পোষ্ট কৰা হৈছে:
15 DEC 2020 3:22PM by PIB Guwahati
প্ৰধানমন্ত্ৰী শ্ৰী নৰেন্দ্ৰ মোদীয়ে আজি গুজৰাটত বিভিন্ন উন্নয়নমূলক প্ৰকল্প মুকলি কৰে৷ এই প্ৰকল্পসমূহৰ ভিতৰত ডিছেলিনেচন প্ৰকল্প, এটা হাইব্ৰীড পুনৰ নৱীকৰণযোগ্য শক্তি উদ্যান আৰু এটা সম্পূৰ্ণ স্বয়ংক্ৰিয় দুগ্ধ সংসাধন আৰু পেকিং প্ৰকল্প আছে৷ এই অনুষ্ঠানত গুজৰাটৰ মুখ্যমন্ত্ৰীও উপস্থিত আছিল৷
অনুষ্ঠানটোত ভাষণ প্ৰদান কৰি প্ৰধানমন্ত্ৰীয়ে কয় যে সময়ৰ সৈতে পৰিৱৰ্তিত হোৱা আৰু বিশ্বৰ শ্ৰেষ্ঠ অভ্যাসসমূহ অনুশীলন কৰাটো উত্তম কথা৷ এই সন্দৰ্ভত তেওঁ কচ্ছৰ কৃষকসকলক প্ৰশংসা কৰি কয় যে তেওঁলোকে এতিয়া বিদেশলৈও ফলৰ ৰপ্তানি কৰিবলৈ ধৰিছে৷ ইয়াৰ দ্বাৰা কৃষকসকলৰ উদ্ভাৱনী শক্তি বৃদ্ধি পাইছে বুলি তেওঁ মন্তব্য কৰে৷ তেওঁ কয় যে গুজৰাটত বিগত দুটা দশকত চৰকাৰৰ ন্যূনতম হস্তক্ষেপৰ ফলত কৃষি, দুগ্ধ আৰু মীন খণ্ডত যথেষ্ট উন্নতিৰ সৃষ্টি হৈছে৷ গুজৰাটত কৃষক আৰু সমবায় খণ্ডক সৱলীকৃত কৰা হৈছে৷
প্ৰধানমন্ত্ৰীয়ে কয় যে কৃষকসকলক কৃষি সংস্কাৰৰ বিৰুদ্ধে ভ্ৰান্ত ধাৰণা দিয়া হৈছে৷ পূৰ্বতে বিৰোধী দলসমূহে যি বিষয়ে কৈ আছিল আৰু কৃষক সংস্থাসমূহৰ দাবী অনুৰূপেই এইবাৰৰ কৃষি সংস্কাৰ সাধন কৰা হৈছে বুলি তেওঁ জানিবলৈ দিয়ে৷ কৃষকৰ কল্যাণ তথা তেওঁলোকৰ সমস্যা সমাধানৰ বাবে ভাৰত চৰকাৰ সদায়েই প্ৰতিশ্ৰুতিৱদ্ধ বুলি তেওঁ দোহাৰে৷
প্ৰধানমন্ত্ৰীয়ে কয়, আজি কচ্ছই নতুন যুগৰ প্ৰযুক্তি আৰু নতুন যুগৰ অৰ্থনীতিৰ দিশত যথেষ্ট আগুৱাই গৈছে৷ পুনৰ নৱীকৰণযোগ্য শক্তি উদ্যান, ডিছেলিনেচন প্ৰকল্প আৰু নতুন স্বয়ংক্ৰিয় প্ৰকল্পই কচ্ছক বিকাশৰ দিশত আৰু এঢাপ আগুৱাই নিব৷ তেওঁ কয় যে কচ্ছ দেশখনৰ ভিতৰতে দ্ৰুততম বিকশিত অঞ্চল হোৱাৰ লগতে অঞ্চলটোত যোগাযোগৰ ব্যৱস্থাও দিনে দিনে উন্নত হ’বলৈ ধৰিছে৷
প্ৰধানমন্ত্ৰীয়ে গুজৰাটৰ লোকসকলে পূৰ্বে নৈশ ভোজনৰ সময়ত বিদ্যুতৰ উপস্থিতি বিচৰাৰ এটা সৰল দাবীৰ বিষয়ে সোঁৱৰণ কৰে৷ আজি গুজৰাটৰ যুৱচামে এই সমস্যাৰ বিষয়ে অৱগত নহয়েই বুলি তেওঁ মন্তব্য কৰে৷
গুজৰাটৰ ৰাজ্য চৰকাৰে বিগত বিশ বছৰ ধৰি কৃষক অনুকূল আঁচনি প্ৰণয়ন কৰি অহাৰ বাবে প্ৰধানমন্ত্ৰীয়ে প্ৰশংসা কৰে৷ তেওঁ কয় যে গুজৰাটে সৌৰ শক্তি উৎপাদনৰ ক্ষেত্ৰত অগ্ৰণী ভূমিকা পালন কৰিছে৷
***
DS/AK/MANN