খুরুমজরি !

কেন্দ্রগী মন্ত্রীমন্দলদা ঐগী খোংলোই ওইবীরিবা শ্রীমান শ্রীপাদ নাইকজী, রাজস্থানগী মুখ্যমন্ত্রী শ্রীমান অশোক গহলোতজী, গুজরাতকী মুখ্যমন্ত্রী শ্রীমান ভাই রুপানীজী, রাজস্থানগী গবর্নর শ্রীমান কলরাজজী, গুজরাতকী গবর্নর শ্রীমান আচার্য় দেববর্তজী, অতৈ মন্ত্রীশিং, এম.পি.শিং, এম.এল.এ.সিং, আয়ুর্বেদগা মরী লৈনরিবা অখঙ-অহৈ পুম্নমক, ইবুংঙো অমসুং ইবেম্মশিং!

অদোম পুম্নমকপু ধনতেরস, ভগবান ধনৱন্তরিগী মপোপ নুমিৎকী নুংঙাই পাউজেল পীজরি। ধনৱন্তরিজী অসি হকশেলগী লাই ওইনা লৌনৈ অমসুং আয়ুর্বেদ অসিসু মহাক্কী থৌজালদগী শেমখিবনি। ঙসিগী শেংলবা নুমিৎ অসিদা, আয়ুর্বেদ নুমিৎ অসিদা, ভগবান ধনৱন্তরিদা মীওইবা জাতি পুম্নমক্না খুরুমজরি মদুদি ভারত য়াওনা মালেম পুম্বা অসি নাদ-য়েক্তনবগী থৌজাল পীনবীয়ু।

মরূপশা,

হন্দক্কী আয়ুর্বেদ নুমিৎ অসি গুজরাত অমসুং রাজস্থানগীদমক্তসু অখন্নবনি। ঙসি গুজরাতকী জামনগরদা ইন্সতিত্যুৎ ওফ তীচিং এন্দ রিসর্স ইন আয়ুর্বেদ অসি ইন্সতিত্যুৎ ওফ নেস্নেল ইম্পোর্তেন্স ওইনা শক খঙলে। মতৌ অসুম্না জয়পুরগী নেস্নেল আয়ুর্বেদ ইন্সতিত্যুৎ অসিসু য়ুনিভর্সিতীগী থাক্তা ঙসি মীয়াদা কৎথোক্লে। আয়ুর্বেদদা অৱাংবা থাক্কী মহৈ-মশিং, রিসর্স অমসুং স্কিল দিবেলপমেন্তকী মরী লৈনবা হেন্না ফবা ইন্সতিত্যুৎশিংগীদমক্তা রাজস্থান-গুজরাতকা লোইননা লৈবাক অপুনবদা নুংঙাইবা ফোংদোকচরি।

মরূপশা,

আয়ুর্বেদ, ভারতকী লন্নি, মসিবু পাকথোক-চাউথোকহনবদা মীওইবা জাতি পুম্নমক্কী য়াইফবা কোনশিল্লি। ঐখোয়গী থাইনদগী লৈজরক্লবা লৌশিং, হৌজিক অতৈ লৈবাকশিংবুসু চাউখৎহনবা অসিদা ভারত মচা কনানা নুংঙাইরোইদৌরিবনো। ঙসি ব্রাজিলগী নেস্নেল পোলিসীদা আয়ুর্বেদ য়াওরে। ভারত অমেরিকাগী মরীবু ওইরো, আয়ুশ অমসুং ভারতকী ত্রেদিস্নেল মেদিকেল সিস্তেমগা মরী লৈনবা তেংবাং পীনবগী থবক অসি লেপ্তনা হেনগৎলক্লি। চাউথোকচনীংঙাইনি মদুদি @WHOনা গ্লোবেল সেন্তর ফোর ত্রেদিস্নেল মেদিসিন লিংখৎনবা মালেম অপুনবদগী ভারতপু খল্লে অমসুং ভারত্তগী মালেমগীদমক্তা মসিগীদমক থবক তৌগনি। ভারত্তা মসিগী চাউরবা থৌদাং অসি শিন্নবীবগীদমক্তা ৱর্ল্দ হেল্থ ওর্গনাইজেসনবু, মরুওইনা দবল্যু.ঐচ.ও.গী দাইরেক্তর জেনরেল ঐগী মরূপ দোক্তর তেদ্রোসবুসু থমোই শেংনা তৌবীমল খঙবা উৎচরি। ঐনা থাজৈ মদুদি ভারতনা ফার্মাসী ওফ ৱর্ল্দ ওইনা শাফোংলক্লিবা অসিগুম্না ত্রেদিস্নেল মেদিসিনগীগী চাউখৎ-থৌরাং অমসুং মসিগা মরী লৈনবা রিসর্সপুসু অনৌবা মতোন অদুদা পুরকপা ঙমগনি।

