି ଯୋଜନା ଅଧୀନରେ ଗ୍ରାମାଞ୍ଚଳରେ ଜମିମାଲିକ ମାନଙ୍କୁ ସତ୍ତ୍ୱାଧିକାର ପ୍ରଦାନ କରାଯାଇଛି । ଅଦ୍ୟାବଧି ୧୨୪୧ଟି ଗ୍ରାମର ପ୍ରାୟ ୧ ଲକ୍ଷ ୮୦ହଜାର ଜମିମାଲିକଙ୍କୁ କାର୍ଡ ପ୍ରଦାନ କରାଯାଇଛି ।

୨୦୨୨ ଆର୍ଥିକ ବର୍ଷ ସୁଦ୍ଧା କୃଷି ଋଣ ଲକ୍ଷ୍ୟ ୧୬ ଲକ୍ଷ ୫୦ ହଜାର କୋଟିକୁ ବୃଦ୍ଧି କରାଯାଇଛି ।

ଆମ ଚାଷୀମାନଙ୍କୁ ପର୍ଯ୍ୟାପ୍ତ ଋଣ ପ୍ରଦାନ କରିବା ଉଦ୍ଦେଶ୍ୟରେ ଅର୍ଥମନ୍ତ୍ରୀ ୨୦୨୨ ଆର୍ଥିକ ବର୍ଷରେ କୃଷି ଋଣ ଲକ୍ଷ୍ୟ ୧୬ ଲକ୍ଷ ୫୦ ହଜାର କୋଟି ବୃଦ୍ଧି କରିଛନ୍ତି । ଶ୍ରୀମତୀ ସୀତାରମଣ ଆହୁରି କହିଛନ୍ତି ଯେ ସରକାର ପଶୁପାଳନ, ଦୁଗ୍ଧ ଓ ମତ୍ସ୍ୟ ଉତ୍ପାଦନ କ୍ଷେତ୍ରରେ ଋଣ ପରିମାଣ ଅଧିକ କରିବା ଉପରେ ଗୁରୁତ୍ୱ ଦେବେ ।

ଗ୍ରାମାଞ୍ଚଳ ବିକାଶ ଭିତ୍ତିଭୂମି ପାଣ୍ଠିରେ ଶତକଡା ୩୩ ଭାଗବୃଦ୍ଧି

ଅର୍ଥମନ୍ତ୍ରୀ ଗ୍ରାମାଞ୍ଚଳ ଭିତ୍ତିଭୂମି ବିକାଶ ପାଣ୍ଠି ନିମନ୍ତେ ଅର୍ଥ ୩୦ ହଜାରରୁ ୪୦ ହଜାର କୋଟି ବୃଦ୍ଧି କରିବାକୁ ଘୋଷଣା କରିଛନ୍ତି ।

ଅଣୁ ଜଳସେଚନ ପାଣ୍ଠି ଦ୍ୱିଗୁଣିତ

ନାବାର୍ଡ ଅଧୀନରେ ଅଣୁ ଜଳସେଚନ ପାଣ୍ଠି ଅର୍ଥ ୫ ହଜାର କୋଟି ଥିବାବେଳେ ଶ୍ରୀମତୀ ସୀତାରମଣ ଆଉ ୫ ହଜାର କୋଟି ଆବଣ୍ଟନ ପାଇଁ ଘୋଷଣା କରିଛନ୍ତି ।

ଅପରେସନ ଗ୍ରୀନ ଯୋଜନା – ‘ଟପ’ରେ ୨୨ଟି ନଷ୍ଟ ହୋଇଯାଉଥିବା ସାମଗ୍ରୀ ସାମିଲ

କୃଷି ଓ ତଦଜନିତ ସାମଗ୍ରୀ ରପ୍ତାନୀକୁ ଦୃଷ୍ଟିରେ ରଖି ଏହାର ଗୁଣାତ୍ମକ ମୂଲ୍ୟ ବଜାୟ ରଖିବା ପାଇଁ ଶ୍ରୀମତୀ ସୀତାରମଣ ଅପରେସନ ଗ୍ରୀନ ସ୍କିମର ପରିସର ବୃଦ୍ଧି ପାଇଁ ପ୍ରସ୍ତାବ ଦେଇଛନ୍ତି ।ଏହା ବର୍ତ୍ତମାନ କେବଳ ଟମାଟୋ, ପିଆଜ ଓ ଆଳୁ ପାଇଁ ଲାଗୁ ହେଉଥିବାବେଳେ ଏହି ଯୋଜନା ପରିସରକୁ ୨୨ଟି ପଚିସଢ଼ି ଯାଉଥିବା ସାମଗ୍ରୀ ଆସିଯିବ ।

