খুরুমজরি,

উত্তর প্রদেশকী রাজ্যপাল শ্রীমতী আনন্দী বেন পতেলজী, কেন্দ্রগী মন্ত্রী মন্দলদা লৈবিরিবা ঐহাক্কী মরূপ শ্রী হরদীপ সিংহ পুরীজী, উত্তর প্রদেশকী শকখংনরবা মুখ্য মন্ত্রী শ্রীমান য়ৌগী অদিত্যনাথজী, য়ু.পি. সরকারগী মন্ত্রী চৌধরী উদয়ভান সিংহজী, দোক্তর জি.এস. ধর্মেশজী, সংসদগী ঐহাক্কী মরূপ প্রোফেসর এস.পি.বঘেলজী, শ্রী রাজকুমার চাহরজী, শ্রী হরিদ্বার দুবেজী, অতৈ মীয়ামগী মীহুৎশিং অমদি আগরাগী ইচিল-ইনাওশিং!! অদোম পুম্নমকপু মেত্রোগী থবক অসি হৌদোকপা অসিগীদমক্তা য়াম্না নুংঙাইবা ফোংদোকচরি!! আগরা অসি য়াম্না মমাংঙৈদগী হৌনা মতম পুম্নমক্তগী খংনরক্লি। হৌজিক মসিদা অনৌবা মতমগী দাইমেন্সন কয়া অমসু হাপচিল্লক্লি। চহি কয়া লিরবা পুৱারী অসিবু য়োকখত্তুনা লৈরবা ২১শুবা চহি চাগা লোয়ননা চুন-চাননবা থৌরাংলি।

ইচিল-ইনাওশিং,

আগরাদা স্মার্ত ফেসিলিতীশিং শেমগৎনবগীদমক্তা হান্ননা লুপা করোর লিশিং ১গী প্রোজেক্তশিংগী থবক চত্থরি। হৌখিবা চহিদা কমান্দ অমসুং কন্ত্রোল সেন্তর উরেপ-ফয়ুং তম্বা ফংজখিবা অদুসু শাবা লোইরে। কোরোনাগী মতমদি মসি য়াম্না কান্নখি হায়না ঐঙোন্দা খংহনবিরকখি। হৌজিক ফাওবদা লুপা করোর লিশিং ৮দগী হেনবা মসিগী মেত্রো প্রোজেক্ত অসিনা আগরাদা স্মার্তকী ফেসিলিতীশিং শেম্বগা মরি লৈনবা মিশন অসি হেন্না মপাঙ্গল কনখৎহল্লগনি।

মরূপশা,

হৌখিবা চহি তরুক্তা য়ু.পি.গা লোয়ন-লোয়ননা লৈবাক অসিদা স্পীদ অমদি স্কেলদা মেত্রো নেতৱর্ককী থবক অসিদা সরকারগী মশক অমদি ৱাশক অসি উবা ফংহল্লি। ২০১৪ ফাওবদা লৈবাক অসিদা চাউরাক্না কিলোমিতর ২১৫রোমগী মেত্রো লাইন অসি থবক পাংথোকখি। ২০১৪গী মতুংদা চহি ৬সিদা লৈবাক অসিদা কিলোমিতর ৪৫০দগী হেন্না শাংবা মেত্রো লাইন অসি লৈবাক অসিদা থবক পাংথোক্লি অমসুং চাউরাক্না মেত্রো লাইন ১০০০রোমগী থবকসু চত্থরি। ঙসি লৈবাক অসিগী শহরশিং ২৭তা মেত্রোগী থবক অসি লোইশিনখ্রে নত্রগা তোঙান-তোঙানবা তাঙ্কক্তা লৈরি। য়ু.পি.গী মতাংদা হায়রগসু  আগরা মেত্রোগী ফেসিলিতীগা মরি লৈনবা য়ু.পি.গী তরেৎশুবা শহরনি অমদি মসিগীশিং অসিগী মনুংদা য়াম্না মরুওইবা ৱাফম অমসু লৈরি।   লৈবাক অসিদা শুপ্নতগী মেত্রো রেল নেতৱর্ক অসি শাবদা নত্তনা ঙসি মেত্রো কোচ অসিসু মেক ইন ইন্দিয়াগী মখাদা ভারত অসিমক্তদা শারি। মসিদা নত্তনা সিগ্নেল সিস্তেম অসিসু মপুং ফানা ভারত্তা শানবা থবক চত্থরি। হায়বদি হৌজিক মেত্রো নেতৱর্ককী মতাংদা ভারত অসি মীপাল তাংদবা ওইরক্লি।

