ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ
ଆଇଆଇଏସଏଫ 2020ରେ ପ୍ରଧାନମନ୍ତ୍ରୀଙ୍କ ଉଦଘାଟନୀ ଅଭିଭାଷଣ
ବିଶ୍ଵସ୍ତରୀୟ ବୈଜ୍ଞାନିକ ସମାଧାନ ପାଇଁ ଭାରତ ପାଖରେ ଅଛି ତଥ୍ୟ, ଚାହିଦା, ଗଣତନ୍ତ୍ର ଓ ଜନସଂଖ୍ୟା ପରିସଂଖ୍ୟାନ – ପ୍ରଧାନମନ୍ତ୍ରୀ
ଦେଶର ବିକାଶ ପାଇଁ ବିଜ୍ଞାନର ଉନ୍ନତି ଉପରେ ଗୁରୁତ୍ଵ
ଭାରତୀୟ ମେଧା ଓ ନବୋନ୍ମେଷ କ୍ଷେତ୍ରରେ ନିବେଶ ନିମନ୍ତେ ବିଶ୍ଵବାସୀଙ୍କୁ ନିବେଦନ
Posted On:
22 DEC 2020 5:51PM by PIB Bhubaneshwar
ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ଭାରତ ଆନ୍ତର୍ଜାତିକ ବିଜ୍ଞାନ ମହୋତ୍ସବ (ଆଇଆଇଏସଏଫ) 2020ରେ ତାଙ୍କ ଉଦଘାଟନୀ ଅଭିଭାଷଣ ପ୍ରଦାନ କରିଛନ୍ତି । କେନ୍ଦ୍ରମନ୍ତ୍ରୀ ଡାକ୍ତର ହର୍ଷ ବର୍ଦ୍ଧନ ମଧ୍ୟ ଏହି ଅବସରରେ ଉପସ୍ଥିତ ଥିଲେ ।
ଏହି ଅବସରରେ ଉଦବୋଧନ ଦେଇ ପ୍ରଧାନମନ୍ତ୍ରୀ କହିଛନ୍ତି ଯେ, ବିଜ୍ଞାନ, ବୈଷୟିକ ଜ୍ଞାନ ଓ ଉଦ୍ଭାବନ କ୍ଷେତ୍ରରେ ଭାରତର ଏକ ଉନ୍ନତ ପରମ୍ପରା ରହିଛି । ଆମ ବୈଜ୍ଞାନିକଗଣ ଯୁଗାନ୍ତକାରୀ ଗବେଷଣା କରିଛନ୍ତି । ଆମର ବୈଷୟିକ ଶିଳ୍ପ ବୈଶ୍ଵିକ ସମସ୍ୟାର ସମାଧାନ ଦିଗରେ ଅଗ୍ରଭାଗରେ ରହିଛି । ମାତ୍ର ଭାରତ ଆହୁରି ଅଧିକ କିଛି କରିବାକୁ ଚାହୁଁଛି । ଆମେ ଗର୍ବର ସହ ଆମର ଅତୀତକୁ ଅବଲୋକନ କରୁଥିବା ବେଳେ, ଉନ୍ନତ ଭବିଷ୍ୟତର ମଧ୍ୟ କାମନା କରୁଛୁ ।
ପ୍ରଧାନମନ୍ତ୍ରୀ କହିଛନ୍ତି ଯେ, ଦେଶକୁ ସବୁଠାରୁ ନିର୍ଭରଯୋଗ୍ୟ ବିଜ୍ଞାନ ଶିକ୍ଷା ଦେବା ଆମର ଲକ୍ଷ୍ୟ ରହିଆସିଛି । ତା' ସହ ଆମର ବିଜ୍ଞାନପ୍ରେମୀ ମାନେ ବିଶ୍ଵର ମେଧାବୀ ବିଜ୍ଞାନୀଙ୍କ ସମକକ୍ଷ ହେବା ମଧ୍ୟ ଆମେ ଚାହୁଁଛୁ । ଭାରତୀୟ ବୈଜ୍ଞାନିକମାନଙ୍କୁ ଏହି ସୁଯୋଗ ଦେବା ନିମନ୍ତେ ହାକାଥନ ଆୟୋଜନ କରାଯାଉଛି ।