মরূপশা,

হোংলক্লিবা মতমগা লোইননা ঙসি পোৎশক খুদিংমক ইন্তিগ্রেৎ তৌরি। হকশেলসু মসিদগী তোঙানবা নত্তে। ৱাখল্লোন অসিগা লোইননা ঙসি অনা-লায়েংগী তোঙান তোঙানবা পথাপশিংগী ইন্তিগ্রেসন, পুম্নমক্তা মগুন হাপ্নবগী মায়কৈদা খোংথাং অমগী মথংদা অমা থংজিল্লি। ৱাখল্লোন অসিনা আয়ুশপু, আয়ুর্বেদবু লৈবাক অসিগী হেল্থ পোলিসীগী অথোইবা শরুক ওইহল্লে।

মরূপশা,

মসি মতম পুম্নমক্তা চুমদুনতা লৈরক্লি মদুদি ভারত্তা হকশেলগা মরী লৈনবা লন-থুম কয়ামরুম লৈরি। অদুবু মসিসু অদুক্কী মতিক চুম্মি মদুদি লৌশিং অসি অনম্বা মতমদা লাইরিকশিংদা, শাস্ত্রশিং খক্তদা লৈরক্লি অমসুং খর-খজিক্না ইপু-ইবেনগী মফমদা। লৌশিং অসিবু অনৌবা তঙাইফদবশিংগা লোইননা চাউখৎহনবা অসি মথৌ তাই। মরম অসিনা, লৈবাক অসিদা অহানবা ওইনা লৈবাক অসিদা ঐখোয়গী ইপা-ইপুগী অনা-লায়েংগী লৌশিং অসি ২১শুবা চহি চাগী অনৌবা সাইন্সতগী ফংলকপা ই-পাউগা লোইননা পুনশিল্লি, অনৌবা রিসর্স শেমগৎলি। চহি অহুমগী মমাংদা মফম অসিদা ওল ইন্দিয়া আয়ুর্বেদিক ইন্সতিত্যুৎ লিংখৎখ্রে। লেহদা সোবা-রিগপাগা মরী লৈনবা রিসর্স অমসুং অতৈ থিজিন-হুমজিন্নবা নেস্নেল সর্বিস সোৱা রিগপা ইন্সতিত্যুৎ লিংখৎনবগী থবক পায়খৎলি। ঙসি গুজরাত অমসুং রাজস্থানগী ইন্সতিত্যুৎ অনি অপগ্রেদ তৌখ্রিবা অসিসু খোংথাং অসিগী শরুক অমনি।

ইচিল-ইনাওশিং,

হায়নৈ মদুদি ৱাংবা হেনগৎলকপগা লোইননা থৌদাংসু হেনগৎলকই। ঙসি মরুওইবা ইন্সতিত্যুৎ অনি অসিগী ৱাংবা হেনৎলকপা অসিদা ঐসু হায়জরি। লৈবাক অসিগী প্রেমিয়ম আয়ুর্বেদিক ইন্সতিত্যুসন ওইবনা মরম ওইদুনা হৌজিক অদোম অমসুং অদোম পুম্নমক্তা ইন্তর্নেস্নেল প্রাক্তিসশিংগী মনুং চনবা অমসুং সাইন্তিফিক স্তেন্দর্গী মনুং ওইবা অসিগুম্বা সিলেবস শেম্নবা থৌদাং শিন্নরি। ঐনা মহৈ-মশিংগী মন্ত্রালয় অমসুং য়ু.জি.সি.দসু হায়জরি মদুদি আয়ুর-ফিজিক্স অমসুং আয়ুর-কেমিস্ত্রী সাইন্সকুম্বা হিরমশিংদা অনৌবা ওইথোকপা য়াবশিংগা লোইননা থবক তৌবীয়ু। মসিদগী রিসর্সতা ঙম্লিমখৈ হেনগৎহন্ননবা ইন্তিগ্রেতেদ দোক্তোরেল অমসুং পোস্ত দোক্তোরেল কর্রিকুলম শেম্নবা থবক তৌবা ঙমগনি। ঙসি ঐগী লৈবাক্কী প্রাইবেৎ সেক্তর, ঐখোয়গী স্তার্ত অপ্সতসু অখন্ননা হায়জরি। লৈবাক্কী প্রাইবেৎ সেক্তর, অনৌবা স্তার্ত অপ্সনা আয়ুর্বেদগী গ্লোবেল দিমান্দদা স্তদী তৌগদবনি অমসুং সেক্তর অসিদা ওইরক্কদবা গ্রোথতা অদোমগী শরুক লৌগদবনি। আয়ুর্বেদগী লোকেলগী মপাঙ্গলগীদমক্তা অদোম্না মালেম অপুনবদা ভোকেল ওইগদবনি। ঐনা থাজৈ মদুদি ঐখোয়গী অপুনবা হোৎনমিন্নবা অসিনা আয়ুশতা নত্তনা হকশেলগী ঐখোয়গী সিস্তেম অপুনবা অসিদা চাউনা অহোংবা অমা উবা ফংলগনি।  