ইচিল-ইনাওশিং,

ঙসিগী অনৌবা ভারতকী মংলান অসি অদুক্কী মতিক চাউই, অদুক্কী মতিক অথোইবা ওইরি। অদুবু শুপ্নতগী মংলান শাগৎপনা থবক মপুং ফারোই, মংলান অসি থৌনা লৈনা মপুং ফাহনগদবনি।  অদোম্না থৌনা লৈনা, কত্থোকপা অমগা লোয়ননা মমাংলোমদা চংশিনবা তারবদি করিগুম্বা অপনবা অমত্তনা অদোম্বু থিংবা ঙম্লোই। ভারতকী চুম্নগী নহা,  ভারতকী অপিকপা শহর অসি ঙসি মসিগী থৌনা উৎলি, ঙসি কত্থোকপা অসি উৎলি।  ২০শুবা চহি চা অসিদা লৈবাক অসিগী মেত্রো শহরশিংনা লৌরিবা থৌদাং অসি পাকথোক-চাউথোক্নবা হৌজিক আগরাগুম্বা পীক্লবা শহরশিংনা তৌরি।  অপীকপা শহরশিং অসি আত্মনির্ভর ভারত মরীল ওইনবগীদমক্তা চাউখৎপগী থবক কয়া অমদা হেন্না লুম্না লৌরি। নোংচুপ থংবা উত্তর প্রদেশকী শহরশিং অসিদা মরোমদোম লেপচবা ঙম্নবা পোৎ খুদিংমক লৈ। মফম অসিগী লম, মফম অসিগী লৌমীশিং অসি মপাল নাইদনা মতিক ময়াই লৈ।  শা-শলগী মতাংদসু মসিগী মফম অসি লৈবাক অসিদা মাংজিল থারি। মসিগী মতাংদা মফম অসিগী দায়রী অমসুং ফুদ প্রোসেসিংগা মরি লৈনবা ইন্দস্ত্রীগী ওইনা পাংথোকপা য়াবা কয়া অমা লৈ। মসিদা নত্তনা মসিগী লম অসি সর্ভিশ সেক্তর অমসুং মেনুফেকচরিং সেক্তরদসু মাংজিল থানা চংশিল্লি।

মরূপশা,

মতমগী অনৌবা ফেসিলিতীশিং অসি ফংবদগী, মতমগী অনৌবা কনেক্তিবিতী অসি ফংবনা নোংচুপ থংবা য়ু.পি.গী মসি মতিক-ময়াই অসি হেন্না হেনগৎলি।  লৈবাক অসিগী অহানবা রেপিদ রেল ত্রান্সপোর্ত সিস্তেম অসি মেরুত্তগী দিল্লীগী মরক্তা শেম্লি। দিল্লী-মেরুতকী মরক্তা লেন ১৪গী এক্সপ্রেশ-ৱে অসিসু য়াম্না থুনা মফম অসিগী মীশিংগী থৌগল তৌরগনি।  নোংচুপ থংবা উত্তর প্রদেশকী জিলাশিং শম্নহনগদৌরিবা গঙ্গা এক্সপ্রেশৱে অসি য়োগীজীগী সরকারনা হান্ননা অয়াবা পীখ্রে। মসিদা নত্তনা য়ু.পি.দা এয়রপোর্ত দর্জন কয়া অসিবু রিজনেল কনেক্তিবিতীগীদমক্তা শেম-শারি। মসিসু অয়াম্বনা নোংচুপ থংবা উত্তর প্রদেশতনি।

