খুরুমজরি! তেক্সতাইলকী মতাংদা ৱারী ৱাতাই শাবা অসিদা ঐহাক্না য়াওবা ফংজবা অসি য়াম্না নুংঙাই। মসিদা তোঙান তোঙানবা লৈবাকশিংদগী মীওইশিংনা শরুক য়াবা অসি উবদা হরাওবা পোকই। ইন্দিয়ন কাউন্সিল ফোর কলচরেল রিলেসন্স অমসুং উত্তর প্রদেশ ইন্সিতিত্যুত ওফ দিজাইন্না মীপুম খুদিংমক অসুম্না পুনশিন্নবা কান্না হোৎনখি। নখোয়না ফজরবা থিম অমা খল্লি – “ৱীবিং রিলেসন্স: তেক্সতাইল ত্রেদিসন্স”। মরুপশিং ঐখোগা তেক্সতাইল সেক্তরগা লৈরিবা মরী অসি চহিচা কয়াগী মমাংদগীনি। তেক্সতাইল সেক্তরদা অদোমনা ঐখোয়গী ইতিহাস, ঐখোয়গী দাইবর্সিতী অমসুং অচৌবা খুদোংচাবা উবা ফংগনি

মরুপশিং, ভারতকী তেক্সতাইলগী লৈরিবা চৎনবী অসি য়াম্না লিরে। ঐখোয়না লংচাক চাকপা, ফী শাবা অমসুং লংজম মচু শংবা অহানবশিংগী মরক্তা অমনি। মহৌশানা ভারত্তা মচু শংবা লংজম অসিগী শাংলবা অমদি মতিক মঙাল লৈরবা ইতিহাস অমা লৈজৈ। মসিগা চপ মান্ননা মুগাগীসু লৈজৈ। মরুপশিং, ঐখোয়গী তেক্সতাইলগী লৈরিবা দাইবর্সিতী অসিনা ঐখোয়গী নাৎকী ফজরবা গুনশিং অদু উৎলি। ৱাজৎ খুদিংদা চ৭লু। খুঙ্গং খুদিংদা চৎলু। তোঙান তোঙানবা কাংলুপশিংগী মরক্তা চৎলু। মখোয়গী তেক্সতাইলগী চৎনবী অসিদা তোপ তোপ্পা মগুন য়াওবা থেংনগনি। করিগুম্বা অন্ধ্র প্রদেশকী কালামকারি লৈরবা, মুগা সিল্ক অসি অসামগী চাউথোকচনীংঙাই ওই। কাশ্মিরদা পাশমিনা ফংঙি, পঞ্জাবকী নাৎতা ফুলাক্রিনা মগুন হাপ্পি। করিগুম্বা গুজরাত অসি পতোলাসকী মমিং চৎলবদি, বনারসকী মখোয়গী সারি লৈজরি। মধ্য প্রদেশকী চান্দেরি ফী লৈবগুম ওরিশাগী ফজরবা সমবলপুরি ফী লৈজৈ। ঐহাক্না হায়রিবা অসিদা খরা খক্তনি। অতোপ্পা কয়া অমা লৈরি। ঐখোয়গী ত্রাইবেল মীয়ামগী ফজরবা তেক্সতাইলগী চৎনবী অসিদা অদোমগী মীৎয়েং চীংশিনবা পাম্মি। ভারতকী তেক্সতাইলগী চৎনবীশিংদা: মচু কয়া য়াওরি, মখল কয়া লৈরি। অকুপ্পা ময়েক কয়া য়াওরি।

মরূপশিং, তেক্সতাইল সেক্তরনা মতম পুম্বদা খুদোংচাবশিং পুরকই। দোমেস্তিক্কী ওইনা ভারত্তা তেক্সতাইল সেক্তর অসি খ্বাইদগী থবক য়াম্না পীবা অমনি। মালেমগী ওইনা তেক্সতাইলশিংনা ললোন-ইতিক অমসুং নাৎকী ওইবা মরীশিং শাগৎপদা মতেং পাংই। মসিগী মতুংদা ভারতকী তেক্সতাইলশিং অসি মালেমদা খ্বাইদগী ভেল্যু লৈবা ওইরি। মখোয়না অতোপ্পা নাৎশিংগী কস্তমশিং, ক্রাফশিং, পোত্থোকশিং অমসুং তেক্নিকশিংগা লোয়ননা চৎমিন্নরি।