ପ୍ରଧାନମନ୍ତ୍ରୀ କହିଛନ୍ତି ଯେ, ଖୁବ କମ ବୟସରୁ ବୈଜ୍ଞାନିକ ପ୍ରବୃତ୍ତି ଜାଗ୍ରତ କରାଇବା ପାଇଁ ନୂତନ ଜାତୀୟ ଶିକ୍ଷାନୀତି ବେଶ ସହାୟକ ହେବ । ବର୍ତ୍ତମାନ ଧ୍ୟାନ ଉପଯୋଗରୁ ଫଳାଫଳ ଉପରେ କେନ୍ଦ୍ରିତ ହୋଇଛି । ଏହା ପାଠ୍ୟପୁସ୍ତକ ଠାରୁ ଗବେଷଣା ଓ ପ୍ରୟୋଗ ଉପରେ ନିବଦ୍ଧ ରହିଛି । ନୂତନ ଶିକ୍ଷାନୀତି ଉଚ୍ଚମାନର ଶିକ୍ଷକ ତିଆରି କରିବ । ଏହା ପ୍ରତିଭାବାନ ବୈଜ୍ଞାନିକ ମଧ୍ୟ ପ୍ରସ୍ତୁତ କରିବ । ଏହାସହ ଅଟଳ ଇନୋଭେସନ ମିଶନ ଓ ଅଟଳ ଟିଙ୍କରିଙ୍ଗ ଲ୍ୟାବ ମଧ୍ୟ ଏଥିରେ ବେଶ ସହାୟକ ହେବ ବୋଲି ଶ୍ରୀ ମୋଦୀ କହିଛନ୍ତି ।
ଦେଶରେ ଶ୍ରେଷ୍ଠ ତଥା ମେଧାବୀ ବୈଜ୍ଞାନିକ ସୃଷ୍ଟି ପାଇଁ ସରକାର ଗୁଣାତ୍ମକ ଗବେଷଣା ଉପରେ ଗୁରୁତ୍ଵାରୋପ କରି ପ୍ରଧାନମନ୍ତ୍ରୀ ରିସର୍ଚ ଫେଲୋ ଯୋଜନା ପ୍ରବର୍ତ୍ତନ କରିଛନ୍ତି । ଏହି ଯୋଜନା ଦେଶର ବୃହତ ଶିକ୍ଷାନୁଷ୍ଠାନଗୁଡିକରେ ବୈଜ୍ଞାନିକମାନଙ୍କୁ ସାହାଯ୍ୟ କରୁଛି ।
ବିଜ୍ଞାନ ଓ ପ୍ରଯୁକ୍ତିବିଦ୍ୟାର ସୁଫଳ ଯେପରି ସମସ୍ତଙ୍କ ନିକଟରେ ପହଞ୍ଚିବ ପ୍ରଧାନମନ୍ତ୍ରୀ ତାହା ଉପରେ ଗୁରୁତ୍ଵାରୋପ କରିଛନ୍ତି । ସେ କହିଛନ୍ତି ଯେ, ବିଜ୍ଞାନ ଓ ପ୍ରଯୁକ୍ତିବିଦ୍ୟାର ଅଭାବ ଓ ପ୍ରଭାବ ମଧ୍ୟରେ ସମନ୍ଵୟ ରକ୍ଷା କରୁଛି । ଏହା ଦରିଦ୍ରରୁ ଦରିଦ୍ରତମ ବ୍ୟକ୍ତିକୁ ସରକାରଙ୍କ ସହ ଯୋଡୁଛି । ଡିଜିଟାଲ ଇଣ୍ଡିଆ ଅଗ୍ରଗତି ଯୋଗୁଁ ଭାରତ ବୈଶ୍ବିକ ହାଇଟେକ ଶକ୍ତିରେ ଉଭୟ ଉତ୍ପତ୍ତି ଓ ବିପ୍ଳବର ସ୍ଥାନ ନେଇଛି ବୋଲି ଶ୍ରୀ ମୋଦୀ କହିଛନ୍ତି ।