 গ্রেতর নোইদাগী জেৱরদা মতমসিগী অনৌবা, মালেমগী থাক্কী গ্রীনফীল্দ এয়রপোর্তনা লম অসিগী শক্তম অসি মপুং ফানা হোংহল্লগনি।

মরূপশা,

লৈবাক অসিগী ইনফ্রা সেক্তরগী অচৌবা খুদোংচাদবা অমা মতম পুম্বদা লৈরম্বা অদুদি  অনৌবা প্রোজেক্তশিংদি লাউথোক্লম্মি অদুবু মসিগী সেলদি মফম কদায়দগী লাক্কদগে হায়বসিদা ইখন খন্নরমদে।  মরম অসিনা প্রোজেক্তশিং অসি চহি কয়া পন্দুনা লৈরমখি, থবক্কী খোংজেল অসি য়াম্না তপ্লম্মি। মমিংখক্তগী ওইনা থবক তৌরম্মি। ঐখোয়গী সরকারনা  প্রোজেক্তশিং হৌদোকখিবগা লোয়ননা মসিগীদমক্তা অচংবা শেলশিং থৌরাং তৌবদসু য়াম্না লুনা লৌরি। কনেক্তিবিতী অমদি মতমসিগী অনৌবা ইনফ্রাস্ত্রকচরদা  ঙসি লৈবাক অসিনা চাদিং তৌরিবসিগুম হান্নগুম্না অমুক্তা তৌখিদ্রি।  হৌজিক নেস্নেল ইনফ্রাস্ত্রকচর পাইপলাইন প্রোজেক্তকী মখাদা লুপা  করোর লাখ ১০০দগী হেন্না চাদিং তৌনবা থৌরাং লৈ। মল্তী-মোদেল কনেক্তিবিতী ইনফ্রাস্ত্রকচর মাস্চতর প্লান্দসু থবক চত্থরি। লৈবাক অসিগী ইনফ্রাস্ত্রকচর অসি হেন্না ফগৎহন্নবগীদমক্তা লৈবাক পুম্নমক্না ইনভেস্ত তৌনিংনবা পুক্নিং চিংশিন্নবা হোৎনবনি। ইনফ্রাস্ত্রকচর অমসুং রিএল ইস্তেত প্রোজেক্তশিংদা ইনভেস্ত তৌবদা মীরৈবাক্কী ইনভেস্ত অসি লাইথোকহন্নবগীদমক্তা মথৌ তাবা থবক পায়খৎলি।  

মরূপশা,

অফবা ইনফ্রাস্ত্রকচর, অফবা কনেক্তিবিতীনা খ্বাইদগী হেন্না তুরিজম সেক্তরদা কান্নহনগনি।  তুরিজম অসি মীপুম খুদিংনা শেল তান্নবগী পাম্বৈ ওইরিবা সেক্তর অমনি হায়না মতম পুম্নমক্তা ঐহাক্না খনজৈ। ইনভেস্ত য়াম্না তৌদনা খ্বাইদগী য়াম্না চাগা অসি তুরিজম সেক্তরদগী ওইথোকপা ঙম্মি। মসিগী ৱাখল্লোন অসিগা লোয়ননা লৈবাক অসিগী লোকেল তুরিজম অসি ভোকেল ওইহন্নবা থাক কয়াদা থবক পাংথোক্লি।