মরূপশা,

অদোম্না মসিসু নীংথিজনা খঙই মদুদি চহি অসিদা পার্লিয়মেন্তকী নোংজু মীফমদা পুৱারী ওইরবা কমিসন অনিসু শেমখি। অহানবদা – নেস্নেল কমিসন ফোর ইন্দিয়ন সিস্তেম ওফ মেদিসিন অমসুং অনিশুবদা নেস্নেল কমিসন ফোর হোমিওপেথী। মসিদা নত্তনা, অনৌবা নেস্নেল এজুকেসন পোলিসীদসু ভারতকী মেদিকেল এদুকেসন্দা ইন্তিগ্রেসনগী এপ্রোচতা পুক্নীং থৌগৎখি। পোলিসী অসিগী ৱাখল্লোন্নি মদুদি এলোপেথিক এজুকেসনদা আয়ুর্বেদগী বেসিক ওইবা ই-পাউ মথৌ তাই অমসুং আয়ুর্বেদগী এজুকেসনদা এলোপেথিক প্রাক্তিসশিংগী মরুওইবা মথৌ তাই। খোংথাং অসিনা আয়ুশ অমসুং ভারতকী ত্রেদিস্নেল মেদিসিন সিস্তেমগা মরী লৈনবা মহৈ-মশিং অমসুং রিসর্সপু হেন্না মপাঙ্গল কলহল্লগনি।

মরূপশা,

২১শুবা চহি চাগী ভারত অসি হৌজিক্তি মচেৎ ওইনা নত্তে, হোলিস্তিক ওইবা মওংদা খল্লে। হেল্থকা মরী লৈনবা শিংনবশিংবুসু হৌজিক হোলিস্তিক এপ্রোচকা লোইননা মওং অদুদা লোইশিন্নবা হোৎনরে। ঙসি লৈবাক অসিদা অহোংবা অমসুং অফবা লায়েংগা লোইননা প্রিভেন্তিব হেল্থকেয়রদা, ৱেলনেসতা হেন্না ফোকস তৌরি। আচার্য় চরকনসু হায়বীখি – স্বস্থস্য স্বাস্থ্য রশ্রনং, আতুরস্য বিকার প্রশমনং চ! হায়বদি মশা ফবা মীওইগী হকশেল ঙাক-শেনবা অমসুং অনাবা মীবু লাইনাদগী কোকহনবা, মসি আয়ুর্বেদগী পান্দমনি। মশা ফবা মীওই, মশা ফনা অদুম লৈহনবা, ৱাখল্লোন অসিগা লোইননা অসিগুম্বা অনাবা পোকহনগদবা ফিভমদগী লাপ্না লৈননবা খোংথাং পুম্নমক লৌখৎলি। অমরোমদা লুবা-নানবা, অমাংশঙ, অফবা ঈশিং, মৈখু চেন্দবা চাকখুম, মচি ওইবা চিঞ্জাক পুম্নমক অসিদা পুক্নীং চংদুনা হেল্থ অমসুং ৱেলনেস সেন্তর লাখ অম-মখাই হিন্দুস্তানগী কাচিন কোয়াদা শেমগৎলি। মসিদা অখন্নবা মওংদা আয়ুশ ৱেলনেস লিশিং ১২ মখাইদগী হেন্না মপুং ফানা আয়ুর্বেদদা কৎথোক্লি, আয়ুর্বেদগা মরী লৈননা শেম্লি।

মরূপশা,

ৱেলনেসকী ভারতকী ৱাংঙুলোন অসিনা ঙসি মালেম পুম্নমক্কী পুক্নীং চিংশিল্লি। কোরোনাগী অসিগুমবা লুরবা মতম অসিদা অমুক হন্না উৎলে মদুদি হেল্থ এন্দ ৱেলনেসকা মরী লৈনবা ভারতকী ত্রেদিস্নেলগী লৌশিং অসি কয়াদা মথৌ লৈখ্রবনো। কোরোনাগা মায়োক্ননবা কান্নবা থৌওং অমত্তা লৈত্রিঙৈদা, ভারতকী য়ুমথোং খুদিংদা য়াইঙং, শঙ্গোমগুম্বা কয়ানা ইম্যুনিতী বুস্তর ওইনা কান্নবা ফংহনখি। অসুক মশিং য়াম্বা, অদুক্কী মতিক মী কুংনা তারিবা ঐখোয়গী লৈবাক অসি, করিগুমবা ঙসি লাকশিল্লবা মওংদা লৈরে হায়বা তারবদি, মদুদা ঐখোয়গী থাইনদগী চৎনরক্লবা থৌওংগীসু চাউরবা থৌদাং য়াওরি।  