মরুপশিং, মসিগী প্রোগ্রাম অসি গান্ধী জী ১৫০শুবা মপোক নুমিৎ পাংথোকপগী থৌরমগসু মরী লৈনৈ। মহাত্মা গান্ধীনা তেক্সতাইল সেক্তর অমসুং সোসিএল এম্পাৱর্মেন্তগা য়াম্না নক্না মরী লৈনবা অমা উখি। মহাক্না অচম্বা তরেং অদুবু ভারতকী নিংতম্বগী ইহৌগী মরুওইবা সিম্বল অমা ওন্থোকখি। তরেংনা ঐখোয় পুম্ববু লৈবাক অমা ওইনা পুনশিল্লি।

মরূপশিং, ঙসি ঐখোয়না তেক্সতাইল সেক্তর অসি অত্মানির্ভর ভারত নত্রগা মরোমদোম লেপ্পা ভারত অমা শেমগৎপদা মতেং পাংগদবা ওইনা য়েংলি। ঐখোয়গী সরকারনা অখন্ননা: স্কিল হেনগৎহনবা, শেলগী তেংবাং পীবা, খ্বাইদগী নৌবা তেক্নোলোজীগা লোয়ননা সেক্তর অসি মপাঙ্গল কনখৎহনবদা মীৎয়েং চংলি। ঐখোয়না ঐখোয়গী ফীশাবীশিংদা মালেমগী থাক্কী পোত্থোকশিং পুথোক্নবা মতেং পাংলি। মসিগীদমক্তা: ঐখোয়না মালেমগী খ্বাইদগী ফবা প্রেক্তিসশিং তম্বা পাম্মি। ঐখোয়না মালেম্না ঐখোয়গী খ্বাইদগী ফবা প্রেক্তিসশিং অসি তমখিবসু পাম্মি। মরম অসিনা ঙসিগী ৱারী ৱাতাই অসিদা লৈবাক তরামাথোইনা শরুক য়াবা অসি নুংঙাইবা ফাওই। ৱাখল্লোনশিং অমসুং খ্বাইদগী ফবা প্রেক্তিসশিং অমগা অমগা শিয়র তৌনবা অসিনা পুন্না চৎমিন্নবগী অনৌবা এভেন্যুশিং শেম্লগনি।

মরূপশিং মালেম পুম্বদা তেক্সতাইল সেক্তরদা নুপী কয়ামরুম থবক পীরি। মতৌ অসুম্না অফবা তেক্সতাইল সেক্তরনা নুপীগী এম্পাৱর্মেন্তগী খোঙথাংশিংদা মপাঙ্গল হাপ্পকনি। মরূপশিং অৱাবা মতম অসিদা ঐখোয়না তুংলমচৎকীদমক শেম শাবা মথৌ তাই। ঐখোয়গী তেক্সতাইল ত্রেদিসনশিং অসিদা মতিং লৈরবা ৱাখল্লোনশিং অমসুং প্রিন্সিপলশিং লৈরি। মসিগী মনুংদা: দাইবর্সিতী অমসুং এদাপ্তিবিলিতী, মীপান তাংদবা, স্কিল অমসুং ইনোবেসন য়াওরি। মসিগী প্রিন্সিপলশিং অসি হৌজিক য়াম্না মরুওইবা ওইরক্লি। ঙসিগী ৱেবিনার অসিগুম্বা প্রোগ্রামশিং অসিনা মসিগী ৱাখল্লোনশিং অসি মখাতানা চৎনহনবদা মতেং পাংগনি হায়না ঐহাক্না থাজবা থম্মি। মসিনা অহেনবা অফবা তেক্সতাইল সেক্তরদা মতেং পাংগনি হায়নসু ঐহাক্না থাজবা থম্মি। ঐহাক্না আই.সি.সি.আর, য়ু.পি.আই.দি. অমসুং শরুক য়ারিবা খুদিংমকপু মসিগী খোঙথাং অসিগীদমক য়াইফ-মঙ্গোল পীজরি।

পুম্নমকপু থাগৎপা ফোঙদোকচরি!

***