তাজমহলগুম্বা ইপা-ইপুগী হাক্তক্তগী লৈরক্লবা অতাংবা লন অসি মনাক্তা মতমসিগী অনৌবা ফেসিলিতীশিং অসি শেমগৎপগা লোয়ননা তুরিস্তশিং অসিগীদমক্তা ইজ ওফ ত্রেভেল্লিংসু হেনগৎহল্লি। সরকারনা শুপ্নতগী ই-ভিজা স্কীমদা য়াওবা লৈবাক মশিং  অসি অদুক্কী মতিক হেনগৎহনবদা নত্তনা হোতেল রুমগী তেরিফতা তেক্স অসিসু অদুক্কী মতিক য়াম্না হন্থহনখ্রে। স্বদেশ দর্শন অমসুং প্রসাদনচিংবা স্কীমশিংদগী তুরিস্তশিংগী পুক্নিং চিংশিন্নবা হোৎনরি। সরকারনা হোৎনবদগী হৌজিক ত্রেভেল অমসুং তুরিজম অসি কম্পিতিতিব ইন্দেক্সতা ৩৪শুবা মশিংদা লৈরে। ২০১৩দা ভারত অসি মসিগী ইন্দেক্স অসিগী ৬৫শুবা রেঙ্কতা লৈরমখি। ঙসি মফম অসি অদুক্কী মতিক খুমাং চাউশিল্লে।  

কোরোনাগী ফীভম অসি ফগৎলক্লগা য়াম্না থুনা তুরিজম সেক্তর অসিগী মঙালসু হান্নগী ফীভমদা হঞ্জিল্লক্লগনি হায়বা ঐহাক্না থাজৈ।

মরূপশা,

অনৌবা ফেসিলিতীশিংঅসিগীদমক্তা, অনৌবা সিস্তেমশিং অসিগীদমক্তা অনৌবা মওংদা শেমদোকপা অসি য়াম্না মথৌ তাই। ঐখোয়না মমাংগী চহি চাগী ৱায়েল পথাপ্তা মথংগী চহি চাদা শেম-শাবগী থবক তৌবা য়াদে। মমাংগী চহিদা য়াম্না কান্নরম্বা ৱায়েল-পথাপ অদু মথংগী চহিদা পোৎলুম অমা ওইরকই অদুনা মরম অসিনা অনৌবা মওংদা শেমদোকপগী থবক অসি লেপ্তনা চত্থরি। ময়াম্না তত্তনা হঙলি মদুদি হান্নগা য়েংনবদা হৌজিক শেমদোক্লিবা অনৌবা মওং অসিনা হেন্না নিংথিনা করিগী থবক তৌরিবনো হায়না। হান্নগা য়েংনবদা হৌজিক্কা খেৎনবা করিনো? মরম অসিদি য়াম্না ইচম চম্মি। হান্নগী অনৌবা মওংদা শেমদোকপা অদুদি মতৎ-মতৎ তৌরম্মি। । হৌজিক মপুং ফাবা ৱাখল্লোন অমগা লোয়ননা অনৌবা মওংদা শেমদোক্লি। হৌজিক শহরশিংদা শেমগৎলিবশিং অসি য়েংসি। শহরশিং চাউখৎহন্নবগীদমক্তা ঐখোয়না থাক ৪দা থবক তৌখি। মমাংঙৈদগী লৈরক্লবা খুদোংচাদবশিং লৈহন্দনবনি, পুন্সি মহিং অসি হেন্না লায়থোকহন্নবনি, খ্বাইদগী য়াম্না ইনভেস্ত তৌনবনি, অমদি মতমসিগী অনৌবা তেক্নোলোজী অসি শিজিন্নবা হেনগৎহন্নবনি। 