ବିଶ୍ଵସ୍ତରୀୟ ଶିକ୍ଷା, ସ୍ୱାସ୍ଥ୍ୟ, ସଂଯୋଗୀକରଣ ଓ ଗ୍ରାମାଞ୍ଚଳ ସମସ୍ୟାର ସମାଧାନ ପାଇଁ ଆଜି ଭାରତ ନିକଟରେ ତଥ୍ୟ, ଜନସଂଖ୍ୟା, ପରିସଂଖ୍ୟାନ ଓ ଚାହିଦା ମହଜୁଦ ରହିଛି । ସମସ୍ତଙ୍କୁ ସୁରକ୍ଷା ଦେବାପାଇଁ ଓ ଭାରସାମ୍ୟ ରକ୍ଷା ପାଇଁ ଭାରତର ଗଣତନ୍ତ୍ର ରହିଛି । ସେଥିପାଇଁ ସମଗ୍ର ବିଶ୍ଵ ଭାତରକୁ ବିଶ୍ଵାସ କରୁଛି ବୋଲି ଶ୍ରୀ ମୋଦୀ କହିଛନ୍ତି ।
ଆମ ଦେଶରେ ଜଳ ସଙ୍କଟ, ପ୍ରଦୂଷଣ, ମୃତ୍ତିକା ଗୁଣବତ୍ତା, ଖାଦ୍ୟ ନିରାପତ୍ତା ଭଳି ଅନେକ ଆହ୍ଵାନ ରହିଛି ଯାହାର ସମାଧାନ କେବଳ ଆଧୁନିକ ବିଜ୍ଞାନ ଦ୍ଵାରା ହିଁ ସମ୍ଭବ । ଆମ ସାଗର ବକ୍ଷରୁ ଜଳ, ଶକ୍ତି, ଖାଦ୍ୟ ସମ୍ପଦ ଅନୁସନ୍ଧାନ କରିବାରେ ବିଜ୍ଞାନର ଏକ ବିଶେଷ ଭୂମିକା ରହିଛି । ବିଜ୍ଞାନର ନୂତନ ଉଦ୍ଭାବନ ବ୍ୟବସାୟ ଓ ବାଣିଜ୍ୟ ଉପରେ ମଧ୍ୟ ପ୍ରଭାବ ବିସ୍ତାର କରୁଛି ।
ପ୍ରଧାନମନ୍ତ୍ରୀ କହିଛନ୍ତି ଯେ, ମହାକାଶ କ୍ଷେତ୍ରରେ ସଂସ୍କାର ଅଣାଯାଇ ଆମ ଯୁବଗୋଷ୍ଠୀ ଓ ଘରୋଇ କ୍ଷେତ୍ରକୁ ଉତ୍ସାହିତ କରାଯାଇଛି । ଏହା କେବଳ ଆକାଶକୁ ଛୁଇଁବାକୁ ନୁହେଁ, ବରଂ ଗଭୀର ମହାକାଶର ଉଚ୍ଚତା ଛୁଇଁବାକୁ ଉଦ୍ଦିଷ୍ଟ । ନୂତନ ଉତ୍ପାଦନ ଭିତ୍ତିକ ପ୍ରୋତ୍ସାହନ ଯୋଜନା ବିଜ୍ଞାନ ଓ ବୈଷୟିକ ଜ୍ଞାନ ଉପରେ ଗୁରୁତ୍ଵାରୋପ କରିବାକୁ ଉଦ୍ଦିଷ୍ଟ । ଏଭଳି ପଦକ୍ଷେପ ବିଜ୍ଞାନୀଗୋଷ୍ଠୀଙ୍କ ମନୋବଳ ବୃଦ୍ଧି କରାଇବା ସହ ବିଜ୍ଞାନ ଓ ବୈଷୟିକ ଜ୍ଞାନର ବିକାଶ ପାଇଁ ଆବଶ୍ୟକ ବାତାବରଣ ସୃଷ୍ଟିକରି ବିଜ୍ଞାନ ଓ ଶିଳ୍ପ ମଧ୍ୟରେ ଏକ ନୂତନ ଭାଗୀଦାରୀ ସଂସ୍କୃତିର ଉନ୍ମେଷ ଘଟାଇବ । ଏହି ସହଯୋଗର ବାତାବରଣ ବିଜ୍ଞାନ ଓ ଦ୍ରୁତ ଶିଳ୍ପାୟନ ପାଇଁ ମାର୍ଗ ପ୍ରସ୍ତୁତ କରିବ ବୋଲି ପ୍ରଧାନମନ୍ତ୍ରୀ ଆଶା ପ୍ରକଟ କରିଛନ୍ତି ।