ଇ-ନାମ ସହ ମିଶିବ ଆଉ ଏକ ହଜାର ମଣ୍ଡି

ଅର୍ଥମନ୍ତ୍ରୀ କହିଛନ୍ତି ଯେ ପାଖାପାଖି ୧.୬୮ କୋଟି କୃଷକ ପଞ୍ଜିକୃତ ହୋଇଥିବା ବେଳେ ଇ-ନାମ ଜରିଆରେ ୧.୧୪ ଲକ୍ଷ କୋଟି ମୂଲ୍ୟର କାରବାର ହେଉଛି । କୃଷିବଜାରରେ ସ୍ୱଚ୍ଛତା ଓ ପ୍ରତିଯୋଗିତା ସୃଷ୍ଟି କରିଥିବାରୁ ଅର୍ଥମନ୍ତ୍ରୀ ଏକ ହଜାର ଅଧିକ ମଣ୍ଡି ଇ-ନାମରେ ସାମିଲ କରିବାକୁ ପ୍ରସ୍ତାବ ଦେଇଛନ୍ତି ।

କୃଷି ଭିତ୍ତିଭୂମି ପାଣ୍ଠିରେ ଏପିଏମସିର ପ୍ରବେଶ

ଭିତ୍ତିଭୂମି ସୁବିଧା ବୃଦ୍ଧି ଦୃଷ୍ଟିରୁ ଅର୍ଥମନ୍ତ୍ରୀ ଏପିଏମସିକୁ କୃଷି ଭିତ୍ତିଭୂମି ପାଣ୍ଠିରେ ପ୍ରବେଶ ନିମନ୍ତେ ପ୍ରସ୍ତାବ ଦେଇଛନ୍ତି ।

ପାଞ୍ଚଟି ମାଛଧରା ବନ୍ଦର ବିକାଶ ପାଇଁ ପ୍ରସ୍ତାବ

ମାଛଧରା ବନ୍ଦର ଆଧୁନିକୀକରଣ ଓ ମାଛ ସଂଗ୍ରହ କେନ୍ଦ୍ରର ବିକାଶ ନିମନ୍ତେ ଶ୍ରୀମତୀ ସୀତାରମଣ ପର୍ଯ୍ୟାପ୍ତ ପୁଞ୍ଜି ବିନିଯୋଗ ନିମନ୍ତେ ପ୍ରସ୍ତାବ ଦେଇଛନ୍ତି । ସେ କହିଛନ୍ତି ଯେ ପାଞ୍ଚଟି ପ୍ରମୁଖ ମାଛଧରା ବନ୍ଦର ଯଥା -କୋଚି, ଚେନ୍ନାଇ, ବିଶାଖାପାଟନମ, ପାରାଦ୍ୱୀପ ଏବଂ ପେଟୁଘାଟ ଆର୍ଥିକ ଦୃଷ୍ଟିରୁ ବିକଶିତ ହେବ । ଏହା ବ୍ୟତିତ ନଦୀ ମୁହାଣ ଓ ଅନ୍ୟାନ୍ୟ ଜଳଉତ୍ସଗୁଡିକର ମାଛଧରାକୁ ପ୍ରୋତ୍ସାହନ ପାଇଁ ମଧ୍ୟ ସେ ପ୍ରସ୍ତାବ ଦେଇଛନ୍ତି ।

ତାମିଲନାଡୁରେ ପ୍ରତିଷ୍ଠିତ ହେବ ବହୁମୁଖୀ ସାମୁଦ୍ରିକ ଗୁଳ୍ମ ଉଦ୍ୟାନ

ସାମୁଦ୍ରିକ ଗୁଳ୍ମଚାଷକୁ ଲାଭଜନକ ବିବେଚନା କରି ଶ୍ରୀମତୀ ସୀତାରମଣ କହିଛନ୍ତି ଯେ ଏହି ନୂତନ ଭାବେ ଆସୁଥିବା କ୍ଷେତ୍ର ଯୋଗୁ ଉପକୂଳବାସିନ୍ଦାଙ୍କ ଜୀବନମାନରେ ଉନ୍ନତି ଘଟିପାରିବ । ସାମୁଦ୍ରିକ ଗୁଳ୍ମ ଉତ୍ପାଦନକୁ ଦୃଷ୍ଟିରେ ରଖି ସେ ତାମିଲନାଡୁରେ ଏକ ବହୁମୁଖୀ ସାମୁଦ୍ରିକ ଗୁଳ୍ମ ଉଦ୍ୟାନ ସ୍ଥାପନ ପାଇଁ ପ୍ରସ୍ତାବ ଦେଇଛନ୍ତି ।