ইচিল-ইনাওশিং,

রিএল ইস্তেতকী ফীভম অসি করি ওইরম্বগে হায়বা অসি ঐখোয় পুম্বনা নিংথিনা খংনরবনি। য়ুম শারিবশিং অমসুং য়ুম লৈরিবশিংগী মরক্তা থাজনবা লৈনরক্ত্রে। মবুকচেল ফত্তবা মীওই খরনা রিএল স্তেত পুম্নমক অসিগী মিংচৎ থিহনখি, ঐখোয়গী ময়ায় থংবা থাক্তা লৈরিবা মীশিং অসিবু ৱাহনখি। মসিগী অৱাবা অসি কোকহন্নবগীদমক্তা আর.ই.আর.এ.গী ৱায়েল-পথাপ অসি পুশিল্লকখ্রে। হন্দক্তা লাকখিবা রিপোর্ততা মসিগী ৱায়েল-পথাপ অসিগী মতুংদা ময়ায় ওইবা থাক্তা লৈরিবা মীওই কাংলুপশিংগী য়ুম অসি থুনা-য়াংনা লোইশিনবা হৌরে। মতৌ অসিগুম্না  ঐখোয়গী শহরশিংদা অচৌবা অৱাবা অমা লৈরম্মি, হাংদুনা লৈরিবা য়ুমশিং অসিগী।  মসি য়াম্লবা মী মশিং কয়া অমনা য়ুম ভারা ফংবদা অৱাবা ওইখিবা মতমদুগীনি। মসিগী অৱাবা অসি কোক্নবগীদমক্তসু মোদেল লো অমা শেমদুনা রাজ্যশিংদা পীখ্রে।

মরূপশা,

শহরশিংগী পুন্সি মহিং অসি লাইথোকহন্নবগীদমক্তা মতমসিগী অনৌবা পব্লিক ত্রান্সপোর্ততগী হৌরগা হাউসিংদা মায়কৈ শিন-থুংনা থবক চত্থরি। আগরাদগী প্রধানমন্ত্রী আৱাস য়োজনা হৌদোকখি। মসিগী স্কীম অসিগী মখাদা শহরগী লাইরবশিংগী ওইনা য়ুম করোর ১দগী হেন্না শানবগী অয়াবা পীখ্রে। শহরগী ময়ায় থংবা থাক্তা লৈবা মীওই কাংলুপশিংগী ওইনসু অহানবা ওইনা য়ুম লৈনবগীদমক্তা তেংবাং পীরি। হৌজিক ফাওবদা লাখ তরানিথোই মখাইদগী হেনবা শহরগী ময়ায় থংবা থাক্তা লৈবী মীওই কাংলুপকী ইমুংশিংদসু য়ুম লৈনবগীদমক্তা লুপা করোর লিশিং ২৮মুক্কী তেংবাং পীখ্রে। অমৃত মিশনগী মখাদা লৈবাক অসিগী শহর কয়াদা ঈশিং, সীৱরগুম্বা ইনফ্রাস্ত্রকচর অসি অপগ্রেদ তৌগদৌরি। শহরশিংদা পব্লিক তোইলেৎকী হেন্না ফবা ফেসিলিতীশিং ওইরো, ৱেস্ত মেনেজমেন্তকী অনৌবা মওংগী সিস্তেমশিং ওইরো, মসিগীদমক্তা মফমদুগী লুপশিংদগী মতেং পীরি।

ইচিল-ইনাওশিং,

ঙসি শহরগী লাইরবশিং লেম্না লায়েংবা ফংলি অমদি ময়ায় থংবা থাক্কী মীশিংনা হীদাক হোংনা ফংলি, হোংনা সর্জরী তৌবা ফংলি। সরকার হোৎনবদগী মৈদগী হৌরগা মোলৃবাইলফাওবগী চাদিং অসি য়াম্না হন্থরে। এজুকেসন লোন্দগী হৌরগা হোম লোনফাওবগী লোনগী চাং অসি হন্থহনখ্রে। স্ত্রীৎ ভেন্দর, থেলা, হিদা মী হোনবদসু অহানবা ওইনা বেঙ্কতগী হোংনা লোন ফংহনখ্রে। মসিনি পুন্না, ময়াম পুম্বা চাউখৎহনবা, ময়াম পুম্বনা থাজবিবা হায়বসি।