କୋଭିଡ ବୈଶ୍ଵିକ ମହାମାରୀ ନିମନ୍ତେ ଟୀକାର ବିକାଶ ବର୍ତ୍ତମାନ ବିଜ୍ଞାନ ପାଇଁ ସବୁଠାରୁ ବଡ ଆହ୍ଵାନ ବୋଲି ପ୍ରଧାନମନ୍ତ୍ରୀ କହିଛନ୍ତି । ମାତ୍ର ସବୁଠାରୁ ବଡ ଆହ୍ଵାନ ହେଉଛି ଉତ୍ତମ ମେଧା ସମ୍ପନ୍ନ ଯୁବଶକ୍ତି । ସେ ବିଜ୍ଞାନ ଓ ବୈଷୟିକ ଜ୍ଞାନର ବିକାଶ ଦେଶର ହିତ ପାଇଁ ପ୍ରୟୋଗ କରିବା ଉପରେ ଗୁରୁତ୍ଵାରୋପ କରିଛନ୍ତି । ସେ କହିଛନ୍ତି ଯେ, ଆଜି ଯାହା ବିଜ୍ଞାନ, ତାହା କାଲୀ ପ୍ରଯୁକ୍ତିବିଦ୍ୟା ଓ ପରବର୍ତ୍ତୀ ଅବସ୍ଥାରେ ଇଞ୍ଜିନିୟରିଂ ସମାଧାନ ସୂତ୍ର । ବିଜ୍ଞାନ କ୍ଷେତ୍ରରେ ମେଧାବୀ ଛାତ୍ରଛାତ୍ରୀଙ୍କୁ ଆକୃଷ୍ଟ କରିବା ନିମନ୍ତେ ସରକାର ବିଭିନ୍ନ ସ୍ତରରେ ବୃତ୍ତିର ବ୍ୟବସ୍ଥା କରିଥିବା ଶ୍ରୀ ମୋଦୀ କହିଛନ୍ତି । ମାତ୍ର ଏହା ବିଜ୍ଞାନୀ ଗୋଷ୍ଠୀଙ୍କ ମଧ୍ୟରେ ଆଦୃତ ହେବା ଦରକାର । ଚନ୍ଦ୍ରଯାନ ମିଶନ ଯୁଗବୋଷ୍ଠୀଙ୍କୁ ଏ ଦିଗରେ ଉତ୍ସାହିତ କରିଛି ।
ପ୍ରଧାନମନ୍ତ୍ରୀ ବିଶ୍ଵବାସୀଙ୍କୁ ଭାରତୀୟ ମେଧା ଓ ଉଦ୍ଭାବନ କ୍ଷେତ୍ରରେ ନିବେଶ କରିବା ପାଇଁ ଆହ୍ଵାନ ଦେଇଛନ୍ତି । ସମବେତ ବ୍ୟକ୍ତିମାନଙ୍କୁ ଉଦବୋଧନ ଦେଇ ସେ କହିଛନ୍ତି ଭାରତରେ ଖୁବ ଉଚ୍ଚ ମେଧା ସମ୍ପନ୍ନ ବ୍ୟକ୍ତି ଅଛନ୍ତି । ସ୍ଵଚ୍ଛ ଓ ଖୋଲା ହୃଦୟ ବାତାବରଣ ପାଇଁ ଯଥେଷ୍ଟ ସୁଯୋଗ ରହିଛି । ଗବେଷଣା ବାତାବରଣକୁ ସମୃଦ୍ଧ କରିବା ପାଇଁ ଭାରତ ସରକାର ସବୁବେଳେ ପ୍ରତ୍ୟେକ ଆହ୍ଵାନ ପାଇଁ ପ୍ରସ୍ତୁତ । କରୋନା ବିରୁଦ୍ଧରେ ସଂଗ୍ରାମ ସତ୍ୱେ ଅହରହ ପରିଶ୍ରମ କରି ଆମର ବୈଜ୍ଞାନିକମାନେ ଯେପରି ଦେଶକୁ ସମୃଦ୍ଧି ପଥରେ ଆଗେଇ ନେଇଛନ୍ତି ମୋଦୀ ତାହାର ଭୂୟସୀ ପ୍ରଶଂସା କରିଛନ୍ତି ।
***********
(Release ID: 1682893)
Visitor Counter : 269
Read this release in:
English
,
Urdu
,
Marathi
,
Hindi
,
Assamese
,
Bengali
,
Manipuri
,
Punjabi
,
Gujarati
,
Tamil
,
Telugu
,
Kannada
,
Malayalam