ଚାଷୀମାନଙ୍କ କଲ୍ୟାଣ ପ୍ରତି ସରକାରଙ୍କ ଅଙ୍ଗୀକାରବଦ୍ଧତାକୁ ଦୋହରାଇ ଶ୍ରୀମତୀ ସୀତାରମଣ କହିଛନ୍ତି ଯେ, ଗହମ, ଧାନ, ଡାଲିଜାତୀୟ ଶସ୍ୟ ବ୍ୟାପକ ପରିମାଣରେ କୃଷକମାନଙ୍କ ଠାରୁ ଆହରଣ କରାଯାଇଛି । ସେ ଦୃଷ୍ଟିରୁ ଏହି ସମସ୍ତ ଶସ୍ୟର ସହାୟକ ମୂଲ୍ୟ ଉତ୍ପାଦନ ଖର୍ଚ୍ଚର ପ୍ରାୟ ଦେଢ଼ଗୁଣ ବୃଦ୍ଧି କରାଯାଇଛି । ଗହମ କ୍ଷେତ୍ରରେ ୨୦୧୩-୧୪ ଆର୍ଥିକ ବର୍ଷରେ ୩୩ ହଜାର ୮୭୪ କୋଟି ଟଙ୍କା ସହାୟକ ମୂଲ୍ୟବାବଦ ପଇଠ କରାଯାଇଥିବା ବେଳେ, ୨୦୧୯-୨୦ରେ ଏହା ୬୨ ହଜାର ୮୦୨ କୋଟିକୁ ବୃଦ୍ଧି ପାଇଛି ଓ ୨୦୨୦-୨୧ରେ ଏହା ୭୫ ହଜାର ୬୦ କୋଟିକୁ ବୃଦ୍ଧି ପାଇଛି । ୨୦୧୯-୨୦ରେ ୩୫ ଲକ୍ଷ ୫୭ ହଜାର ଗହମ ଚାଷୀ ଉପକୃତ ହୋଇଥିବା ବେଳେ ୨୦୨୦-୨୧ରେ ୪୩ ଲକ୍ଷ ୩୬ ହଜାର ଉପକୃତ ହୋଇଛନ୍ତି ।

ଧାନ କ୍ଷେତ୍ରରେ ୨୦୧୩-୧୪ରେ ୬୩ ହଜାର ୯୨୮ କୋଟି ପ୍ରଦାନ କରାଯାଇଥିବା ବେଳେ, ୨୦୧୯-୨୦ରେ ଏହା ୧ ଲକ୍ଷ ୪୧ ହଜାର ୯୩୦ କୋଟିକୁ ବୃଦ୍ଧି ପାଇଛି । ୨୦୨୦-୨୧ରେ ଏହା ୧ ଲକ୍ଷ ୭୨ ହଜାର ୭୫୨ କୋଟି ହେବ ବୋଲି ଆକଳନ କରାଯାଇଛି । ୨୦୧୯-୨୦ରେ ୧ କୋଟି ୨୪ ଲକ୍ଷ ଧାନ ଚାଷୀ ଉପକୃତ ହୋଇଥିବା ବେଳେ ଏହି ସଂଖ୍ୟା ୨୦୨୦-୨୧ରେ ୧ କୋଟି ୫୪ ଲକ୍ଷକୁ ବୃଦ୍ଧି ପାଇଛି । ସେହିପରି ଡାଲିଜାତୀୟ ଶସ୍ୟ କ୍ଷେତ୍ରରେ ୨୦୧୩-୧୪ ତୁଳନାରେ ୨୦୨୦-୨୧ରେ ଏହା ୪୦ ଗୁଣବୃଦ୍ଧି ପାଇଛି ।

ତୁଳାଚାଷୀ ୨୦୧୩-୧୪ରେ ମାତ୍ର ୯୦ କୋଟି ଟଙ୍କା ପାଇଥିବା ବେଳେ ୨୭ ଜାନୁଆରୀ ୨୦୨୧ ସୁଦ୍ଧା ୨୫ ହଜାର୯୭୪ କୋଟି ପାଇଛନ୍ତି ।

SM

********