মরূপশা,

কোরোনাগী মতম অসিদা মালেম অপুনবা অসিদা আয়ুর্বেদগী প্রদক্তশিংগী দিমান্দ য়াংনা হেনগৎলক্লি। হৌখিবা চহিগা য়োংনরুবদা হন্দক্কী চহি অসিদা সেপ্তেম্বরদা আয়ুর্বেদগী পোৎথোকশিং মপান্দা থাদোকপা চাউরাক্না শরুক অম-মখাই হেনগৎখি, চাউরাক্না চাদা ৪৫ হেনগৎখি। মসিদা নত্তনা মসালাশিং মপান্দা থাদোকপদসু য়াম্না হেনগৎখি। য়াইঙং, শিংগুম্বা ইম্যুনিতী বুস্তর ওইবা পোৎলমশিংনি হায়না লৌনবশিং মপান্দা থাদোকপা খঙহৌদনা অসুম্না হেনগৎখিবা অসিনা উৎলে মদুদি মালেমদা আয়ুর্বেদগী পাম্বৈশিং অমসুং ভারতকী মসালাশিংদা থাজবা কয়াদা হেনগৎলিবা। হৌজিক্তি লৈবাক কয়াদা য়াইঙংগা মরী লৈনবা অখন্নবা থক্ননবা পোৎলমশিংসু পাম্নবা হেনগৎলক্লে। ঙসি মালেমগী মমিং চৎলবা মেদিকেল জর্নেলশিংনসু আয়ুর্বেদদা অনৌবা আশা থম্বা হৌরক্লে।

মরূপশা,

কোরোনাগী মতম অসিদা ঐখোয়গী ফোকস অসি শুপ্নগী আয়ুর্বেদ শিজিন্নবা খক্তদা লোইবা নত্তে। অৱাবগী পুংফম অসি আয়ুশকা মরী লৈনবা রিসর্স অসিবু লৈবাক অসিদা অমসুং মালেমদা হেনগৎহন্নবগীদমক শিজিন্নরি। ঙসি নাকল অমরোমদা ভারতনা ভেক্সিনগী তেস্তিং তৌরি, অদুগা অমরোমদনা কোবিদকা মায়োক্ননবা আয়ুর্বেদ রিসর্সতসু ইন্তর্নেস্নেল কোল্লাবোরেসনবু খোংজেল য়াংনা হেনগৎহল্লি। হৌজিক হৌজিক, ঐখোয়গী মরূপ শ্রীপাদজীনা তাকপীখি মদুদি মতম অসিদা মফম চাম্মদগী হেনবদা রিসর্স পাংথোক্লি। দিল্লীমক্তদা ওল ইন্দিয়া আয়ুর্বেদ ইন্সতিত্যুসন্না, হৌজিক অদোমদা শুগাইনা তাকখিবা অদুগুম্না, দিল্লী পুলিসকী জৱান লিশিং ৮০দা ইম্যুনিতীগা মরী লৈনবা রিসর্স তৌখ্রে। মসি মালেমগী খ্বাইদগী চাউবা গ্রুপ স্তদী ওইবা য়াই। মসিগীসু পুক্নীং লাংতক্নীংঙাই ওইবা ফল ফংবা ফংখ্রে। লাক্কদৌরিবা নুমিৎশিংদা মালেমগী ওইবা তেস্ত খরসু হৌরগনি।

মরূপশা,

আয়ুর্বেদগা মরী লৈনবা ইকোসিস্তেম অপুনবগী চাউখৎ-খোংথাংদা, লৈবাক অসিদা হেল্থ এন্দ বেলেন্সকা মরী লৈনবা তুরিজমবুসু ইনোৎ হাপকনি। গুজরাত অমসুং রাজস্থানদদি মসিগীদমক্তা ঙমখৈ নাইদনা ওইথোক্নীংঙাই কয়ামরুমসু লৈ। ঐনা থাজৈ মদুদি জামনগর অমসুং জয়পুরগী ইন্সতিত্যুৎ অনি অসি মায়কৈ অসোমদসু কান্নবা ওইগনি। অমুক্কা হন্না অদোম পুম্নমক্তা হন্না হন্না নুংঙাইবা ফোংদোকচরি। ঙসি দিৱালী মচানি, হয়েংনা অচৌবা দিৱালীনি। অদোম্বু, অদোমগী ইমুংবুসু ঐগী মায়কৈদগী দীপাবলী অসিগী শেংলবা থৌরম অসিদা হন্না হন্না য়াইফ-মঙ্গল পীজরি।

হন্না হন্না থাগৎচরি!!

***