ইচিল-ইনাওশিং,

মতম খরদগী ওইরক্লিবা অনৌবা য়াওল অসিনা লৈবাক অসিদা অনৌবা অমা লৈহল্লকখ্রে। মরুওইনা লৈবাক অসিগী ইচলশিং, ইচানুপীশিংনা ফংলিবা কান্নবা অসিনা অখন্নবা মওংদা ওইহল্লদি অদোমসু অপেনবা ফাওগনি। হান্নগা য়েংনবদা অদোমগী নুংদসু অনৌবা থাজবা অমা পোক্লক্লমগনি। নুমিৎ খুদিংগী লাপ্ল-লাপ্লবা মফমশিংদগী চিথীশিংদা ঐহাক ফংই। মেদিয়াগী থোংদগী ইচল-ইচাশিংগী ৱাখল্লোনশিং ঐঙোন্দা য়ৌরক্লি। ইমা-ইচলশিংগী য়াইফ-থৌজালনা ঙসি তশেংনা ঐহাক্কী পুক্নিং থুমহৎহল্লে।  লৈবাক অসিগী ইচল-ইচেশিং, লৈবাক অসিগী নহা ওইরিবশিং, লৈবাক অসিগী লৌমীশিং, লৈবাক অসিগী শিন্মীশিং, থবক তৌরিবশিং, ল্লোন-ইতিক তৌরিবশিংগী থাজবিবা অসি হৌখিবা মীখলশিংদা উবা ফংলি। য়ু.পি. য়াওনা লৈবাক অসিগী কাচিন-কোয়াদা মীখলগী ফলশিং অসিদা থাজবগী মমি তারি। নুমীৎ ২-৩গী মমাংদা তেলঙ্গনাদা, হাইদরাবাদতা লাইরবা অমদি ময়ায় থংবা থাক্তা লৈবা মীওই কাংলুপ্না সরকারনা হোৎনরিবশিং অসিদা হান্না অমুক্তা তৌখিদ্রিবা মওংদা য়াইফ-থৌজাল পীখ্রে। অদোম্না লেপ্পিবা অমদি অদোম্না শৌগৎপিবা অসি ঐহাক্কী ইথৌনা হাপ্পিরিবনি।  ইরৈচাশিংগী নুংঙাইবা মচা-মচাশিং অসিনা ঐহাকপু অনৌবা থবক তৌবদা থৌনা হাপ্পিরি।  অনৌবা থবক পায়খৎনবগী পাঙ্গল হাপ্পিরি। অদোমগী য়াইফনবা হেন্না থবক তৌবা ঙম্নবা। ইরোমদোম লেপচবা ঙম্বগী মসিগী থাজবা অসি লেপ্তনা পাঙ্গল কন্না লৈবা ওইরসনু, চাউখৎনবগী থবক অসি অসুম্মক হেনগৎলক্লসনু হায়জবগা লোয়ননা অদোমগী মেত্রো প্রোজেক্ত অসিগীদমক্তা অমুক হন্না নুংঙাইবা ফোংদোকচরি!!

অদুবু ঐহাক্না ৱাফম অমা শোইদনা নিংশিংহনগনি, কোরোনাগী তীকা লাকপা ঙাইরি অমদি হৌখিবা নুমীৎশিংদা বৈজ্ঞানিকশিংদগী ফংলবনিনা হৌজিক মতম কুইনা ঙাইনগদবা মান্দ্রে। অদুবু লায়চৎ অসিদগী ঙাকথোক্নবগীদমক্তা চেকশিন্দবা তৌরোইদবনি। মাস্ক, ফুৎ তরুক লাপ্না লৈনবা অসি য়াম্না মরুওই। অদোম্না মসিগী মতাংদা খনবিগনি হায়বগী থাজবা অসিগা লোয়ননা হন্না-হন্না অদোম পুম্নমকপু থাগৎচরি!!

থাগৎচরি।                                                                                                                     

*****